کوئی پُرساں ہی نہ ہم دل زدگاں کا نکلا
شہر کا شہر اُسی دشمنِ جاں کا نکلا
نئی بستی میں سبھی لوگ پُرانے نکلے
ہم جہاں کے تھے کوئی بھی نہ وہاں کا نکلا
زیست خمیازہ ء ادراک ہے اور کچھ بھی نہیں
پسِ ہر سنگ اِک آئینہ زیاں کا نکلا
دل عبث آرزوئے خاک میں پہنچا تہہِ آب
عکس تک سروِ سرِ موجِ رواں کا نکلا
زینہ ء ذات پہ دزدانہ قدم رکھتا ہوا
قافلہ کس کے تعقب میں گماں کا نکلا
چارہ سازوں میں تھی اک چشم ندامت آثار
یہ مسیحاؤں میں بیمار کہاں کا نکلا
خس و خاشاکِ رہِ عشق ہوئے تو ہم سے
اور اِک رشتہ نسیمِ گزراں کا نکلا
تیرا انجام ہوا جو، وہی ہونا تھا جمالؔ
اس جہاں میں تُو کسی اور جہاں کا نکلا
