اِنتِسَابْ

اپنے ممّی پاپا کے نام

        کہ جن کی شفقتیں، محبتیں، نالۂ نیم شبی اور دعائے سحر گاہی

        میرے اس علمی و تحقیقی کام کے دوران شجرِ سایہ دار بنے

        شمسی، قمری، انجمی اور موسمی تغیر و تبدّل کو اپنے بدن پر اوڑھے ہر لمحہ سایہ گُستر رہیں۔

        اور

        اُن کی بہو سُمیّہ کے نام

        کہ جس کی مخلصانہ محبت و رفاقت ہر لمحہ میرے حوصلوں کو بلندی

        اور  میرے عزائم کو پختگی عطا کرتی ہے۔

                                        محمد حسین مُشاہدؔ رضوی

قائم رہے ہمیشہ یہ جذبۂ محبت

ڈاکٹر محمد حسین مُشاہدؔ رضوی۔۔ اک تعارف

نام :           محمد حسین

        قلمی نام:             محمد حسین مُشاہدؔ رضوی

        والد کا نام  : عبدالرشید برکاتی

        والدہ کا نام:         خدیجہ حجن

        گھر جنت:   سُمیّہ ثمرین

        دختران:             مُصفّامیمونہ،  مزکّا تسنیم

        ولادت:               محرم الحرام 1400ئ/دسمبر1979ء

        مقامِ ولادت :        مالیگاؤں،  ضلع ناشک،  مہاراشٹر

        تعلیمی لیاقت:       ایم۔ اے،  ڈی۔ ایڈ،  پی۔  ایچ۔  ڈی(اردو)،  یوجی سی -نیٹ(اردو)،  

        دیگر تعلیمی لیاقت:        2؍ سالہ خوش نویسی و خطاطی کورس،  زیرِ اہتمام قومی کونسل برائے

                        فروغِ اردو زبان، د ہلی ڈی۔  ٹی۔ پی کورس

        پی۔  ایچ۔  ڈی کا موضوع:مصطفی رضا نوریؔ بریلوی کی نعتیہ شاعری کا تحقیقی مطالعہ

        یونی ورسٹی کا نام:       ڈاکٹر بابا صاحب امبیڈکر مراٹھواڑہ یونی ورسٹی،  اورنگ آباد،  مہاراشٹر،  ہند

        نگراں کا نام :      محترمہ ڈاکٹر شرف النہار صاحبہ،  صدر شعبۂ اردو ڈاکٹر  رفیق زکریا کالج فور ویمن،  اورنگ آباد،  مہاراشٹر

        مشاغل:              سیرت، قرآنیات، احادیث، شاعری، تنقید و تحقیق،  ادب اور مذہبی ادب کا مطالعہ

        ملازمت:             ضلع پریشد اردو پرائمری اسکول،  نیاے ڈونگری،  تعلقہ ناندگاؤں

                         ضلع ناشک (2002ء سے تاحال)

        ادبی سرگرمیاں : ڈاکٹر محمد حسین مُشاہدؔ رضوی کو شعر و ادب میں اردو ادب سے عموماً اور مذہبی ادب سے خصوصاً دل چسپی اور شغف ہے۔ نثر و نظم دونوں اصنافِ ادب میں طبع آزمائی کرتے۔   ہیں اردو کے اُبھرتے ہوئے عمدہ نعت گو شاعر،  قلم کار اور نعتیہ ادب کے جواں سال محقق و ناقد میں آپ کا شمار ہوتا ہے۔ آپ کا طرزِ تحریر انتہائی دل نشین،  شگفتہ اور سلیس ہے، مذہبی،  اصلاحی، سماجی، تعلیمی اور ادبی موضوعات پر اب تک درجنوں تحقیقی و تنقیدی اور تجزیاتی مضامین و مقالات نہ صرف مقامی اخبارات بل کہ ملکی و بین الاقوامی اخبارات و رسائل اور جرائد میں شائع ہو چکے ہیں۔ یہی نہیں بل کہ موصوف کے کئی اہم مضامین کے دوسری زبانوں میں تراجم بھی ہوئے ہیں۔  شاعری میں موصوف نے حمد و مناجات و دعا،  نعت گوئی،  سلام،  اولیائے کرام کی شان میں مناقب نگاری اور مقتدر علمائے کرام کے لیے نذرانۂ عقیدت کو اپنا مطمحِ نظر بنایا۔

انعامات و اعزازات:

(1)  بارہویں جماعت میں اردو مضمون میں ٹاپ(1997 ) ایوارڈ من جانب مہاراشٹر اسٹیٹ اردو اکیڈمی،  ممبئی

        (2) مقابلۂ خوش نویسی میں دوم انعام(1998)     منعقدہ من جانب ادارۂ فیض القلم،  مالیگاؤں

         (3)تقریری مقابلے میں اول انعام ( 1998) منعقدہ من جانب اے ٹی ٹی ہائی اسکول کلچرل کمیٹی،  مالیگاؤں

        (4)بیسٹ کیلی گرافر اِن اردو(1999) من جانب الا انصار ایجوکشنل سوسائٹی،  ہزار کھولی، مالیگاؤں

        (5)بی۔  اے میں اردو مضمون میں ٹاپ(2002) ایوارڈ من جانب مہاراشٹر اسٹیٹ اردو اکیڈمی،  ممبئی

        (6)ایم۔  اے میں اردو مضمون میں ٹاپ(2004)ایوارڈ من جانب مہاراشٹر اسٹیٹ اردو اکیڈمی،  ممبئی

        (7)ایوارڈ من جانب کل ہند تنظیمِ اردو اساتذہ ناشک ڈیویژن،   برائے ادبی و تدریسی خدمات (2009)بہ دست محترم اطہر پرویز صاحب

        (8) حجۃ الاسلام ایوارڈبر ائے پی۔ ایچ۔ ڈی(2011) من جانب تنظیم نوجوانانِ اہل سنت،  اورنگ آباد

        (9)بیسٹ اکیڈمک اچیومنٹ برائے پی ایچ ڈی(2011) بہ دست محترم ڈاکٹر اے جی خان صاحب (بی سی یو ڈی،  مراٹھواڑہ یونی ورسٹی اونگ آباد)

        (10) فخرِ سنیت ایوارڈ برائے پی ایچ ڈی(2011)من جانب رقیہ حجن  ایجوکیشنل سوسائٹی،  مالیگاؤں بہ دست حضرت مفتی مجیب اشرف صاحب قبلہ

        (11) وقارِ قلم ایوارڈ برائے پی ایچ ڈی(2011) من جانب ترقی اردو ہند،  شاخ مالیگاؤں و اردو لائبریری ٹرسٹ، مالیگاؤں

        (12) فیضانِ رشید ایوارڈبرائے پی ایچ ڈی، (2011) من جانب نوجوانانِ بزمِ حق،  نیاے ڈونگری

        (13)اعزاز من جانب مہاراشٹر راجیہ پراتھمک شکشک سنگھ شاخ ناند گاؤں  برائے پی ایچ ڈی،  (2011)بہ دست مسٹر پنکج بھجبل ایم ایل اے، ناندگاؤں

        (14)توصیفی سند،  سپاس نامہ و اعزاز برائے پی  ایچ ڈی، (2011)من جانب جامعہ غوثیہ نجم العلوم،  ممبئی

مطبوعات:

(1)چہل حدیث مع گلدستۂ احادیث2004ء

        (2)اردو کی دل چسپ اور غیر معروف صنعتیں 2005ء

        (3)لمعاتِ بخشش(نعتیہ دیوان)2009ء

        (4)تذکرۂ مجیب2010ئ        

        (5)عملی قواعدِ اردو2010ء دوسرا ایڈیشن 2011ء

        (6)نثرِ رضا کے ادبی جواہر پارے2010ء

        (7)سرکارِ دو عالم صلی اللہ علیہ و سلم کی خوش طبعی2011ء

        (8)جنگِ آزادی 1857ء کا فتوائے جہاد اور علامہ فضل حق کا قائدانہ کردار2011ء

        (9)تشطیراتِ بخشش(شعری مجموعہ)2011ء

         (10)شادی کا اسلامی تصور2011ء

        (11)پھنس گیا کنجوس( ادبِ اطفال،  مراٹھی کہانیوں کا ترجمہ)

        (12)اقلیمِ نعت کا معتبر سفیر۔۔ نظمی مارہروی

        (13)گلشنِ اقوال

        (14)رہنمائے نظامت

        (15) حضرت خواجہ معین الدین چشتی رحمۃ اللہ علیہ

        (16)جگا ڈاکو اور جادوئی غار

        (17)سلطان ٹیپو

        (18)میلاد النبی ﷺ اور علمائے عرب

        (19)حضرت خدیجۃ الکبریٰ رضی اللہ عنہا

        (20)حضرت عائشہ صدیقہ رضی اللہ عنہا

حرفے چند

زکوٰۃِ حُسن دے اے جلوۂ بینش کہ مہر آسا

چراغِ خانۂ درویش ہو کاسہ گدائی کا

                                                (غالبؔ )

بفضلِ خدا و رسول( جل و علا و صلی اللہ علیہ و سلم )دسمبر 2003ء کی بات ہے جب میری تعلیمی ترقی میں ایک نیا موڑ آیا۔ یونی ورسٹی گرانٹس کمیشن (UGC)کے زیرِ اہتمام منعقدہ ملک گیر سطح کے مقابلہ جاتی امتحان نیشنل ایجوکیشنل ٹیلنٹ(NET)میں مجھے تمغۂ کام یابی و کام رانی حاصل ہوا۔ بعدہ2004ء میں پونہ یونی ورسٹی سے ایم۔ اے۔ (اردو )کی تکمیل ہوئی۔ تو میرے ذہن و قلب میں یہ خواہش انگڑائیاں لینے لگی کہ اب مجھے کوئی تحقیقی کام کرنا چاہیے۔ چناں چہ میں نے اپنی پسندیدہ شخصیت ’’امام احمد رضا بریلوی‘‘ کے روشن و درخشاں افکار و نظریات کو پیشِ نظر رکھ کر کسی موضوع کے تعین کی طرف پیش قدمی کی۔ اسی دوران مجھے حضرت علامہ پروفیسر ڈاکٹر سید محمد امیٖن میاں صاحب قبلہ مارہروی(پروفیسر شعبۂ اردو مسلم یونی ورسٹی، علی گڑھ)سے شہر جل گاؤں میں ملاقات کا شرف حاصل ہوا۔  اثنائے گفتگو راقم نے آپ کی خدمتِ والا بابرکت میں پی۔ ایچ۔ ڈی۔  کرنے اور موضوع سے متعلق مودّبانہ معروضہ پیش کیا، تو آپ نے ’’حضور مفتیِ اعظم علامہ شاہ مصطفی رضا نوریؔ بریلوی کی حیات و خدمات اور نعتیہ شاعری‘‘ کے حوالے سے تحقیقی کام کرنے کا مفید ترین مشورہ عنایت فرمایا، ساتھ ہی خصوصی دعاؤں سے بھی نوازا۔ میں جلگاؤں سے اس یقین و اعتماد کے ساتھ وطنِ مالوف مالیگاؤں لوٹا کہ اب میرا تحقیقی کام ان شآء اللہ شروع ہو کر کامیابی کی منزل سے ضروٗر ہم کنار ہو گا، کیوں کہ ایک’’ نجیب الطرفین سید زادے ‘‘ کی دعائیں اور شفقتیں میرے سر پر سایہ فگن ہیں۔

        اسی دوران ملک العلما(خلیفۂ امام احمد رضا)کے اکلوتے فرزندِ ارجمند تنویرِ عرب، توقیرِ عجم حضرت پروفیسر ڈاکٹر سیدمختارالدین احمد آرزوؔ علیہ الرحمۃ (سابق صدر شعبۂ عربی مسلم یونیورسٹی علی گڑھ) (م1431ھ/2010ء)کا تحریر فرمودہ محبت نامہ راقم کے گھر تشریف فرما ہوا، جس میں حضرتِ اقدس نے یوں مشفقانہ کرم نوازی فرمائی کہ :

        ’’یہ جان کر خوشی ہوئی کہ آپ اور آپ کے رفقا دینی و علمی کاموں میں مصروف ہیں، یہ علم ہی کی خدمت ہے اوراس کے لیے ضروری ہے کہ اچھا کتب خانہ ہو۔ مسرت ہوئی کہ آپ اس طرف متوجہ ہیں، اچھے کتب خانے کے بغیر اچھی اور معیاری کتابیں نہیں لکھی جا سکتیں۔ یہ بھی ضروری ہے کہ آپ کچھ نہ کچھ لکھتے رہیں۔ مطالعہ اور موضوع وسیع رکھیں۔ مجھے آپ کی آیندہ ترقیوں کے بارے میں ضروری معلوم ہوتا ہے کہ آپ ریسرچ کر کے ڈاکٹریٹ کر لیں۔ ‘‘

(مکتوب ڈاکٹر مختار الدین احمد آرزوؔ بنام راقم محررہ4؍ جنوری2005ء، از:علی گڑھ)

        حضرت علامہ پروفیسر ڈاکٹر سید محمد امین میاں صاحب مارہروی اور حضرت پروفیسر ڈاکٹر سیدمختارالدین احمد آرزوؔ جیسی عظیم نابغۂ روزگار اور یادگارِ سلف روحانی و علمی مقدس ہستیوں کے مفید و نیک مشوروں اور حوصلہ افزائیوں کے زیرِ سایہ راقم نے ڈاکٹر عبداللطیف سبحانی صاحب(شعبۂ اردوٗ گورنمنٹ کالج، اورنگ آباد)کی نگرانی میں ’’ہندوستان میں اردو کی نعتیہ شاعری اور مصطفی رضا نوریؔ بریلوی کا حصہ ‘‘عنوان کے تحت ’’ناگ پوٗر یونی ورسٹی ‘‘ میں رجسٹریشن کے لیے درخواست دی، لیکن رجسٹریشن نہ ہوسکا۔ مگر حوصلہ بلند تھا، یقین پُختہ تھا۔ موصوف ہی کی نگرانی میں دوبارہ ’’ڈاکٹر بابا صاحب امبیڈکر مراٹھواڑہ یونی ورسٹی، اورنگ آباد ‘‘ میں متذکرۂ بالا موضوع کے تحت میں نے رجسٹریشن کی درخواست دی، مگر اس مرتبہ بھی وائے محرومیِ قسمت کہ رجسٹریشن نہ ہوسکا۔ (دراصل نعت کو صنف ادب کی حیثیت سے تسلیم کرنے میں بہت سارے ناقدین کا رویہ انکاری ہے) اس دوران جو خاکہ مرتب کیا گیا تھا اُسے اصلاح و نظرِ ثانی کے لیے ناچیز نے حضرت پروفیسر ڈاکٹر سیدمختارالدین احمد آرزوٗؔ علیہ الرحمہ کو ارسال کیا تھا۔ حضرتِ اقدس نے اُسے ملاحظہ فرما کر ایک مکتوبِ گرامی کے ذریعہ دوبارہ رہنمائی فرمائی کہ  :

        ’’مقالے کا خاکہ دیکھا، مناسب ہے۔ آپ محنت کر کے نگراں کے مشوروں سے فائدہ اُٹھاتے ہوئے مقالہ کا پہلا ڈرافٹ تیار کر لیجیے، بعد میں حک و اصلاح، ترمیم و اضافہ کرتے رہیے گا، موضوع پر مواد کی کمی نہیں،  بریلی، بمبئی، لاہور، کراچی کے علما و محققین سے رابطہ رکھیے اور کتب و رسائل جو آپ کے لیے ضروری ہوں منگواتے رہیے۔ ‘‘

(مکتوب ڈاکٹر مختار الدین احمد آرزوؔ بنام راقم محررہ23؍ اگست 2005ئ، از:علی گڑھ)

        ڈاکٹر آرزوٗ علیہ الرحمہ کے مشوروں سے مختلف محققین سے رابطہ استوار کرنے کی راقم نے کوشش کی اس ضمن میں ڈاکٹر عبدالنعیم عزیزی صاحب (بریلی شریف) نے مواد کی فراہمی میں انتہائی فراخ دلانہ و مخلصانہ تعاون فرمایا۔ لیکن رجسٹریشن نہ ہونے کے سبب میں دل برداشتہ ہو گیا،  لیکن جب اِن حوصلہ شکن واقعات سے میں نے جواں سال، با عزم و پُر ہمت، صاحبِ علم و فضل محقق و مصنف حضرت مولانا ڈاکٹر غلام جابر شمس مصباحی صاحب (ممبئی)کو آگاہ کیا تو انھوں نے میری بے حد حوصلہ افزائی فرمائی برابر ٹیلی فونک رابطہ قائم رکھا۔ ایک مرتبہ فرمایا کہ تحقیق کے راستے میں آرام کم اور تکالیف زیادہ ہیں، اپنوں کی بے اعتنائیاں اور غیروں کی رکاوٹیں جھیلنے کا مادّہ پیدا کیجیے اور صبر و ضبط سے کام لیتے رہیے۔ اللہ رب العزت جل و علا بڑا کارساز ہے۔ اور جب آپ کے مقدر میں ہو گا تب ہی یہ کام شروع ہو کر پایۂ تکمیل تک پہنچے گا کیوں کہ     ؎

اے رضاؔ ہر کام کا اک وقت ہے

دل کو بھی آرام ہوہی جائے گا

        اسی اثنا میں ماہرِ رضویات علامہ پروفیسر ڈاکٹر محمد مسعود احمد نقش بندی مجددی(کراچی) نے اپنے ایک شفقت نامہ کے ذریعہ ہمت بڑھائی اور دعاؤں سے نوازا۔ جب آپ ہندوستان تشریف لائے تو فون پر گفتگوٗ بھی فرمائی اور میرے ارادوں پر مسرت و شادمانی کا اظہار کرتے ہوئے حوصلہ افزا ملفوظاتِ حسنہ سے سرفراز کیا۔

        انھیٖں بزرگوں کی پیہم پذیرائیوں اور حوصلہ افزائیوں سے چند سال بعد ڈاکٹر عبداللطیف سبحانی صاحب ہی کے توسط سے ناچیز نے محترمہ ڈاکٹر شرف النہار صاحبہ (صدر شعبۂ اردو ڈاکٹر رفیق زکریا کالج فور ویمن، اورنگ آباد ) کی خدمت میں حاضر ہو کر اپنا مقصد و مدعا بیان کیا،  آپ نے شفقت فرماتے ہوئے میرے مقالے کی نگرانی کی ذمہ داری کو قبول فرمالیا،  چناں چہ آپ کی نگرانی میں نئے سرے سے موضوع میں معمولی ترمیم و تغیر کے بعد اجمالی خاکہ تیار کر کے ’’مصطفی رضا نوریؔ بریلوی کی نعتیہ شاعری کا تحقیقی مطالعہ‘‘ عنوان متعین کرتے ہوئے 2008ء میں ’’ڈاکٹر بابا صاحب امبیڈکر مراٹھواڑہ یونی ورسٹی،  اورنگ آباد ‘‘ میں رجسٹریشن کے لیے درخواست پیش کی گئی ،مقامِ شکر و احسان کہ گائیڈ کی کوششوں سے ریسرچ کمیٹی کے مہربان اراکین نے اس موضوع کو تحقیق کے لیے منظور فرما لیا۔ رجسٹریشن ہو جانے کے بعد کام برق رفتاری سے شروع کر دیا گیا۔ اس دوران کیا کیا دشواریاں درپیش ہوئیں اس کا بیان کرنا غیر مناسب معلوم ہوتا ہے۔ ہاں ! اتنا ضرور عرض کروں گا کہ پھول کے ساتھ کانٹے بھی ملے، غیروں کا تو شکوہ کیا بعض اپنوں نے حوصلہ شکنی کے لیے کوئی دقیقہ فروگذاشت نہ کیا۔ مگر نعتِ مصطفی (صلی اللہ علیہ و سلم ) کے حوالے سے آپ(صلی اللہ علیہ و سلم ) کے ایک عاشقِ صادق، قطبِ دوراں علامہ مصطفی رضا نوریؔ بریلوی کی حیات و خدمات اور نعتیہ شاعری پر تحقیقی کام ہو رہا تھا، غیب سے مشکلات حل ہوتی گئیں اور کام آگے بڑھتا رہا۔ یہ بھی میری قسمت کی معراج ہی ہے کہ ’’دیر آید درست آید‘‘ کے مصداق اللہ رب العزت جل و علا نے میرے اس تحقیقی مقالے کی نگرانی کے لیے جس رہِ نما کو منتخب فرمایا وہ ساداتِ کرام سے تعلق رکھتی ہیں، اُن کے اہلِ خانہ کا خاندانِ برکات (مارہرہ مطہرہ) کے ساداتِ کرام سے دیرینہ روابط ہیں۔ لہٰذا محترمہ ڈاکٹر شرف النہار صاحبہ کی برکتوں اور شفقتوں سے بھی میری پریشانیاں اور کلفتیں کافور ہوتی گئیں اور بزرگوں کی نظرِ التفات اور دعائے خیر کے زیرِ سایہ بالآخر یہ تحقیقی کام پایۂ تکمیل تک پہونچ ہی گیا۔

        راقم کا تحقیقی مقالہ آٹھ ابواب پر مشتمل ہے ،باب اول میں نعت کے لغوی اور اصطلاحی مفہوم کی وضاحت کی گئی ہے اور ثابت کیا گیا ہے کہ ہر وہ ادب پارہ جو قاری یا سامع کو حضور صلی اللہ علیہ و سلم کی طرف متوجہ کرے وہ نعت ہے چاہے و ہ نظمی ہو یا نثری۔

        باب دوم میں نعت گوئی کے فن پر روشنی ڈالتے ہوئے مختلف قد آور علمائے ادب کے اقوال پیش کیے گئے ہیں۔ اس میں ضمنی عنوانات حزم و احتیاط موضوع اور من گھڑت روایتیں،  نعت ہیئت -اصنافِ سخن، ضمائر کا استعمال کے تحت نعت، آدابِ نعت اور لوازماتِ نعت پر تحقیقی بحث کی گئی ہے اور ثابت کیا گیا ہے کہ نعت اصنافِ ادب میں سب سے محترم صنف ہے۔

        باب سوم میں نعت گوئی کی تاریخ کا اجمالی جائزہ لیا گیا ہے اور تحقیق کی روشنی میں اس امر کو پایۂ ثبوت تک پہنچانے کی کوشش کی گئی ہے کہ میثاق النبیین کے بعد حضرت آدم علیہ السلام سے حضرت عیسیٰ علیہ السلام تک کسی نہ کسی طور نبیِ آخرالزماں صلی اللہ علیہ و سلم کا ذکرِ جمیل ہوتا رہا ہے۔ ولادت و بعثت کے بعد نعت گوئی کو عروج حاصل ہوا۔ اس باب میں اوّلین نعت گو شعرا کی تحقیق کرتے ہوئے یہ ثابت کیا گیا ہے کہ جناب ابو طالب کو اوّلین نعت گو شاعر ہونے کا اعزاز حاصل ہے۔

        راقم نے اس بات کی کوشش کی ہے کہ نعتیہ ادب کا طالبِ علم جب اس مقالے کو دیکھے تو اسے وافر مقدار میں تحقیقی مواد ایک ہی جگہ مل جائے اس لحاظ سے عربی، فارسی اور اردو کی نعتیہ شاعری کے علاوہ نعتیہ ادب کے فروغ و ارتقا میں دوسری زبانوں کی حصہ داری اور شراکت پر روشنی ڈالتے ہوئے انگریزی،  فرانسیسی،  جرمنی،  بہاری،  کر دی،  مارواڑی،  میواتی،  سرائیکی،  کشمیری،  ہندکو،  ہاوسا،  سندھی،  بنگالی،  پشتو،  پنجابی،  دوآبے،  ہریانوی،  سنسکرت،  گجراتی،  ہندی، مراٹھی وغیرہ   زبانوں میں تحریر کی گئی نعتوں کا ایک حسیٖن انتخاب بھی اس مقالہ میں جمع کر دیا گیا ہے۔ لیکن یہ بات بھی مسلم ہے کہ تحقیق ایک مسلسل جاری رہنے والا عمل ہے اس لیے اس مقالہ کو حرفِ آخر نہ سمجھا جائے۔

        باب چہارم میں ’’ ہندوستان میں اردو کی نعتیہ شاعری 1412ء سے حضرت نوریؔ بریلوی تک ‘‘عنوان کے تحت ہندوستان میں اردو کے ارتقائی عمل کو بیان کرتے ہوئے اس امر کی تحقیق کی گئی ہے کہ اردو زبان کے آغاز کے ساتھ ہی اردو میں نعت گوئی کا آغاز ہوا۔ ہندوستان میں اردو کی نعتیہ شاعری کا جائزہ لیتے ہوئے اس باب میں اردو کے ارتقائی سفر کی طرح اردو نعت کے لسانی و ارتقائی مراحل، زبان کی شایستگی ا ور پختگی کو سمجھنے کے لیے فنِ اردو نعت گوئی کو تین ادوار میں منقسم کیاگیا ہے۔

        (1)   پہلا دور     (815ھ/1412ء سے1154ھ/1750ء تک )

        (2)   دوسرا دور  (1154ھ/1750ء سے 1308ھ/1890ء تک)

        (3)   تیسرا دور   ( 1308ھ/1890ء سے حضرت نوریؔ بریلوی کے عہد تک)

        تینوں ادوار پر تفصیلی بحث کرتے ہوئے یہ واضح کیا گیا ہے کہ ان شعرائے کرام کے کلام کا یہ فکری کارواں پورے شعور و آگہی سے آگے بڑھتے ہوئے عصرِ حاضر کے شعرا کو ماضی کی جملہ امانتیں سونپ دیں۔ یہ انھیں حضرات کی کوششوں کا ثمرہ ہے کہ عصرِ حاضر کے ادبی منظر نامہ پر اردو نعت گوئی بے پناہ مقبول ہے اور آج نعتیہ شاعری میں نئے لہجے اور نئے رنگ و آہنگ کے ساتھ جدید علامتوں اور اشاروں کو بڑی فن کاری سے استعمال کیا جا رہا ہے۔ حتیٰ کہ اردو نعت گوئی کا یہ نہ رُکنے والا سلسلہ مسلسل جاری ہے۔ یہاں تک کہ بعض ناقدین اکیسویں صدی کو نعت گوئی کی صدی خیال کرتے ہیں۔

        باب پنجم میں پانچ ضمنی عنوانات، (1) حیات نوریؔ بریلوی (2) علمی خدمات (3)ادبی خدمات (4) سیاسی خدمات (5) تدریسی خدمات کے تحت نوریؔ بریلوی کی حیات و خدمات پر بالتفصیل تحقیقی روشنی ڈالنے کی کوشش کی گئی ہے۔ مقالے کا اصل موضوع مفتیِ اعظم حضرت نوریؔ بریلوی کی نعتیہ شاعری ہونے کے سبب آپ کی حیات و خدمات کے بعض اہم گوشوں کو اجاگر نہ کیا جا سکا۔ بہ ہر کیف! یہ اہلِ ذوق کو دعوتِ تحقیق دیتے ہیں کہ وہ ان پر مستقبل میں کام کریں۔

         باب ششم میں کلامِ نوریؔ بریلوی کا بالتفصیل تحقیقی جائزہ لیتے ہوئے آپ کے کلام کے مختلف شعری و فنّی محاسن کو تحقیق کی روشنی میں اُجاگر کرنے کی کوشش کی گئی ہے۔ اس باب میں آپ کے دور میں نعت گوئی کے معیار اور اُس کی عام روش، آپ کی نعت گوئی کے آغاز، تخلیقی رویے،  تصورِ عشق و فن،  عقیدۂ توحید،  خصائصِ رسالت صلی اللہ علیہ و سلم ،  ترکیب سازی،  شاعرانہ پیکر تراشی،  لسانی و عروضی چاشنی،  محاورات کا ستعمال،  مشکل زمینوں اور موضوعات،  خیال آفرینی،  پیرایۂ زبان و بیان،  صنائع و بدائع،  تغزل کا رنگ و آہنگ،  عربی، فارسی اور اردو کے ساتھ ہندی اور پورَبی زبان کی آمیزش اور رچاؤ نیز قرآن و حدیث،  فقہ و تفسیر جیسے علوم و فنون کی رنگا رنگی وغیرہ شعری و فنّی محاسن کو نمایاں کیا گیا ہے۔

        باب ہفتم میں حضرت نوریؔ بریلوی کے شعری و فنّی محاسن، آپ کے نعتیہ رُجحانات،   خیالات اور افکار پر اہلِ علم و دانش نیز شاعروں، ادیبوں اور محققین و ناقدین نے اپنے جن گراں قدر تاثرات کا اظہار کرتے ہوئے نوریؔ بریلوی کی شاعرانہ عظمت و رفعت کو خراجِ تحسین پیش کیا ہے۔  ان میں سے چند تاثرات یک جا کیے گئے ہیں۔ اسی طرح باب ہفتم میں ضمنی باب ’’نوریؔ بریلوی کی طرز کا اتّباع‘ کے تحت یہ بھی واضح کیا گیا ہے کہ آپ کے اسلوب اور طرزِ نگارش کو اختیار کرتے ہوئے آپ کے معاصرین اور متاخرین شعرا نے نعتیہ کلام قلم بند کیا ہے۔ مثال کے طور پر چند شعرا کی نعتیں اس باب میں جمع کی گئی ہیں۔

         باب ہشتم میں ماحصل کے طور پر ماقبل ابواب کی روشنی میں نوریؔ بریلوی کے اسلوبِ نگارش، کلام کی خوبیوں، آپ کے نعتیہ رجحانات، خیالات اور افکار کی عالم گیر شہرت و مقبولیت کو واضح کرتے ہوئے یہ بیان کیا گیا ہے کہ آپ کی نعتوں میں تصوف و معرفت کی جو روح پنہاں ہے وہ ہماری قومی و ملی، تہذیبی و تمدنی اور علمی و ادبی ورثہ ہیں۔ جذبہ و فن کی وسعت،  خیالات و محسوسات کی بلندی،  مضامین و موضوعات کے تنوع اور مختلف علمی و ادبی اور شعری محاسن کے اعتبار سے اردو نعت گوئی کی تاریخ میں نوریؔ بریلوی کا مقام و مرتبہ بہت بلند و بالا اور ارفع و اعلا ہے۔ آج عالمِ اسلام میں نوریؔ بریلوی کے ذہن و فکر سے نکلے ہوئے نعتیہ سرمدی نغمات کی دھومیں مچی ہوئی ہیں اور آپ کے کلامِ  بلاغت نظام قلبِ مُسلم پر نگراں ہیں اور فردوسِ گوش بنے ہوئے ہیں۔

        علاوہ ازیں ضمیمہ کے تحت عصرِ حاضر میں اردو نعت گوئی کے اجمالی منظر نامہ کو بیان کرتے ہوئے یہ بتایا گیا ہے کہ عصرِ رواں میں نعت گوئی میں نت نئے تجربات ہو رہے ہیں۔  شعرائے کرام نو تراشیدہ اور خود وضع کردہ لفظی تراکیب، مترنم بحروں اور نئی ہیئت و سانچوں کو اندازِ  نو سے برت رہے ہیں۔  ذات و کائنات کے مسائل، انسانی دکھوں،  تکالیف، مصائب، آلام اور پریشانیوں کے مداوا کی بات رسول اللہ صلی اللہ علیہ و سلم کے حوالے سے نعتوں میں کی جا رہی ہے۔ نئے لہجے اور نئے رنگ و آہنگ کے ساتھ جدید علامتوں اور اشاروں کو بڑی چابک دستی سے برتا جا رہا ہے۔

        اس مقام پر پہونچ کر مقالہ کی تیاری، مواد کی فراہمی اور قلمی و زبانی معاونت کرنے والوں نیز دعائے خیر سے نوازنے والوں کی خدمت میں ہدیۂ سپاس پیش کرنا راقم اپنا اہم ترین فریضہ تصور کرتا ہے۔ چناں چہ اس ضمن میں سب سے پہلے۔۔۔۔۔

سجدۂ شکر و احسان!ا

اُس خالقِ کائنات عز و جل کے لیے ۔۔۔

جس نے لفظِ کُن سے لوحِ انسانی کو شکر و احسان کے پُر نور نشانات عطا کیے اور راقم کو اشرف المخلوقات بناتے ہوئے اُمّتِ محمدیہ(صلی اللہ علیہ و سلم ) میں پیدا فرما کر مجھے قرطاس و قلم اور تحقیق و جستجو کا حوصلہ بخشا اور اپنے محبوبِ اعظم صلی اللہ علیہ و سلم کی نعت گوئی کے حوالے سے اپنے ایک نیک بندے کی نعتیہ شاعری پر تحقیقی کام کرنے کی قوت عطا فرمائی۔

لاکھوں سلامِ عقیدت و محبت!

مصطفی جانِ رحمت صلی اللہ علیہ و سلم پر ۔۔۔

        کہ جو باعثِ تخلیقِ کائنات بھی ہیں اور محبوبِ کردگار بھی۔۔کہ جن کی مدح خوانی و ثنا خوانی قلب و جگر کے لیے نور اور روح و نظر کے لیے سرور ہے۔ یہ آپ(صلی اللہ علیہ و سلم ) ہی کی رحمتِ بے پایاں کا صدقہ و وسیلہ ہے کہ راقم آپ کے عاشقِ صادق مصطفی رضا نوریؔ بریلوی کی نعتیہ شاعری کا تحقیقی جائزہ لیتے ہوئے اس علمی کام کی تکمیل کے قابل بن سکا۔

ارمغانِ تشکر و امتنان!

میری مشفقہ معلمہ محترمہ ڈاکٹر شرف النہار صاحبہ (صدر شعبۂ اردو ڈاکٹر رفیق زکریا کالج فور ویمن، اورنگ آباد)کے لیے۔۔۔

        جنھوں نے عدیم الفرصتی کے باوجود میرے اس مقالے کو از اوّل تا آخر حرف بہ حرف ملاحظہ فرما کر زیورِ اصلاح سے مزین و آراستہ کیا، اور میری اس تحقیقی کاوش کو اس لائق بنا دیا کہ اہلِ علم یقیناً اسے بہ نظرِ استحسان دیکھیں گے۔ آپ کیسی شفیق،  خلیق،  منکسر المزاج،  مہربان اور سراپا خلوص و محبت ہیں اسے لفظوں کا جامہ پہنا کر بیان کرنا ممکن نہیں۔ میں جب جب اورنگ آباد حاضر ہوتا،    آپ نہایت خندہ پیشانی سے پیش آتیں،  میرے مقالے پر اصلاح فرماتیں،  زبان و بیان اور اسلوب کی نوک پلک درست کرتیں،  مفید مشوروں سے نوازتیں اور ساتھ ہی ساتھ خاطر تواضع بھی فرماتیں۔  یہ انھیٖں کی مربیانہ،  مشفقانہ اور مخلصانہ بے غرَض رہِ نمائی کاحسیٖن و جمیل ثمرہ ہے کہ میرا مقالہ پایۂ تکمیل تک کام یابی و کام رانی سے پہنچ گیا۔ آپ کا میرے ساتھ تعاون و ہمدردی ’’نہ ستایش کی تمنا، نہ صلہ کی پروا‘‘ سے عبارت رہا، بل کہ حقیقت یہ ہے کہ آپ نے نعتیہ شاعری پر ہو رہے اس تحقیقی کام کی مکمل رہِ نمائی ایک عبادت سمجھ کر فرمائی۔ خداوندِ قدوس سے دعا ہے کہ انھیں آلامِ روزگار سے ہر لمحہ محفوظ و مامون رکھے۔ (آمین)

ہدیۂ سپاس و محبت!

ان حضرات کے لیے ۔۔۔

        جنہوں نے مقالہ کی تیاری میں مواد فراہم کیے، کسی بھی طرح سے قلمی و علمی،  زبانی و عملی معاونت فرمائی اور میری کامیابی کے لیے اپنی دعائے خیرسے مجھے نوازا،  ان حضرات میں ۔۔

        ٭  حضرت علامہ پروفیسر ڈاکٹر سید محمد امیٖن میاں مارہروی صاحب(پروفیسر شعبۂ اردو مسلم یونی ورسٹی، علی گڑھ)

        ٭ حضرت حسان العصر سید آلِ رسول حسنین میاں نظمی مارہروی صاحب(سجادہ نشین خانقاہِ برکاتیہ، مارہرہ شریف)

        ٭ حضرت سید محمد اشرف میاں برکاتی مارہروی صاحب(انکم ٹیکس کمشنر، دہلی)

        ٭ حضرت مولاناسید محمد حسینی میاں اشرفی مصباحی صاحب

        (سجادہ نشین آستانۂ عالیہ شمسیہ حسینیہ، رائے چور،  کرناٹک)

        ٭ شہزادۂ حضور صدرالشریعہ محدثِ کبیر حضرت علامہ ضیاء المصطفی صاحب قبلہ، گھوسی۔

        ٭ ماہرِ رضویات حضرت پروفیسر ڈاکٹر محمد مسعود احمد نقش بندی مجددی علیہ الرحمۃ(کراچی)

        ٭  حضرت پروفیسر ڈاکٹر سیدمختارالدین احمد آرزوؔ علیہ الرحمۃ (سابق صدر شعبۂ عربی مسلم یونی ورسٹی علیگڑھ)

        ٭ حضرت مفتی محمد مجیب اشرف صاحب، خلیفۂ نوریؔ بریلوی و مفتیِ اعظمِ مہاراشٹر(بانی و مہتمم جامعہ امجدیہ رضویہ، ناگ پور)

        ٭ حضرت قاری محمد امانت رسول رضوی صاحب، خلیفۂ نوریؔ بریلوی(پیلی بھیت)

        ٭ حضرت ڈاکٹر عبدالنعیم عزیزی صاحب(بریلی شریف)

        ٭ حضرت ڈاکٹر فاروٗق احمد صدیقی صاحب (صدر شعبۂ اردو بہار یونی ورسٹی، مظفر پور، بہار)

        ٭ حضرت علامہ وقار احمد عزیزی صاحب(بھیونڈی)

        ٭ حضرت مولانا ڈاکٹر غلام جابر شمس مصباحی صاحب(ممبئی)

        ٭ حضرت ڈاکٹر سراج احمد بستوی صاحب(اردوٗ ترجمان ڈی۔ آئی۔ جی۔ رینج بستی، یوپی)

        ٭ حضرت مولانا محمد توفیق احسنؔ مصباحی صاحب(ممبئی)

        ٭ حافظ و قاری محمد اسماعیل رشیدی صاحب (خطیب و امام سنی جامع مسجد، نیائے ڈونگری، تعلقہ ناندگاؤں، ناسک)وغیرہم نمایاں طور پر قابلِ ذکر ہیں۔

        بڑی ناسپاسی ہو گی اگر میں اس موقع پر محترم ڈاکٹر عبداللطیف سبحانی صاحب کا شکریہ نہ ادا کروں کہ اولاً انھیں کی نگرانی میں یہ کام شروع ہوا تھا۔ اسی طرح محترم پروفیسر ڈاکٹر غیاث الدین صاحب(صدر شعبۂ اردو ڈاکٹر بابا صاحب امبیڈکر مراٹھواڑہ یونی ورسٹی، اورنگ آباد) میری طرف سے بجا طور پر ہدیۂ امتنان کے مستحق ہیں کہ جب بھی میں یونی ورسٹی گیا، آپ بڑے تپاک سے ملے،  خلوص سے پیش آئے،  اور ریسرچ ورک سے متعلق پوچھتے رہے،  مفید مشورے بھی دیے۔  نیز وطنِ مالوف مالیگاؤں کے مشہور ناقد و محقق جناب سلیم شہزاد صاحب کا بھی راقم ممنون ہے کہ آپ نے بعض اہم دشواریوں کے حل میں میری بھر پور معاونت فرمائی۔

        علاوہ ازیں اورنگ آباد میں مقیم میرے دیرینہ کرم فرما محترم حافظ و قاری ذکی اللہ خان رضوی صاحب کا ناچیز بے پناہ شکر گزار ہے کہ آپ نے بڑی فراخ دلی اور کشادہ قلبی کے ساتھ بیش تر میرے قیام و طعام کا بندوبست فرمایا اور پردیس میں مجھے پردیسی ہونے کا ذرّہ بھر بھی احساس نہ ہونے دیا۔ میرے جملہ احبا،  اعزہ اور اقربا کا بھی میں ممنون و  متشکر ہوں کہ ان حضرات کی ہمت افزائی قدم قدم پر میری ہم سفر رہی،  نیز عزیزِ گرامی کاملی محمد غلام جیلانی صاحب(ٹائم کمپیوٹر، مالیگاؤں )کا شکریہ ادانہ کرنا بڑی نا انصافی ہو گی موصوف نے انتہائی درجہ رعایت کے ساتھ کمپوزڈ شدہ میٹرس کی پرنٹس اپنے پرنٹر سے کئی مرتبہ نکال کر دی۔ عقیل ورلڈ ڈی۔  ٹی۔ پی سینٹر کے عقیل احمد صاحب اور ایس آر گرافکس کے شفیق رشید آرٹسٹ کا بھی راقم ممنون ہے کہ انھوں نے ٹائپ شدہ مواد کی خوب صورت تزئین میں میری رہنمائی فرمائی۔

        اخیر میں،  مَیں اپنے مشفق و مہربان والدین کی خدمتِ عالیہ میں جذبۂ احترام و عقیدت کے ساتھ ہدیۂ امتنان و تشکر پیش کرتا ہوں جنھوں نے میری بہتر تعلیم و تربیت فرمائی۔  یہ انھیں کی شفقتیں،  محبتیں، نالۂ نیٖم شبی اور دعائے سحر گاہی کا جیتا جاگتا ثبوت ہے کہ میرا یہ تحقیقی کام بہ حسن و خوبی انجام پذیر ہوا۔ میرے دونوں عزیز بھائی محمد اسماعیل برکاتی، مولانا محمد رضا رضوی (متعلم مرکز الدراسات الاسلامیہ جامعۃ الرضا، بریلی شریف) اور میری شریکِ حیات کی خدمت میں بھی مَیں ہدیۂ سپاس نذر کرتا ہوں کہ ان لوگوں کی محبت و رفاقت نہ ہوتی تو مَیں اتنا بڑا کام ہرگز نہیں کر سکتا تھا۔ اسی طرح میری تینوں پیاری بہنیں جو اپنے گھر رہتے ہوئے میرے علمی و تحقیقی کام سے متعلق نیک خواہشات اور تمناؤں کی سوغات مجھ پر لٹاتی رہیں اور دعاؤں میں یاد کرتی رہیں میں ان کے لیے بھی تشکر طراز ہوں۔

        پیشِ نظر کتاب ’’ مفتیِ اعظم علامہ مصطفی رضا نوری بریلوی کی نعتیہ شاعری کا تحقیقی  مطالعہ‘‘ میرے مقالہ برائے پی ایچ ڈی کے ابواب اول،  دوم،  پنجم،  ششم،  ہفتم اور ہشتم پر مشتمل ہے۔  بقیہ ابواب ان شآ ء اللہ ’’نعتیہ روایت اور ہندوستان میں اردو نعت گوئی‘‘ کے نام سے علاحدہ کتاب کی شکل میں پیش کیا جائے گا۔  اس کتاب کی اشاعت میں خصوصی دل چسپی کا مظاہرہ کرنے والے احباب کا راقم ممنون ہے۔ ناچیز نے اس تحقیقی مقالے کو معتبر و مستند بنانے میں بڑی عرق ریزی کا مظاہرہ کیا ہے۔  پھر بھی اگر کہیں کوئی لغزش یا خامی نظر آ جائے تو اسے میری کم علمی اور بے بضاعتی پر محمول کرتے ہوئے مشفقانہ اصلاح و مشوروں سے نوازیں۔  مجھے یقین ہے کہ اربابِ نقد و نظر راقم کے اس تحقیقی مقالے کو بہ نظر استحسان دیکھتے ہوئے ہمت افزائی فرمائیں گے تاکہ مزید کچھ کام کرنے کا حوصلہ پیدا ہو۔

        ربِّ لم یزل سے دست بستہ دعا ہے کہ ۔۔۔

        اے ساری کائنات کے پروردگار۔۔۔

        حرفوں اور لفظوں کے خالق۔۔۔

        جلا جلالہٗ و عم نوالہٗ۔۔۔

جب تک گلشنِ عشقِ مصطفی(ﷺ)میں عندلیبانِ محبت و عقیدت کی نواسنجیاں قائم و دائم رہے۔۔۔

        اور

جب تک ثنا گویانِ مصطفی بارگاہِ رسالت مآب (ﷺ)میں اپنا نذرانۂ خلوص و اُلفت نچھاور کرتے رہیں ۔۔۔

تب تک جو بھی ثواب و رحمت تُو اُن کے حصہ میں ارزاں فرماتا رہے تو تُو ان جملہ حضرات کو بھی عطا فرما جنھوں نے میری کسی بھی طرح سے معاونت فرمائی۔

        اے قادرِ مطلق جل شانہٗ۔۔۔

        رسولِ رحمت صلی اللہ علیہ و سلم کے صدقہ و طفیل۔۔۔

        ان تمام حضرات کے عزّ و علم و عمل اور عمر میں برکتیں نازل فرما!۔۔۔

        انھیں عفو و عرفاں اور عافیت سے نواز!۔۔

        فروغِ نعت میں ہمیں اخلاص کے ساتھ مصروف و مشغول رکھ!۔۔۔

        ایں دُعا از من و از جملہ جہاں آمین باد!!۔۔

                                   (ڈاکٹر)محمد حسین مُشاہد رضوی

                                ۱۴؍ محرم الحرام ۱۴۳۳ھ / ۱۰؍ دسمبر ۲۰۱۱ء بروز سنیچر

                                سروے نمبر ۳۹ پلاٹ نمبر ۱۴ نیا اسلام پورہ،  مالیگاؤں

                                      (ناسک ) ۴۲۳۲۰۳،  مہاراشٹر،  انڈیا،  

                                         +91 9420230235

اغراض و مقاصد

نعت پیغمبر اسلام حضرت محمد مصطفی صلی اللہ علیہ و سلم کی تعریف و توصیف میں لکھی جانے والی منظومات کو کہا جاتا ہے۔  ویسے بعض علمائے ادب کے نزدیک ہر وہ ادبی کاوش جس میں حضور اقدس صلی اللہ علیہ و سلم کا ذکر ہو تعریف و توصیف ہو چاہے وہ نثر ہو یا نظم ’’نعت‘‘ ہے۔

        جہاں تک حمد کا معاملہ ہے تو اس میں شاعر کو اتنی پابندی نہیں ہوتی جتنی کہ نعت میں ہوتی ہے۔  نعت انتہائی مشکل ترین صنف سخن ہے۔ اگر شاعراس میں سر مو تجاوز کرتا ہے تو شرک کا ارتکاب کر بیٹھتا ہے اور کمی کرتا ہے توگستاخیِ  رسول صلی اللہ علیہ و سلم کا مرتکب ہو جاتا ہے: بہ قولِ عرفی    ؎

عرفی مَشَتاب ایں رہ نعت است نہ صحرا

آہستہ کہ رہ بر دمِ تیغ است قدم را

        ہمارے ادبا اور شعرا نے حمد کے ساتھ ساتھ نعت گوئی کے فن کو ضرور برتا ہے اور اپنی اپنی تصنیف وتالیف میں حمد باریِ تعالیٰ کے بعد رسول اﷲ صلی اللہ علیہ و سلم کی بارگاہ میں عقیدت و محبت سے نعت پاک کا نذرانہ بھی پیش کیا ہے اور ادب کی جملہ اصناف مثلاً:  غزل،  مثنوی،  قصیدہ،  رباعی،  قطعہ،  مسدس،  مخمس،  ہائیکو،  ترائیلے،  سانیٹ،  ماہیے،  دوہا،  کہہ مکرنی،  اور معرا نظم وغیرہ میں نعتیں لکھی ہیں۔  اس طرح دیکھا جائے تو نعت نہ صرف یہ کہ ایک صنف سخن کی حیثیت رکھتی ہے بل کہ تمام اصنافِ ادب میں انتہائی طاقت ور اور پاکیزہ صنف کا درجہ رکھتی ہے۔

        عربی، فارسی اور دیگر زبانوں کے ادب کی طرح اردو زبان و ادب میں بھی نعتیہ شاعری کو کافی فروغ حاصل ہوا ہے۔ ہندوستان میں اردو نعتیہ شاعر ی کا آغاز دکن میں حضرت سید محمد حسینی عرف خواجہ بندہ نواز گیسو دراز(م825ھ)سے ہوا اور پھر دیکھتے دیکھتے شمالی ہند اور دیگر صوبوں اور خطوں میں اردو نعتیہ روایت کا آغاز ہوا۔ بعد ازاں اس میں رفتہ رفتہ ترقی ہوتی رہی۔

        مفتیِ اعظم علامہ مصطفیٰ رضا نوریؔ بریلوی (م1981ء)ہندوستانی مسلمانوں کے ایک مذہبی رہِ نما تھے۔ عالم اسلام کی مشہور شخصیت اعلا حضرت امام احمد رضا محدثِ بریلوی (م 1921ء)  کے فرزندِ اصغر تھے۔  آپ کا خانوادہ کئی صدی پیش تر سے اسلامی علوم و فنون کا مرکز و محور رہا ہے۔  یہی وجہ ہے کہ آپ کو ورثے میں علم و فن کے وہ نایاب گوہر حاصل ہوئے جو دیگر حضرات کے یہاں شاذونادر ہیں۔  ان میں سب سے اہم ترین عشق رسول صلی اللہ علیہ و سلم کی دولتِ  عظمیٰ ہے کہ یہ آپ کے خانوادے کا طرۂ امتیاز ہے۔  آپ کی علمی، ادبی، دینی،  سیاسی اور اصلاحی خدمات کا دائرہ انتہائی وسیع ہے۔  آپ کو نثر کے ساتھ ساتھ نظم پر بھی ملکہ حاصل تھا۔ حمد و نعت و منقبت وسلام کے علاوہ آپ نے اپنی شعری صلاحیتوں کو کہیں اور نہیں برتا آپ کا مجموعۂ کلام ’’سامان بخشش 1354ھ‘‘ کے نام سے موسوم ہے۔ آپ کی شاعری اپنے پیش رَو شعرا سے قدرے مختلف ہے نوریؔ بریلوی کے مجموعۂ کلام میں شامل بیش تر نعتیں سادہ زمینوں اور آسان بحروں میں ہیں لیکن اس کے باوجود شعری و فنی محاسن بدرجۂ اتم موجود ہیں۔

        یوں تو حضرت نوریؔ بریلوی کی حیات و خدمات پر عالمی پیمانے میں کام جاری ہے،   درجنوں مصنفین کتب ورسائل تصنیف کر رہے ہیں۔  محققین اور ریسرچ اسکالرزتحقیقی مقالہ جات تحریر کر رہے ہیں اور بیش ترڈائجسٹ، ماہ نامہ، سہ ماہی رسائل اور ہفت روزہ و روزنامہ اخبارات نے آپ کی علمی شخصیت کے خد و خال اجاگر کرنے کے لیے خصوصی شماروں کی اشاعت بھی کی ہے۔  مگر دنیائے شعر و ادب میں آپ کی شاعرانہ حیثیت پر کوئی بھی قابل ذکر تحقیقی کام نہیں ہوا اور نہ ہی اردو کے بلند پایہ نعت گو کی حیثیت سے آپ کے مقام و منصب کو متعین کیا گیا لہٰذا اردو کے ممتاز نعت گو شعرا کفایت علی کافیؔ ،  لطفؔ بدایونی،  امیرؔ مینائی،  شبلی نعمانی،  الطاف حسین حالیؔ ،  بیدمؔ شاہ وارثی،  امام احمد رضاؔ بریلوی،  محسنؔ کاکوروی،  حسنؔ رضا بریلوی،  حفیظؔ جالندھری،  آسیؔ غازی پوری وغیرہ کے ساتھ ساتھ نوریؔ بریلوی کا تعین بھی دُنیائے ادب کے ممتاز نعت گو شاعر کی حیثیت سے کیا جائے اور حضرت نوریؔ بریلوی کے کلام میں موجود جملہ شعری و فنی محاسن کو اُجاگر کرنے اور بہ حیثیت نعت گو نوریؔ بریلوی کے مقام و منصب کو بیان کرنے کے لیے راقم نے اپنے تحقیقی مقالہ برائے پی ایچ ڈی کا عنوان ’’ مصطفیٰ رضا نوریؔ بریلوی کی نعتیہ شاعری کا تحقیقی مطالعہ ‘‘ڈاکٹر بابا صاحب امبیڈکر مراٹھواڑہ یونی ورسٹی کے شعبۂ اردو اور ریسرچ کمیٹی کے مہربان اراکین کی اجازت سے منتخب کر کے تحقیقی مقالے کی تکمیل کر لی ہے۔ جس کا ایک حصہ اس وقت آپ حضرات کے ہاتھوں کی زینت ہے۔ 

        بہ حیثیت طالب علم راقم نے ’’مصطفیٰ رضا نوریؔ بریلوی کی نعتیہ شاعری کا تحقیقی مطالعہ‘‘ عنوان کے تحت جو مقالہ تحریر کیا تھا اس میں سے پیشِ نظر کتاب میں شامل ابواب کی فہرست نشانِ خاطر کریں۔

آئینۂ ترتیب

باب اوّل: نعت،  آدابِ نعت اور لوازماتِ نعت

        ٭ ---------نعت کی تعریف۔  لغوی اور اصطلاحی مفہوم

        ٭ ---------نثری نعت

        ٭ ---------نعت گوئی کا فن(علمائے ادب کے اقوال کی روشنی میں )

        ٭ ---------حزم و احتیاط اور موضوع روایتیں

        ٭ ---------ہیئت۔ اصنافِ سخن

        ٭ ---------ضمائر کا استعمال

باب دوّم :مفتیِ اعظم علامہ نوریؔ بریلوی۔  حیات و خدمات

        ٭ ---------حیات نوریؔ بریلوی

        ٭ ---------علمی خدمات

        ٭ ---------ادبی خدمات

        ٭ ---------سیاسی خدمات

        ٭ ---------تدریسی خدمات

باب سوم:  مفتیِ اعظم کی نعتیہ شاعری کا تحقیقی و ادبی مطالعہ

        ٭ ---------نوریؔ بریلوی کے عہد میں نعت گوئی کا معیار اور عام روش

        ٭ ---------نوریؔ بریلوی۔ نعتیہ شاعری کا آغاز

        ٭ ---------شاعری سے لگاؤ اور تخلیقی رویّے

        ٭ ---------نوریؔ بریلوی کا تصورِ  عشق

        ٭ ---------کلامِ نوریؔ میں عقیدۂ توحید

        ٭ ---------کلامِ  نوریؔ میں خصائص رسول صلی اللہ علیہ و سلم

        ٭ ---------کلامِ  نوریؔ حزم و احتیاط

        ٭ ---------نوریؔ بریلوی کی منقبت نگاری

        ٭ ---------کلامِ نوریؔ اور علم بیان

        ٭ ---------کلامِ نوریؔ میں صنائع و بدائع

        ٭ ---------کلامِ نوریؔ میں عروضی چاشنی

        ٭ ---------کلامِ نوریؔ میں ترکیب سازی

        ٭ ---------کلامِ نوریؔ میں شاعرانہ پیکر تراشی

        ٭ ---------کلامِ  نوریؔ میں خیال آفرینی

        ٭ ---------نوریؔ بریلوی کا پیرایۂ زبان وبیان

        ٭ ---------کلامِ نوریؔ میں محاورات کا استعمال

        ٭ ---------نوریؔ بریلوی کا تغزل

        ٭ ---------نوریؔ بریلوی کی مشکل پسندی

        ٭ ---------نوریؔ بریلوی کی اصلاحی شاعری

        ٭ ---------کلامِ نوری میں عربی کی آمیزش اور فارسیت کا رچاؤ

        ٭ ---------کلامِ نوریؔ میں ہندی و ہندوستانی عناصر اور علاقائی بولیوں کا استعمال

        ٭ ---------نوریؔ بریلوی کی حمداور رباعی میں نعتیہ کلام کا جائزہ

باب چہارم :نوریؔ بریلوی کے نعتیہ رجحانات، خیالات اور افکار کی پذیرائی

        ٭ ---------نوریؔ بریلوی کی طرز کا اتباع

 باب پنجم:ماحصل: بہ حیثیت نعت گو نوریؔ بریلوی کا مقام و مرتبہ

کتابیات

باب اوّل

نعت، آدابِ نعت اور لوازماتِ نعت

الف: نعت کی تعریف- لغوی اور اصطلاحی مفہوم

نعت عربی زبان کا لفظ ہے جس کے معنی وصف و خوبی اور تعریف و توصیف کے ہیں۔  لیکن عُرفِ عام میں نعت، رسول اللہ صلی اللہ علیہ و سلم کی ثناوستایش اور تعریف و توصیف بیان کرنے والی منظومات کو کہا جاتا ہے۔ یوں تو نعت کا لفظ مستقل ایک موضوع یا مضمون کا احاطہ کرتا ہے اور جب یہ لفظ استعمال کیا جاتا ہے تو وہ تمام خزائن اور ذخائر مراد ہوتے ہیں جو حضور رحمتِ عالم صلی اللہ علیہ و سلم کے فضائل و مناقب، شمائل و خصائل، اخلاق و کردار، تعریف و توصیف اور مدح و ثنا پر مشتمل ہوتے ہیں۔  چاہے وہ نظمی ہوں یا نثری۔ لہٰذا ذیل میں عربی، فارسی اور اردو لغات سے نعت کا لغوی مفہوم اور ان مفاہیم سے ماخوذ تصریحات کی روشنی میں نعت کے اصطلاحی مفہوم پر روشنی ڈالنا غیر مناسب نہ ہو گا۔

لسان العرب :نعت:انعت : وصفک الشئی تنعتہ بما فیہ و تبالغ فی وصفہ والنعت : مانعت بہ نعت ینعتہ نعتا:وصفہ ورجل ناعت من قوم ناعت قال الشاعر  ؎

انعتہا انی من نعتہا

ونعت الشئی وتنعتہ اذا وصفہ

قال ابن الاعرابی : انعت اذا حسن وجہۃ حتی ینعت وصفہ صلی اﷲ علیہ و سلم

 یقول ابن الاثیر : النعت وصف الشئی بما فیہ من حسن ولا یقال فی القبیح الا یکلف متکلف فیقول نعت سوء والوصف یقال فی الحسن والقبیح وناعتون ونا عتین جمیعا موضع یقال الراعی       ؎

حی الدیار دیار ام بشیر

بنو یعتیین فشاطی التسریر

                                انہا اراد اناعتین 3/2 فصحی     (1)

تاج العروس:(نعت کالمنع)ای فی کونہ مفتوح العین فی الماضی والمضارع (الوصف) تنعت الشئی بما فیہ وتبالغ فی وصفہ وانعت ما نعت بہ نعتہ ینعتہ نعتا وسفہ ورجل ناعت من قوم نعات قال الشاعر     ؎

انعتہا انی من نعتہا

وفی صفتہ صلی اﷲ علیہ و سلم (2)

        لسان العرب اور تاج العروس دونوں ہی عربی لغات سے نعت کاجو مفہوم سامنے آیا ہے اس کی وضاحت یوں کی جا سکتی ہے کہ نعت کسی شَے کی خوبی یا وصف کو اس طرح بیان کرنا ہے کہ اس میں مبالغہ سے کام لیا جائے اورقبح کا ذرّہ بھر شائبہ نہ ہو۔ صاحبِ لسان العرب نے ابنِ اعرابی کے حوالے سے تحریر کیا ہے کہ نعت رسول اللہ صلی اللہ علیہ و سلم کی صفت کو بھی کہتے ہیں اور صاحبِ تاج العروس نے بھی نعت کو رسول اللہ صلی اللہ علیہ و سلم کی صفت شمار کیا ہے۔ لیکن صاف طور پر ان لغات سے یہ واضح نہیں ہوتا کہ نعت کا حقیقی مفہوم کیا ہے۔

المنجد: نعتہ (ف)نعتا تعریف کرنا، بیان کرنا، نعت کلمۃ :کلمہ کی صفت لانا، نعت (س)نعتا: اچھی صفات دکھانا، نعت (ک)نعاتہ الرجل پیدایش ہی سے اچھی صفات والا ہونا۔   (3)

معجم العربیہ : نعت ینعت نعتاوانتعت کسی چیز کو بیان کرنا یا اس کے اوصاف بیان کرنا (خصوصاً)تعریف میں،  سراہنا، تعریف کرنا، خوبیاں بیان کرنا، صرف و نحو میں صفت کو موصوف کے ساتھ ملانا۔

نعت : صفت، وصف، جوہر، ہنر، تعریف

نعت(ج) نعوت، اسم صفت، وصف، صفت،  خاصیت، گُن

نُعتَہُ: بہت خوبصورت، حسن

منعوت : وہ اسم جس کے ساتھ صفت بیان کی گئی ہو۔  موصوف (صرف و نحو)  (4)

مصباح اللغات: نعتہ (ف) نعتاً: تعریف کرنا، بیان کرنا(اور اکثر اس کا استعمال صفات حسنہ کے لیے ہوتا ہے)۔   (5)

فرہنگ آصفیہ: صفت و ثنا، تعریف و توصیف، مدح، ثنا،  مجازاً خاص حضرت سید المرسلین رحمۃ للعالمین صلی اﷲ علیہ و سلم کی توصیف۔   (6)

غیاث اللغات : نعت (ء) :نعت بالفتح تعریف و توصیف کردن از منتخب اگرچہ نعت بمعنی مطلق صفت است لیکن اکثر استعما ل ایں لفظ ستایش و ثنائے رسول (صلی اللہ علیہ و سلم ) آمدہ است، بمعنیٰ صیغۂ اسمِ فاعل و اسمِ مفعول و صیغۂ صفتِ مشبہ نیز می آید۔  (7)

         ترجمہ:  زبرسے نعت کے معنی صفاتِ حسنہ کے ساتھ تعریف و توصیف کرنا ہیں اگرچہ لفظِ  نعت کے مطلق معنی رسول اللہ صلی اللہ علیہ و سلم کی تعریف و ثنا میں آتا ہے، اسمِ فاعل و مفعول اور صفت کے صیغے کے اعتبار سے یہ ثنائے رسول صلی اللہ علیہ و سلم ہی کے معنی میں آتا ہے۔

لغاتِ فارسی :  نعت (ء)  تعریف، صفت، ستایش،  تعریف کرنا،  خاص کر رسول اللہ(صلی اللہ علیہ و سلم ) کی تعریف و توصیف کو نعت کہتے ہیں۔    (8)

لغات کشوری: نعت(ء) :تعریف، صفت، تعریف کرنا خاص کر رسول اﷲ   (صلی اللہ علیہ و سلم )کی  (9)

نور اللغات: نعت (ء  :  بالفتح ):یہ لفظ بمعنی مطلق وصف ہے لیکن اس کا استعمال آں حضرت (صلی اللہ علیہ و سلم )کی ستایش و ثنا کے لیے مخصوص ہے۔   (10)

فیروز اللغات:نعت (ئ، ا، مونث) : (1)مدح، ثنا، تعریف (2)رسول اﷲ   (صلی اللہ علیہ و سلم )کی شان میں مدحیہ اشعار۔   (11)

فرہنگ ادبیات:پیغمبر اسلام حضرت محمد صلی اللہ علیہ و سلم کی تعریف و توصیف کا حامل کلام۔   (12)

        درج بالا میں عربی لغات سے اخذ کردہ لغوی تصریحات سے لفظ ’’نعت‘‘سے متعلق اردو اور فارسی زبان میں جو تصور پایا جاتا ہے اس کا مکمل اظہار نہیں ہوتا۔ یہ الگ بات ہے کہ عربی میں رسول اﷲ صلی اللہ علیہ و سلم کی توصیف و ثنا میں جو اشعار کہے گئے تھے ان کو’’ نعت ‘‘تو نہیں،   ہاں ! ’’مدحیۂ رسول اﷲ‘‘ کا سرنامہ اہلِ عرب دیا کرتے تھے، بہ ہر کیف !یہ بھی ایک تسلیم شدہ حقیقت ہے کہ لفظ ’’نعت‘‘ کو رسول اﷲ صلی اللہ علیہ و سلم کے وصف و خوبی بیان کرنے والی مدحیہ نظم کے سرنامہ کے طور پر استعمال کرنے کا سہرا اردو والوں کے سر جاتا ہے۔

        عربی زبان کی متذکرۂ بالا لغات میں نعت کے جو معنی درج ہیں ان سے تو یہ تصور سامنے آتا ہے کہ نعت کے معنی وصف کے ہیں خصوصاً جب آپ کسی چیز کے وصف میں مبالغہ سے کام لیں تو اس وقت نعت کا لفظ استعمال ہوتا ہے۔

        ڈاکٹر سراج بستوی کے بہ قول : ’’قرآن مجید میں اس مادہ ’’نعت ‘‘کا کوئی لفظ استعمال نہیں ہوا ہے۔ مفسرین کرام نے قرآن کی شرح و ترجمانی میں اس لفظ کو وصف کے معنی میں استعمال کیا ہے احادیث رسول اﷲ صلی اللہ علیہ و سلم و شمائل ترمذی (حافظ محمد عیسیٰ ترمذی م279ھ) میں نعت کا لفظ اپنی مختلف نحوی اور صرفی صورتوں میں قریباً پچاس مقامات پر استعمال ہوا ہے۔

        مطالعۂ حدیث ہی کی روشنی میں بعض شارحینِ حدیث نے اپنی تحریروں میں نعت کو مطلق وصف کی عمومیت سے نکال کر اسے آں حضرت صلی اللہ علیہ و سلم کی تعریف و توصیف سے وابستہ کیا ہے اور اسے ایک خاص مفہوم کا حامل ٹھہرایا۔ غالباً ’’النہایۃ فی غریب الحدیث والاثر ‘‘وہ پہلا ماخذ ہے جس میں اس کے مرتب ابن اثیر (544ھ/606ھ)نے لفظ نعت کو اصطلاحی مفہوم میں پیش کیا ہے۔ ‘‘

        نعت کے اصطلاحی معنوں کی وضاحت کرتے ہوئے ڈاکٹر عبد المجید سندھی نے بھی اپنے خیال کا اظہار ان الفاظ میں کیا ہے کہ  :

         ’’نعت کے معنی ہیں ’خوب صورت وصف ‘یعنی کسی کی خوبیاں بیان کرنا لیکن اب نعت مستقل اصطلاح کی صورت اختیار کر چکا ہے اور اس کے معنی ہیں آں حضرت (صلی اللہ علیہ و سلم )کی ثنا اور وصف بیان کرنا ‘‘(13)

        اس ضمن میں ڈاکٹر رشاد عثمانی کا خیال یوں ہے کہ  :

        ’’اردو لغات میں اگر چہ عربی و فارسی لغات کی پیروی میں نعت کا لفظ مطلق وصف اور ثنائے رسول دونوں معنی میں آیا ہے۔ مگر جیسا کہ ’’نور اللغات‘‘ کے مرتب نے لکھا ہے کہ ’’یہ لفظ بمعنی مطلق وصف ہے لیکن اس کا استعمال آں حضرت صلی اللہ علیہ و سلم کی ستایش اور ثنا کے لیے مخصوص ہے ‘‘اردو زبان و ادب میں مطلق وصف کے معنی میں اس کا استعمال قریب قریب ناپید ہے۔ شعر و ادب میں لفظِ نعت کا استعمال وصفِ رسول صلی اللہ علیہ و سلم کے بیان کے علاوہ دیکھنے میں نہیں آیا۔ اس کی بڑی وجہ غالباً یہ ہے کہ عربی سے فارسی اور پھر فارسی سے اردو شعر و ادب تک یہ لفظ وصفِ مطلق کی عمومیت سے نکل کر آں حضرت  صلی اللہ علیہ و سلم کی تعریف و توصیف اور مدح و ثنا کے لیے مخصوص ہو چکا تھا۔ یعنی اردو لغت اور زبان و ادب میں اس کے معنی سرکار دو عالم حضرت محمد رسول اﷲ صلی اللہ علیہ و سلم کی تعریف و توصیف کے مفہوم سے منسوب و مختص ہے۔ ‘‘  (14)

        مذکورہ بالا عربی،  فارسی، اُردو لغات اور تمام حضرات کی مختلف آرا کو سمجھنے کے بعد نعت کے معنی و مفہوم اور تعریف و توصیف میں یہی کہنا منا سب معلوم ہوتا ہے کہ ہر وہ ادب پارہ جس میں حضور اقدس صلی اللہ علیہ و سلم کا ذکر ہو،  مدح ہو،  ثنا ہو،  تعریف و توصیف ہو،  سراپا کا بیان ہو،  شبیہ و شمائلِ اقدس کی لفظی تصویر کشی ہو،  عادات و اخلاق کا بیان ہو،  فضائل ومحاسن جمیلہ کا  اظہار ہو،   حضور صلی اللہ علیہ و سلم سے خطاب ہو،  آ پ سے استغاثہ و فریاد ہو،  عقیدت و محبت کے جذبات کی ترجمانی ہو،  مقصد و بعثتِ نبوت کا تذکرۂ خیر ہو یا ذات رسالت مآب صلی اللہ علیہ و سلم کا ذکر جمیل ہو۔  الغرض ہر وہ ادبی کاوش جو اپنے قاری یاسامع کو مصطفیٰ جان رحمت صلی اللہ علیہ و سلم کی طرف متوجہ کرے اور قرب کا احساس پیدا کرے چاہے وہ نثری ہو یا نظمی بلا شبہ ’’نعت‘‘ ہے۔

        چناں چہ متذکرۂ بالا خیال کی تصدیق مشہور محقق ڈاکٹر رفیع ا لدین اشفاقؔ اور معروف ادیب ڈاکٹر عبدالنعیم عزیزی کے گراں قدر خیالات سے ہوتی ہی،ڈاکٹر رفیع الدین اشفاؔ ق۔۔ ڈاکٹر فرمان فتح پوری کے حوالے سے تحریر کرتے ہیں  :

        ’’اصولاً آں حضرت صلی اللہ علیہ و سلم کی مدح سے متعلق نثر اور نظم کے ہر ٹکڑے کو نعت کہا جائے گا، لیکن اردو اور فارسی میں جب لفظِ نعت کا استعمال ہوتا ہے تو اس سے عام طور پر آں حضرت صلی اللہ علیہ و سلم کی منظوم مدح مراد لی جاتی ہے۔ ‘‘  (15)

        اور ڈاکٹر عبدالنعیم عزیزی نے یوں تحریر کیا ہے کہ  :

        ’’نعت ایک موضوع کا نام ہے اس کے لیے کوئی خاص صنف،  فارم یا ٹیکنک نہیں ہے اسے غزل، مثنوی،  مسدس، مخمس، رباعی، قطعہ وغیرہ کسی بھی صنف میں لکھا جا سکتا ہے۔ نعت کا موضوع مخصوص نہیں بہت ہی وسیع ہے۔ ‘‘  (16)

        نعت کا موضوع ادب کی کسی ایک صنف سے مخصوص نہیں ہے۔ حضور اکرم صلی اللہ علیہ و سلم کی تعریف و توصیف اور آپ کی سیرتِ طیبہ کا تذکرہ کسی بھی صنف اور ہیئت میں ہو سکتا ہے۔  شعرائے کرام نے کم و بیش تمام اصناف میں نعتیں قلم بند کی ہیں۔ جو صنفِ سخن جس عہد میں زیادہ مقبول رہی،  اس کو نعت کے لیے استعمال کیا گیا۔ 

        اس تجزیے کے بعد صاحبِ فرہنگِ ادبیات سلیم شہزاد کی نعت سے متعلق مکمل عبارت نقل کی جا رہی ہے جسے نعت کی جملہ تعریفوں میں جامع ترین تعریف سے تعبیر کرنا غیر مناسب نہ ہو گا۔  اس میں موصوف نے نعت کی صنفی حیثیت کے ساتھ ساتھ اس کے عہد بہ عہد عروج و ارتقا کی تاریخ کو بھی اجمالاً سمیٹ لیا ہے:

        ’’نعت : پیغمبرِ اسلام حضرت محمد( صلی اللہ علیہ و سلم )کی تعریف و توصیف کا حامل کلام۔  نعت شاعری کی مختلف ہیئتوں میں کہی گئی ہے اور مثنوی اور طویل بیانیہ نظموں کی یہ روایت رہی ہے کہ ابتدا نعت سے کی جائے۔  عربی اور فارسی کے اثر سے جس طرح اردو مرثیے میں محض واقعاتِ کربلا کو نظم کر دیا جاتا ہے اسی طرح نعت ایک موضوعی صنفِ سخن ہے جس میں قصائد،  منظوم واقعاتِ  سیرت،  غزلیں،  رباعیاں اور مثنویاں سبھی ہیئتیں شامل ہیں۔  حضور(صلی اللہ علیہ و سلم ) اپنی حیاتِ مبارکہ ہی میں اس شاعری کے زندہ موضوع بن گئے تھے اور آپ نے کعب بن زہیر،  لبید بن ربیعہ،  کعب بن مالک اور حسان بن ثابت وغیرہ اصحاب سے اپنی نعتیں سماعت فرمائی ہیں۔  عربی سے نعت فارسی میں آئی تو اسے حافظؔ ،  سعدیؔ ،  صائبؔ اور عرفیؔ جیسے شعرا میسر آئے۔  ہندوستان میں خسروؔ ،  نظامیؔ اور بیدلؔ نے فارسی میں نعتیں کہیں،  خسروؔ نے اسے ہندوستانی بولیوں میں بھی رواج دیا۔ 

        اردو کے تشکیلی دور میں متعدد صوفی شعرا نے اس صنف میں طبع آزمائی اور بہ طور ایک زبان کے اپنی حیثیت منوا لینے کے بعد اردو کے سبھی چھوٹے بڑے شعرا کے یہاں اس کی مثالیں تخلیق ہوئیں اگرچہ انیسؔ و دبیرؔ نے جس طرح صرف مرثیے میں اپنے فنّی کمال دکھائے اس طرح صرف نعت سے منسلک کوئی کلاسیکی شاعر اردو کو نہیں ملا۔  البتہ یہ سعادت دورِ جدید کے بہت سے شعرا کو حاصل ہے۔ 

        انیسویں صدی کے اواخر میں امام احمد رضا خاں رضاؔ اور محسنؔ کاکوروی نے اپنے شعری اظہار میں صرف نعت کو جگہ دی جن کا کلام آج بھی زبان زد خاص و عام ہے ان کے بعد نعت پھر اپنی روایتی حدود میں سمٹ گئی یعنی مثنوی کی ابتدا یا غزل کے چند اشعار میں۔  اس ضمن میں ’’مسدسِ حالی‘‘ کی یہ اہمیت ہے کہ اس کے اختتام پر شاعر نے حضور( صلی اللہ علیہ و سلم )سے خطاب کیا ہے۔  حالیؔ کے بعد حفیظؔ جالندھری کا ’’شاہ نامۂ اسلام‘‘ جس میں سیرت کے مضامین باندھے گئے ہیں،  جدید نعت نگاری کے لیے تازیانہ بن گیا۔  اقبالؔ کی شاعری عشقِ رسول( صلی اللہ علیہ و سلم )کے تجربہ پسند شعری اظہار کی مثال ہے۔  اس میں نعت کے عنوان سے کوئی نظم نہیں ملتی لیکن رسول اللہ (صلی اللہ علیہ و سلم ) کے افکار کی شاعرانہ تفسیر و توضیح نے اقبالؔ کی کئی نظموں کو نعتیہ رنگ دے دیا ہے۔

        انجمن ترقی پسند مصنفین اور حلقۂ اربابِ ذوق کے غلبے نے اس صنف کو ایک بار تو شاعری سے خارج ہی کر دیا کیوں کہ ان فن کاروں کے نظریات مادّی،  جسمانی اور غیر مذہبی( بل کہ مذہب بے زار) نظریات تھے مگر آزادی کے کچھ عرصے بعد جدید شاعروں نے پھر اسمِ محمد(صلی اللہ علیہ و سلم ) سے اجالا کرنے کی تخلیقی کوشش شروع کر دی ہیں۔  ان میں اسلامی ادب کے بعض پیرو کار حفیظؔ میرٹھی،  نعیمؔ صدیقی،  یونسؔ قنوجی اور حفیظؔ تائب کے نام اہمیت رکھتے ہیں۔  عمیقؔ حنفی اور عبدالعزیز خالدؔ نے اپنی طویل نعتیہ نظموں ’’صلصلۃ الجرس‘‘ اور ’’فارقلیط‘‘ کے لیے،  جن میں زبان و بیان کے گراں قدر تجربات ملتے ہیں،  خاصی شہرت پائی ہے،  ہندو پاک میں آج کئی شعرا صرف نعت کہنے میں مصروف ہیں۔ ‘‘(17)

        مشہور و معروف محققین و ناقدین کے گراں قدر اقوال و تاثرات کی روشنی میں اس امر کی مکمل وضاحت و صراحت ہو جاتی ہے کہ نعت سرورِ عالم صلی اللہ علیہ و سلم کی تعریف و توصیف میں لکھی جانے والی منظومات ہی کو نہیں بل کہ ایسے نثری شہ پاروں کو بھی کہا جا تا ہے جن میں رسول اللہ صلی اللہ علیہ و سلم کا کسی بھی طرح سے ذکرِ خیر ہو،  اور نعت اصنافِ ادب میں نہ صرف یہ کہ شامل ہے بل کہ یہ ادب کی ہر صنف میں مسلسل لکھی جا رہی ہے۔ 

حواشی

(1)ابن منظور:لسان العرب، دار لسان العرب، بیروت ص668

(2)زبیدی :تاج العروس، با المطبعۃ الخیریۃ المنشاہ بجمالیہ، مصر ج 1، ص93

(3) المنجد:مرکزی ادارۂ تبلیغ دینیات، دہلی، ص1028

(4) ولیم ٹامسن ورٹے :معجم العربیہ، مولی رام منیجر مفید عام پریس، چٹر جی روڈ، لاہور،  ص1121/1122

(5) عبد الحفیظ بلیاوی، مولوی:مصباح اللغات،  ایچ ایم سعید اینڈ کمپنی لاہور، ص887

(6) خانصاحب سید احمد دہلوی،  مولوی : فرہنگ آصفیہ، نیشنل اکاڈمی دہلی، 1974ء ج4، ص579

(7) غیاث الدین:غیاث اللغات، رزاق پریس، کان پور 1332ھ

(8)لغاتِ فارسی : پبلشر لالہ رام نرائن لال بینی مادھو، الٰہ آباد، 1931ء، ص 904

(9)لغات کشوری :مولوی تصدق حسین رضوی، دار الاشاعت کراچی، ص537

(10) نور اللغات : مولوی نورالحسن نیّرؔ کاکوروی، قومی کونسل برائے فروغِ اردو زبان، نئی دہلی، 1998ء، ص 833

(11) فیروزالدین، مولوی:فیروز اللغات، ایجوکیشنل پبلشنگ ہاؤ س دہلی، ص683

(12) سلیم شہزاد:فرہنگ ادبیات، منظر نما پبلشرز، مالیگاؤں،  ص709

(13)اوج: نعت نمبر ج2، گورنمنٹ کالج شاہدرہ، لاہور ص562

(14)اوج: نعت نمبر ج2، گورنمنٹ کالج شاہدرہ، لاہور ص155

(15) رفیع الدین اشفاقؔ ، ڈاکٹر :اردو کی نعتیہ شاعری، اردو اکیڈمی،  سندھ،  1976ء، ص 21

(16)عبدالنعیم عزیزی، ڈاکٹر :رضا گائڈ بک، رضا اکیڈمی برطانیہ، ص2

(17)سلیم شہزاد:فرہنگِ ادبیات،  منظر نما پبلشرز،  مالیگاؤں،  ص 709/710

٭٭٭

ب: نثری نعت

جیسا کہ تحقیق کی جاچکی ہے کہ ہر وہ ادب پارہ جس میں حضور رحمتِ عالم صلی اللہ علیہ و سلم کی تعریف و توصیف بیان کی جائے یا جس کے سننے،  پڑھنے سے سے قاری یا سامع بارگاہِ رسالت مآب صلی اللہ علیہ و سلم کی طرف متوجہ ہو وہ نعت ہے، خواہ وہ نظم ہو یا نثر۔

        اگر دیکھا جائے تو نعت گوئی کا آغاز میثاق النبین ہی سے ہو گیا تھا اور اس کے بعد حضرت آدم علیہ السلام سے حضرت عیسیٰ علیہ السلام تک تمام انبیائے کرام کی امتوں کے نیک طینت اور پاک باز افراد کو اس بات کا علم تھا کہ لوحِ محفوظ پر جن کا نام لکھا گیا ہے وہ ہی سب سے محترم و بزرگ ہستی ہیں۔  اس لحاظ سے نبیِ کریم صلی اللہ علیہ و سلم کی شانِ اطہر و اقدس میں مدحت و تہنیت کا نذرانہ پیش کرنے کو وہ باعثِ سعادت سمجھتے تھے۔ آسمانی کتب و صحائف میں نبیِ کریم صلی اللہ علیہ و سلم کی ولادت و بعثتِ طیبہ کے اذکار بڑی شان کے ساتھ موجود ہیں۔ یہی نہیں بل کہ انبیائے سابقہ نے اپنی امتوں کو آپ صلی اللہ علیہ و سلم کی آمد آمد کی بشارتیں بھی سنائی ہیں۔  

        حضرت آدم و حضرت شیث و حضرت یعقوب اور حضرت موسیٰ علیہم السلام کے علاوہ حضرت عیسیٰ،  حضرت اشعیاہ،  حضرت دانیال،  حضرت ابراہیم و اسماعیل،  حضرت ارمیاہ، اور حضرت ہبقوق علیہم السلام نے بھی آپ صلی اللہ علیہ و سلم کی آمد آمد کی عظیم خوش خبریاں سنائیں۔  یہ بشارتیں ولادتِ نبوی صلی اللہ علیہ و سلم سے قبل،  ایک سے ڈھائی ہزار برس کے درمیان سنائی گئیں۔  نبیِ اکرم صلی اللہ علیہ و سلم کی آمد کا انتظار تمام انبیائے کرام کی امتوں اور نیک بندوں کو تھا۔  یہی وجہ ہے کہ احمدِ مجتبیٰ صلی اللہ علیہ و سلم کی ولادتِ باسعادت کے بعد شاہِ حبش نجاشی، عبداللہ بن سلام،  کعب احبار،  سلمان فارسی (رضی اللہ عنہم)کہ علمائے یہود و نصاریٰ میں تھے۔ ان حضرات نے توریت،  انجیل اور انبیائے کرام کی بشارتوں اور پیش گوئیوں کی تصدیق کی اور مشرف بہ اسلام ہوئے اور ان میں شاہِ حبش نجاشی کے علاوہ جملہ حضرات کو حضور اکرم صلی اللہ علیہ و سلم کی صحبتِ بابرکت نصیب ہوئی جس پر جملہ موجوداتِ عالم کو رشک ہے۔

        آسمانی کتب توریت،  زبور،  انجیل اور دیگر آسمانی صحائف میں حضور انور صلی اللہ علیہ و سلم کی ولادتِ باسعادت کا تذکرۂ خیر موجود ہے ان تذکروں کو ہم نثری تہنیت نامے قرار دے سکتے ہیں۔  ولادتِ باسعادت سے قبل اور بعد حضور انور صلی اللہ علیہ و سلم کی تعریف و توصیف اسی طرح جاری رہی اور جب اللہ تعالیٰ نے آپ کو اعلانِ نبوت کا حکم دیا اور وحی کے ذریعہ آپ پر قرآنِ کریم نازل کیا تو ساری دنیا نے دیکھا کہ وہ ایک مکمل ضابطۂ حیات ہونے کے ساتھ ہی اللہ رب العزت کی عظمت اور وحدانیت کا آئینہ دار ہے اور سرورِ عالم صلی اللہ علیہ و سلم کی مدح و ستایش کا مظہر بھی۔ خالق کائنات نے اس مقدس کتاب میں جگہ جگہ اپنی حمد وثنا بھی فرمائی ہے اور اپنے حبیبِ  پاک صاحبِ لولاک صلی اللہ علیہ و سلم کی نعت و صفات بھی بیان کی ہیں۔ جو کہ نثری نعت کے بہترین نمونے ہیں ، چند آیاتِ طیبات خاطر نشین ہوں  :

        وَمَا اَرسَلنٰکَ اِلَّاکاَ فَّۃً لِّلنَاس(اے محبوب ہم نے تم کو نہ بھیجا مگر ایسی رسالت سے جو تمام آدمیوں کو گھیرنے والی ہے۔ سورہ سبا آیت 28)اِنَّکَ لَعَلیٰ خُلُقٍ عَظِیم(بے شک تمہاری خوٗ بوٗ بڑی شان کی ہے۔ سورہ قلم آیت4) مَا کَانَ مُحَمُّدُ‘ اَبَا اَحَدٍمِّنْ رِّجَالِکُم وَلٰکن رَّسولَ اللّٰہِ و خاتَمَ النبیین(محمد تمہارے مردوں میں کسی کے باپ نہیں،  ہاں ! اللہ کے رسول ہیں اور سب نبیوں میں پچھلے۔ سورہ احزاب آیت 40)اِنَّا اعطینٰک الکوثر (اے محبوب بیشک ہم نے تمھیں بیشمار خوبیاں عطا فرمائیں۔ سورہ کوثر آیت 1)لاتَر فَعُوا اَصواتَکُم فَوقَ صوتِ النَّبی(اپنی آوازیں اونچی نہ کرو اس غیب بتانے والے (نبی) کی آواز سے۔  سورہ حجرات آیت 2)قد جآء کُم مِنَ اللّٰہِ نورُ‘ وَّکِتابُ‘ مُّبین(بے شک تمھارے پاس اللہ کی طرف سے ایک نور آیا اور روشن کتاب۔ سورہ مائدہ آیت 15) یَا اَیُّھَا النَّبِیُ اِنَّا اَرْسَلنٰکَ شَاہِدًا وَّمُبَشِّرًا وَّنَذِیرًا(بیشک ہم نے تمھیں بھیجا حاضر و ناظر اور خوشی اور ڈر سناتا۔ سورہ فتح آیت8)  وَرَفَعَنا لَکَ ذِکْرَک(اور ہم نے تمھارے لیے تمھارا ذکر بلند کر دیا۔ سورہ انشراح آیت4 )وَلَو اَنَّہُم اِذ ظَلَمُوا اَنفُسَہُم جَآءُ  وْکَ فَاسْتَغفِرُاللّٰہَ وَاسْتَغفَرَ لَھُمُ الرَّسُولُ لَوَ جَدُوا اللّٰہَ تَوَّابًا رَّحِیْمًا (اور وہ جب اپنی جانوں پر ظلم کریں، تو اے محبوب تمہارے حضور حاضر ہوں اور پھر اللہ سے معافی چاہیں اور رسول ان کی شفاعت فرمائے تو ضرور اللہ کو بہت توبہ قبول کرنے والا مہربان پائیں۔ سورہ نسآء آیت 64)  وَمَا یَنْطِقُ عَنِ الْہَوَی اِن ہُوَ اِلَّا وَحْیُ‘ یُّوحیٰ(اور وہ کوئی بات اپنی خواہش سے نہیں کرتے وہ تو نہیں مگر وحی جو انھیں کی جاتی ہے۔  سورہ نجم آیت3/4)وَمَا اَرسَلنٰکَ اِلَّا رَحْمَۃَ لَّلعالَمِین(اور ہم نے تمھیں نہ بھیجا، مگر رحمت سارے جہان کے لیے۔ سورہ انبیاء آیت107)(تراجم از: کنز الایمان)

        یہاں نثری نعت کے نمونے کے طور پر چند آیات ہی نقل کرنے پر اکتفا کیا گیا ہے مگر حق تو یہ ہے کہ اللہ تبار ک و تعالیٰ نے قرآنِ  کریم میں بے شمار جگہوں پر رسول کریم صلی اللہ علیہ و سلم کا ذکرِ خیر کیا ہے اور ان پر خود درود و سلام بھی بھیجا ہے۔ اللہ تعالیٰ نے ایک بالکل ہی منفرد انداز میں اپنے محبوب کی تعریف یوں بھی کی ہے کہ  لَا تَجْعَلُوا دُعَآ ءَ الرَّسُولِ  بَیْنَکُمْ کَدُعَا ٓءِ بَعْضِکُمْ بَعْضًا (رسول کے پکارنے کو آپس میں ایسا نہ ٹھہرا لو جیسا تم میں ایک دوسرے کو پکارتا ہے۔ سورہ نورآیت63)۔۔ ۔۔۔ایسی شان اور رفیع مرتبہ اللہ تعالیٰ نے صرف اپنے محبوب کو بخشا۔  یہ بات قرآن شریف سے اس طرح ثابت ہے کہ خالقِ کائنات نے ’’یا آدم، یا موسیٰ اور یا عیسیٰ ‘‘کے انداز میں حضور صلی اللہ علیہ و سلم کو مخاطب نہیں کیا بل کہ انھیں بڑے احترام سے ’’یا ایھا الرسول، یا ایھا النبی،  یا ایھا المزمل، یا ایھا المدثر‘‘  وغیرہ کہہ کر پکارا ہے۔  اور بلا شبہہ انھیں ایسی شان اور وجاہت عطا کی ہے جو کسی دوسرے کے حصے میں نہیں آئی۔ یہاں یہ بات پایۂ ثبوت کو پہنچتی ہے کہ قرآنِ کریم سرورِ عالم صلی اللہ علیہ و سلم کی نعت بھی ہے اور کامل و اکمل ترین اوّلین درس گاہِ نعت بھی۔

        واضح ہو کہ رحمتِ عالم صلی اللہ علیہ و سلم کی ولادتِ باسعادت کے بعد اور بچپن سے عالمِ شباب تک آپ کو جتنے لوگوں نے بھی دیکھا آپ کی تعریف و توصیف بیان کی۔ ان کلمات کو بھی نثری نعت کے زمرے میں رکھا جا سکتا ہے۔ اس ضمن میں حضور انور صلی اللہ علیہ و سلم کے نورانی پیکر سے متعلق عرب کی بدّو خاتون اُمِّ معبد کے اس بیان کو بہ طورِ مثال پیش کرنا غیر مناسب نہ ہو گا جو اس نے اپنے خاوند کو دیا  : 

        ’’ام معبد کہنے لگی۔  میں نے ایک ایسا مرد دیکھا جس کا حُسن نمایاں تھا،  جس کی ساخت بڑی خوب صورت اور چہرہ ملیح تھا۔  نہ رنگت کی زیادہ سفیدی اس کو معیوب بنا رہی تھی اور نہ گردن اور سرکا پتلا ہونا اس میں نقص پیدا کر رہا تھا۔  بڑا حسین،  بہت خوب روٗ۔  آنکھیں سیاہ اور بڑی تھیں،  پلکیں لانبی تھیں۔  اس کی آواز گونج دار تھی۔  سیاہ چشم۔  سرمگین۔  دونوں ابروٗ باریک اور ملے ہوئے۔  گردن چمک دار تھی۔  ریشِ مبارک گھنی تھی۔  جب وہ خاموش ہوتے تو پُر وقار ہوتے۔  جب گفتگو فرماتے تو چہرہ پُر نور اور با رونق ہوتا۔  شیریں گفتار۔  گفتگو واضح ہوتی نہ بے فائدہ ہوتی نہ بے ہودہ۔  گفتگو گویا موتیوں کی لڑی ہے جس سے موتی جھڑ رہے ہوتے۔  دور سے دیکھنے پر سب سے زیادہ با رعب اور جمیل نظر آتے۔  اور قریب سے سب سے زیادہ شیریں اور حسین دکھائی دیتے۔  قد درمیانہ تھا۔  نہ اتنا طویل کہ آنکھوں کو بُرا لگے۔  نہ اتنا پست کہ آنکھیں حقیر سمجھنے لگیں۔  آپ دو شاخوں کے درمیان ایک شاخ کی مانند تھے جو سب سے سر سبز و شاداب اور قد آور ہو۔  ان کے ایسے ساتھی تھے جو ان کے گرد حلقہ بنائے ہوئے تھے۔  اگر آپ انہیں کچھ کہتے تو فوراً تعمیل کرتے۔  اگر آپ انہیں حکم دیتے فوراً بجا لاتے۔  سب کے مخدوم۔  سب کے محترم۔ ‘‘ (1)

        نبیِ کریم صلی اللہ علیہ و سلم کے خدا دادحسن و جما ل کے بارے میں دو چار یا دس بیس کی یہ رائے نہ تھی بل کہ ہر وہ شخص جس کو قدرت نے ذوقِ سلیم کی نعمت سے نوازا ہوتا،  وہ آ پ صلی اللہ علیہ و سلم کو دیکھ کراسی طرح مسحور ہو جایا کرتا اور ہر ایک کی زبان سے بے ساختہ آپ کے حسن و جمال کی تعریف نکلنے لگتی۔ آپ صلی اللہ علیہ و سلم کو جو دیکھتا سو جان سے قربان ہونے لگتا دوست،  دشمن،  اپنے اور بے گانے میں کوئی امتیاز باقی نہیں رہتا۔

        اسی طرح حضرت جعفر طیّار رضی اللہ تعالیٰ عنہ کا وہ بے مثل و بے نظیر خطبہ جو آپ نے نجاشی بادشاہ کے دربار میں پیش فرمایا تھا وہ بھی نثری نعت کا اعلا نمونہ اور عمدہ شاہ کار تصور کیا جاتا ہے ، ذیل میں اردو ترجمہ نشانِ خاطر فرمائیں  :

        ’’اے بادشاہ! ہم جاہل قوم تھے،  بتوں کی پوجا کیا کرتے۔  مردار کھایا کرتے اور بد کاریاں کیا کرتے اپنے رشتہ داروں کے ساتھ اپنے پڑوسیوں کے ساتھ بے رحمی کا سلوک کرتے ہم میں سے طاقت ور،  غریب کو کھا جایا کرتا۔  ہمارا یہ نا گفتہ بہ حال تھا کہ اللہ تعالیٰ نے ہماری طرف ہم میں سے ایسا رسول بھیجا جس کے نسب کو بھی ہم جانتے ہیں جس کی صداقت،  امانت اور عفت سے بھی ہم اچھی طرح آگاہ ہیں اس نے ہمیں اللہ تعالیٰ پر ایمان لانے کی دعوت دی۔  کہ ہم اس کو وحدہٗ لاشریک مانیں۔  اور اسی کی عبادت کریں اور وہ پتھر اور بت جن کی پوجا ہم اور ہمارے آبا و اجداد کیا کرتے تھے ان کی بندگی کا پٹہ اپنی گردن سے اتار پھینکیں۔  اس نے ہمیں حکم دیا کہ ہم سچ بولیں۔  امانت میں خیانت نہ کریں۔  رشتہ داروں کے ساتھ اچھا سلوک کریں۔  ہم سائیوں کے ساتھ عمدگی سے پیش آئیں۔  برے کاموں سے اور خوں ریزیوں سے باز رہیں۔  اس نے ہمیں فسق و فجور،  جھوٹ بولنے،  یتیموں کا مال کھا نے،  پاک دامن عورتوں پر جھوٹی تہمت لگانے سے منع کیا اور ہمیں حکم دیا کہ ہم صرف اللہ تعالیٰ کی عبادت کریں۔  کسی چیز کو اس کا شریک نہ بنائیں۔  نیز اس نے ہمیں یہ حکم دیا کہ ہم نماز پڑھیں زکوٰۃ دیں اور روزے رکھیں۔  ‘‘(2)

        نثری نعت کے ذیل میں بخاری شریف،  مسلم شریف،  ابن ماجہ، نسائی شریف، مشکوٰۃ شریف اور ترمذی شریف کے ابوابِ فضائل نیز مختلف اقسام کے درود شریف وغیرہ شمار کیے جاتے ہیں۔  اردو زبان میں امام العلما ء مولانا نقی علی خاں بریلوی ( والدِ ماجد امام احمد رضا بریلوی) کی ’’تفسیر سورۂ الم نشرح‘‘ اور ’’سرور القلوب‘‘ کی بعض عبارتیں تو نثر میں نعت نگاری کی ایسی اعلا ترین مثالیں ہیں کہ پڑھتے ہوئے کیف آگیں جذبات سے روح وجد کر اُٹھتی ہے۔  ’’تفسیرِ سورۂ الم نشرح‘‘ کی ایک خاصی طویل،  عشق و محبتِ رسول صلی اللہ علیہ و سلم اور صفاتِ رسولِ مقبول صلی اللہ علیہ و سلم کے پُر لطف بیان سے معمور عبارت خاطر نشین فرمائیں،  جو نثری نعت کے ایک عمدہ شاہ کار سے کم نہیں،  اس کا ایک ایک فقرہ اپنی جگہ خود ایک مکمل اور بہترین نعت ہے  :

’’سرورِ بنی آدم۔۔ روحِ روانِ عالم۔۔ انسان عین وجود۔۔ دلیلِ کعبۂ مقصود۔۔ کاشفِ سرِّ مکنون۔۔ خازنِ علمِ مخزون۔۔ اقامتِ حدود و احکام ۔۔ تعدیلِ ارکانِ اسلام ۔۔ امامِ جماعتِ انبیا۔۔ مقتدائے زمرۂ اتقیا۔۔ قاضیِ مسندِ حکومت۔۔ مفتیِ دین و ملت۔۔ قبلۂ اصحابِ صدق و صفا۔۔ کعبۂ اربابِ حلم و حیا۔۔ وارثِ علومِ اولین۔۔ مورثِ کمالاتِ آخرین۔۔ مدلولِ حروفِ مقطعات۔۔ منشائے فضائل و کمالات۔۔ منزلِ نصوصِ قطعیہ ۔۔ صاحبِ آیتِ بینہ۔۔ حجت حق الیقین۔۔ تفسیرِ قرآنِ مبین۔۔ تصحیح علومِ متقدمین ۔۔ سندِ انبیا و مرسلین۔۔ عزیزِ مصر احسان۔۔ فخرِ یوسفِ کنعان۔۔ مظہرِ حالاتِ مضمرہ۔۔ مخبرِ اخبارِ ماضیہ۔۔ واقفِ امورِ مستقبلہ۔۔ عالمِ احوالِ کائنہ ۔۔ حافظِ حدودِ شریعت۔۔ ماحیِ کفر و بدعت ۔۔ قائدِ فوجِ اسلام ۔۔ دافعِ جیوشِ اصنام ۔۔ نگینِ خاتمِ سروری ۔۔ خاتمِ نگینِ پیغمبری۔۔ فاتح مغلقاتِ حقیقت۔۔ سرِّ اسرارِ طریقت۔۔ یوسفِ کنعان جمال۔۔ سلیمانِ ایوانِ جلال۔۔ منادیِ طریقِ رشاد۔۔ سراجِ اقطار وبلاد۔۔ اکرمِ اسلاف ۔۔ اشرفِ اشراف۔۔ لسانِ حجت۔۔ طرازِ مملکت۔۔ نورسِ گلشنِ خوبی ۔۔ چمن آرائے باغِ محبوبی۔۔ گلِ گلستانِ خوش خوئی۔۔ لالۂ چمنستانِ خوب روئی۔۔ رونقِ ریاضِ گلشن۔۔ آرایشِ نگارستانِ چمن۔۔ طرۂ ناصیۂ سنبلستان۔۔ قرۂ دیدۂ نرگستان۔۔ گل دستۂ بہارستانِ جنان۔۔ رنگ افزائے چہرۂ ارغواں ۔۔ ترطیبِ دماغِ گل روئی ۔۔ طراوتِ جوے بارِ دل جوئی ۔۔ تراوشِ شبنمِ رحمت۔۔ توتیائے چشمِ بصیرت۔۔ نسرینِ حدیقۂ فردوسِ بریں ۔۔ رَوحِ رائحہ روحِ ریاحین۔۔ چمن خیابان زیبائی۔۔ بہار افزائے گلستانِ رعنائی۔۔ نخل بند بہارِ نو آئین ۔۔ رنگ آمیز لالہ زارِ رنگین ۔۔ رنگ روے مجلس آرائی۔۔ رونقِ بزمِ رنگیں ادائی۔۔ گل گونہ بخش چہرۂ گل نار ۔۔ نسیمِ اقبالِ بہارِ ازہار ۔۔ نگہت عنبر بیزانِ گل زار ۔۔ نفحۂ مشک ریزانِ موسمِ بہار ۔۔ اصلِ اصول۔۔ سرا بستانِ ملکوت۔۔ بیخِ فروغِ نخلستانِ ناسوت ۔۔ فارسِ میدانِ جبروت ۔۔ شہ سوارِ مضمارِ لاہوت ۔۔ قمری سرو یکتائی ۔۔ تدرو باغِ دانائی ۔۔ شاہ بازِ آشیانِ قدرت ۔۔ طاوسِ مرغ زارِ جنت ۔۔ شگوفۂ شجرۂ محبوبیت ۔۔ ثمرۂ سدرۂ مقبولیت ۔۔ نوبادۂ گل زارِ ابراہیم ۔۔ نورسِ بہارِ جنتِ نعیم ۔۔ اعجوبۂ صنعت کدۂ بو قلموں ۔۔ زینتِ کارگاہِ گوناگوں ۔۔ لعلِ آب دارِ بدخشانِ رنگینی ۔۔ دُرِّ یتیم گوش مہ جبینی ۔۔ جگر گوشۂ کانِ کرم ۔۔ دست گیرِ درماندگانِ اُمم ۔۔ یاقوتِ نسخۂ امکان ۔۔ روحِ روانِ عقیق و مرجان ۔۔ خزانۂ زواہرِ ازلیہ۔۔گنجینۂ جواہرِ قدسیہ ۔۔گوہرِ محیطِ احسان ۔۔ ابرِ گہر بارِ نیساں ۔۔ لوٗ لوٗئے بحرِ سخاوت وعطا ۔۔ گہرِ دریائے مروت و حیا ۔۔ مشک بار صحرائے ختن ۔۔ گل ریز دامن گلشن ۔۔ غالیہ سائے مشامِ جان ۔۔ عطر آمیز دماغِ قدسیاں ۔۔ جوہرِ اعراض و جواہر ۔۔ منشائے اصنافِ زواہر ۔۔ مخزنِ اجناسِ عالیہ ۔۔ معدنِ خصائصِ کاملہ ۔۔ مقوم نوعِ انساں ۔۔ ربیعِ فصلِ دوراں ۔۔ مکمل انواعِ سافلہ۔۔ مربی نفوسِ فاضلہ ۔۔ اخترِ برجِ دل بری ۔۔ خورشیدِ سمائے سروری ۔۔ آبروے چشمۂ خورشید ۔۔ چہر ہ افروز ہلالِ عید ۔۔ ہلالِ عیدِ شادمانی۔۔ بہارِ باغِ کام رانی ۔۔ صفائے سینۂ نیّرِ اعظم ۔۔ نورِ دیدۂ ابراہیم و آدم ۔۔زیبِ نجمِ گلستاں ۔۔ گلِ ماہ تابِ باغِ آسماں ۔۔ مُشرقِ دائرۂ تنویر ۔۔ مَشرقِ آفتابِ منیر ۔۔ شمسِ چرخِ استوا ۔۔ چراغِ دودمانِ انجلا۔۔ مجلیِ نگار خانۂ کونین ۔۔ سیارۂ فضائے قاب قوسین ۔۔ زہرۂ جبینِ انوار ۔۔ غرۂ جبہۂ اسرار ۔۔عقدہ کشائے عقدِ ثریا ۔۔ ضیائے دیدۂ یدِ بیضا ۔۔ نورِ نگاہِ شہود ۔۔ مقبولِ ربِّ ودود ۔۔ بیاضِ روئے سحر ۔۔ طرازِ فلکِ قمر ۔۔ جلوۂ انوارِ ہدایت ۔۔ لمعانِ شموسِ سعادت ۔۔ نورِ مردمکِ انسانیت ۔۔ بہائے چشمِ نورانیت ۔۔ شمعِ شبستانِ ماہِ منور ۔۔ قندیلِ فلکِ مہر انور ۔۔ مطلعِ انوارِ ناہید ۔۔ تجلیِ برق و خورشید ۔۔ آئینۂ جمالِ خوب روئی ۔۔ برقِ سحابِ دل جوئی ۔۔ مشعلِ خور تابِ لامکاں ۔۔ تربیع ماہ تابِ درخشاں ۔۔ سہیلِ فلکِ ثوابت ۔۔ اعتدالِ امزجۂ بسائط۔۔ مرکزِ دائرۂ زمین و آسماں ۔۔ محیطِ کرۂ فعلیت و امکاں ۔۔ مربع نشینِ مسندِ اکتائی ۔۔ زاویہ گزینِ گوشۂ تنہائی ۔۔ مسند آرائے ربعِ مسکوں ۔۔ رونقِ مثلثات گردوں ۔۔ معدنِ نہارِ سخاوت۔۔منطقۂ بروجِ سعادت ۔۔ اوجِ محدبِ افلاک ۔۔ رونقِ حضیضِ خاک ۔۔ اسدِ میدانِ شجاعت ۔۔ اعتدالِ میزانِ عدالت ۔۔ سطحِ خطوطِ استقامت ۔۔ حاویِ سطوحِ کرامت۔۔ طبیبِ بیمارانِ ضلالت ۔۔ نباضِ محمومانِ شقاوت ۔۔ علاجِ طبائعِ مختلفہ ۔۔ دافعِ امراضِ متضادہ ۔۔ جوارشِ مریضانِ محبت ۔۔ معجونِ ضعیفانِ امت ۔۔ قوتِ دل ہائے ناتواں ۔۔ آرامِ  جاں ہائے مشتاقاں ۔۔ تفریحِ قلوبِ پژمردہ ۔۔ دوائے دل ہائے افسردہ ۔۔ مقدمۂ قیاسِ معرفت ۔۔ ممہدِ قواعدِ محبت ۔۔ عقلِ اول سلسلۂ عقول ۔۔ مبدیِ ضوابطِ فروع و اصول ۔۔ نتیجۂ استقرائے مبادیِ عالیہ ۔۔ خلاصۂ مدارکِ ظاہرہ و باطنہ ۔۔ رابطۂ علت و معلول ۔۔ واسطۂ جاعل و مجعول ۔۔ مدرکِ نتائجِ محسوسات ۔۔ مہبطِ اسرارِ مجردات ۔۔ جامعِ لطائفِ ذہنیہ۔۔ مجمعِ انوارِ خارجیہ ۔۔ حقیقتِ حقائقِ کلیہ ۔۔ واقفِ اسرارِ جزئیہ ۔۔ مبطلِ مزخرفاتِ فلاسفہ ۔۔ مثبتِ براہینِ قاطعہ ۔۔ اوسطِ طرفینِ امکان و وجوب ۔۔ واسطۂ ربطِ طالب و مطلوب۔۔ معلمِ دبستانِ تفرید ۔۔ مدرسِ مدرسۂ تجرید ۔۔ سالکِ مسالکِ طریقت ۔۔ دانائے رموزِ حقیقت ۔۔ اثباتِ وحدتِ مطلقہ ۔۔ برہانِ احدیتِ مجردہ ۔۔ خزینۂ اسرارِ الٰہیہ ۔۔ گنجینۂ انوارِ قدسیہ ۔۔ تصفیۂ قلوبِ کاملہ ۔۔ تزکیۂ نفوسِ فاضلہ ۔۔ سرِ دفترِ دیوانِ ازل ۔۔ خاتمِ صحفِ ملل ۔۔ تخمِ مزرعِ حسنات ۔۔ ترغیبِ  اہلِ سعادات ۔۔ جمعِ محاسنِ فتوت ۔۔کفایتِ حوائجِ خلقت ۔۔ ہادیِ سبیلِ رشاد ۔۔ استیعابِ قواعدِ سداد ۔۔ شیرازۂ مجموعۂ فصاحت ۔۔ بہجتِ حدائقِ بلاغت ۔۔ سراجِ وہاجِ ہدایت ۔۔ نسخۂ کیمیائے سعادت ۔۔ تکمیلِ دلائلِ نبوت ۔۔ صحیفۂ احوالِ آخرت ۔۔ منسح منتہی الا رب ۔۔ لُبِ اصولِ ادب ۔۔ بیاضِ زواہرِ جواہر ۔۔ تمہیدِ نوادرِ بصائر ۔۔ مقتدائے صغیر و کبیر ۔۔ مفتاحِ فتحِ قدیر ۔۔ میزبانِ نزل ابرار ۔۔ مفیدِ مستفیدانِ اسرار ۔۔ قلزمِ دررِ قلائد ۔۔ درجِ جواہرِ عقائد ۔۔ تیسیرِ اصولِ تاسیس ۔۔ روضۂ گلستانِ تقدیس ۔۔ احیائے علوم و کمالات ۔۔ مطلعِ اشعۂ لمعات ۔۔ مقدمۂ طبقاتِ بنی آدم ۔۔ رہِ نمائے دینِ مسلم و محکم ۔۔ تشریحِ حجتِ بالغہ ۔۔ تصریحِ واقعاتِ ماضیہ۔۔ تقریرِ قصصِ انبیا ۔۔ تحریرِ معارفِ اصفیا ۔۔ دلیلِ مناسکِ ملت ۔۔ منتقیِ اربابِ بصیرت ۔۔ وسیلۂ امدادِ فتاح ۔۔ سببِ نزہتِ ارواح ۔۔ خازنِ کنزِ دقائق ۔۔ درِ مختار بحرِ رائق ۔۔ ذخیرۂ جواہرِ تفسیر ۔۔ مشکوٰۃِ مفاتیحِ تیسیر ۔۔ جامعِ اصول ۔۔ غرائب معالم ۔۔ مصدرِ صحاح بخاری و مسلم ۔۔ منظورِ مدارکِ عالیہ۔۔ مختارِ عقولِ کاملہ ۔۔ ملتقطِ کتابِ تکوین ۔۔ نہایتِ مطالبِ مومنین ۔۔ انسانِ عیونِ ایمان ۔۔ قرۃ عینینِ انسان ۔۔ منبعِ شریعت و حکم ۔۔ مجمعِ بحرین حدوث و قدم ۔۔ خلاصۂ مآرب سالکین ۔۔ انتہائے منہاج عارفین ۔۔ شرفِ ائمۂ دین ۔۔ تنزیہہ شریعتِ متین ۔۔ زبورِ غرائبِ تدقیق ۔۔ تلخیص عجائبِ تحقیق۔۔ ناقدِ نقدِ تنزیل ۔۔ ناسخِ  توریت و انجیل ۔۔ حافظِ مفتاحِ سعادت ۔۔ کشفِ غطائے جہالت ۔۔ واقفِ خزائنِ اسرار ۔۔ کاشفِ بدائعِ افکار ۔۔ عالمِ علومِ حقائق ۔۔ جذبِ قلوبِ خلائق ۔۔ زیبِ مجالسِ ابرار ۔۔ نورِ عیونِ اخیار ۔۔ تہذیبِ لطائفِ علمیہ ۔۔ تجریدِ مقاصدِ حسنہ ۔۔ بیاضِ انوارِ مصابیح ۔۔ توضیحِ ضیائے تلویح ۔۔ حاویِ علومِ سابقین ۔۔ قانونِ شفائے لاحقین ۔۔ معدنِ عجائب و غرائب ۔۔ مدارِ مکارمِ و مناقب ۔۔ نقش فصوصِ حکمیہ ۔۔ منتخب جواہرِ مضیہ ۔۔ عین علم و ایقان ۔۔ حصن حصین امتان ۔۔ تبیین متشابہاتِ قرآنیہ ۔۔ غایت بیان اشارات فرقانیہ۔۔ تنقیح دلائلِ کافیہ ۔۔ تصحیح براہینِ شافیہ ۔۔ زُبدۂ اہلِ تطہیر ۔۔ ملجائے صغیر و کبیر ۔۔ غواصِ بحارِ عرفان ۔۔ زُبدۂ اربابِ احسان ۔۔ مرقاتِ معارجِ حقیقت ۔۔ سلمِ مدارجِ معرفت ۔۔ موضحِ صراطِ مستقیمِ نجات ۔۔ اقصیِٰ معراجِ اصحابِ کمالات ۔۔ قوتِ قلوبِ ممکنات ۔۔ صفائے ینابیعِ طہارات ۔۔ وقایہ احکامِ الٰہیہ ۔۔ افقِ مبینِ انوارِ شمسیہ ۔۔ دستورِ قضاۃ و حکام ۔۔ ایضاحِ تیسیرِ احکام ۔۔ نورِ انوارِ مطالع ۔۔ تنویرِ منارِ طوالع ۔۔ کمالِ بدورِ سافرہ ۔۔ طلعتِ بوارقِ متجلیہ ۔۔ موردِ فتحِ باری ۔۔ تابشِ نورِ سراجی ۔۔ بحرِ جواہرِ درایت ۔۔ طغرائیِ منشورِ رسالت ۔۔ عدیمِ اشباہ و نظائر ۔۔ امینِ کنوزِ ذخائر ۔۔ ملخّصِ مضمراتِ عوارف ۔۔ شرحِ مبسوطِ معارف ۔۔ سراجِ شعبِ ایمان ۔۔برزخِ وجوب و امکان ۔۔ دُرِ تاجِ افاضل ۔۔ ملتقیٰ بحرِفضائل ۔۔ ناطقِ فصلِ خطاب ۔۔ میزانِ نصابِ احتساب ۔۔ منشائے فیضِ وافی ۔۔ مبدئِ علمِ کافی ۔۔ تبییضِ دُرِ مکنون ۔۔ موجبِ سرورِ محزون ۔۔ صرحِ برہانِ قاطع۔۔ نقایہ دلیلِ ساطع ۔۔ رافعِ لوائے ہدیٰ ۔۔ حکمتِ بالغۂ خدا ۔۔ ضوئِ مصباحِ عنایت ۔۔ معطیِ زادِ آخرت ۔۔ عمدۂ فتوحاتِ رحمانیہ ۔۔ مخزنِ مواہبِ لدنیہ ۔۔ نتیجۂ دلائلِ خیرات ۔۔ لمعانِ مطالعِ مسرات ۔۔ قاموسِ محیطِ اتقان ۔۔ بلاغِ مبینِ فرقان ۔۔ نہرِ خیابانِ توحید ۔۔  نورِ عینِ خورشید ۔۔ شمسِ بازغۂ مشارقِ انوار ۔۔ رونقِ ربیعِ بستانِ ابرار ۔۔ شناورِ قلزمِ ملاحت ۔۔ آب یارِ جوے لطافت ۔۔ تراوشِ ابرِ سیرابی ۔۔ ابرِ بہارِ شادابی ۔۔ سحابِ دُر افشانِ سخاوت ۔۔ نیسانِ گہر بارِ عنایت ۔۔ کوثرِ عرصۂ قیامت ۔۔ سلسبیلِ باغِ جنت ۔۔ آبِ حیاتِ رحمت ۔۔ ساحلِ نجاتِ امت ۔۔ روحِ چشمۂ حیواں ۔۔ آشنائے دریائے عرفاں ۔۔ محمد شاہدِ دیں جانِ ایماں ۔۔ محمد رحمتِ حق لطفِ یزداں ۔۔ (ﷺ)‘‘(3)

        علاوہ ازیں امام احمدرضا محدث بریلوی کی مختلف تصنیفات کے اقتباسات،  مولوی شبلی نعمانی کی نثر ’’ظہورِ قدسی‘‘،  سید سلیمان علی ندوی کے ’’خطباتِ مدراس‘‘،  مفتی محمد شریف الحق امجدی کی ’’نزہۃ القاری شرح بخاری ‘‘کی مختلف جلدیں،  پیر کرم شاہ ازہری کی سیرت پر سات مجلدات کو محیط ’’ ضیاء النبی ‘‘ کی جلد 2؍ 3؍ 4؍ 5،  اور پروفیسر ڈاکٹر محمد مسعود احمد نقش بندی مجددی کراچی کی ’’جانِ ایمان‘‘ اور ’’ جانِ جاناں‘‘ ماہر القادری کی ’’دُرِّ یتیم‘‘ اور دیگر کتبِ سیرت وغیرہ نثری نعت کے نہایت خوبصورت اور دل کش نمونوں کے طور پر سامنے آئے ہیں۔ متذکرۂ بالا کتب سے بعض کی عبارتیں ذیل میں ہدیۂ قارئین ہے  :

        ’’ہم سر اس کا دیکھا نہ سنا،  فر رسالت اس سے پیدا،  اور افسرِ شفاعت اس پر زیبا،  سرفرازانِ عالم اس کی سرکار میں فِرقِ ارادت زمینِ انکسار پر رکھتے ہیں اور سرشارانِ بادۂ نخوت اپنی سرکشی اور خود سری سے توبہ کرتے ہیں ۔۔ ۔۔ ۔۔ ۔۔ روئے روشن زلفِ سیاہ میں نمایاں ہے،  یا نورِ بصر مُردَمکِ چشم سے درخشاں،  ماہِ دو ہفتہ پُر نور عارض سے تاباں،  شمسِ بازغہ اس کے مدرسۂ تنویر میں شمسیہ خواں،  لعلِ بدخشاں کا اس کی رنگینی سے دم فنا اور گلستانِ ارم کا صرصرِ خجالت سے رنگ ہَوا۔  اس عارضۂ پُر نور کے عشق میں رنگِ رخسارِ سحر فق ہے۔  اور سینۂ ماہ شق،  مراء تِ خیال کو سکتہ،  چراغِ صبح سسکتا،  مطبخِ گل زار سرد،  رنگِ شفق زرد،  دلِ شبنم افسردہ،  روئے گل پژ مردہ،  دُربا گریاں،  مرجانِ بے جان آئینۂ حیران،  خورشید سرگرداں،  شمعِ چراغِ سحر،  عقیق خون در جگر،  لالۂ خونین کفن،  قمری طوقِ غم بہ گردن،  یاقوت بے دم،  لعل زیر بارِ غم،  یدِ بیضا دست بردل،  تدرو بے تیغِ بسمل،  بلبل کو اس گلستانِ خوبی کی یاد میں سبقِ بوستان فراموش،  اور مرغِ چمن اس گلِ رنگین کے شوق میں روز و شب نالاں و مدہوش،  آئینۂ حلب پر اگر وہ سرِّ عرب عکس افگن ہو سوزِ محبت سے گل جائے،  اور ورقِ گل پر اگر وصفِ عارضِ رنگین زیبِ  رقم ہو پیرہن میں پھولا نہ سمائے۔  یا ایہا المشتاقون بنورِ جمالہٖ صلوا علیہ و آلہٖ۔ ‘‘(4)

٭

        ’’ہاں ! جشن کی وہ رات،  راتوں کی سرتاج۔۔ رشکِ شبِ قدر،  ۔۔ نازشِ لیلۃ القدر ۔۔ ہاں ! اس رات ستارے چمک رہے تھے۔۔ چاندنی کھل رہی تھی۔۔ نور کی چادر پھیلی ہوئی تھی۔۔ فضائیں مہک رہی تھیں،  ہوائیں چل رہی تھیں،  خاموشیاں مسکرارہی تھیں ۔۔ وہ آنے والا پیکرِ بشری میں آ رہا تھا۔۔ ہاں ! رات گذر گئی،  وہ آ گیا۔۔ صبح ہو گئی،  ہر طرف چہل پہل ہے۔۔ ہر طرف خوشیاں ہی خوشیاں ہیں ۔۔ ماں خوش ہو رہی ہیں ۔۔ دادا عبدالمطلب مسکرا رہے ہیں ۔۔ چچاؤں کے دل کی کلیاں کھل رہی ہیں ۔۔ خوشی میں باندیوں کے بندھن کھل رہے ہیں ۔۔ سدا کے اسیروں کو آزادیاں مل رہی ہیں ۔۔ اللہ اللہ ! وہ پیارا،  ماں کا دُلارا،  سیہ کاروں کا سہارا کیا آیا عالم میں بہار آ گئی۔۔ اُس کی آمد آمد کی ساتویں دن خوشی منائی گئی ۔۔ دادا نے نام رکھا۔۔ محمد۔۔ مگر یہ نام تو قرنوں پہلے رکھا جا چکا تھا۔۔‘‘(5)

٭

’’حسن و جمال کا یہ داتا۔۔ جس نے سارے عالم کو حسن و جمال کی بھیک بانٹی۔۔ جس کے صدقے کائنات کے ذرّے ذرّے پر نکھار آیا ۔۔ جو کائنات کا سنگھار ہے۔۔ دیکھیے دیکھیے،  آگے قدم بڑھا رہا ہے۔۔ رُخ سے پردہ اٹھانے والا ہے۔۔ جلوہ دکھانے والا ہے۔۔ مگر وہ تو آدم (علیہ السلام) کی تخلیق سے پہلے بھی نبی تھا۔۔ دیکھنے والوں نے ا سے دیکھا بھی تھا۔۔مگر ہم نے نہ دیکھا تھا۔۔ ہم کو دکھا یا جانا تھا۔۔ اسی لیے نا معلوم کب سے اُس کی رسالت و ختمیّت کی بات ہو رہی تھی ۔۔ اس کے آنے سے صدیوں پہلے اس کے آنے کی خبریں دی جا رہی تھیں ۔۔ ذرا ماضی کی طرف چلیے،  دور ۔۔ بہت دور۔۔ سنیے سنیے۔۔ نو عمری کا زمانہ ہے،  چچا کے ساتھ شام کے سفر پر جا رہے ہیں،  اچانک بحیرہ راہب کی نظر پڑتی ہے،  بے ساختہ پکار اٹھتا ہے یہ بچہ وہی نبی ہے جس کی عیسیٰ (علیہ السلام) نے بشارت دی تھی۔۔ پھر جب جوانی میں تجارت کے لیے تشریف لے گئے تو نسطورا راہب کی نگاہ پڑ گئی وہ بھی پکار اٹھا آپ اس امت کے نبی ہیں  ۔۔‘‘(6)

٭

’’جب وہ جانِ راحت کانِ رافت پیدا ہوا۔۔ بارگاہِ الٰہی میں سجدہ کیا اور ربِّ ھب لی اُمّتی فرمایا۔۔ جب قبر شریف میں اُتاراگیا، لبِ جاں بخش کو جنبش تھی،  بعض صحابہ نے کان لگا کر سُنا، آہستہ آہستہ اُمتی فرماتے تھے ۔۔ قیامت کے روز کہ عجب سختی کا دن ہے۔۔ تانبے کی زمین۔۔ ننگے پاؤں ۔۔ زبانیں پیاس سے باہر۔۔ آفتاب سروں پر۔۔ سایے کا پتا نہیں ۔۔ حساب کا دغدغہ۔۔ مَلِکِ قہار کا سامنا۔۔ عالَم اپنی فکر میں گرفتار ہو گا۔۔ مجرمانِ بے یار دامِ آفت کے گرفتار۔۔ جدھر جائیں گے سوا نفسی نفسی اِذہبوا الیٰ غیری کچھ جواب نہ پائیں گے ۔۔ اُس وقت یہی محبوبِ غم گسار کام آئے گا ۔۔ قفلِ شفاعت اس کے زورِ بازو سے کھل جائے گا۔۔ عمامہ سرِ اقدس سے اُتاریں گے اور سر بہ سجود ہو کر’’ اُمتی ‘‘ فرمائیں گے۔۔ وائے بے انصافی!  ایسے غم خوار پیارے کے نام پر جاں نثار کرنا اور مدح و ستایش و نشرِ فضائل سے اپنی آنکھوں کو روشنی اور دل کو ٹھنڈک دینا واجب۔۔یا یہ کہ حتی الوسع چاند پر خاک ڈالے اور اِن روشن خوبیوں میں انکار کی شاخیں نکالے۔۔‘‘(7)

٭

حواشی

(1)پیر کرم شاہ ازہری، علامہ: ضیاء النبی، مطبوعہ دہلی، ج 2،  ص174/175

(2)پیر کرم شاہ ازہری، علامہ: ضیاء النبی، مطبوعہ دہلی، ج 2،  ص365

(3)نقی علی خاں بریلوی،  علامہ : تفسیرِ سورۂ الم نشرح،  رضوی کتاب گھر دہلی،  ص 4/7

(4)نقی علی خاں بریلوی،  علامہ: سرورالقلوب بذکرِ المحبوب،  فاروقیہ بک ڈپو،  دہلی،  ص 119/120

(5)محمد مسعود احمد،  پروفیسر ڈاکٹر: جانِ جاناں،  رضوی کتاب گھر،  دہلی،  1990،  ص49/50

(6)محمد مسعود احمد،  پروفیسر ڈاکٹر: جانِ جاناں،  رضوی کتاب گھر،  دہلی،  1990،  ص57

(7) احمد رضا بریلوی،  امام:مجموعۂ رسائل نور اورسایا، رضا اکیڈمی، ممبئی، 1998ء، ص 73

٭٭٭

ج: نعت گوئی کا فن۔ اقوالِ علمائے ادب کی روشنی میں

جس طرح دیگر اصنافِ سخن میں قصیدہ، مثنوی،  رباعی، غزل وغیرہ کا اپنا ایک منفرد اور جداگانہ مقام ہے۔  اسی طرح نعت بھی اپنے اصول و ضوابط کے اعتبار سے ایک منفرد مقام رکھتی ہے۔ دراصل اصنافِ ادب میں نعت سے زیادہ لطیف،  نازک اور مشکل ترین کوئی صنفِ سخن نہیں اور اس سے کماحقہٗ عہدہ بر آ ہونا ممکن بھی نہیں اس لیے کہ ذاتِ باریِ تعالیٰ خود رسول کائنات صلی اللہ علیہ و سلم کی ثنا خواں و مدح خواں ہے۔

        نعت نگار کو اپنا شہبازِ فکر بڑے ہی ہوش و خرد کے ساتھ اس پُر خطر وادی میں پرواز کرنا پڑتا ہے۔ اگر اس سے اس راہ میں ذرہ بھر بھی لغزش اور کوتاہی ہو جاتی ہے تو اس کا ایمان و اسلام اور دین و مذہب دونوں خطرے میں پڑ جاتے ہیں یہی وجہ ہے کہ نعت کے میدان میں آہستگی کے ساتھ نہایت سنبھل کر حزم و احتیاط کے دامن کو تھامے ہوئے قدم رکھنا ضروری ہے۔  اکثر نعت گو شعرا نے اس پُر خطر وادی میں بڑے ہو ش و حواس کے ساتھ قدم رکھا ہے۔ علاوہ ازیں ایسے نعت گو شعرا بھی ہیں جن سے اس راہ میں لغزشیں ہوئی ہیں اُن کا ذکر آئندہ ضمنی باب میں کیا جائے گا۔ البتہ جن نعت گو شعرا نے اس پُر وادی کے خطرات اور فنِ نعت کی اہمیت و عظمت، اس کے مقام و مرتبہ اور تقدس کو محسوس کیا ہے ان کے جذبات و احساسات کو ذیل خیالات کی روشنی میں سمجھا جا سکتا ہے۔

        امام احمد رضا محدثِ بریلوی  :

        ’’حقیقتاً نعت شریف لکھنا نہایت مشکل ہے، جس کو لوگ آسان سمجھتے ہیں اس میں تلوار کی دھار پر چلنا ہے اگر بڑھتا ہے تو الوہیت میں پہونچ جاتا ہے اور کمی کرتا ہے تو تنقیص ہوتی ہے البتہ حمد آسان ہے کہ اس میں راستہ صاف ہے جتنا چاہے بڑھ سکتا ہے،  غرض ایک جانب اصلا حد نہیں اور نعت شریف میں دونوں جانب سخت پابندی ہے۔ ‘‘ (1)

        عبد الکریم ثمرؔ :

         ’’نعت نہایت مشکل صنفِ  سخن ہے نعت کی نازک حدود کو مدِ نظر رکھتے ہوئے اس کی آفاقیت قائم رکھنا آسان کام نہیں۔ سرکارِ اقدس صلی اللہ علیہ و سلم کی شانِ اقدس میں ذرا سی بے احتیاطی اور ادنا سی لغزشِ خیال و الفاظ ایمان و عمل کو غارت کر دیتی ہے۔ ‘‘  (2)

        مجید امجد:

        ’’حقیقت یہ ہے کہ جنا بِ رسالت مآب صلی اللہ علیہ و سلم کی تعریف میں ذرا سی لغزش نعت گو کو حدودِ کفر میں داخل کر سکتی ہے۔ ذرا سی کوتاہی مدح کو قدح میں بدل سکتی ہے، ذرا سا شاعرانہ غلو ضلا لت کے زمرے میں آسکتا ہے،  ذرا سا عجزِ بیان اہانت کا باعث بن سکتا ہے۔ ‘‘   (3) 

        ڈاکٹر ابواللیث صدیقی:

        ’’نعت کے موضوع سے عہدہ برآہوناآسان نہیں موضوع کا احترام کلام کی بے کیفی اور بے رونقی کی پردہ پوشی کرتا ہے، نقاد کو نعت گو سے باز پُرس کرنے میں تامّل ہوتا ہے اور دوسری طرف نعت گو کو اپنی فنی کمزوری چھپانے کے لیے نعت کا پردہ بھی بہت آسانی سے مل جاتا ہے، شاعر ہر مرحلہ پر اپنے معتقدات کی آڑ پکڑتا ہے اور نقاد جہاں کا تہاں رہ جاتا ہے لیکن نعت گوئی کی فضا جتنی وسیع ہے اتنی ہی اس میں پرواز مشکل ہے۔ ‘‘  (4)

        ڈاکٹر اے۔ ڈی۔  نسیم قریشی:

         ’’نعت گوئی کا راستہ پُل صراط سے زیادہ کٹھن ہے اس پر بڑی احتیاط اور ہوش سے چلنے کی ضرورت ہے اس لیے اکثر شاعروں نے نعت کہنے میں بے بسی کا اظہار کیا ہے جس ہستی پر خدا خود درود بھیجتا ہے انسان کی کیا مجال کہ اس کی تعریف کا احاطہ کر سکیں۔ ‘‘ (5)

        ڈاکٹر فرمان فتح پوری:

        ’’نعت کا موضوع ہماری زندگی کا ایک نہایت عظیم اور وسیع موضوع ہے اس کی عظمت و وسعت ایک طرف عبد سے اور دوسری طرف معبود سے ملتی ہے۔ شاعر کے پا ے فکر میں ذرا سی لغزش ہوئی اور وہ نعت کے بجائے گیا حمد و منقبت کی سرحدوں میں۔  اس لیے اس موضوع کو ہاتھ لگانا اتناآسان نہیں جتنا عام طور پر سمجھا جاتا ہے۔ حقیقتاً نعت کا راستہ بال سے زیادہ باریک اور تلوار کی دھار سے زیادہ تیز ہے۔ ‘‘ (6)

        مذکورہ بالا فکر انگیز، پاکیزہ خیالات سے یہ امر واضح ہو جا تا ہے کہ ایسی ارفع و اعلا ذات کو جب شاعر اپنی شاعری کا موضوع بناتا ہے تو اسے کن سنگلاخ وادیوں سے گذرنا پڑے گا اور کس قدر قیود و آداب اس کے عنان گیر رہیں گے،  لہٰذا نعت گوئی ہماری شاعری میں سب سے زیادہ اہم اور دشوار گزار وہ موضوع ہے جو اس خیال کو استحکام بخشتا ہے کہ جن حضرات کوسرورِ کائنات صلی اللہ علیہ و سلم سے دلی تعلق اور روحانی رابطہ ہو گا یقیناً وہی اس پُر خار وادی میں قدم رکھ سکتے ہیں۔ عشقِ رسول صلی اللہ علیہ و سلم اور جذبۂ ایمانی سے سرشار ہو کر نعت گوئی کے لیے دیوانہ وار قلم برداشتہ نہیں لکھا جائے گا کہ اس طرح شاعر اس مقام تک جا سکتا ہے جو کفر واسلام اور شرک و توحید کی سرحد ہے۔ اس لیے نعت گو شاعر پر اوزان و بحور ہی کی پابندیاں عائد نہیں ہوتی ہیں بل کہ اسلام اور شریعت کاپاس و لحاظ اس کے لیے لازمی ہے۔  دراصل نعت ہماری شاعری کی وہ محبوب اور پاکیزہ صنف ہے جس کے ڈانڈے ایک طرف عبد سے اور دوسری طرف معبود سے ملتے ہیں اور اس کا راستہ بال سے باریک اور تلوار کی دھار سے زیادہ تیز ہے،  نعت گو جب تک عشقِ رسول صلی اللہ علیہ و سلم میں ڈوب کر توحید ورسالت اور عبودیت کے نازک رشتوں میں ہم آہنگی پیدا نہ کرے اس وقت تک وہ نعت گوئی کے منصب سے عہدہ بر آ نہیں ہو سکتا۔ نعت کا فن نہایت مشکل ہے، کیوں کہ نعت کے مضامین قرآن و حدیث سے ماخوذ ہوتے ہیں۔ اُن مضامین کو نظم و نثر میں اس اسلوب اور طرزِ ادا میں بیان نہیں کیا جا سکتا جسے دوسرے معشوقانِ مجازی کے ذکر کے وقت شاعراستعما ل کرتا ہے،   یہاں چشمِ زدن کے لیے بھی ادب کا دامن ہاتھ سے چھوٹ جانے پر شاعر کا اسلام و ایمان تباہ و برباد ہوسکتا ہے۔

        دراصل نعت ایک ایسے ممدوح کی تعریف و توصیف ہے جس کی بارگاہ میں بے جا مبالغہ آرائی قربتِ ممدوح کا وسیلہ نہیں بن سکتی اور نہ یہاں اس بیان کو باریابی حاصل ہے جو حق و صداقت کی ترجمانی سے محروم ہو۔ یہاں قدم قدم پر خطرات کا سامنا ہے،  کیوں کہ نعت اُس ذاتِ مقدس کی مدح سرائی ہے جن کی بارگاہ میں دانستہ و نادانستہ ذرا بھی سوے ادب حبطِ اعمال کا سبب ہوسکتا ہے، یہاں ’’با خدا دیوانہ باش و با محمد ہوشیار‘‘ کی منزل ہمہ وقت سامنے رہنی چاہیے۔ غرض یہ کہ نعت کی راہ شاعری کی سخت ترین راہوں میں سے ہے اور تمام اصنافِ سخن سے مشکل، اگر حد سے تجاوز کرتا ہے تو الوہیت کی تجلی خاکستر کر دے گی اور کمی کرتا ہے تو تنقیصِ شانِ رسالت کی تیز تلوار شاعر کی گردن ناپ دے گی لہٰذا اس فن کی نزاکتوں سے عہدہ بر آ ہونے کے لیے بڑے محتاط فکر و تخیل، ہوشیاری اور ادب شناسی کی ضرورت پڑتی ہے کسی خیال کو فنی پیکر عطا کرنے سے پہلے اس کو سو بار احتیاط کی چھلنی میں چھان لینا پڑتا ہے تب کہیں جا کر وہ معرضِ وجود میں آتا ہے اور احتیاط کے تقاضوں کو ادا کرتا ہے۔

حواشی

(1)   مصطفیٰ رضا نوری بریلوی، علامہ:الملفوظ، مطبوعہ کانپور،  ص144/145

        (2)   نقوش: رسول نمبر، لاہور، ج10، ص24

        (3)   نقوش: رسول نمبر، لاہور، ج10، ص24

        (4)   نقوش: رسول نمبر، لاہور، ج10، ص25

        (5)   نقوش: رسول نمبر، لاہور، ج10، ص25

        (6)   نقوش: رسول نمبر، لاہور، ج10، ص25

٭٭٭

د: حزم و احتیاط اور موضوع روایتیں

نعت جملہ اصنافِ ادب میں انتہائی مشکل ترین اور حزم و احتیاط کی متقاضی صنف ہے،  یہ پُل صراط پر چلنے اور تلوار پر قدم رکھنے کے مترادف ہے،  بہ قولِ عُرفیؔ    ؎

عُرفیؔ مَشَتاب ایں رہِ نعت است نہ صحرا

آہستہ کہ رہ بر دمِ تیغ است قدم را

ہشدار کہ نتواں بیک آہنگ سرودن

نعتِ شہ کونین و مدیحِ کے و جم را

        گذشتہ اوراق میں نعت اور آدابِ نعت سے متعلق جید علمائے ادب کے گراں قدر اقوال و تاثرات کو پیش کیا گیا ہے جن کے مطالعہ کے بعد نعت کا سب سے اہم ترین اور قابلِ توجہ پہلوجوسامنے آیا ہے وہ حزم و احتیاط کا ہے۔

        حزم و احتیاط نعت کے دیگر جملہ لوازمات و ضروریات میں انتہائی اہم جز ہے۔  اگر شاعر اس میں سرِ مو بھی حد سے تجاوز کرتا ہے تو الوہیت تک پہونچ کر شرک جیسے گناہِ عظیم کا ارتکاب کر بیٹھتا ہے اور اگر بال برابر بھی کمی کرتا ہے تو تنقیصِ  شانِ رسالت مآب صلی اللہ علیہ و سلم ہو جاتی ہے اور وہ بجائے ثنا خوانِ رسول کہلا نے کہ بارگاہِ رسول صلی اللہ علیہ و سلم کی شان میں بے ادب اور گستاخ سمجھا جاتا ہے اور لعنت کے طوق کا حامل ہو جاتا ہے۔ یہ دونوں باتیں شاعر کے لیے دنیا و آخرت دونوں جگہ نقصان کی باعث بنتی ہیں۔ اسی لیے نعت کے میدان میں آہستگی کے ساتھ نہایت سنبھل کر حزم و احتیاط کے دامن کو سختی سے تھامے ہوئے قدم بڑھانے کی ضرورت ہوتی ہے، نعت کے میدان میں لمحہ لمحہ با ادب، با ملاحظہ، ہوشیار کی صدائے باز گشت گونجتی رہتی ہے اور یہاں پا ے اسلوب میں ہر لحظہ شریعتِ مطہرہ کی بیڑیوں کی کار فرمائیاں ہوتی ہیں۔

        نعت دراصل حضرت محمد مصطفیٰ صلی اللہ علیہ و سلم کی مدح سرائی، تہنیت، ثنا گوئی اور قصیدہ خوانی کا نام ہے کہ جن کے اوصافِ حمیدہ اور خصائلِ جمیلہ کو خود خالقِ کائنات جل شانہٗ نے قرآنِ پاک میں بیان فرمایا ہے، کہیں اپنے پیارے حبیب صلی اللہ علیہ و سلم کو مزمل و مدثر، کہیں طہٰ و یٰٓس، کہیں منذر و نذیر،  کہیں سراجِ منیرجیسے القاب و خطابات سے یا د فرما کر محبوبِ رعنا صلی اللہ علیہ و سلم کی تقدس مآب بارگاہ کا ادب و احترام بتایا اور نعت گوئی کرنے والوں کو سلیقہ و شعور بخشا۔  دیکھا جائے تو قرآنِ مقدس کے ورق ورق میں ثنائے مصطفیٰ علیہ التحیۃ والثنا مسطور ہے اور اس کی سطر سطر بارگاہِ رسالت مآب صلی اللہ علیہ و سلم کے ادب و احترام اور تعظیم و توقیر کا نورِ بصیرت اکنافِ عالم میں عام کر رہی ہیں۔ غرض یہ کہ قرآنِ مقدس مصطفیٰ جانِ رحمت صلی اللہ علیہ و سلم کی نعت بھی ہے اور کامل و اکمل ترین اولین درس گاہِ نعت بھی۔

        قرآن و سنت اور سیرتِ طیبہ کو پیشِ نظر رکھتے ہوئے اگر نعت قلم بند کی جائے تو شاعر ہر قسم کی بے راہ روی، افراط و تفریط، غلو و اغراق اور کج بیانی سے کوسوں دور رہے گا، بہ قول رضا بریلوی    ؎

قرآن سے میں نے نعت گوئی سیکھی

تاکہ رہے احکامِ شریعت ملحوظ

        چناں چہ یہ امر ملحوظِ خاطر رکھتے ہوئے وہی شاعر نعت گوئی میں کام یاب و کام ران ہوسکتا ہے جو شریعتِ مطہرہ کے رموز واسرار سے کماحقہٗ واقف ہو اور سیرتِ طیبہ کا قاری و عامل بھی۔  کیوں کہ نعت میں خیالات کی بے راہ روی، افراط و تفریط اور غلو و اغراق کی چنداں گنجایش نہیں ہوتی یہاں لمحہ بھر کے لیے بھی زمامِ حزم و احتیاط ہاتھ سے بہ ہر صورت نہیں چھوٹنا چاہیے ورنہ شاعر کا ایمان واسلام اور دین و مذہب خطرے میں پڑ جائے گا اور جس کے نتیجے میں وہ خسر الدنیا و الآخرۃ قرار دیا جائے گا۔

        احمدِ مجتبیٰ صلی اللہ علیہ و سلم کی ذاتِ مبارکہ قیس و فرہاد،  وامق و رانجھا اور لیلا و مجنوں کی طرح بے محابا عشق و محبت کے اظہار و اشتہار کی بارگاہ نہیں بل کہ یہاں صدیق و فاروق،  عثمان و علی،  سلمان و بوذر،  خالد و ابنِ رواحہ اور دیگر جاں نثار صحابۂ کرام رضوان اللہ علیہم اجمعین کے تئیں مخلصانہ احترام و عقیدت، تعظیم و توقیر اور عشق و محبت کی خاموش عبادت مقبول ہے، اس مقام پر دلِ رنجور کے ہزار پارچے یہاں وہاں بکھیرنے والوں کا ازدحام نہیں بل کہ کفر و شرک، باطل پرستوں اور دشمنانِ مصطفیٰ (صلی اللہ علیہ و سلم )کے لشکرِ جرار کے مقابل چند فدایانِ شوق، حق پرست دیوانگانِ مصطفیٰ (صلی اللہ علیہ و سلم ) کی سر بہ کف عقیدت مندیاں اور جذبۂ ایثار و قربانی کی الفت آمیز سرشاریاں ہیں۔ اس بارگاہِ عظمت نشان میں دربارِ ایزدی کے مقرب قدسیانِ کرام اس درجہ ادب و احترام سے حاضر ہوتے ہیں کہ ان کے پروں کی آہٹ بھی محسوس نہیں ہوتی بہ قولِ علامہ اخترؔ رضا ازہری بریلوی    ؎

’’ادب گاہیست زیرِ آسماں از عرشِ نازک تر‘‘

یہاں آتے ہیں یوں قدسی کہ آوازہ نہیں پر کا

        نعتیہ ادب کا ناقدانہ مطالعہ و تجزیہ کرنے کے بعد یہ بات روزِ روشن کی طرح واضح اور عیاں ہو جاتی ہے کہ جہاں بیش تر نعت گو شعرا نے انتہائی درجہ حزم و احتیاط سے کام لیتے ہوئے بارگاہِ مصطفیٰ(صلی اللہ علیہ و سلم ) میں اپنا خراجِ عقیدت و محبت پیش کیا ہے وہیں بعض شعراسے نعت گوئی کے میدان میں لغزشیں بھی ہوئی ہیں اور ان کے ہاتھوں سے احتیاط کا دامن چھوٹتا نظر آیا ہے انھوں نے نعت میں ان مضامین کو نظم کر دیا ہے جن سے بچنا اور دور رہنا لا زمی امر تھا۔  یہی وجہ ہے کہ ان شعرا کے اشعار میں افراط و تفریط اور غلو و اغراق پایا جاتا ہے۔ ویسے نعتیہ ادب کی روح سے واقف حضرات نے تنقید و اصلاح کا کارنامہ شروع سے ہی جاری رکھا تھا۔  اس ضمن میں ایک تاریخی واقعہ کا ذکر کرنا غیر مناسب نہ ہو گا۔  اردو زبان کے مشہور شاعر جناب اطہر ہاپوڑی نے ایک نعت لکھ کر امام احمد رضا بریلوی کے پاس بہ غرضِ ملاحظہ ارسال کی،  جس کا مطلع تھا   ؎

کب ہیں درخت حضرتِ والا کے سامنے

مجنوں کھڑے ہیں خیمۂ لیلا کے سامنے

        امام احمد رضا بریلوی اس پر ناراض ہوئے اور فرمایا کہ مطلع کا مصرعِ ثانی منصبِ رسالت سے فروتر ہے۔  محبوبِ کردگار صلی اللہ علیہ و سلم کے گنبدِ خضرا کو خیمۂ لیلا سے تشبیہ دینا بے ادبی ہے اور مجنوں میاں بیچ میں کہاں سے آ گئے؟ یہ تو ذاتِ رسول صلی اللہ علیہ و سلم کا معاملہ ہے،  ساتھ ہی قلم برداشتہ یوں اصلاح فرمائی     ؎

کب ہیں درخت حضرتِ والا کے سامنے

قدسی کھڑے ہیں عرشِ معلا کے سامنے

        حضرت اطہر ہاپوڑی اس اصلاح پر اتنا خوش ہوئے کہ تا عمر اس پر نازاں رہے۔  یہ ان تمام شعرا کے لیے لمحۂ فکریہ ہے جو نعتِ پاک میں بے احتیاطی اور من گھڑت واقعات کے باب میں توجہ دلانے پر برافروختہ ہو جاتے ہیں۔  

        میدانِ نعت میں ہم دیکھتے ہیں کہ بعض اچھے اچھے اور نام ور شعرا کے کلام میں بھی بے اعتدالی پائی جاتی ہے اور وہ نعتِ رسول صلی اللہ علیہ و سلم لکھتے ہوئے راستہ بھول کر الوہیت کی منزل تک پہنچ جاتے ہیں اور بے خبری کے اندھیروں میں بھٹکتے ہوئے دکھائی دیتے ہیں ، مثلاً استاذالاساتذہ امیرؔ مینائی کے چند اشعار ملاحظہ ہوں      ؎

ظاہر ہے لفظِ اَحد و احمدِ بے میم

بے میم ہوئے عین خدا احمدِ مختار

        ظاہر ہے لفظِ ’’احد‘‘ حقیقت میں بے میم ہے یا لفظِ ’’احمد ‘‘ سے میم کو جدا کر دیں تو لفظ’’ احد‘‘ رہ جاتا ہے۔  جس سے امیرؔ مینائی یہ نتیجہ اخذ کرتے ہیں کہ ’’ احد ‘‘ و ’’احمد‘‘ ایک ہیں اور’’ احمدِ مختار‘‘  معاذ اللہ ’’عین خدا‘‘ ہیں۔  آپ مشکل سے یقین کریں گے کہ یہ امیرؔ مینائی جیسے ہوش مند شاعر کا شعر ہے۔  مزید دیکھیں       ؎

قرآن ہے خورشید تو نجم صحیفے

اللہ گہر اور صدف احمدِ مختار

        مصرعۂ ثانی شرعاً قابلِ گرفت اور لائقِ اعتراض ہے، کیوں کہ صدف سے گہر (موتی) پیدا ہوتا ہے اور امیرؔ مینائی کے مذکورۂ بالا شعر کی روشنی میں حضور رحمتِ عالم صلی اللہ علیہ و سلم صدف ہوئے اور اللہ تعالیٰ جل شانہٗ گہر تو غور فرمائیے کہ معنی و مفہوم کہاں سے کہاں تک جا پہنچا ہے ؟موصوف کے اس شعر سے بھی صَرفِ نظر نہیں کیا جا سکتاکہ      ؎

طور کا جلوہ تھا جلوہ آپ کا

لن ترانی تھی صدائے مصطفیٰ

        شاعر کے نزدیک طور پر حضرت موسیٰ علیہ السلام نے جو تجلی دیکھی تھی وہ جلوۂ مصطفی صلی اللہ علیہ و سلم ہی تھا،  اور لن ترانی بھی حضور صلی اللہ علیہ و سلم ہی نے کہا تھا (گویا حضور صلی اللہ علیہ و سلم خدا کے پردے میں خود ہی لن ترانی فرما رہے تھے،  معاذ اللہ) یہ عقیدہ بھی توحید کے یک سر منافی اور شرعاً نادرست ہے۔  اسی طرح امیرؔ مینائی کا ہی ایک شعر دیکھیں    ؎

طور وہ روضہ ہے،  میں صورتِ موسیٰ لیکن

اَرِ نی مُنہ سے نکالوں جو مزار آئے نظر

        اس شعر میں موصوف کہہ رہے ہیں کہ روضۂ رسول صلی اللہ علیہ و سلم کوہِ طور ہے اور میں بہ صورتِ موسیٰ (علیہ السلام) ۔۔ جب مجھے روضۂ رسول صلی اللہ علیہ و سلم نظر آ جائے گا تو میں ربِّ ارِنی کہوں گا۔  یہاں نبیِ کونین صلی اللہ علیہ و سلم کو ’’رب‘‘ کہنا نعت گوئی کا منصب نہیں بل کہ یہ آدابِ نعت اور لوازماتِ نعت سے بھٹک جانا ہے۔  یہ شعر بھی ملاحظہ کریں     ؎

پاک تھی رنگِ دو رنگی سے وہ خلوت گہہِ خاص

وہی شیشہ،  وہی مَے خوار تھا معراج کی شب

        قابَ قوسین کی خلوتِ گاہِ خاص میں دو نہ تھے بل کہ صرف ایک ہی ذات تھی۔ وہی ذات شراب کی بوتل،  وہی ذات شراب پینے والی تھی۔  امیرؔ مینائی کا ’’وہی ‘‘ سے خدا کی طرف اشارہ ہے یا حبیبِ خدا کی جانب،  یہ خدا ہی بہتر جانتا ہے۔  خدا کو رسولِ خدا کا منصب دینا یا رسولِ خدا کو خدا کے مقام پر فائز کرنا یا دونوں کو ایک ہی قرار دینا دونوں ہی صورتیں قابلِ گرفت ہیں۔  نیز خدا اور حبیبِ خدا کو شیشہ و شراب اور مَے خوار جیسے سوقیانہ الفاظ سے تشبیہ دینا ادب و احترام کے یک سر خلاف ہے۔

        مندرجہ بالا اشعار سے صاف ظاہر ہوتا ہے کہ امیرؔ مینائی سے لغزشیں ہوئی ہیں کیوں کہ ان اشعار میں حضور احمد مجتبیٰ صلی اللہ علیہ و سلم کی ذات والا صفات کا بیان الوہیت کی صفات سے متصف کر کے کیا گیا ہے جس سے اخذ ہونے والا مفہوم یہی بتاتا ہے کہ معاذ اللہ ثم معاذاللہ حضور اکرم صلی اللہ علیہ و سلم خدا ہیں۔ جب کہ آقا ے کائنات صلی اللہ علیہ و سلم نے اس بات کی سخت ممانعت فرمائی ہے کہ ہرگز ہرگز تم مجھ کو خدا نہ بنانا چناں چہ ارشاد فرماتے ہیں :

         ’’مجھے حد سے نہ بڑھاؤ جیسا کہ نصاریٰ نے حضرت مسیح علیہ السلام کے ساتھ کیا میں تو خدا کا بندہ اور اس کا رسول ہوں مجھے صرف خدا کا بندہ اور اس کا رسول ہی کہو۔ ‘‘  (1)

        چناں چہ اسی حدیث پاک کی ترجمانی فرماتے ہوئے عاشقِ رسول اور عظیم نعت گو شاعر حضرت علامہ شرف الدین بوصیری علیہ الرحمہ (م695ھ)اپنے مشہورِ زمانہ قصیدۂ بُردہ میں ارشاد فرماتے ہیں     ؎

’’دَع مَادَّ عَتہ ُ النَّصاریٰ فی نَبِیہِمُ

وَاحکُم بِمَا شِئتَ مَدحاً فیہِ وَاحتَکَمٖ

        ترجمہ :  وہ نعت چھوڑ جو عیسا ئیوں نے اپنے نبی کی شان میں کہی،  کہ ابنُ اللہ بنا ڈالا اور اس کے سوا جو کچھ نعت میں کہنا چاہے حکم لگا کر اور فیصلہ کر کے کہہ۔ ‘‘

        اسی قبیل کا ایک شعر اور ملاحظہ ہو،  امیرؔ مینائی کہتے ہیں     ؎

آیا خیالِ انجمنِ لامکاں ہمیں

دیکھے کبھی جو عاشق و معشوق ڈاب میں

(امیرؔ مینائی : محامدِ خاتم النبیین،  مطبع نول کشور،  لکھنؤ،  صفحاتِ متفرقہ)

        اس شعر کا مصرعۂ ثانی مبتذل ہے۔  انجمنِ لامکاں اور بزمِ اسرا میں اللہ جل شانہٗ اور محبوبِ خدا صلی اللہ علیہ و سلم کی ملاقات کہاں اور دنیاوی عاشق و معشوق اور اُن کا ملن اور ڈاب کہاں ؟ اس شعر کا مضمون و تخیل اور تشبیہ کا انداز عامیانہ و سوقیانہ اور مبنی بر تضحیک و ابتذال ہے جو نعت جیسی تقدیسی صنف کے لیے قطعاً نامناسب اور خلافِ ادب ہے۔ 

        اس طرح کے معاملات مشہور اور عظیم نعت گو شاعر محسنؔ کاکوروی کے کلام میں بھی ملتے ہیں،  آپ کا کلام ملاحظہ ہو     ؎

عینیت سے غیرِ رب کو رب سے

غیریتِ عین کو عرب سے

ذاتِ احمد تھی یا خدا تھا

سایا کیا میم تک جدا تھا(2)

        ان شعروں میں ’’احمد‘‘ کے ’’میم‘ ‘ کو ہٹا کر ’’اَحد‘‘ اور ’’عرب‘‘ سے ’’عین‘‘ کو لفظ سے جدا کر کے ’’رب ‘‘ بنا کر پیش کیا گیا ہے۔ جن سے شرعی سقم مترشح ہوتا ہے۔ 

        حضرت کرامت علی شہیدیؔ کا یہ شعر دیکھیں    ؎

خدا منہ چوم لیتا ہے شہیدیؔ کس محبت سے

زباں پر میرے جس دم نام آتا ہے محمد کا

        یہ شعر عاشقِ رسول (ﷺ) حضرت شہیدیؔ کا سرکارِ دو عالم صلی اللہ علیہ و سلم کے تئیں والہانہ وارفتگی کا اشاریہ ہے،  جس کے پُر خلوص ہونے سے انکار محال ہے لیکن ’’منہ چومنا‘‘۔۔ ’’بوسا لینا‘‘ یہ سب انسانی افعال ہیں جن سے سبحان السبوح و القدوس جل شانہٗ پاک و منزہ ہے۔  اسی طرح حضرت بیدمؔ شاہ وارثی کا یہ شعر بھی ملاحظہ کریں کہ بیدمؔ شاہ وارثی آدابِ نعت اور لوازماتِ نعت اور تقاضائے نعت کی حدود سے کتنی آگے نکل گئے ہیں اس شعر کو کسی بھی طرح سے نعت کا عمدہ شعر قرار نہیں دیا جا سکتا۔  اس قسم کی بے جا خیال آرائیوں کی نعت میں چنداں گنجایش نہیں    ؎

عشق کی ابتدا بھی تم عشق کی انتہا بھی تم

رہنے دو راز کھل گیا بندے بھی تم خدا بھی تم

        امیرؔ مینائی،  کرامت علی شہیدیؔ ،  بیدمؔ شاہ وارثی اور محسنؔ کاکوروی جیسے اساتذۂ نعت کے علم و فضل پر ذرّہ بھر بھی شبہ نہیں کیا جا سکتا اور نہ ہی ان حضرات کے عشقِ رسول صلی اللہ علیہ و سلم کی مخلصانہ تہہ داریوں کو نشانۂ تنقید بنایا جا سکتا ہے۔ اردو نعت گوئی کے فروغ و ارتقا اور استحکام میں ان کی خدمات یقیناً آبِ زر سے لکھے جانے کے قابل ہیں ان حضرات سے جوشِ عقیدت میں جو شرعی لغزشیں واقع ہوئی ہیں اگر وہ ان سے باخبر ہو جاتے تو ایسے مضامین کو اپنے کلام سے خارج کر دیتے۔

        مقالہ نگار کے ممدوح مفتیِ اعظم علامہ مصطفی رضا نوری بریلوی قدس سرہٗ رسولِ کونین ﷺ کی الفت و محبت میں والہانہ سرشار ی کے با وصف ایسے نازک مقامات سے چراغِ شریعت اور عشقِ حبیب کے اُجالے میں سلامت روی کے ساتھ گذرے ہیں۔  شعر نشانِ خاطر کریں    ؎

خدا ہے تو نہ خدا سے جُدا ہے اے مولا

ترے ظہور سے رب کا ظہور آنکھوں میں

        اور یہ دو شعر دیکھیں ، جوشِ عقیدت اور جذبۂ محبت میں عقیدہ کیسا سلامت ہے،  فرماتے ہیں    ؎

سجدہ کرتا جو مجھے اس کی اجازت ہوتی

کیا کروں اذن مجھے اس کا خدا نے نہ دیا

حسرتِ سجدہ یوں ہی کچھ تو نکلتی لیکن

سر بھی سرکار نے قدموں پہ جھکانے نہ دیا

        عصرِ حاضر کے نعتیہ منظر نامے پر جو شعرا نعت کے میدان میں اپنی فکری جولانیاں دکھا رہے ہیں اُن میں بھی کچھ کے کلام میں قابلِ گرفت موضوعات در آئے ہیں۔ ذیل میں پیش مشہور نعت گو شاعر جناب اعظم چشتی کے اشعار بہ طورِ مثال پیش کیے جاتے ہیں جنھوں نے حزم و احتیاط کی شرط کو برقرار نہ رکھتے ہوئے شاعری کی ہے    ؎

انسانیت کو بخشی وہ معراج آپ نے

ہر آدمی سمجھنے لگا ہے،  خدا ہوں میں

۔ ۔ ۔ ۔ ۔ ۔ ۔ ۔

عبد و معبود میں ہے نسبتِ تام

ہے محمد بھی احمدِ بے میم

۔ ۔ ۔ ۔ ۔ ۔ ۔ ۔ ۔

عقل کہتی ہے مثلُنا کہیے

عشق بے تاب ہے خدا کہیے

۔ ۔ ۔ ۔ ۔ ۔ ۔ ۔ ۔ 

آ گئی سامنے آنکھوں کے اللہ کی صورت

آئے سرکار جو اللہ کی برہاں بن کر

                                        (اعظم چشتی: نیرِ اعظم،  صفحاتِ متفرقہ)

        مذکورہ بالا اشعار میں عبد و معبود اور الوہیت و رسالت کے فرق کو ملحوظ نہ رکھتے ہوئے شرکیہ مضامین قلم بند ہوئے ہیں ان اشعار میں رسول اللہ صلی اللہ علیہ و سلم کو بندہ بھی اور خدا بھی بتایا گیا ہے جو کسی بھی لحاظ سے صحیح نہیں ہے اور ذیل کے دو اشعار دیکھیں ان اشعار میں بارگاہِ خداوندی کے لیے جو اسلوب اختیار کیا گیا ہے اسے بے ادبی قرار دینا غیر مناسب نہ ہو گا   ؎

محمد نے خدائی کی خدا نے مصطفائی کی

کو ئی سمجھے تو کیا سمجھے کو ئی جانے تو کیا جانے

۔ ۔ ۔ ۔ ۔ ۔ ۔ ۔ ۔

اللہ کے پلّے میں وحدت کے سوا کیا ہے

جو کچھ ہمیں لینا ہے لے لیں گے محمّد سے

                                                (نامعلوم)

        یہ بات مسلمہ ہے کہ نعت کا فن نعت نگار سے یہ چاہتا ہے کہ وہ نعت لکھتے ہوئے شریعت کا پاس و لحاظ کرے اور الوہیت و رسالت کے فرق کوسمجھے۔ نعت گوئی میں حزم و احتیاط اور لغزشوں پر مبنی جن اشعار کی مثالیں دی گئی ہیں ان سے مقصود بزرگ نعت گو شعرا پر نشترِ تنقید چلانا نہیں ہے بل کہ اس محاکمہ سے مجھے اس خیال کو مزید تقویت پہنچانا ہے کہ یقیناً نعت کے پلِ صراط پر چلنا نہایت مشکل کام ہے،  اور نعت گوئی ’’اللہ اگر توفیق نہ دے انسان کے بس کا کام نہیں ‘‘ سے عبارت ہے۔

        علاوہ ازیں مدینۂ طیبہ کے لیے ’’یثرب‘‘ کا استعمال شرعاً منع ہے۔ بخاری و مسلم کی حدیث ہے،  یقولونَ یَثربَ وہِیَ المدینۃ،  لوگ اسے یثرب کہتے ہیں حال آں کہ یہ مدینہ ہے۔  ممانعت کے باوجود بعض شعرا مثلاً امیرؔ مینائی،  ڈاکٹر اقبالؔ ، محمد علی جوہرؔ ،  ظفرؔ علی خاں،  حفیظؔ جالندھری وغیرہ نے یثرب کا استعمال کیا ہے    ؎

خاکِ یثرب ہے مرتبے میں حرم

واہ رے احترام احمد کا

                                                (امیرؔ مینائی)

نگاہ عاشق کی دیکھ لیتی ہے پردۂ میم اٹھا اٹھا کر

وہ بزمِ یثرب میں آ کے بیٹھیں ہزار منھ کو چھپا چھپا کر

                                        (ڈاکٹر اقبالؔ )

جس سے چہرے دمک اٹھے تھے یثرب کے

دیکھو جوہرؔ کی بھی آنکھوں میں وہی نور ہے آج

                                        (محمد علی جوہرؔ )

ارسطو کی حکمت ہے یثرب کی لونڈی

فلاطون طفلِ دبستانِ احمد

                                                (ظفرؔ علی خاں )

        اسی طرح جب حضور رحمتِ عالم صلی اللہ علیہ و سلم اور دیگر انبیا ے کرام علیہم السلام کا تقابل بھی شعرا کرتے ہیں تو بعض اوقات اس میں بھی بے ادبی کا پہلو نکل جاتا ہے۔ اس لیے دیگر انبیائے کرام علیہم السلام سے تقابل کے موقع پر ’’تلک الرسل فضلنا بعضہم علیٰ بعض‘‘ کو پیشِ نظر رکھ کر سلیقہ مندی اور ادب و احترام کو ملحوظ رکھنا بھی از حد ضروری ہے۔

        میدانِ نعت میں ان احتیاطی رویوں کے ساتھ متن اور لفظوں کے انتخاب میں بھی غایت درجہ توجہ کی ضرورت ہے۔  نعت میں انھیں مضامین کو نظم کیا جانا چاہیے جو مستند اور قرآن و حدیث کے متقاضی ہیں اور روایت و درایت کے اصولوں سے پایۂ ثبوت تک پہنچتے ہیں۔  بابِ فضائل میں ضعیف روایتیں بھی قابل قبول ہیں۔  لیکن موضوعات اور من گھڑت واقعات و قصص اور روایتوں کو جلیل القدر محدثین و محققین اور علمائے محتاطین کے نزدیک کسی بھی قسم کا مقامِ اعتبار حاصل نہیں ہے۔  واضح ہونا چاہیے کہ نعت گوئی میں موضوع اور من گھڑت روایتوں کو بیان کرنا نعت گوئی کے اصولوں کے یک سر منافی ہے۔  نعت نگار کے لیے ضروری ہے کہ وہ نعت گوئی سے پہلے صرف نعتیہ شاعری ہی نہیں بل کہ مستند روایتوں پر مشتمل سیرتِ طیبہ کی کتب و رسائل کا بھی گہرائی سے مطالعہ کرے۔

         مشہور ناقد و شاعراحسان دانشؔ اپنے شاگردوں کو مشورہ دیا کرتے تھے کہ:

        ’’صرف شاعری کا مطالعہ کافی نہیں ہے،  اچھا اور ستھرا شعر کہنے کے لیے نثری ادب بھی پڑھنا ضروری ہے۔ ‘‘

        بہ قول عزیز احسنؔ (کراچی):

        ’ ’نعتیہ اشعار قلم بند کرنے کے لیے تو نثری ادب کی شرط کے ساتھ ساتھ دینی ادب کی شرط بھی لگانی ضروری ہے۔ ‘‘

        چناں چہ نعت گو کو چاہیے کہ وہ سیرت و مغازی،  تاریخِ اسلام،  حیاتِ طیبہ،  اور فضائلِ سیدُ الانام صلی اللہ علیہ و سلم پر لکھی گئی مستند نثری کتب کا بھی مطالعہ کرے۔  موضوع اور من گھڑت روایتوں پر مشتمل میلاد ناموں، معراج ناموں،  مواعظ،  خطبات اور حکایات سے دور رہے تاکہ اس کا کلام ہر قسم کی بے اعتدالی،  بے راہ روی اور شرعی اسقام سے پاک و مبرا بن سکے۔  بلا تردد ہر قسم کے زباں زدِ خاص و عام غیر ثقہ اور وضعی مضامین، جعلی حکایات اور واقعات کو نعت میں منظوم کرتے رہنا یہ کسی بھی طرح سے لائقِ تحسین نہیں۔  ہاں ! یہ بات بھی تسلیم ہے کہ دورِ متاخرین و متوسطین کے شعرا کا ماخذ عموماً سنی سنائی روایتوں اور غیر مستند واقعات و حکایات پر مشتمل کتابیں تھیں اور جن کے صحیح و سقیم کا اندازہ لگانا بہ ہر کیف ! ایک مشکل امر تھا۔  لیکن یہ بھی سچ ہے کہ بعض علمائے اعلام نے روایت و درایت کے اصولوں پر جانچ پرکھ کر ایسی جملہ موضوع روایتوں کو اپنی کتب و رسائل میں جمع کر دیا ہے۔  اردو نعتیہ شاعری میں کثرت سے نظم کیے جانے والے بعض ایسے مضامین کی نشان دہی ذیل میں نشانِ خاطر فرمائیں۔

        شبِ معراج میں حضور انور صلی اللہ علیہ و سلم کے نعلین شریف سمیت عرشِ معلا پر تشریف لے جانے سے متعلق ایک روایت کو نعت گو شعرا نے کافی نظم کیا ہے ، اس کے مفہوم سے پہلے چند مشہور شعرا کے اشعار ملاحظہ کریں      ؎

نعلینِ پا سے عرشِ معلا کو ہے شرَف

روح الامیں ہے غاشیہ بردارِ مصطفی

                                                (بیدمؔ وارثی)

حکم موسیٰ کو ’’فاخلع‘‘ مگر معراج میں

تاجِ فرقِ عرشِ بریں ہے نعلینِ پائے مصطفی

                                                (وہبیؔ لکھنوی)

ان کے نعلین کا مقام فلک

ان کے نعلین تک مری پرواز

                                                (بشیر حسین ناظمؔ )

عرشِ اعلا کا بھی اعزاز بڑھا ہے اُن سے

سلسلہ فیض کا ایسا ترے نعلین میں ہے

                                                (غلام قطب الدین فریدؔ )

سُن کے جس کے نام کو جھک جائے عقیدت کی جبیں

جس کی نعلین کہ اتری نہ سرِ عرشِ بریں

                                                (ادیبؔ رائے پوری)

یانبی دیکھا ہے رتبہ آپ کی نعلین کا

عرش نے چوما ہے تلوا آپ کی نعلین کا

                                                (نثار علی اجاگرؔ )

        متذکرۂ بالا واقعہ کا مفہوم کچھ یوں ہے کہ جب سرکارِ دو عالم صلی اللہ علیہ و سلم نے عرشِ الٰہی کی طرف عروج فرمایا تو اللہ تعالیٰ کے اس فرمان کے پیشِ نظر جو حضرت موسیٰ علیہ السلام سے کہا گیا تھا  :

        ’’اے موسیٰ بے شک میں تیرا رب ہوں تو تُو اپنے جوتے اتار ڈال،  بے شک تُو پاک جنگل طویٰ میں ہے۔ ‘‘(3)

        آپ صلی اللہ علیہ و سلم نے بھی نعلین اتارنے کا قصد فرمایا ، لیکن ارشاد ہوا  :

        یا محمد! لا تخلع نعلیک لتشرک السمآء  بھما۔ 

        ترجمہ: اے محمد! تم اپنے نعلین نہ اتارو تاکہ آسمان ان سے شرف حاصل کرے۔

        سرکارِ دو عالم صلی اللہ علیہ و سلم کے نعلینِ مقدس کی فضیلت و عظمت پر لکھی جانے والی علامہ احمد المقری التلمسانی رحمۃ اللہ علیہ نے اپنی مشہور و معروف کتاب ’’فتح المتعال فی مدح النعال ‘‘ اور علامہ رضی الدین قزوینی اور محمد بن عبدالباقی زرقانی علیہم الرحمۃ نے ’’شرح مواہب اللدنیہ ‘‘میں زور دے کر وضاحت کی ہے کہ یہ قصہ مکمل طور پر موضوع ہے۔ 

        ’’فتح المتعال فی مدح النعال ‘‘ کا اردو ترجمہ حضرت مولانا محمد خان قادری رضوی اور حضرت مولانا محمد عباس رضوی کی مشترکہ کاوش سے منظر عام پر آ چکا ہے۔ مذکورہ مترجم کتاب کے مقدمہ اور بعض تقریظات میں اس روایت کو نقل کر کے استشہاد کرتے ہوئے نعلینِ پاک کی فضیلت ثابت کرنے کی کوشش کی گئی ہے۔  جب کہ علامہ احمد المقری التلمسانی نے شیخ السبتی،  شیخ ابولحسن علی بن احمد الخزرجی اور دیگر حفاظِ حدیث کے حوالے سے اسے موضوع قرار دیا ہے۔  (4)

        امام محمد بن عبدالباقی زرقانی علیہ الرحمہ نے امام رضی الدین قزوینی و دیگر محدثین کے حوالے سے اس روایت کو گھڑنے والے کے غارت ہونے کی دعا کی ہے۔  امامِ نعت گویاں امام احمد رضا محدث بریلوی سے بھی اس روایت کے بارے میں سوال کیا گیا،  چناں چہ احکامِ شریعت میں ہے کہ  :

        ’’سوال: حضورِ اقدس صلی اللہ علیہ و سلم کا شبِ معراج عرشِ الٰہی پر نعلینِ مبارک سمیت تشریف لے جانا صحیح ہے یا نہیں ؟

        جواب: یہ محض جھوٹ اور موضوع ہے۔  واللہ اعلم۔ ‘‘(5)

        اسی طرح واقعۂ معراج کے ضمن میں بیان کی جانے والی وہ روایت جسے ’’معارج النبوۃ‘‘ کے حوالے سے واعظین سنایا کرتے ہیں۔  اس کا خلاصہ یوں ہے  :

        ’’حضورِ اکرم صلی اللہ علیہ و سلم نے شبِ معراج براق پر سوار ہوتے وقت اللہ تعالیٰ سے وعدہ لے لیا ہے کہ روزِ قیامت جب کہ سب لوگ اپنی اپنی قبروں سے اٹھیں گے،  ہر ایک مسلمان کی قبر پر اسی طرح ایک براق بھیجوں گا،  جیسا کہ آج آپ کے واسطے بھیجا گیا۔ ‘‘

        متذکرہ بالا روایت کو بھی بعض شعرا نے اپنی نعتوں میں نظم کیا ہے، اس کے بارے میں بھی امام احمد رضا محدثِ بریلوی سے استفسار کیا گیا کہ :

        ’’سوال: یہ مضمون صحیح ہے یا نہیں اور کتاب ’’معارج النبوۃ‘‘ کیسی کتاب ہے،  اس کے مصنف عالمِ اہل سنت اور معتبر محقق تھے یا نہیں ؟

        جواب: بے اصل ہے۔ ’’معارج النبوۃ‘‘ کے مولف سنّی واعظ تھے، کتاب میں رطب و یابس سبھی کچھ ہے۔  واللہ اعلم۔ ‘‘(6)

        علاوہ ازیں معراج کے حوالے سے یہ بات بھی بے حد مشہور ہے کہ گلاب کا پھول اس رات آقا صلی اللہ علیہ و سلم کے پسینۂ مبارک سے پیدا ہوا اور اس کی خوش بو میں بھی یہی راز پوشیدہ ہے۔  ایک روایت کے الفاظ یوں نقل کیے گئے ہیں۔  

        من اراد ان یشم رائحتی فلیشتم الورد الاحمر۔

        ترجمہ: جو میری خوش بو کو سونگھنا چاہے وہ سرخ گلاب کو سونگھ لے۔  (7)

        امام بدرالدین زرکشی نے ’’اللآ لی المنثورۃ ‘‘ میں امام سخاوی نے ’’المقاصد الحسنہ‘‘ میں اور شیخ محمد طاہر پٹنی نے ’’تذکرۃ الموضوعات‘‘ میں اسے من گھڑت اور موضوع روایت قرار دیا ہے۔  (8)

        واقعۂ معراج النبی صلی اللہ علیہ و سلم سے متعلق اس طرح کی بیش تر روایات ایسی کتابوں میں ملتی ہیں جو غیر مستند اور بے سروپا حکایات پر مبنی ہیں۔  اس سلسلے میں معارج النبوۃ اور نزہۃ المجالس کے ساتھ ساتھ بعض تقاریر کے مجموعوں کے نام لیے جا سکتے ہیں۔  

        اسی طرح سرکارِ دو عالم صلی اللہ علیہ و سلم کے دندانِ مبارک کی شہادت کے بارے میں خبرسُن کر حضرت اویس قرنی رضی اللہ عنہ کا اپنے تمام دانتوں کو توڑنے والی اور حضرت بلال رضی اللہ عنہ کے بارے میں اذان سے روکنے اور آپ رضی اللہ عنہ کے اذان نہ پڑھنے کے سبب صبح کے طلوع نہ ہونے والی روایتیں بھی تواتر کے ساتھ ہمارے واعظین اور بیش تر نعت گو شعرا بیان کرتے رہتے ہیں۔  ذیل کے اشعار دیکھیں    ؎

ایک دنداں کے بدلے میں توڑے،  دانت اپنے دہن میں نہ چھوڑے

تھے وہ عاشق اویسِ قرنی،  میرے پیارے رسولِ مدنی

                                                (مدینہ کا چاند، میلاد نامہ)

حضرتِ بلال نے جو اذانِ سحر نہ دی

قدرت خدا کی دیکھیے نہ مطلق سحر ہوئی

                                                (نامعلوم)

        ان روایتوں کے بارے میں بھی علمائے محققین نے اپنی رائے کا اظہار کرتے ہوئے انھیں بھی موضوع قرار دیا ہے،  اس ضمن میں ممتاز عالمِ اہل سنت علامہ محمد عبدالمبین نعمانی مصباحی سے جب راقم نے پوچھا تو آپ نے جواباً تحریر فرمایا کہ  :

        ’’ایک بار آپ نے واقعۂ اذانِ بلال (رضی اللہ عنہ) کے بارے میں سوال لکھا تھا،  میری اپنی کوئی تحقیق نہیں ہے،  ہاں ! مجھے اچھی طرح یاد ہے کہ حضرت شارح بخاری علیہ الرحمہ اس کی تردید کیا کرتے اور کہا کرتے کہ یہ واقعہ ایسا ہے کہ اس کے راوی تواتر کی حد تک ہوں تو کسی طرح مانا جاتا مگر یہاں ضعیف حدیث بھی ملنا مشکل ہے،  یوں ہی حضرت اویس قرنی رضی اللہ تعالیٰ عنہ کے دانت توڑنے والے واقعے کا بھی رد فرماتے اور کہتے یہ عقل و شرع دونوں کے خلاف ہے،  حضرت اویس قرنی رضی اللہ عنہ کوئی مجذوب یا مجنون تو تھے نہیں کہ ایسی خلافِ عقل حرکت کرتے۔ ‘‘(9)

        نعتیہ ادب کے مطالعہ کے بعد یہ بات بھی ظاہر ہوتی ہے کہ ہمارے بیش تر نعت گو شعرا کے کلام میں جہاں ایسے مضامین ملتے ہیں جو صحیح اورحَسَن احادیثِ طیبہ سے ماخوذ تو ہیں ہی بل کہ بعض نے مکمل متنِ حدیث کو نظم کرنے کی کام یاب کوشش کرتے ہوئے مفہومِ حدیث کو اپنے شعروں میں خوش اسلوبی کے ساتھ برتا ہے۔  وہیں سیکڑوں نعتیہ اشعار ایسے بھی ملتے ہیں جو کسی شدید ضعیف بل کہ موضوع اور من گھڑت روایتوں پر مشتمل ہیں۔  آج کل تقریر و تحریر میں ایسی بے احتیاطی کی بھر مار ہوتی جا رہی ہے۔  واعظین اور قصہ گو قسم کے مقررین کا تو یہ معمول بنتا جا رہا ہے کہ وہ ایسی بے سروپا روایتوں کو بلا تحقیق لوگوں کے سامنے سناتے چلے جا رہے ہیں۔  

        حالاں کہ سرکارِ دو عالم صلی اللہ علیہ و سلم کا فرمانِ عالی شان ہے کہ :

        ’’کسی شخص کے جھوٹا ہونے کے لیے اتنا ہی کافی ہے کہ وہ ہر سنی سنائی بات آگے بیان کر دے۔  ‘‘(10)

        واقعۂ معراج النبی صلی اللہ علیہ و سلم کے ضمن میں بعض واقعات،  اذانِ حضرت بلا ل رضی اللہ عنہ،  حضرت اویس قرنی رضی اللہ عنہ کے دانت توڑنے جیسے واقعات کا محاکمہ کیا جا چکا ہے۔  نعتیہ اشعار میں ہم دیکھتے ہیں کہ بعض ایسی باتوں کو احادیثِ رسول صلی اللہ علیہ و سلم کہہ کر سُنا،  سُنایا اور پڑھا جا رہا ہے جو آقائے کائنات صلی اللہ علیہ و سلم کے فرمودات میں سے نہیں ہیں۔  ان موضوع روایتوں میں سے ایک مشہور قول ہے  :

        ’’الفقر فخری وبہٖ افتخر‘‘۔  

        ترجمہ :  فقر میرا فخر ہے اور میں اس کے ساتھ مفتخر ہوں۔ 

        اس قول کی شہرت و مقبولیت کا یہ عالم ہے کہ اچھے اچھے اہلِ علم اپنی کتابوں میں اسے نقل کر کے اس سے استشہاد کرتے ہوئے نظر آتے ہیں،  اور مشہور نعت گو شعرا نے اپنے کلام میں اس مضمون کو نظم کیا ہے،  چوں کہ یہاں نعت گوئی میں حزم و احتیاط اور موضوع روایتوں کے بارے میں اظہارِ خیال مقصود ہے لہٰذا چند معروف شعرا کے اشعار کے بعد ائمۂ محدثین اور ماہرینِ اصولِ حدیث کے اقوا ل کی روشنی میں اس قول کا تنقیدی جائزہ پیش کیا جائے گا      ؎

سماں ’’الفقر فخری‘‘ کا رہا شانِ امارت میں

’’بآب و رنگ و خال و خط چہ حاجت روے زیبا را‘‘

                                        (ڈاکٹر اقبالؔ )

اگرچہ ’’فقر فخری‘‘ رتبہ ہے تیری قناعت کا

مگر قدموں تلے ہے فرِ کسرائی و خاقانی

                                                 (حفیظؔ جالندھری)

جس کو حضرت نے کہا ’’الفقر فخری‘‘ اے ظفرؔ

فخرِ دیں،  فخرِ جہاں پر وہ فقیری ختم ہے

                                                (بہادر شاہ ظفرؔ )

سلام اس پر کہ تھا ’’الفقر فخری‘‘ جس کا سرمایا

سلام اس پر کہ جس کے جسمِ اطہر کا نہ تھا سایا

                                                (ماہرؔ القادری)

کروں مال و زر کی میں کیوں ہوس مجھے اپنے فقر پہ فخر بس

یہی حرزِ جانِ فقیر ہے یہی ’’قولِ شاہِ حجاز‘‘ ہے

                                                (مرتضیٰ احمد خان میکشؔ )

ہے فخر تجھے فقر پہ اے شاہِ دو عالم

اے ختمِ رُسل،  ہادیِ دیں،  خلقِ مجسم

                                                (حافظؔ لدھیانوی)

 ملا ہے درس محمد سے ’’ فقر فخری‘‘ کا

کمالِ فقر میں مضمر ہے قیصری اپنی

                                                (راجا رشید محمود)

        ’’الفقر فخری‘‘ کے بارے میں امام حجر عسقلانی رحمۃ اللہ علیہ کہتے ہیں  :

        ’’الفقر فخرو بہ افتخر و ہٰذا الحدیث سئل عند الحافظ ابن تیمیہ،   فقال انہ لا یعرف فی کتب المسلمین المرویۃ و جزم الاصفہانی بانہ موضوع (11)

        ترجمہ : اس حدیث ’’الفقر فخری‘‘ کے بارے میں ابن تیمیہ سے پوچھا گیا تو انھوں نے کہا یہ جھوٹ ہے،  مسلمانوں کے ذخیرۂ مرویات میں اس قسم کی کوئی چیز نہیں پائی گئی اور امام اصفہانی نے بھی اس کے موضوع (جعلی) ہونے کی تائید کی ہے۔ ‘‘

        امام سخاوی علیہ الرحمہ راقم ہیں  :

        ’’الفقر فخری وبہٖ افتخر۔۔ باطل الموضوع ‘‘(12)

        ترجمہ: الفقر فخری۔۔ باطل اور گھڑی ہوئی روایت ہے۔

        حضرت ملا علی قاری علیہ الرحمہ نے موضوعاتِ کبیر،  شیخ محمد بن طاہر پٹنی علیہ الرحمہ نے تذکرۃ الموضوعات اور شارح بخاری امام احمد قسطلانی علیہ الرحمہ نے المواہب اللدنیہ میں بھی اس کو موضوع اور من گھڑت کہا ہے۔ علاوہ ازیں مجددِ اعظم امامِ نعت گویاں امام احمد رضا محدثِ بریلوی کی بھی تحقیق ذیل میں نشانِ خاطر فرمائیں آپ نے بھی ’’الفقر فخری‘‘ کو بے اصل قرار دیا ہے :

        ’’حضورِ اقدس،  قاسمِ نعم،  مالک الارض ورقابِ امم،  معطیِ منعم،  قثمِ قیم،  ولی والی،  علی عالی،  کاشف الکرب،  رافع الرتب،  معینِ کافی،  حفیظ وافی،  شفیعِ شافی،  عفوِ عافی،  غفورِ جمیل،  عزیزِ جلیل،  وہابِ کریم،  غنیِ عظیم،  خلیفۂ مطلقِ حضرتِ رب،  مالک الناس و دیانِ عرب،  ولی الفضل،  جلی الافضال،  رفیع المثل،  ممتنع الامثال صلی اللہ تعالیٰ علیہ و سلم کی شانِ ارفع و اعلا میں الفاظِ مذکورہ   (یتیم، غریب،  مسکین،  بے چارہ) کا اطلاق ناجائز و حرام ہے۔ 

        خزانۃ الاکمل مقدسی و ردالمحتار اواخر شتی میں ہے :

        ویجب ذکرہ صلی اللہ تعالیٰ علیہ و سلم باسمآء المعظمۃ فلا یجوز ان بقال انہ فقیر،  غریب،  مسکین۔

        ترجمہ: حضور اقدس صلی اللہ تعالیٰ علیہ و سلم کا ذکر عزت و تکریم والے ناموں سے کرنا واجب ہے اور اس طرح کہنا جائز نہیں کہ آ پ فقیر،  غریب اور مسکین تھے۔

        نسیم الریاض جلد سابع صفحہ ۴۵۰ ؍ میں ہے :

        الانبیاء علیہم الصلوٰۃ والسلام لا یو صفون با لفقر ولایجوز ان یقال نبینا صلی اللہ تعالیٰ علیہ و سلم فقیر وقولہٗ عند ’الفقر فخری‘ لا اصل لہٗ کما تقدم۔

        ترجمہ : انبیائے کرام علیہم الصلوٰۃ والسلام کو فقر سے موصوف نہ کیا جائے اور یہ جائز نہیں کہ ہمارے آقا صلی اللہ علیہ و سلم کو فقیر کہا جائے۔  رہا لوگوں کا ’الفقر فخری‘ کو آپ سے مروی کہنا تو اس کی کوئی اصل نہیں۔  جیسا کہ پہلے بیان ہوا ہے۔  اسی کے صفحہ ۳۷۸؍ میں ہے :

        قال الزر کشی کالسبکی لا یجوز ان یقال لہٗ صلی اللہ علیہ و سلم فقیر او مسکین وہو اغنی الناس باللہ تعالیٰ لا سیحا بعد قولہٗ تعالیٰ ’’ووجدک عائلاً فاغنیٰ ‘‘ وقولہٗ صلی اللہ تعالیٰ علیہ و سلم ’’اللہم احینی مسکیناً ‘‘ اراد بہٖ المسکنۃ القبیلۃ با لخشوع والفقر فخری،  باطل لا اصل لہ ۔۔ کما قال الحافظ ابنِ حجر عسقلانی۔ ۔ 

        ترجمہ: امام بدرالدین زرکشی نے امام سبکی کی طرح کہا ہے کہ یہ جائز نہیں کہ آپ کو فقیر یا مسکین کہا جائے اور آپ اللہ کے فضل سے لوگوں میں سب سے بڑھ کر غنی ہیں۔  خصوصاً اللہ تعالیٰ کے ارشاد ’’ہم نے آپ کو حاجت مند پایا سو غنی کر دیا‘‘۔  کے نزول کے بعد رہا آپ کا یہ فرمان کہ اے اللہ ! مجھے مسکین زندہ رکھ۔۔ الخ۔  تو اس سے مراد باطنی مسکنت کا خشوع کے ساتھ طلب کرنا ہے اور الفقر فخری باطل ہے۔  اس کی کوئی اصل نہیں جیسا کہ حافظ ابنِ حجر عسقلانی نے فرمایا ہے۔  (13)

        امام احمد رضا محدثِ بریلوی نے ’’کتاب الشفا‘‘ قاضی عیاض رحمۃ اللہ علیہ کے حوالے سے مزید اس بات کی وضاحت فرمائی ہے کہ سرکارِ دو عالم صلی اللہ علیہ و سلم کی ذاتِ والا صفات کے لیے نازیبا اور غیر موزوں اسما و صفات کا استعمال حکایتاً بھی ناجائز و ممنوع ہے۔  اسی طرح بارگاہِ رسالت مآب صلی اللہ علیہ و سلم میں گستاخی و بے ادبی اگرچہ سہواً یا جہالت و لاعلمی کے سبب ہی ہو لائقِ گرفت اور ناقابلِ معافی جرم ہے۔

        واضح ہونا چاہیے کہ یہ امران جانب دار ناقدین کے لیے چشم کشا ہے جو امام احمد رضا بریلوی،  برادرِ رضا استاذِ علامہ حسن رضا بریلوی اور شہزادۂ رضا مفتیِ اعظم علامہ مصطفی رضا نوریؔ بریلوی علیہم الرحمہ کے کلام سے نہ صِرف یہ کہ صَرفِ نظر کرتے ہوئے نظر آتے ہیں بل کہ ان محتاط نعت نگاروں کے کلام کو سوے عقیدت اور غلوئے عقیدت سے مملو قرار دینے کی سعیِ نا مشکور کرتے ہیں۔ جب کہ ان حضرات نے اپنی نثری کتب میں بے سروپا روایتوں کو حصارِ نقد میں لیتے ہوئے حزم و احتیاط کا حق ادا کیا ہے تو کیسے ان شاعروں کے یہاں ایسی روایتیں جگہ پا سکتی ہیں ؟ جب ہم ان حضرات کے کلام کا انتقادی جائزہ لیتے ہیں تو مسرت و انبساط کی لہریں نہاں خانۂ دل میں اٹھنے لگتی ہیں کہ ان کی زبان و قلم کو اللہ جل شانہٗ نے بے جا خیال آرائیوں سے محفوظ رکھا۔

        غرض یہ کہ حقیقت میں نعت وہی نعت ہوتی ہے جو عبد اور معبود کے فرق، انبیائے کرام علیہم السلام کے مقام و منصب اور شریعتِ مطہرہ کے اصولوں کو ملحوظ رکھتے ہوئے رسول اللہ صلی اللہ علیہ و سلم کے ادب و احترام کے ساتھ نظم کی جائے۔ افراط و تفریط، مبالغہ و اغراق،  بے جا خیال آرائی،  من گھڑت،  جعلی اور موضوع روایات سے شاعر کے ایمان و اسلام پر سوالیہ نشان لگ جاتا ہے۔

        معروف ادیب و محقق ڈاکٹر عبدالنعیم عزیزی نے نعت نگاری میں افراط و تفریط، مبالغہ و اغراق، بے جا خیال آرائی اور جعلی و موضوع روایات کو بیان کرنے کی نفی کرتے ہوئے اپنی حتمی رائے کا اظہار یوں کیا ہے اور بتایا ہے کہ حقیقی نعت کیا ہے؟  :

        ’’حضور صلی اللہ علیہ و سلم کو خدا سمجھ لینا،  ان سے دیگر انبیا کے تقابل میں انبیا کی توہین کا پہلو نکال دینا،  نبی کو ایلچی اور بھائی کہہ کر ان کی بارگاہِ قُدس میں بے ادبی کا ارتکاب کرنا،  ان کے لیے دل رُبا،  رنگیلے وغیرہ کا استعمال، خدا ورسول کے فرق کو مٹا دینا،  خدا کو جسم والاسمجھ کر منہ کا چوم لینا وغیرہ۔ غلط روایات اور معجزہ کا بیان،  مدینۂ طیبہ کو یثرب کہنا۔ تمام باتیں شرعاً ناروا ہیں۔

        یوں تو شاعری خواہ اس کا موضوع کچھ بھی ہو طہارتِ الفاظ ہر جگہ ضروری ہے اور نعت میں تو قدم قدم پر شریعت کا پہرہ ہے۔ یہ تو بڑے ادب کا مقام ہے۔ ہر لفظ کو منزلِ تطہیر سے گزار کر استعمال کرنا پڑتا ہے۔ (14)

        نعت بلا شبہ عقیدے اور عقیدت کا نام ہے۔  مگر نعت میں اُن ہی عقائد اور موضوعات کو بیان کرنا ضروری ہے جو قرآن و سنت سے ماخوذ ہوں اور جن پر علمائے امت کا اجماع ہو۔ نیز جن میں کسی بے ادبی یا عدم تقدیس کا شائبہ اور شرعی گرفت میں آنے کا احتمال بھی نہ ہو۔ نعت گوئی کی ابتدائی منزل کے چند محتاط شعرا کو چھوڑ کر بیش تر کے یہاں اس طرح کی خامیاں نظر آتی ہیں۔  الغرض کہنا صرف یہی ہے کہ نعت تحریر کرتے ہوئے اس پاکیزہ فن کے لوازمات اور شرعی وقار کو ملحوظِ خاطر رکھنا لازمی ہے۔

حواشی

(1)  نقوش : رسول نمبر، ج  10، ص 27

(2)محسن کاکوروی: کلیاتِ محسن، ص 232/233

(3)(سورۂ طٰہٰ :۱۲)

(4)فضائلِ نعلینِ حضور(مترجم: مفتی محمد خان قادری و مولانا محمد عباس رضوی ) ص ۳۶۲

(5)احمد رضا بریلوی،  امام: احکامِ شریعت ص ۱۶۶

(6) احمد رضا بریلوی،  امام: احکامِ شریعت ص ۱۶۵

(7) بدرالدین زرکشی،  امام: اللا ٓ لی المنثورۃ،  ص۱۴۷

(8)مختصر المقاصد الحسنہ ص ۹۱،  اللآ لی المنثورہ ص ۱۴۷،  تذکرۃ الموضوعات ص ۱۶۱وغیرہا کتب

(9)مکتوب بہ نام راقم ۱۵؍ ۸؍ ۲۰۰۵ء

(10)مسلم بن الحجاج قشیری،  امام:مسلم شریف،  مطبوعہ نور محمد،  کراچی،  ج ۱،  ص ۸

(11)ابن حجر عسقلانی،  امام: تلخیص الحبیر،  جلد ۳،  ص۱۰۹

(12)شمس الدین سخاوی،  امام: مختصر المقاصد الحسنہ،  ص ۲۹۲

(13)احمد رضا بریلوی،  امام : فتاویٰ رضویہ، مطبوعہ کراچی،  جلد ششم ص ۱۲۶

(14)عبدالنعیم عزیزی، ڈاکٹر :اردو نعت گوئی اور فاضلِ بریلوی، ادارۂ تحقیقاتِ امام احمد رضا،  کراچی، 2008ء، ص 163/164

٭٭٭

ہ : ہیئت۔ اصنافِ سُخن

نعت اصنافِ ادب کی سب سے مقدس و محترم اور پاکیزہ صنف ہے۔ لفظِ نعت اپنی ابتدائے آفرینش سے تا حال صرف اور صرف رسول اللہ صلی اللہ علیہ و سلم کے اوصاف و خصائل،  شمائل و فضائل اور مدح و توصیف کے اظہار کے لیے مختص ہے۔ نعت کا شمار دیگر اصنافِ سخن میں ایک معتبر و محترم اور تقدس مآب صنف کی حیثیت سے ہوتا ہے۔ ہر چند کہ نعت ہر زبان میں کہی جا رہی ہے لیکن بعض ناقدین کے نزدیک نعت اب بھی صنفِ سخن کا درجہ نہیں پا سکی بہ قول اُن کے وجہ صرف اتنی ہے کہ نعت کی کوئی متعین ہیئت نہیں ہے۔  جب کہ صنفی شناخت کے لیے صرف ہیئت معیار نہیں بل کہ موضوع بھی بہت اہم کردار ادا کرتا ہے اور موضوعی اہمیت کے لحاظ سے نعت وہ مہتم بالشان صنف ہے کہ دوسری کوئی صنف اس کے پاسنگ برابر بھی نہیں،  نعت ہماری شاعری کی سب سے زیادہ محبوب، طاقت ور، مؤثر، پاکیزہ، تنوع اور مقدار و معیار کے اعتبار سے نمایاں اور ممتاز صنف ہے۔ اس ضمن میں اربابِ علم و فن کی گراں قدر آرا نشانِ خاطر ہوں  : 

        ظہیر غازیپوری:

        ’’نعت بلاشبہ ایک اہم اور قابلِ توجہ صنفِ  سخن ہے۔ اردو نعت نے جب ایک مستقل صنف کا درجہ حاصل کر لیا ہے تو اس کے فنی حسن و قبح پر بے باکانہ انداز میں گفتگو ہونی چاہئے تاکہ قارئین اور تخلیق کار دونوں حقائق سے واقف ہو سکیں۔ ‘‘  (1)

        ڈاکٹر سید وحید اشرف:

        ’’نعت یقیناً ایک صنفِ  شاعری ہے اور فارسی میں ایم۔ اے کے نصاب میں فارسی نعتیہ قصیدے شامل ہیں۔ اردو میں جب مرثیہ کو نصاب میں شامل کیا جا سکتا ہے تو نعتیہ شاعری کو کیوں نہیں شامل کیا جا سکتا۔ ‘‘ (2)

        ڈاکٹر سید طلحہ رضوی برق داناپوری :

        ’’حمد، قصیدہ، مثنوی، مرثیہ، سلام وغیرہ کی طرح نعت بھی اردو فارسی کی ایک مستقل صنفِ سخن کی حیثیت حاصل کر چکی ہے۔ لہٰذا نعت اردو شاعری کے اصنافِ  سخن میں یقیناً شامل ہے۔ ‘‘(3)

        ڈاکٹر مناظر عاشق ہرگانوی : 

        ’’یہ صنف (نعت) اسلامی ارادت و عقیدت کی بنا پر ہی نہیں بل کہ اپنے شعری محاسن کی وجہ سے بھی بے مثال ہے۔ اس لیے دوسری اصنافِ سخن میں یہ بھی شمار ہوتی ہے اور بے حد مقبول ہے۔ ‘‘(4)

        ساجد لکھنوی:

        ’’اصنافِ سخن میں نعت ہی ایک ایسی صنفِ سخن ہے جس کا دنیا کی ہر زبان کے ادب میں بہت کافی سرمایہ موجود ہے اور ہر مذہب اور ملت کے شاعر نے اس صنفِ  سخن کے اضافے میں حصہ لیا ہے اور فخرِ کائنات، سید الرسل،  محمّد رسول اللہ صلی اللہ علیہ و سلم کے حضور نذرانۂ عقیدت و محبت پیش کیا ہے۔ ‘‘(5)

        ڈاکٹر محبوب راہی :

        ’’نعت کے اردو کی صنفِ سخن ہونے سے کون انکار کر سکتا ہے۔   نوا سۂ رسول (صلی اللہ علیہ و سلم ) حضرت امام حسین (رضی اللہ عنہ) اور ان کے رفقا کے غم کے اظہار کے لیے اردو شاعر ی نے مرثیہ جیسی متا ثر کن اور زندۂ جاوید صنف کو زندہ کیا تو کیا خود سرورِ کائنات کے تئیں اظہار عقیدت کے لیے ’’نعت ‘‘ ایک آزاد صنفِ سخن قرار نہیں دی جا سکتی، اوروں کی رائے کچھ بھی ہو میری اپنی حتمی رائے ’’نعت ‘‘ کے اردو شاعری کی ایک لاثانی اور لافانی صنفِ سخن قرار دیے جانے کے حق میں ہے۔ ‘‘ (6)

        ڈاکٹر شمس الر حمن فاروقی :

        ’’آپ نے حمد کو صنف سخن میں شمار کیا ہے اور صحیح شمار کیا ہے۔ اسی انداز کی چیز نعت بھی ہے یعنی یہ صنفِ سخن اس معنی میں ہے کہ اس کا موضوع متعین ہے اگرچہ ہیئت متعین نہیں۔ ملحوظ رہے کہ بعض اصناف موضوع سے زیادہ اپنی ہیئت سے پہچانی جاتی ہیں، جیسے غزل، رباعی۔ بعض اصناف میں ہیئت اور موضوع دونوں کی قید ہوتی ہے، جیسے قصیدہ۔ اور بعض اصناف صرف موضوع کی بنا پر پہچانی جاتی ہیں، مثلاً مرثیہ، حمد،  نعت وغیرہ۔ لہٰذا نعت کو صنف قرار دینے میں کوئی قباحت نہیں۔ اسے ہمیشہ صنف ہی قرار دیا گیا ہے۔ ‘‘ (7)

        لہٰذا تمام گراں قدر خیالات و نظریات کی روشنی میں یہ بات واضح ہوتی ہے کہ جس طرح حمد،  غزل،  قصیدہ،  مرثیہ،  رباعی،  مستزاد،  مثنوی  وغیرہ میں اصنافِ سخن کی ہیئت و ساخت کی واضح شکل نظر آتی ہے۔ نعت کی کوئی خاص ہیئت و ساخت کا تعین اب تک نہیں ہوسکا ہے۔  بہ ہر حال اسے غزل،  مثنوی،  قصیدہ،  رباعی،  قطعہ،  مرثیہ،  مستزاد،  مسدس،  مخمس،  دوہا،  ماہیا،  سانیٹ،  ترائیلے،  ہائیکو،  ثلاثی وغیرہ میں لکھا جا سکتا ہے۔ اس صنفِ سخن کی مقبولیت کا آج یہ عالم ہے کہ ادب کی ہر صنف میں شعرا نعتیہ کلام تحریر کر رہے ہیں اور اس کی آفاقیت اور عالم گیریت میں بہ تدریج اضافہ ہوتا جا رہا ہے۔ نعت اپنے ابتدائی دور میں قصیدے کے فارم میں کہی جاتی تھی۔  اس کی وجہ یہ تھی کہ عربی کی شاعری میں جہاں نعت گوئی کا آغاز ہوا مافی الضمیر کے اظہار کے لیے قصیدے کی ہیئت رائج تھی، یہاں یہ کہا جا سکتا ہے کہ نعت عصری اور زمانی تقاضوں کی ہم مزاج صنف ہے کیوں کہ جس عہد میں جو صنفِ سخن مروج تھی اسی میں نعتیہ کلام تحریر کیا گیا۔ غزل چوں کہ ہماری شاعری کی مقبول صنف ہے اور ہردور میں اپنی داخلی خصوصیات اور ہیئت کے سبب پسندیدہ رہی ہے یہی وجہ ہے کہ نعتیہ مضامین کے لیے بھی سب سے زیادہ غزل کی صنف ہی مستعمل رہی ہے۔ ساجد لکھنوی کے بہ قول:

         ’’ابتدائے اردو شاعری سے اگر آپ بہ نظر غائر مطالعہ کریں تو آپ کو پچانوے فی صد نعتیں غزل کے فارم میں ملیں گی۔ ‘‘ (8)

        یہاں یہ کہنا غیر مناسب نہ ہو گا کہ نعت گوئی کاسلسلہ اردو میں ابتدا ہی سے جاری ہے اردو کا غالباً ایک بھی شاعر خواہ مسلم ہو یا غیر مسلم،  سکھ ہویا عیسائی، یا کسی اور عقیدے کا ایسا نہ ملے گا کہ اس نے نعت نہ کہی ہو، یہ اردو کے اپنے مزاج اور تہذیب کی دین ہے۔ ذخیرۂ نعت کے مطالعہ کی روشنی میں یہی ظاہر ہوتا ہے کہ ابتداء ً فارسی اور اردو میں لکھی گئی نعتیں زیادہ تر غزل کی ہیئت میں ہیں۔  پہلے ہی عرض کیا جا چکا ہے کہ نعت ایک موضوعی صنف ہے وہ کسی ایک ہیئت میں محصور نہیں رہی،  بالخصوص اردو میں یہ قصیدہ،  مثنوی،  مرثیہ،  قطعہ،  رباعی،  نظم،  معریٰ نظم،  آزاد نظم،   آزاد غزل،  مخمس،  مسدس،  مثلث،  مربع،  ثلاثی،  سانیٹ،  ہائیکو،  ترائیلے،  ماہیے،  دوہا،  کہہ مکرنی  وغیرہ تک میں لکھی جا رہی ہے اور اس لیے موضوعی تقدس کے شانہ بشانہ ہیئتی تنوع کے لحاظ سے بھی یہ کہا جا سکتا ہے کہ نعت سب سے زیادہ طاقت ور، مؤثر، نمایاں اور ممتاز صنفِ سخن ہے اور یہ صرف اپنے موضوعی تقدس اور اسلامی ارادت کی بنا پر ہی نہیں بلکہ اپنے شعری محاسن کی وجہ سے بھی بے مثال صنف تصور کی جاتی ہے۔ 

        آج جب ہم ادب کے شعری اثاثے عموماً نعتیہ شاعری کا خصوصاً تحقیقی مطالعہ کرتے ہیں تو یہ بات مکمل طور پر عیاں ہو جاتی ہے کہ نعت گوئی ادب کی جملہ اصناف میں جاری و ساری ہے۔  ادب کی مختلف اصناف میں لکھے گئے نعتیہ کلام کی مثالیں ذیل میں خاطر نشین کریں۔   

صنفِ غزل میں نعت

غزل اردو شاعری کی ایک ہر دل عزیز صنفِ  سخن ہے۔  ہر دور میں شعرا نے اس صنفِ سخن میں طبع آزمائی کی ہے۔ اردو شاعری کا بہت بڑا سرمایہ غزل کی شکل میں محفوظ ہے۔ غزل کے معنی ’’سخن با یار گفتن‘‘ کے ہیں۔  عشق و محبت غزل کے خمیر میں داخل ہے۔  لیکن غزل صرف محبت کے موضوعات ہی تک محدود نہیں۔ اس کا دائرہ بہت وسیع ہے۔  اس میں سماجی و سیاسی مسائل،  فلسفہ و تصوف اور انسانی زندگی کے مختلف پہلوؤں کی ترجمانی موجود ہے۔

        ظاہری ساخت کے اعتبار سے غزل کے پہلے شعر کے دونوں مصرعے ہم قافیہ ہوتے ہیں،  اسے مطلع کہا جاتا ہے۔ پہلے مطلع کے بعد آنے والے مطلع کو حُسنِ مطلع کہتے ہیں۔ آخری شعر میں شاعر اپنا تخلص پیش کرتا ہے جسے مقطع کہتے ہیں۔ غزل کے تمام مصرعے کسی ایک بحر میں ہوتے ہیں اسی طرح شاعر کو قافیہ و ردیف کی پابندی بھی کرنی پڑتی ہے۔ غزل کا ہر شعر ایک مکمل اکائی ہوتا ہے جو جداگانہ مضامین کی عکاسی کرتا ہے۔

        اردو شاعری کی ابتدا ہی سے غزل نے مقبولیت حاصل کر لی تھی اور تا حال اس میں کوئی فرق نہیں آیا ہے قلی قطب شاہ معانیؔ سے لے کر بانیؔ تک عوام و خواص میں غزل کی مقبولیت حیرت انگیز ہے۔  موجودہ زمانے میں فلم اور ٹی وی کے پھیلاؤ نے موسیقی میں غزل گایکی کو بھی خاصا رواج دیا اور عوام میں پسندیدہ بنا یا ہے۔

        اس میں ولی،  میرؔ ،  سوداؔ ،  انشاءؔ ،  آتشؔ ،  مصحفیؔ ،  ناسخؔ ،  ذوقؔ ،  مومنؔ ،  غالبؔ ،  ظفرؔ ،  داغؔ ،  اکبرؔ ،  اقبالؔ ،  جوشؔ ،  فراقؔ ،  یگانہؔ ،  حسرتؔ ،  جگرؔ ، ریاضؔ ،  اصغرؔ ،  آرزوؔ ،  تاباںؔ ،  مجروحؔ ،  جذبیؔ ،  اخترؔ ،  ناصرؔ ،  شکیبؔ ،  بانیؔ ،  ظفرؔ اقبال،  زیبؔ ،  خلیلؔ ،  اور نداؔ وغیرہ نے عہد بہ عہد نام پیدا کیا ہے۔ ان شعرا کی غزل کا مطالعہ زبان اور اس کے شعری برتاؤ کی تبدیلیوں اور غزل کی مختلف روایات کا مطالعہ بھی ہے۔

        غزل ہر دور میں اپنی داخلی خصوصیات اور ہیئت کے سبب پسندیدہ رہی ہے یہی وجہ ہے کہ نعتیہ مضامین کے لیے بھی سب سے زیادہ غزل کی صنف ہی مستعمل رہی ہے۔ بیشتر شعرا نے غزل ہی کے فارم میں نعتیں کہی ہیں ذیل میں مفتیِ اعظم علامہ مصطفی رضا نوریؔ بریلوی کا غزل کی ہیئت میں تحریر کیا گیا نعتیہ کلام نشانِ خاطر کیجیے   ؎

قفسِ جسم سے چھٹتے ہی یہ پرّاں ہو گا

مرغِ جاں گنبدِ خضرا پہ غزل خواں ہو گا

روز و شب مرقدِ اقدس کا جو نگراں ہو گا

اپنی خوش بختی پہ وہ کتنا نہ نازاں ہو گا

اس کی قسمت کی قسم کھائیں فرشتے تو بجا

عید کی طرح وہ ہر آن میں شاداں ہو گا

اس کی فرحت پہ تصدق ہوں ہزاروں عیدیں

کب کسی عید میں ایسا کوئی فرحاں ہو گا

چمنِ طیبہ میں تو دل کی کلی کھلتی ہے

کیا مدینہ سے سوا روضۂ رضواں ہو گا

آپ آ جائیں چمن میں تو چمن جانِ چمن

خاصہ اک خاک بسر دشتِ مغیلاں ہو گا

جانِ ایماں ہے محبت تری جانِ جاناں

جس کے دل میں یہ نہیں خاک مسلماں ہو گا

دردِ فرقت کا مداوا نہ ہوا اور نہ ہو

کیا طبیبوں سے مرے درد کا درماں ہو گا

نورِ ایماں کی جو مشعل رہے روشن پھر تو

روز و شب مرقدِ نوریؔ میں چراغاں ہو گا

اک غزل اور چمکتی سی پڑھو اے نوریؔ

دل جلا پائے گا میرا ترا احساں ہو گا

صنفِ قصیدہ میں نعت

قصیدے کی ابتدا عربی شاعری سے ہوئی۔  عربی سے یہ صنفِ سخن فارسی شاعری میں پہونچی اور فارسی کے اثرسے اردو شاعری میں اس صنفِ سخن کو فروغ حاصل ہوا۔ قصیدہ ایک موضوعی صنفِ سخن ہے۔ جس میں کسی کی مدح یا ہجو کی جاتی ہے لیکن زیادہ تر قصائد مدح و توصیف ہی کی غرض سے لکھے گئے ہیں۔ اس کے علاوہ مناظرِ قدرت،  پند و نصائح،  معاشی بدحالی،  سیاسی انتشار وغیرہ جیسے موضوعات بھی قصیدے میں بیان کیے جاتے ہیں،  قصیدے کے اجزائے ترکیبی یہ ہیں۔  (1)تشبیب(2)گریز(3)مدح(4) دعا یا حُسنِ طلب۔

        پہلا شعر قصیدے کا مطلع کہلا تا ہے یہاں سے قصیدے کا پہلا جز تشبیب شروع ہوتا ہے۔  اس میں شاعر اپنے تعلق سے فخر و امتنان پر مشتمل اشعار کہتا ہے۔ دوسرا جز گریز جیسا کہ نام سے ظاہر ہے شاعر اپنی تعریف ترک کر کے ممدوح کی مدح  و توصیف کی سمت رجوع کرتا ہے۔  اس کے بعد مدح کا مرحلہ آتا ہے جو تشبیب سے طویل تر ہوتا ہے اگرچہ ذوقؔ و غالبؔ کے قصیدوں میں مدح کے اشعار کم تعداد میں ملتے ہیں۔ حُسنِ طلب اس کے بعد کی منزل ہے جس میں قصیدہ خواں اپنے ممدوح کی جانب سے لطف و اکرام کی توقع ظاہر کرتا ہے، پھر ممدوح کے لیے دعا پر قصیدہ ختم ہو جاتا ہے۔ جس قصیدے میں اس کے تمام اجزائے ترکیبی موجود ہوں اور جس میں راست ممدوح سے خطاب کیا گیا ہو اسے خطابیہ قصیدہ کہتے ہیں۔ قصیدے میں یوں تو صرف مدح خوانی مقصود ہوتی ہے لیکن اکثر قصائد میں ہجویہ، واعظانہ، اور دوسرے بیانیہ مضامین بھی نظم کیے گئے ملتے ہیں۔ اس اعتبار سے انھیں مدحیہ، ہجویہ،  واعظانہ وغیرہ بھی کہا جاتا ہے۔ اردو میں سوداؔ ،   انشائؔ ،  ذوقؔ اور غالبؔ کے قصائد معروف ہیں۔ مدح و توصیف کے مقصد سے بعض شعرا نے پیغمبرِ اسلام صلی اللہ علیہ و سلم ، خلفائے راشدین رضی اللہ عنہم،  اور دیگر اکابرِ دین کے بھی قصیدے لکھے ہیں جن میں مومنؔ ،  محسنؔ ،  رضاؔ بریلوی،  عبدالعزیز خالدؔ اور بہت سے دوسرے نئے شعرا کے نام آتے ہیں۔ ذیل میں حضرت نوریؔ بریلوی کا صنفِ قصیدہ میں تحریر کیا گیا نعتیہ کلام خاطر نشین ہو    ؎

بہ خطِ نور اس در پر لکھا ہے

یہ بابِ رحمتِ ربِّ عُلا ہے

سر خیرہ جو اس در پر جھکا ہے

ادا ہے عمر بھر کی جو قضا ہے

مقابل در کے یوں کعبہ بنا ہے

یہ قبلہ ہے تو تُو،  قبلہ نما ہے

یہاں سے کب کوئی خالی پھرا ہے

سخی داتا کی یہ دولت سرا ہے

جسے جو کچھ ملا جس سے ملا ہے

حقیقت میں وہ اس در کی عطا ہے

یہاں سے بھیک پاتے ہیں سلاطیں

اسی در سے انھیں ٹکڑا ملا ہے

شبِ معراج سے ظاہر ہوا ہے

رسل ہیں مقتدی تو مقتدا ہے

خدائی کو خدا نے جو دیا ہے

اسی در سے اسی گھر سے ملا ہے

شہ عرش آستاں اللہ اللہ!

تصور سے خدا یاد آ رہا ہے

یہ وہ محبوبِ حق ہے جس کی رویت

یقیں مانو کہ دیدارِ خدا ہے

رمی جس کی رمی ٹھہری خدا کی

کتاب اللہ میں اللہ رمیٰ ہے

ہَوا سے پاک جس کی ذاتِ قدسی

وہ جس کی بات بھی وحیِ خدا ہے

وہ یکتا آئینہ ذاتِ اَحد کا

وہ مرآتِ صفاتِ کبریا ہے

جہاں ہے بے ٹھکانوں کا ٹھکانہ

جہاں شاہ و گدا سب کا ٹھیا ہے

کرم فرمایئے اے سرورِ دیں

جہاں منگتوں کی یہ پیہم صدا ہے

خزانے اپنے دے کے تم کو حق نے

نہ قاسم ہی کہ مالک کر دیا ہے

جسے جو چاہو جتنا چاہو دو تم

تمہیں مختارِ کل فرما دیا ہے

نہیں تقسیم میں تفریق کچھ بھی

کہ دشمن بھی یہیں کا کہہ رہا ہے

ضیائے کعبہ سے روشن ہیں آنکھیں

منور قلب کیسا ہو گیا ہے

مَے محبوب سے سرشار کر دے

اویسِ قرَنی کو جیسا کیا ہے

گما دے اپنی الفت میں کچھ ایسا

نہ پاؤں مَیں میں مَیں جو بے بقا ہے

عطا فرما دے ساقی جامِ نوریؔ

لبالب جو چہیتوں کو دیا ہے

صنفِ رباعی میں نعت

رباعی اس نظم کو کہتے ہیں جس میں صر ف چار مصرع ہوں،  پہلا،  دوسرا اور چوتھا ہم قافیہ ہو،  دوسرا شعر خصوصاً چوتھا مصرع نہایت بلند اور عجیب ہوتا کہ سننے والا متحیر ہو جائے۔ یوں تو چار مصرعوں میں ایک ہی مضمون قطعہ میں بھی بیان کیا جاتا ہے لیکن چار مصرعوں کے قطعے کے لیے کوئی عروضی وزن مخصوص نہیں جب کہ رباعی بحرِ ہزج کے چوبیس مخصوص اوزان میں کہی جاتی ہے۔  وزن کی قید کے باوجود رباعی میں اتنا تصرف جائز ہے کہ ایک ہی رباعی میں چاروں مصرعے چوبیس میں سے چار مختلف اوزان لے کر کہے جا سکتے ہیں۔  عروضیوں نے ’’لاحول ولا قوۃ الا باللہ ‘‘ کے وزن کو بھی رباعی کا وزن قرار دیا ہے۔

        رباعی اور غزل کے موضوعات میں فرق صرف دو اور چار مصرعوں میں بیان کرنے کا ہے اگرچہ رباعی میں یہ خیال رکھا جاتا ہے کہ اس کا چوتھا مصرع ’’زور دار‘‘ ہو یعنی اس میں خیال کی بلندی پائی جائے کہ سننے والا متحیر ہو جائے۔

        رباعی کی ایجاد کا سہرا فارسی شاعر رودکیؔ کے سر باندھا جاتا ہے۔ عمر خیامؔ نے صرف رباعیاں کہی ہیں جن کے سبب مشہورِ عالم شعرا میں اس کا شمار ہونے لگا۔ اردو میں یہ صنفِ شعر ابتدا ہی سے موجود ہے اور اس پر طبع آزمائی استادِ فن ہونے کے مترادف خیال کی جاتی ہے۔ میرؔ ،  سوداؔ ،  ناسخؔ ،  انیسؔ ،  دبیرؔ ،  غالبؔ ،  مومنؔ اور ذوقؔ سے لے کر امجدؔ ،  جوشؔ ،  فراقؔ ،  یگانہؔ ،  اکبرؔ ،  اقبالؔ ،  فانیؔ ،  اخترؔ ،  سہیلؔ اور رواںؔؔ وغیرہ شعرا نے رباعیاں کہی ہیں۔ ہمارے شعرا نے نعتیہ موضوعات کے اظہار کے لیے رباعی کا بھی سہارالیا چناں چہ اس میں نعتیہ کلام بہ کثرت ملتے ہیں۔ ذیل میں  حضرت نوریؔ بریلوی کی نعتیہ رباعیاں خاطر نشین کیجیے     ؎

دنیا تو یہ کہتی ہے سخن ور ہوں میں

ارے شعرا کا آج سرور ہوں میں

میں یہ کہتا ہوں یہ غلط ہے سوبار غلط

سچ تو ہے یہی کہ سب سے احقر ہوں میں

۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔

بدکار ہوں مجرم ہوں سیاہ کار ہوں میں

اقرار ہے اس کا کہ گنہ گار ہوں میں

بہ ایں ہمہ ناری نہیں نوری ہوں ضرور

مومن ہوں تو فردوس کا حق دار ہوں میں

صنفِ قطعہ میں نعت

قطعہ کے معنی ٹکڑے کے ہوتے ہیں اصطلاحاً قصیدے یا غزل کی طرح مقفّا چند اشعار جن کا مطلع نہیں ہوتا اور جن میں ایک ہی مربوط خیال پیش کیا جاتا ہے۔ یعنی قطعہ نظم نگاری کی ایک ہیئت ہے۔ قطعے میں کم سے کم دو اشعار ہونے چاہئیں زیادہ کی تعداد مقرر نہیں۔ اردو میں اقبالؔ ،  چکبستؔ ،  سیمابؔ اور جوشؔ وغیرہ کے قطعے مشہور ہیں۔ شعر ا نے قطعہ میں بھی نعتیہ موضوعات کو برتا ہے۔ حضرت نوریؔ بریلوی کا نعتیہ قطعہ ملاحظہ کیجیے     ؎

کفش پا ان کی رکھوں سر پہ تو پاؤں عزت

خاکِ پا ان کی ملوں منھ پہ تو پاؤں طلعت

طیبہ کی ٹھنڈی ہوا آئے تو پاؤں راحت

قلبِ بے چین کو چین آئے تو جاں کو راحت

صنفِ مرثیہ میں نعت

مرثیہ عربی لفظ ’’رُثاء‘‘ بہ معنی ’’  مُردے پر رونا‘‘ سے مشتق ہے۔  قدیم ترین موضوعی صنفِ سخن ہے،  دنیا بھر کی شاعری میں جس کے عمدہ نمونے دیکھے جا سکتے ہیں۔  ہومرؔ کی ’’ایلیڈ‘‘،  فردوسیؔ کی’’ شاہ نامہ‘‘ اور ویاسؔ کی ’’مہا بھارت‘‘ جیسی رزمیہ نظموں سے لے کر مرثیے کا سلسلہ واقعاتِ کربلا کے رزمیوں تک پھیلا ہوا ہے۔ رزم میں کام آنے والے سورماؤں کے سوگ اور ماتم کے علاوہ مرثیہ بزرگانِ قوم، خویش و اقارب اور مشاہیر کی موت پر بھی لکھا گیا ملتا ہے۔ کربلا کو موضوع بنا کر کہے گئے مراثی کربلائی اور دیگر شخصیات پر کہے گئے مراثی شخصی مرثیے کہلاتے ہیں۔

        اردو شاعری میں مرثیہ واقعاتِ کربلا کو موضوع بنا کر کہی گئی نظموں سے بہ طورِ صنف قائم ہوا قدیم دکنی شعرا اشرف بیابانیؔ ،  محمد قطب شاہ قلیؔ ،  ملاوجہیؔ ،  غواصیؔ ،  فائزؔ ،  شاہیؔ ،  کاظمؔ ،  ابنِ نشاطیؔ ،  ہاشمیؔ ،  نصرتیؔ وغیرہ کے کلام کو مرثیے کا نقطۂ آغاز قرار دیا جا سکتا ہے۔  شمالی ہند میں بھی یہ روایت اسی زمانے میں اسماعیلؔ امروہوی،  آبروؔ ،  یک رنگؔ ،  حاتمؔ ،  مسکینؔ ،  حزینؔ ،  غمگینؔ ،  فضلیؔ وغیرہ کے کلام میں ملتی ہے۔ میرؔ و سوداؔ نے مربع بندوں میں کثرت سے کربلائی مرثیے نظم کیے ہیں۔ اس ہیئت کے علاوہ مرثیہ مختلف ہیئتوں میں بھی لکھا گیا ہے لیکن لکھنوی شعرا نے اس صنف کے لیے مسدس کی ہیئت اختیار کر لی اور مسلسل تقلید نے جسے مرثیے کی روایت بنا دیا۔ میر ضمیرؔ ،  میرانیسؔ اور مرزا دبیرؔ نے مرثیہ نگاری میں فن کارانہ اضافے کیے گویا انھیں پر اس صنف کا اتمام ہو گیا۔ جہاں دیگر اصناف میں نعتیہ کلام ملتے ہیں،  وہیں مرثیہ میں بھی نعتیہ موضوع پر شعرا نے بند تحریر کیے ہیں،  مرثیے میں نعتیہ بند کی مثال نشانِ خاطر کیجیے    ؎

خواہاں نہیں یاقوتِ سخن کا کوئی گر آج

ہے آپ کی سرکار تو یا صاحبِ معراج

اے باعثِ ایجادِ جہاں،  خلق کے سرتاج

ہو جائے گا دم بھر میں غنی بندۂ محتاج

امید اسی گھر کی،  وسیلہ اس گھر کا

دولت یہی میری،  یہی توشہ ہے سفر کا

میں کیا ہوں،  مری طبع ہے کیا،  اے شہ شاہاں

حسّان و فرذوق ہیں یہاں عاجز و حیراں

شرمندہ زمانے سے گئے وائل و سحباں

قاصر ہیں سخن فہم و سخن سنج و سخن داں

کیا مدح کفِ خاک سے ہو نورِ خدا کی

لکنت یہیں کرتی ہیں زبانیں فصحا کی(9)

صنفِ مستزاد میں نعت

لفظی معنی ’’اضافہ کیا گیا ‘‘، اصطلاحاً ایسی نظم،  غزل یا رباعی کو کہتے ہیں جس کے ہر مصرع  یا شعر کے بعد ایسا زائد ٹکڑا لگا ہو جو اسی مصرع یا شعر کی معنویت سے مربوط یا غیر مربوط اور مصرع سے ہم قافیہ یا غیر ہم قافیہ لیکن ہم وزن فقرے سے ہم قافیہ فقروں کا اضافہ کیا گیا ہو۔ اضافہ کیا گیا فقرہ اگر مصرعے سے مربوط نہ ہو تو اسے مستزادِ عارض اور مربوط ہو تو مستزادِ اَلزم کہتے ہیں۔ مستزاد میں اضافی فقروں کی تعداد متعین نہیں یعنی یہ ایک سے زائد ہوسکتے ہیں۔ اس صنف میں نعتیہ کلام کا نمونہ امام احمد رضا بریلوی کے مجموعۂ کلام ’حدائقِ بخشش‘ سے خاطر نشین کیجیے      ؎

وہی رب ہے جس نے تجھ کو ہمہ تن کرم بنایا

ہمیں بھیک مانگنے کو ترا آستاں بتایا

تجھے حمد ہے خدایا

تمہیں حاکمِ برایا،  تمہیں قاسمِ عطایا

تمہیں دافعِ بلایا،  تمہیں شافعِ خطایا

کوئی تم ساکون آیا

یہی بولے سدرہ والے، چمنِ جہاں کے  تھالے

سبھی میں نے چھان ڈالے،  ترے پائے کا نہ پایا

تجھے یک نے یک بنایا

صنفِ مثنوی میں نعت

مثنوی اس نظم کو کہتے ہیں جس میں شعر کے دونوں مصرعے میں قافیہ آئے اور ہر شعر کے دونوں مصرعوں کے قافیے الگ الگ ہوں۔  محققین اسے ایرانیوں کی ایجاد بتاتے ہیں۔ عربی میں یہ صنف نہیں پائی جاتی البتہ رجز اس سے ملتی جلتی صنف ہے۔ شبلیؔ کہتے ہیں کہ رجز کو دیکھ کر ایرانیوں نے مثنوی ایجاد کی جو ایک ہیئتی صنف ہے جس میں کسی بھی موضوع کا اظہار کیا جا سکتا ہے اگرچہ مخصوص معنوں میں اسے عشقیہ منظوم داستان تصور کیا جاتا ہے۔  اس میں ابیات کی تعداد متعین نہیں۔ یہ چند ابیات سے لے کر سیکڑوں ابیات پر مشتمل ہو سکتی ہے اس شرط کے ساتھ کہ اس کی ہر بیت معنوں میں نا مکمل ہو یعنی تمام ابیات مل کر خیال و موضوع کی اکائی تشکیل دیں۔ ’’بوستانِ سعدی‘‘ کی حکایات مختصر مثنویاں ہیں جب کہ مولانا رومؔ کی ’’مثنوی‘‘ طویل ترین مثنوی خیال کی جاتی ہے۔ اردو میں بھی عشقیہ مثنویوں کے ساتھ فلسفیانہ، واعظانہ اور اخلاقی مثنویاں بہ کثرت موجود ہیں۔

        عام طور سے رزمیہ مثنوی کے لیے بحرِ متقارب اور بزمیہ کے لیے بحرِ ہزج یا بحرِ سریع مستعمل ہے۔ مثنوی کے عناصر یہ ہیں۔

        (1) حمد و نعت (2) مدح فرماں روائے وقت (3) تعریفِ شعر وسخن (4) قصد یا اصل موضوع (5) خاتمہ۔  بہت سے مثنوی نگاروں نے ان روایتی پابندیوں سے انحراف کیا ہے۔  حمد و نعت جس کا التزام عام طور سے شعرا کرتے ہیں،  میرؔ اور سوداؔ کی ہجویہ مثنویاں ان سے بھی خالی ہیں۔  جہاں تک مثنوی کے مضامین اور موضوعات کا تعلق ہے تو اس کا دائرہ بہت وسیع ہے۔   مذہبی واقعات،  رموزِ تصوف،  درسِ اخلاق،  داستانِ حُسن و محبت،  میدانِ کارزار کی معرکہ خیزی،  بزمِ طرب کی دل آویزی،  رسوماتِ شادی،  مافوق الفطرت کے حیرت زا کارنامے سبھی کچھ مثنویوں کا موضوع ہیں۔ اس طرح مثنوی کے مضامین میں بڑی وسعت اور ہمہ گیری ہے۔ 

        اردو میں کلاسیکی اور روایتی شاعری اس صنف سے مالامال ہے۔ میراںؔ جی،  نظامیؔ ،  اشرف بیابانیؔ ،  جانمؔ ،  عبدلؔ ،  ملاوجہیؔ ،  غواصیؔ ،  مقیمیؔ ،  نصرتیؔ ،  ابن نشاطی،  سراجؔ ،  شفیقؔ ،  جعفرؔ زٹلی،  فائزؔ ،  آبروؔ ،  حاتمؔ ،   اثرؔ ،  میرؔ ،  سوداؔ ،  انشاءؔ ،  مومنؔ اور شوقؔ وغیرہ کی مثنویاں مشہور ہیں۔ مثنوی نگار شعرا میں میر حسنؔ کے حصے میں جو مقبولیت اور شہرت آئی وہ اپنی مثال آپ ہے۔ یہ کہا جاتا ہے کہ اردو مثنوی کی تاریخ میرحسنؔ کے ذکر کے بغیر نامکمل ہے۔ علاوہ ازیں غالبؔ نے فارسی میں کئی مثنویاں لکھی ہیں اور اردو میں ایک مختصر مثنوی ’’در صفتِ انبہ‘‘۔ حالیؔ ، اقبالؔ اور جوشؔ کا کلام بھی اس سے خالی نہیں۔ ترقی پسند شعرا میں سردار جعفری نے ’’نئی دنیا کو سلام ‘‘ اور جدید شعرا میں قاضی سلیم نے ’’باغبان و گل فروش‘‘لکھ کر روایتی ہیئت میں اس صنف پر طبع آزما ئی کی ہے۔ حمد و نعت تو مثنوی کے عناصر میں شامل ہیں، ذیل میں مشہور مثنوی نگار میرحسنؔ کی مثنوی سے نعتیہ اشعار پیش ہیں   ؎

نبی کون یعنی رسولِ کریم

نبوت کے دریا کا دُرِّ یتیم

ہُوا گو کہ ظاہر میں اُمّی لقب

پَہ علمِ لدُنی کھلا دل پہ سب

کیا حق نے نبیوں کا سردار اُسے

بنایا نبوت کا حق دار اُسے

محمد کے مانند جگ میں نہیں

ہوا ہے نہ ایسا،  نہ ہو گا کہیں

صنفِ دوہا میں نعت

ہندی شاعری کی مشہور صنفِ سخن ہے۔  جس میں دو ہم قافیہ مصرعوں میں ایک مکمل خیال نظم کیا جاتا ہے۔ اسے دوہرا بھی کہتے ہیں۔ دوہا نگاری میں بعض محققین خسروؔ اور بوعلی قلندرؔ کو اولیت کا درجہ دیتے ہیں۔ دوہا نگاری زیادہ تر ہندی اور علاقائی بولیوں میں ہوتی تھی لوک ادب میں دوہا ان دونوں شعرائے کرام سے پہلے بھی مقبول تھا۔ ہندوی میں کبیرؔ ،  گرونانکؔ ،  شیخ فریدؔ شکر گنج،  ملکؔ محمد جائسی،  تلسیؔ داس،  سور داسؔ ،  خان خاناںؔ ،  رسکھانؔ ،  ملاداودؔ ،  سہجوؔ بائی،  دَیاؔ بائی،  میراؔ بائی،  بہاریؔ ،  ورندؔ وغیرہ کے دوہے مشہور ہیں۔

         مشہور ناقد نظامؔ صدیقی کے بہ قول اردو دوہا نگاری کے بانی اردو دوہوں کے اوّلین مجموعہ ’’پریٖت کی ریٖت‘‘کے شاعر خواجہ دلؔ محمد ہیں۔  نظیرؔ ،  جلیلؔ مرزا خانی،  جمیل الدین عالیؔ ،  الیاس عشقیؔ ،  تاجؔ سعید،  پرتَوؔ روہیلہ،  عادل فقیرؔ ،  جمیلؔ عظیم آبادی،  مشتاقؔ چغتائی،  عبدالعزیزخالدؔ ،  بھگوان داس اعجازؔ ،  مناظر عاشقؔ ہرگانوی،  جگن ناتھ آزادؔ ،  نادمؔ بلخی،  بیکلؔ اُتساہی،  نداؔ فاضلی وغیرہ اردو دوہا نگاری کے اہم نام تسلیم کیے جاتے ہیں۔ اس صنف میں بیش تر شعرا نے نعتیں تحریر کی ہیں نادمؔ بلخی کے دونعتیہ مجموعے اس صنف میں ہیں۔  بیکلؔ اُتساہی کے یہاں بھی نعتیہ دوہے بہ کثرت ملتے ہیں،  ذیل میں بیکلؔ کے نعتیہ دوہے ملاحظہ ہوں    ؎

صدقہ مرے رسول کا بٹتا ہے چہو اور

گدا شاہ سب ایک ہیں کوئی تور نہ مور

زُلفوں سے خوشبو بٹے چہرے سے انوار

اُن کے پاؤں کی دھول سے عرش و فرش اُجیار

وہ رب کا محبوب ہے سب اُس کی املاک

ہم سب اُس کے داس ہیں ہم کو کیا ادراک

صنفِ ماہیا میں نعت

ماہیا ایسے مختصر گیت کو کہتے ہیں جس میں ہجر و فراق کے دردو آلام کا ذکر کیا گیا ہو۔  ماہیا مفعول مفاعیلن /فاع مفاعیلن/مفعول مفاعیلن کے وزن میں تین تین مصرعوں کے بندوں میں کہا جا تا ہے۔ یہ صنف اردو شاعری میں بھی مقبول ہے۔ اردو میں جگن ناتھ آزادؔ ،  ظہیرؔ غازی پوری،  نادمؔ بلخی،  شارقؔ جمال،  بھگوان داس اعجازؔ ،  بیکلؔ اُتساہی،  پرکاشؔ تیواری،  ستیہ پال آنندؔ ،  احسن امام احسنؔ وغیرہ کے ماہیے مشہور ہیں۔ دیگر اصناف کی طرح صنفِ ماہیا میں بھی نعتیہ کلام بہ کثرت ملتے ہیں، اس صنف میں بیکلؔ اُتساہی کا نعتیہ کلام   ؎

                رحمت کا اشارا ہے

                اِک نامِ شہِ طیبہ

                جیٖنے کا سہارا ہے

                ۔ ۔ ۔ ۔ ۔ ۔ ۔ ۔ ۔ ۔

                وہ شافعِ محشر ہیں

                 سرکار کے قدموں پر

                ماں باپ نچھاور ہیں

                ۔ ۔ ۔ ۔ ۔ ۔ ۔ ۔ ۔ ۔

                اشکوں سے ضیا کیجے

                پھر نعتِ نبی بیکلؔ  

                دھڑکن سے لکھا کیجے

صنفِ سانیٹ میں نعت (Sonnet)

لفظی معنی ’’صوتِ مختصر ‘‘ سانیٹ اطالوی ادب کی صنفِ  سخن ہے جس میں ایک مضمون کو چودہ مصرعوں میں بیان کیا جاتا ہے اور بحر مخصوص ہوتی ہے۔ لیکن اردو سانیٹ کے لیے کوئی مخصوص بحر نہیں ہے۔ حنیف کیفیؔ کے بہ قول اردو شاعری میں سانیٹ انگریزی کے اثر سے داخل ہوا لیکن ایک صنفِ سخن کی حیثیت سے نہیں بل کہ جدت پسندی کے اظہار کے لیے اور نئے تجربے کی حیثیت سے۔  اردو سانیٹ کی ابتدا کے تعلق سے کیفیؔ نے ن۔م راشد کے حوالے سے لکھا ہے کہ اردو میں پہلا سانیٹ اخترؔ جونا گڑھی نے لکھا اور دوسرا خود راشدؔ نے جو راشدؔ وحیدی کے نام سے شائع ہوا۔ عام خیال یہ ہے کہ اخترؔ شیرانی نے سانیٹ کو اردو میں متعارف کرایا۔ تصدق حسین خالدؔ ،  احمد ندیم قاسمیؔ ،  تابشؔ مہدی،  منظرؔ سلیم وغیرہ نے بھی سانیٹ لکھے ہیں۔ ان کے بعد عزیزؔ تمنائی نے اس ہیئت میں شاعری کا ایک پورا مجموعہ ’’برگِ نو خیز‘‘ کے نام سے شائع کرایا ہے۔  اس صنف میں بھی نعتیں لکھی جا رہی ہیں،  نادمؔ بلخی اور علیم صباؔ نویدی کے اس صنف پر مشتمل دو نعتیہ مجموعے شائع ہو چکے ہیں۔ علیمؔ صاحب کا ایک نعتیہ سانیٹ ذیل میں خاطر نشین ہو    ؎  

گرد آلود بدن تھے ہر طرف

صورتوں پر تیرہ بختی کے نقوش

زندگی میلی دشاؤں کی شناخت

غیر سنجیدہ فضاؤں کی شناخت

نسلِ آدم کا مقدر چاک چاک

بدنما،  بے رنگ ارادے خوف ناک

دور تک پھیلے تھے پستی کے نقوش

تیرگی عریاں کھڑی تھی صف بہ صف

جلوہ فرما جب ہوئے شاہِ ہدیٰ

صورتوں میں صورتیں پیدا ہوئیں

رحمتوں پر نیتیں شیدا ہوئیں

اور منور ہو گئے ارض و سما

جسم کو تہذیب کی خوشبو ملی

زندگانی نور افشاں ہو گئی

صنفِ ہائیکو میں نعت Haiku

ہا ئیکو جاپانی صنفِ سخن ہے جو سترہ ہجاؤں اور تین سطروں میں کہی جاتی ہے اس کی پہلی اور تیسری سطر میں پانچ پانچ اوردوسری سطرمیں سات ہجائیں ہوتی ہیں جن میں ایک مکمل خیال یا لفظی پیکر تشکیل دیا جاتا ہے اور اس کا خاتمہ ہمیشہ کسی اسم پر ہوتا ہے۔  اردو میں پہلی بار(1936ء)’’ساقی‘‘ کے جاپان نمبر میں اس کے نمونے سامنے آئے، پھر مختصر نظم نگاری کے رجحان نے بہت سے شعرا کو ہائیکو لکھنے کی ترغیب دی اور اردو مزاج کے مطابق بے شمار ہائیکو لکھے گئے جن میں کبھی اصل کی تقلید کی گئی اور کبھی آہنگ کی دھن میں قافیے بھی نظم کر دیے گئے۔ اردو میں علیمؔ صبا نویدی، نادمؔ بلخی، بیکلؔ اُتساہی، ساحلؔ احمد، شبنمؔ سنبھلی، فرازؔ حامدی،  ظہیرؔ غازی پوری، شارقؔ جمال،  وغیرہ کے ہائیکو مشہور ہیں۔ بیکلؔ نے جہاں دیگر اصناف میں نعتیں تحریر کی ہیں، وہیں اس صنف میں بھی آپ کا نعتیہ کلام ملتا ہے، ذیل میں نعتیہ ہائیکو ملاحظہ ہو     ؎

                قرآں کی آیات

                دل سے پڑھیے تو لگتی ہے

                پیارے نبی کی نعت

                ۔ ۔ ۔ ۔ ۔ ۔ ۔ ۔ ۔ ۔

                جیٖنے کا احساس

                روئے تمنّا جگمگ جگمگ

                ذکرِ نبی کی آس           

صنفِ ثلا ثی میں نعت

اسے مثلث اور تثلیث بھی کہتے ہیں۔ ثلاثی تین مصرعوں پر مشتمل شعری ہیئت ہے جو مختلف اوزان و بحور اور مختلف نظامِ قوافی کے استعمال سے کسی مکمل خیال کا اظہار کرتی ہے۔ پرانی شاعری میں تین تین مصرعوں پر مشتمل بندوں کی طویل نظمیں پائی جاتی ہیں۔ نئی شاعری میں ثلاثی کے نام سے صرف تین مصرعے ایک مکمل نظم کے طور پر پیش کیے جاتے ہیں۔ ثلاثی کے تین مصرعے آزاد بھی ہوسکتے ہیں اور پابند بھی۔ اردو میں حمایت علی شاعرؔ ، حمیدالماسؔ ، عادلؔ منصوری، محمد علویؔ ، رشیدافروزؔ ، ساحلؔ احمد، علی ظہیرؔ وغیرہ کی اکثر نظمیں ثلاثی میں ہیں۔  اس صنف میں بھی نعت گو شعرا نے بارگاہِ مصطفیٰ صلی اللہ علیہ و سلم میں نذرانۂ عقیدت پیش کیا ہے     ؎

        شغلِ ذکرِ حبیب

        ہے خدا کی قسم

        ہر مرَض کا طبیب (10)

        ۔۔۔

خارزاروں کو لالہ زار کیا

  مصطفی کی نگاہ نے ارشدؔ

  جلتے صحرا کو برف بار کیا

صنفِ ترائیلے میں نعت: (Troilet)

فرانسیسی ادب کی ایک معروف صنفِ سخن ہے۔ جو آٹھ مصرعوں پر مشتمل ہوتی ہے اور جس میں پہلے مصرعے کی تکرار چوتھے اور ساتویں مصرعے کی جگہ اور دوسرے مصرعے کی تکرار آٹھویں مصرعے کی جگہ کی جاتی ہے تیسرا اور پانچواں مصرع پہلے مصرعے کے اور چھٹا مصرع دوسرے مصرعے کے قافیے میں لکھا جاتا ہے۔  اردو میں نریش کمار شادؔ ، فرحت کیفیؔ اور روف خیرؔ وغیرہ نے اس صنف میں نظمیں کہیں ہیں۔ مذکورہ صنف میں نعتیہ کلام     ؎

بشیر و نذیر و سراجِ منیر

رسولِ مکرّم خدا کے حبیب

دو عالم کی رحمت،  خدا کے سفیر

بشیر و نذیر و سراجِ منیر

پیامیِ توحیدِ ربِّ قدیر

وہ آئے تو جاگے ہمارے نصیب

بشیر و نذیر و سراجِ منیر

رسولِ  مکرّم  خدا  کے  حبیب(11)

کہہ مکرنی میں نعت

کہہ مکرنی میں عورتوں کی زبان سے کوئی بات بیان کی جاتی ہے جس میں ایک سے معشوق مراد ہوتا ہے اور دوسری سے کچھ اور۔ اس کا قائل معشوق کی بات کہہ کر مکر جاتا ہے کہہ مکرنیوں کو  سکھیاں اور مکرنیاں بھی کہتے ہیں۔ یہ امیر خسروؔ کی پسندیدہ صنف تھی اس میں بھی نعتیہ کلام کے نمونے ملتے ہیں      ؎

                ہیں وہ رب کے بڑے دُلارے

                ہم کو بھی ہیں جان سے پیارے

                کوئی نہیں ہے اُن کا ہم قد

                کیا جبریل ؟

                نہیں ،   محمّد!(12)

آزاد نظم میں نعت: (Free Verse)

ایسی نظم جو کسی روایتی شعری ہیئت کی پابند ی نہیں کرتی اس میں مقررہ تعداد میں مصرعوں کے بند نہیں ہوتے لیکن بحر و وزن کی اتنی پابندی ضرور ہوتی ہے کہ کسی وزن کا کوئی رکن منتخب کر کے اس کی تکرار کی جائے اس نظم میں مصرعے کا روایتی تصور مفقود ہونے کے سبب سطر (یا سطروں ) کو معیار مانا جاتا ہے سطریں بالعموم چھوٹی بڑی ہو تی ہیں جن کی طوالت کا انحصار خیال کی وسعت پر ہوتا ہے ویسے حقیقی آزاد نظم کا تصور محال ہے جو کسی فنی پابندی کو قبول نہیں کرتی۔

        آزاد نظم مغربی شاعری کی دین ہے جس کے ابتدائی آثار بائبل میں شامل ’’نغماتِ سلیمان‘‘ اور زبور کے انگریزی تراجم میں ملتے ہیں۔  فرانسیسی شعرا نے انیسویں اور انگریزی شعرا نے بیسویں صدی میں اسے شعری اظہار کے لیے اپنایا۔ بادلئیرؔ ،  والٹ وھٹمنؔ ،  ہاپکنزؔ ،  ایلیٹؔ ،  لارنسؔ اور بہت سے مغربی شعرا نے اسے خوب ترقی دی۔  اردو میں آزاد نظم انھیں کی تقلید میں کہی گئی۔  راشدؔ ،  میراجیؔ ،  فیضؔ اور اخترالایمانؔ اردو آزاد نظم سے منسوب اہم نام مانے جاتے ہیں۔  جدید شاعری کا بڑا حصہ اسی میں تخلیق کیا گیا ہے اور چھوٹے بڑے ہر جدید شاعر کے یہاں اس کی مثالیں دیکھی جا سکتی ہیں۔ کلیم الدین احمد نے لکھا ہے کہ آزاد نظم لکھنا پابند نظم لکھنے سے زیادہ دشوار ہے۔ اس صنف میں ڈاکٹر مناظر عاشق ہرگانوی کی ایک نعت بہ طورِ مثال خاطر نشین ہوں       ؎

                بحرِ ظلمت میں یا محمّد  ( صلی اللہ علیہ و سلم )

                ہے آپ ہی کا بس اک سہارا

                فیوضِ شبنم کی خنکیوں سے

                عذار گل ہے

                لگی ہے پت جھڑ سے

                آگ غم میں

                اندھیرا بڑھتا ہی جا رہا ہے

                جو آشکارا ہے یا پیمبر  ( صلی اللہ علیہ و سلم )

                ہم عاصیوں کے تم ہی مسیحا

                تمہارے دم سے ہے ضو فشانی (13)

        مذکورہ بالا تحقیقی جائزے سے یہ بات ظاہر ہوتی ہے کہ نعت کی کوئی مخصوص ہیئت متعین نہیں ہے۔ لیکن اس کی مقبولیت اور آفاقیت کا اندازہ اس سے لگایا جا سکتا ہے کہ ادب کی جملہ اصناف میں نعتیہ کلام ملتے ہیں۔ شعرا ے کرام نے بارگاہِ مصطفیٰ صلی اللہ علیہ و سلم میں نذرانۂ عقیدت پیش کرنے کے لیے ہر صنفِ شاعری کو برتا ہے۔  غزل،  قصیدہ،  مثنوی،  مرثیہ،  رباعی،  قطعہ،  مسدس،  مخمس،  مربع،  ثلاثی،  مستزاد،  دوہا،  ماہیا،  سانیٹ،  ہائیکو،  کہہ مکرنی،  ترائیلے،  آزاد نظم وغیرہ میں نعتیہ کلام بہ کثرت ملتے ہیں جو نعت کی بے پناہ مقبولیت اور ہمہ گیریت پر دال ہے۔

حواشی

(1)   مکتوب ظہیر غازی پوری،  محررہ  28؍مئی 2000ء

        (2)   مکتوب ڈاکٹر سید وحید اشرف،  محررہ 3؍جون 2000ء

        (3)   مکتوب ڈاکٹر سید طلحہ رضوی برقؔ داناپوری، محررہ 28؍مئی2000ء

        (4)   مکتوب ڈاکٹر مناظر عاشق ہرگانوی،  محررہ  25؍مئی 2000ء

        (5)   مکتوب ظہیر غازی پوری،  محررہ  28؍مئی 2000ء  

        (6)   مکتوب ڈاکٹر محبوب راہی،  محررہ 23 ؍ مئی 2000ء

        (7)   مکتوب ڈاکٹر شمس الرحمن فاروقی، محررہ 23؍ جولائی2008ء

        (8)   مکتوب ظہیر غازی پوری،  محررہ  28؍مئی 2000ء

        (9)   سلیم شہزاد :فرہنگِ ادبیات، منظر نما پبلشرز، مالیگاؤں، 1998ء، ص 711

        (10) دو ماہی گلبن: نعت نمبر، جنوری /اپریل 1999ء، احمد آباد، ص 42

        (11) دو ماہی گلبن: نعت نمبر، جنوری /اپریل 1999ء، احمد آباد، ص 42

        (12) دو ماہی گلبن: نعت نمبر، جنوری /اپریل 1999ء، احمد آباد، ص 42

        (13) دو ماہی گلبن: نعت نمبر، جنوری /اپریل 1999ء، احمد آباد، ص 182

        (نوٹ:        اس باب میں اصنافِ سخن کی تعریفیں زیادہ تر مشہور محقق و ناقد سلیم شہزاد

                صاحب کی مرتبہ فرہنگِ ادبیات سے لی گئی ہیں،  مُشاہدؔ ۔ )

٭٭٭

و: ضمائر کا استعمال

نعت گوئی کے فن میں ضمائر یعنی ’تو ‘ اور ’تم‘ کا استعمال اور ان کے مراجع کا تعین ایک خاص اہمیت کا حامل ہے۔  ضمائر کا استعمال حد درجہ سلیقہ اور قرینہ کا متقاضی ہے اس لیے کہ ضمائر کے استعمال میں اس بات کا خاص خیال رکھنا پڑتا ہے کہ کون سی ضمیر کس ذات کے لیے استعمال ہو رہی ہے اور اس کا تعلق عبد سے ہے یا معبود سے، نیز اسی کے ساتھ یہ بات بھی ملحوظِ خاطر رکھنا ضروری ہے کہ کس ضمیر کا مرجع کیا ہے۔ نعت میں ضمائر کے استعما ل سے زیادہ توجہ اور احتیاط اس کے مرجع کے تعین میں دامن گیر ہوتی ہے۔  بہ ہر حال! نعت میں ضمائرکا استعمال کیا جا سکتا ہے لیکن مکمل حزم و احتیاط کے ساتھ کہ معنی و مفہوم تخریب کاری کے شکار نہ ہوں ورنہ عبد کا اطلاق معبود پراور معبود کا اطلاق عبد پر ہو جائے گا جس سے دنیا و آخرت کی تباہی و بربادی ہمارا مقدر بن سکتی ہے۔ امیرؔ مینائی کا یہ شعر دیکھیں جس میں مرجع اور مُشارُُ الیہ کا تعین سمجھ میں نہیں آتا    ؎

پاک تھی رنگِ دو رنگی سے وہ خلوت گہہِ خاص

وہی شیشہ،  وہی مَے خوار تھا معراج کی شب

        امیرؔ مینائی کا یہ شعر اس امر کا اشاریہ ہے کہ قابَ قوسین کی خلوتِ گاہِ خاص میں دو نہ تھے بل کہ صرف ایک ہی ذات تھی۔ وہی ذات شراب کی بوتل،  وہی ذات شراب پینے والی تھی۔  مصرعۂ اولیٰ کے لفظ’’وہ ‘‘ کا مرجع اور مُشارُُ الیہ کون سی ذات ہے واضح طور پر پتہ نہیں چلتا کہ حضور صلی اللہ علیہ و سلم کی ذات ہے یا اللہ جل شانہ کی۔ امیرؔ مینائی کا ’’وہی ‘‘ سے خدا کی طرف اشارہ ہے یا حبیبِ خدا کی جانب،  یہ خدا ہی بہتر جانتا ہے۔ غرض مرجع اور مُشارُُ الیہ کے مجہول استعمال سے شعر ایک پہیلی بن کر رہ گیا ہے۔  خدا کو رسولِ خدا کا منصب دینا یا رسولِ خدا کو خدا کے مقام پر فائز کرنا یا دونوں کو ایک ہی قرار دینا دونوں ہی صورتیں قابلِ گرفت ہیں۔  نیز خدا اور حبیبِ خدا کو شیشہ و شراب اور مَے خوار جیسے سوقیانہ الفاظ سے تشبیہ دینا ادب و احترام کے یک سر خلاف ہے۔ چناں چہ آدابِ نعت میں یہ بات پیشِ نظر رکھنا شاعر کے لیے از حد ضروری ہے کہ وہ رسولِ کونین صلی اللہ علیہ و سلم کے لیے جس صفت یا ضمائر کا استعمال کر رہا ہے وہ ادب اور احترام سے مکمل طور پر ہم آہنگ ہو،  تاکہ کسی بھی طرح سے نعت کا تقدس اور پاکیزگی مجروح نہ ہوسکے۔  عربی اور فارسی کے بجائے اردو لسانیات کا یہ ایک توصیفی پہلو ہے کہ اس میں معظم اور مکرم شخصیتوں کے لیے ضمیرِ تعظیمی (آپ)کا استعمال کیا جاتا ہے جس سے ممدوح کا علوئے مرتبت ظاہر ہوتا ہے۔ اس لیے نعت میں ضمائر ’’تو ‘‘ اور ’’تم‘‘ سے اجتناب برتنے کی کوشش کی جانی چاہیے۔  لیکن یہاں یہ امر ذہن نشین رہے کہ جن بزرگ شعرا نے رسولِ کونین صلی اللہ علیہ و سلم کے ادب و احترام کو ملحوظ رکھتے ہوئے اپنے نعتیہ کلام میں ضمائر کا استعمال کیا ہے انھیں شریعت سے بے خبر اور بارگاہِ رسالت مآب صلی اللہ علیہ و سلم کا بے ادب اور گستاخ قرار نہیں دیا جا سکتا۔ جیسا کہ استاذِ محترم پروفیسر ڈاکٹر اشفاق انجم نے نعت میں ضمائر سے متعلق جو اظہارِ خیال کیا ہے اُس سے جید اکابرِ امت پر ضرب پڑتی ہے۔  موصوف راقم ہیں :

        ’’ آج بھی اکثر شعرا سید الثقلین،  حضور نبیِ اکرم صلی اللہ علیہ و سلم کو ’’تو‘‘ سے مخاطب کرتے ہیں،  میری نظر میں یہ گستاخی کی انتہا ہے‘‘(1)

        محترم ڈاکٹر اشفاق انجم نے نعت میں ضمائر ’’تو‘‘ ۔۔’’تم‘‘ اور اس کی اضافی صورتوں کے استعمال کو بارگاہِ رسالت مآب صلی اللہ علیہ و سلم میں گستاخی سے تعبیر کیا ہے۔  لیکن ہمیں حیرت ہوتی ہے موصوف کے مجموعۂ کلام کے نام ’’صلوا علیہ و آلہٖ‘‘ پر کہ اس میں ’’علیہ‘‘ ضمیر واحد غائب ہے جس کے معنی ہوتے ہیں ’’اُس‘‘ ۔۔ اِس طرح اگر نعت میں ضمائر ’’تو‘‘ ۔۔’’تم‘‘ اوراس کی اضافی صورتوں کا استعمال استاذِ محترم ڈاکٹر اشفاق انجم کے نزدیک بارگاہِ نبوی علیہ الصلاۃ والتسلیم میں گستاخی ہے تو موصوف خود اس کے مرتکب ہو رہے ہیں !۔۔

        یہاں یہ نہ سمجھا جائے کہ ہم نعت میں ضمائر کے استعمال کی وکالت کر رہے ہیں۔  بل کہ ہمارا مقصود یہ ہے کہ لسانی ترقی کا دائرہ جب تک محدود رہا تو جن شعرا نے نعت میں ضمائر کا استعمال کیا انھیں گستاخ اور بے ادب قرار دینا سراسر انصاف و دیانت کے منافی ہے۔  خود محترم ڈاکٹر اشفاق انجم کی مرقومہ ’’مناجات بہ واسطۂ صد و یک اسمائے رسولِ کریم ﷺ‘‘ کے چند اشعار نشانِ خاطر کریں جس میں آپ نے ضمائر ’’تو‘‘۔۔’’ تم‘‘ اور اس کی اضافی صورتوں کا استعمال کیا ہے  ؎

مدد اے شفیعِ امم المدد

کہ گھیرے ہیں رنج و الم المدد

تم ہی ہو ولی و نبی و رسول

شفیق و شکور و حبیب و وصول

تمہی داعی و ہادی و ہاشمی

تمہی بالغ و صادق و ابطحی

تمہارے کرم سے ہوں میں نام دار

جلائے گی کیا مجھ کو دوزخ کی نار

ہو جنت میں ایسی جگہ گھر مرا

تمہیں دیکھوں ہر دم حبیبِ خدا

(اشفاق انجم،  ڈاکٹر:روزنامہ انقلاب،  ممبئی،  جمعہ میگزین،  بہ تاریخ 1؍ جنوری 2010ئ، ص10)

        ڈاکٹر اشفاق انجم کی اس مناجات سے استغاثہ و فریاد کا جو پُر سوز انداز مترشح ہوتا ہے اس سے بارگاہِ رسالت مآب صلی اللہ علیہ و سلم میں آپ کی مخلصانہ عقیدت و محبت عیاں ہوتی ہے۔  اس مناجات میں آپ نے ضمائر ’’تو‘‘۔۔’’تم‘‘ اور اس کی اضافی صورتیں استعمال کی ہیں،  لیکن کہیں بھی معنی و مفہوم کا عمل ادب و احترام کے تقاضوں سے دور نہیں ہوا ہے۔  جب انجم صاحب خود ضمائر کا استعما ل کر رہے ہیں تو انھیں چاہیے کہ اپنے فرمانِ والا شان پر نظر ثانی فرما لیں۔   

        اس کے علاوہ نعت میں ضمائر کے استعمال سے متعلق ڈاکٹر اشفاق انجم ہی سے ملتا جلتا خیال ڈاکٹر ملک زادہ منظورؔ نے اپنے ایک مضمون مشمولہ ماہنامہ ’’مظہرِ حق‘‘ بدایوں کے ’’تاج الفحول نمبر‘‘ میں ظاہر فرمایا ہے موصوف لکھتے ہیں :

        ’’ اچھے نعتیہ کلام کے حسن میں اس وقت اور اضافہ ہو جاتا ہے جب شاعر احترام و ادب کے سارے لوازمات کو ملحوظِ خاطر رکھے اور اسی سیاق وسباق میں الفاظ و محاورات، صنائع و بدائع اور ضمائر کا استعمال کرے۔ چوں کہ اردو زبان میں کلمہ تعظیمی بہت زیادہ مستعمل ہیں اس لیے نعتیہ کلام میں ’’تو ‘‘ اور ’’تم‘‘ قابلِ اجتناب ہو جاتے ہیں جو شعرا شریعت کے رموز و نکات سے واقفیت رکھتے ہیں وہ ان کی جگہ ’’وہ‘‘، ’’اُن‘‘ اور ’’آپ‘‘ کے الفاظ استعمال کرتے ہیں۔ ‘‘(2)

        ڈاکٹر ملک زادہ منظورؔ کی محولہ بالا عبارت سے نعت لکھتے وقت ضمائر کا خیال کس طرح رکھا جائے پورے طور پر واضح ہو گیا ہے لیکن مذکورہ عبارت اس بات کا اشاریہ بھی ہے کہ جو شعرا اپنے نعتیہ کلام میں ’’تو‘‘ اور ’’تم‘‘ اور اس کی اضافی صورتوں کا استعمال کرتے ہیں گویا وہ شریعتِ  مطہرہ کے اسرار و نکات سے یک سر ناواقف ہیں اور یہ کہ یہ ضمیریں نعت میں استعمال کرن ا ایک طرح کا سوئے ادب اور گستاخی ہے۔ جب کہ اردو کا کوئی بھی ایسا شاعر نہیں ہو گا جس نے بارگاہِ رسالت مآب صلی اللہ علیہ و سلم میں کمالِ ادب و احترام ملحوظ رکھنے کے باوجود ان ضمائر کا استعمال نہ کیا ہو۔  قواعد کی رُو سے ان ضمائر ’’تو‘‘ اور ’’تم‘‘ کا جب تحقیقی جائزہ لیتے ہیں تو جامعہ اشرفیہ مبارکپور کے رکنِ مجلسِ شوریٰ و معروف ادیب ڈاکٹر شکیل اعظمی ’’تو‘‘، تم‘‘ اور ’’تیرا‘‘ وغیرہ ضمائر کی تحقیق کرتے ہوئے اس طرح رقم طراز ہیں   :

        ’’تو، تم، تیرا، وغیرہ اگرچہ لغۃً ضمیرِ  مخاطب اور کلمۂ خطاب ہے جو ادنا کی طرف کیا جاتا ہے۔  فارسی میں ’’تو‘‘ اور ’’شما‘‘عربی میں ’’انت‘‘۔ ۔ ۔ ۔ ’’ انتم‘‘۔ ۔ ۔ ۔  ’’لک‘‘۔ ۔ ۔ ۔ ’’ بک‘‘ وغیرہ ایک ہی انداز سے استعمال ہوتے ہیں خواہ مخاطب ادنا اور کمتر درجے کا ہو یا اعلا اور برتر درجے کا۔ لیکن اردو میں تو،  تیرا، تم جیسے کلماتِ خطاب و ضمائرادنا اور کمتر درجے کے لئے مستعمل ہیں لیکن یہ معاملہ صرف نثر تک ہی محدود ہے، نظم میں معاملہ اس سے مختلف ہے۔

        چناں چہ قواعدِ اردو از مولوی عبدالحق میں صاف درج ہے کہ نظم میں اکثر مخاطب کے لیے ’تو‘ لکھتے ہیں یہاں تک کہ بڑے بڑے لوگوں اور بادشاہوں کو بھی اسی طرح خطاب کیا جاتا ہے    ؎

بعد شاہانِ سلف کے ’تجھے‘ یوں ہے تفضیل

جیسے قرآن پسِ توریت و زبور و انجیل

                                                (ذوقؔ دہلوی)

دعا پر کروں ختم اب یہ قصیدہ

کہاں تک کہوں ’تو‘ چنیں و چناں ہے

                                                (میرؔ )

        اگرچہ لغوی اعتبار سے’ تو ‘اور’ تیرا‘ کے الفاظ کم تر درجے والوں کے لیے وضع کیے گئے ہیں لیکن اہلِ زبان پیارو محبت کے لیے بھی ان کا استعمال کرتے ہیں اور کسی بھی زبان میں اہمیت اہلِ زبان کے محاورات اور استعمالات ہی کو حاصل ہوتی ہے اس لیے نعتِ  پاک میں ان کا استعمال قطعاً درست ہے اور اس میں کسی طر ح کی بے ادبی اور شرعی قباحت نہیں۔ ‘‘ (3)

        واضح ہو کہ نعت میں بارگاہِ رسالت مآب صلی اللہ علیہ و سلم کے ادب و احترام کا پاس و لحاظ کرتے ہوئے ضمائر ’تو ‘اور’ تم‘ اور ان کی اضافی صورتوں کا استعمال بلاشبہ کیاجا سکتا ہے اور نعت میں ضمائر کا استعمال کرنے والے بزرگوں اور نعت گو شعرا کو بارگاہِ رسالت صلی اللہ علیہ و سلم کا بے ادب اور گستاخ قرار نہیں دینا چاہیے۔ بہ طورِ مثال مشہور و معروف اور مستند شعرا کے نعتیہ اشعار جن میں ’تو، تیرا، تم، تجھ وغیرہ ضمائر کا استعمال کیا گیا ہے ملاحظہ ہو    ؎

کھینچوں ہوں نقصانِ دینی یارسول

’تیری‘ رحمت ہے یقینی یارسول

                                                (میر تقی میرؔ )

’تم‘ شہ دنیا و دیں ہو یا محمد مصطفیٰ

سر گروہِ مرسلیں ہو یا محمد مصطفیٰ

                                                (نظیرؔ اکبر آبادی)

واللیل ’تیرے‘ گیسوے مشکیں کی ہے قسم

والشمس ہے ’ترے‘ رُخِ پُر نور کی قسم

                                                (بہادر شا ہ ظفرؔ )

حشر میں امّتِ عاصی کا ٹھکانہ ہی نہ تھا

بخشوانا ’تجھے‘ مرغوب ہوا،  خوب ہوا

                                                (داغؔ دہلوی)

اے خاصۂ خاصانِ رسل وقتِ دعا ہے

امّت پہ ’تری‘ آ کے عجب وقت پڑا ہے

                                                (حالیؔ )

جھلکتی ہے ’تری‘ امّت کی آبرو اس میں

طرابلس کے شہیدوں کا ہے لہو اس میں

شیرازہ ہوا ملّتِ مرحوم کا ابتر

اب ’تو‘ ہی بتا ’تیرا‘ مسلمان کدھر جائے

                                                (ڈاکٹر اقبالؔ )

’ترے‘ روضے کو مسجودِ زمین و آسماں کہیے

عبادت خانۂ عالم،  مطاعِ دوجہاں کہیے

                                                (محسنؔ کاکوروی)

’تو‘ جو چاہے ارے او مجھ کو بچانے والے

موجِ طوفانِ بلا اُٹھ کے سفینہ ہو جائے

                                                (ریاضؔ خیرآبادی )

دل جس سے زندہ ہے وہ تمنّا ’تمہیں ‘ تو ہو

ہم جس میں بس رہے ہیں وہ دنیا ’تمہیں ‘ تو ہو

                                                (ظفرؔ علی خان)

زینت ازل کی ’تو‘ ہے تو رونق ازل کی ’تو‘

دونوں میں جلوہ ریز ہے ’تیرا‘ رنگ و آب

                                                (سائل دہلوی)

’ترے‘ کردار پہ دشمن بھی انگلی رکھ نہیں سکتا

’ترا‘ اخلاق تو قرآن ہی قرآن ہے ساقی

                                                (ماہرؔ القادری )

سلام اے ظلِ رحمانی سلام اے نورِ یزدانی

’ترا‘ نقشِ قدم ہے زندگی کی لَوحِ پیشانی

                                                (حفیظؔ جالندھری)

کس کی مشکل میں ’تری ‘ ذات نہ آڑے آئی

’تیرا‘ کس پر نہیں احسان رسولِ عربی

                                                (بیدمؔ وارثی)

مرے آقا رسولِ محترم خیر الورا ’تم‘ ہو

خدائی بھر کے داتا شافعِ روزِ جزا ’تم‘ ہو

                                                (جذبیؔ بریلوی)

’تری‘ پیمبری کی یہ سب سے بڑی دلیل ہے

بخشا گدائے راہ کو ’تو‘ نے شکوہِ حیدری

                                                (جوشؔ ملیح آبادی)

حمیدِؔ بے نوا پربھی کرم ہو

مُسلَّم ہے ’ترا‘ فیضِ دوامی

                                               (حمیدؔ صدیقی لکھنوی)

ہے ’تری‘ ذات باعثِ تخلیقِ دوعالم

جھکتے ہیں ’ترے‘ در پر جہاں گیر و جہاں دارا

                                                (شورشؔ کاشمیری)

کُنتُ کنزاً سے ہویدا ہے حقیقت ’تیری‘

نور بے کیف کا آئینہ ہے صورت ’تیری‘

                                                (عزیزؔ صفی پوری)

’تو‘ حبیبِ ربِّ جلیل ہے،  ’تری‘ عظمتوں کا جواب کیا

’تو‘ ضیائے شمعِ خلیل ہے،  ’تری ‘ رحمتوں کا جواب کیا

                                                (شعریؔ بھوپالی)

’ترے ‘نام سے ہے سکونِ دل،  ’ترا‘ ذکر وجہِ قرار ہے

’تری‘ یاد پر شہِ بحر و بر،  مری زندگی کا مدار ہے

                                                (نفیسؔ لکھنوی)

رخشندہ ’ترے‘ حسن سے رخسارِ یقیں ہے

تابندہ ’ترے‘ عشق سے ایماں کی جبیں ہے

                                                (صوفی غلام مصطفیٰ تبسمؔ )

کعبہ ہے زاہد کا قبلہ، میں تو ہوں ’تیرا ‘ عاشقِ شیدا

قبلہ مرا ’ترے ‘ ابروئے پُر خم، صلی اللہ علیک و سلم

                                                (آسیؔ سکندرپوری )

دستگیری اب ’تری‘ درکار ہے

ہے فقیرِؔ خستہ مضطر الغیاث

                                                (فقیرؔ بدایونی)

        یہ ایک مسلمہ حقیقت ہے کہ حضور رحمتِ عالم صلی اللہ علیہ و سلم سے عشق و محبت اور ادب و احترام خانوادۂ رضا بریلوی کا طرۂ امتیاز ہے،  امام احمد رضا محدثِ بریلوی اور ان کے فرزندِ ارجمند مفتیِ اعظم علامہ مصطفیٰ رضا نوریؔ بریلوی بارگاہِ رسالت مآب صلی اللہ علیہ و سلم کے وہ نعت گو شعرا ہیں کہ جن کی مثیل و نظیر شاید ہی کہیں ملے۔ ان شمع رسالت کے پروانوں اور مصطفیٰ جانِ رحمت صلی اللہ علیہ و سلم کے دیوانوں کے شعر شعر میں شرعی و لسانی حزم و احتیاط کے وہ جلوے پنہاں ہیں جو کسی اور کے یہاں شاذونادر ہی پائے جاتے ہوں ان واقفانِ علمِ  شریعت اور محافظانِ ناموسِ رسالت نے بھی اپنے نعتیہ کلام میں ’’تو، تیرا، تم‘ وغیرہ ضمائر کابلا تکلف استعمال فرمایا ہے۔

        چناں چہ امام احمد رضا بریلوی نے اپنے مشہور و معروف نعتیہ مجموعۂ کلام ’’ حدائقِ بخشش‘‘ میں جو پہلی نعت درج کی ہے اس کی ردیف ہی ’’تیرا‘‘ ہے     ؎

واہ کیا جود و کرم ہے شہ بطحا ’تیرا‘

نہیں سنتا ہی نہیں مانگنے والا ’تیرا‘

’تو‘ جو چاہے تو ابھی میل مرے دل کے دُھلیں

کہ خدا دل نہیں کرتا کبھی میلا ’تیرا‘

’تیرے ‘ ٹکڑوں سے پلے غیر کی ٹھوکر پہ نہ ڈال

جھڑکیاں کھائیں کہاں چھوڑ کے صدقہ ’تیرا‘

’تو‘ نے اسلام دیا ’تو‘ نے جماعت میں لیا

’تو‘ کریم اب کوئی پھرتا ہے عطیہ ’تیرا‘

’تیری‘ سرکار میں لاتا ہے رضاؔ اُس کو شفیع

جو مرا غوث ہے اور لاڈلا بیٹا ’تیرا‘

        مفتیِ اعظم علامہ مصطفی رضا نوریؔ بریلوی کے نعتیہ کلام میں ضمائر کا بہ کثرت استعمال ہوا ہے۔  مگرضمائر کے مراجع اور مُشارُُ الیہ میں کہیں بھی مجہول انداز نہیں دکھائی دیتا، کلامِ نوریؔ میں ضمائر کا استعمال بڑے حسن و خوبی اور سلیقہ و قرینہ سے کیا گیا ہے کہ کہیں بھی اس کے مرجع کے تعین میں کسی طرح کی کوئی دقت محسوس نہیں ہوتی    ؎

ضیا بخشی ’تری‘ سرکار کی عالم پہ روشن ہے

مہ و خورشید صدقہ پاتے ہیں پیارے ’ترے‘ در کا

۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔

’تو‘ ہے رحمت،  بابِ رحمت ’تیرا‘ دروازہ ہوا

سایۂ فضلِ خدا سایہ ’تری‘ دیوار کا

۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔

’تو‘ اگر چاہے ملے خاک میں سلطانِ زماں

’تیرا‘ بندہ کوئی ’تو‘ چاہے تو سلطاں ہو گا

        حضرت نوریؔ بریلوی کے متذکرہ بالا اشعار سے یہ واضح ہوتا ہے کہ آپ نے بارگاہِ رسالت مآب صلی اللہ علیہ و سلم کے ادب و احترام کو ملحوظِ خاطر رکھتے ہوئے اس حسن و خوبی کے ساتھ ضمائر کا  استعمال کیا ہے کہ مرجع و معنی کے تعین و تفہیم میں کسی طرح کی کوئی دشواری محسوس نہیں ہوتی اور عبد و معبود کا واضح فرق نظر آتا ہے، مرجع اور مُشارُُ الیہ میں معقولیت کے سبب شعر فہمی میں دقت کا احساس نہیں ہوتا۔  کلامِ نوریؔ سے ضمائر کے استعمال کی مزید مثالیں نشانِ خاطر ہوں  ؎

’تیرا‘ دیدارِ کرم رحمِ مجسم ’تیرا‘

دیکھنی ہو جسے رحماں کے کرم کی صورت

۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔

مالکِ کل کے ’تم‘ ہو نائب، سب ہے ’تمہارا‘ حاضر و غائب

’تم‘ ہو شہود و غیبت والے، صلی اللہ صلی اللہ صلی اللہ علیک و سلم

۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔

ہر ذرہ پر ’تیری‘ نظر ہے،  ہر قطرہ کی ’تجھ‘ کو خبر ہے

ہو علمِ لدنی کے ’تم‘ دانا،  صلی اللہ علیک و سلم

۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔

بہارِ جاں فزا ’تم‘ ہو، نسیمِ داستاں ’تم‘ ہو

بہارِ باغِ رضواں ’تم‘ سے ہے زیبِ جناں ’تم‘ ہو

حبیبِ ربِّ رحماں ’تم‘ مکینِ لامکاں ’تم‘ ہو

سرِ ہر دوجہاں ’تم‘ ہو شہ،  شاہنشہاں ’تم‘ ہو

۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔

’تمہارے‘ فیض سے لاٹھی مثالِ شمع روشن ہو

جو ’تم‘ لکڑی کو چاہو تیز تر تلوار ہو جائے

’تمہارے‘ حکم کا باندھا ہوا سورج پھرے اُلٹا

جو ’تم‘ چاہو کہ شب دن ہوا بھی سرکار ہو جائے

۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔

’تم‘ آئے چھٹی بازی رونق ہوئی پھر تازی

کعبہ ہوا پھر کعبہ کر ڈالا تھا بت خانہ

کیوں زلفِ معنبر سے کوچے نہ مہک اُٹھیں

ہے پنجۂ قدرت جب زلفوں کا ’تری‘ شانہ

ہر پھول میں بو ’تیری‘ ہر شمع میں ضو ’تیری‘

بلبل ہے ’ترا‘ بلبل پروانہ ہے پروانہ

پیتے ہیں ’ترے‘ در کا کھاتے ہیں ’ترے‘ در کا

پانی ہے ’ترا‘ پانی دانہ ہے ’ترا‘ دانہ

میں شاہ نشیں ٹوٹے دل کو نہ کہوں کیسے

ہے ٹوٹا ہوا دل ہی مولا ’ترا‘ کاشانہ

۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔

فوجِ غم کی برابر چڑھائی ہے

دافعِ غم ’تمہاری‘ دہائی ہے

’تم‘ نے کب آنکھ ہم کو دکھائی ہے

’تم‘ نے کب آنکھ ہم سے پھرائی ہے

’تو‘ خدا کا ہوا اور خدا ’تیرا‘

’تیرے‘ قبضے میں ساری خدائی ہے

تاج رکھا ’ترے‘ سر رفعنا کا

کس قدر ’تیری‘ عزت بڑھائی ہے

        مذکورہ بالا اشعار میں بارگاہِ مصطفیٰ صلی اللہ علیہ و سلم کے ادب و احترام اور تعظیم و توقیر کے جملہ لوازمات کے ساتھ ضمائر کو نہایت طریقے اور سلیقے کے ساتھ استعمال کیا گیا ہے۔  لہٰذا مذکورہ مثالوں سے کلّی طور پر واضح ہو گیا کہ حضرت نوریؔ بریلوی نے بھی ضمائر کی زبان میں نعت نگاری کی ہے۔ لیکن زمامِ حزم و احتیاط کو مکمل طور پر ملحوظِ خاطر رکھا ہے یہی وجہ ہے کہ آپ کا کلام اپنی قادرالکلامی اور انفرادیت کی آئینہ داری کرتا ہے۔

        حاصلِ مطالعہ یہ کہ نعت میں ضمائر کا استعمال کیا جا سکتا ہے۔  لیکن اس سلیقہ مندی سے کہ معنی و مفہوم کسی بھی طرح کی تخریب کاری کے شکار نہ ہوں اور نعت کے جملہ لوازمات کا احترام بھی باقی رہے۔  ہاں ! وہ شعرائے کرام جنھوں نے لسانی ترقی کے ہوتے اپنی نعتوں میں ضمائر ’’تو،  تم تیرا ‘‘ اور اس کی شکلیں کی بجائے ضمیرِ تعظیمی ’’آپ‘‘ کا استعمال کیا ہے اور کر رہے ہیں وہ بلا شبہ لائقِ تحسین و آفرین ہیں۔  آج جب کہ زبان کا دائرہ وسعت اختیار کر چکا ہے تو نعت نگار شعرا کو چاہیے کہ نعت میں ضمیرِ تعظیمی کا ہی استعمال کریں تو بہتر ہے۔ 

حواشی

(1) اشفاق انجم،  ڈاکٹر: پیش لفظ صلو ا علیہ وآلہ،  ۔۔(2)ماہنامہ اشرفیہ : ستمبر2000ء مبارک پور، ص43

(3)ماہنامہ اشرفیہ : ستمبر2000ء مبارک پور، ص48/

٭٭٭

باب دوّم

مفتیِ اعظم علامہ مصطفیٰ رضا نوریؔ بریلوی۔ حیات و خدمات

الف :حیاتِ نوریؔ بریلوی

مفتیِ اعظم حضرت نوریؔ بریلوی کا شجرۂ نسب۔ ایک نظر میں

        مفتیِ اعظم علامہ مصطفیٰ رضا نوریؔ بریلوی ہندوستانی مسلمانوں کے ایک مذہبی رہِ نما گذرے ہیں۔  آپ عالم اسلام کی مشہور شخصیت امام احمد رضا محدث بریلوی (م1921ء) کے فرزند اصغر تھے۔  آپ کا خانوادہ کئی صدی  پیش تر سے اسلامی علوم و فنون کا مرکز و محور رہا ہے۔  آپ تقوا و طہارت میں بلندیِ کردار سے متصف تھے۔ مرجعِ فتاویٰ تھے۔ ملتِ اسلامیہ کے قائد و رہِ بر تھے۔ ذیل میں آپ کا شجرۂ نسب پیش کیا جاتا ہے۔ جس کی ابتدا حضرت سعید اﷲ خان صاحب سے کی جا رہی ہے جو عالی جاہ شجاعت جنگ بہادر کے لقب سے مشہور تھے اور قندھار سے سلطان شاہ محمد شاہ کے ہمراہ ہندوستان آئے تھے۔  اعلا انتظامی صلاحیتوں کی وجہ سے حکومت وقت نے انھیں ’’شش ہزاری ‘‘کے منصب سے سرفراز کیا تھا۔ لاہور کا ’’شیش محل‘‘ آپ ہی کی جاگیر تھی۔ آپ کے صاحب زادے سعادت یار خاں صاحب ہیں جوسلطانِ وقت کے وزیر مالیات تھے ان کی امانت داری اور دیانت داری کو دیکھ کر سلطان محمد شاہ نے ضلع بدایوں کے کئی مواضعات انھیں عطا کیے جو آج بھی اس خاندان کے حصے میں ہیں۔ سعادت یار خاں صاحب کے تین فرزند محمد معظم خاں صاحب، محمد اعظم خاں صاحب اور محمد مکرم خاں صاحب ہوئے۔ ان میں محمد اعظم خاں صاحب بھی وزارتِ اعلا کے عہدے پر فائز تھے، مگر کچھ عرصہ بعد سلطنت کی ذمہ داریوں سے سبک دوشی حاصل کر لی اور زہد و اتقا، ریاضت و روحانیت کی جانب مکمل طور پر مائل ہو گئے آپ ہی کی ذات والا مرتبت سے قندھار کے اس خانوادے میں علم و فضل اور زہد و اتقا کا بول بالا شروع ہوا۔  حضرت نوریؔ بریلوی، محمد اعظم خاں صاحب ہی کی نسل سے تعلق رکھتے ہیں۔ محمد اعظم خاں صاحب کے یہاں چار بیٹیاں تولد ہوئیں اور ایک فرزند حافظ کاظم علی خاں ہوئے،  جن کی آل میں تین صاحب زادیاں اور تین بیٹے امام العلماء رضا علی خاں صاحب، حکیم تقی علی خاں صاحب اور جعفر علی خاں صاحب تولد ہوئے۔ حافظ کاظم علی خاں صاحب کے بیٹوں میں امام العلماء رضا علی خاں صاحب کی اولاد میں مولانا نقی علی خاں صاحب اور تین بیٹیاں ہوئیں۔ مولانا نقی علی خاں صاحب کے یہاں تین بیٹے امام احمد رضا، مولانا حسن رضا،   محمد رضا اور تین صاحب زادیاں پیدا ہوئیں۔ مفتیِ اعظم علامہ مصطفیٰ رضا نوریؔ بریلوی،  مولانا نقی علی خاں صاحب کے بڑے بیٹے امام احمد رضا خاں صاحب کے فرزندِ اصغر ہیں۔  حضرت نوریؔ بریلوی کے بڑے بھائی مولانا حامد رضا خاں صاحب اور پانچ بہنیں مصطفائی بیگم، کنیز حسن،  کنیز حسنین،  کنیزحسین اور مرتضائی بیگم ہیں۔ حضرت نوریؔ بریلوی کے یہاں ایک بیٹے انوار رضا خاں صاحب ہوئے جو کم سنی ہی میں انتقال فرما گئے علاوہ ازیں آپ کی چھ بیٹیاں ہوئیں، جن کے اسمائے گرامی نگار فاطمہ، انوار فاطمہ، برکاتی بیگم، رابعہ بیگم، ہاجرہ بیگم اور شاکرہ بیگم ہیں۔ مزید خاکے سے شجرۂ نسب کی تفصیل واضح طور پر نمایاں ہوتی ہے۔

مفتیِ اعظم علامہ مصطفیٰ رضا نوریؔ بریلوی کا شجرۂ نسب

سعید اﷲ خاں (شجاعت جنگ بہادر)

سعادت یار خاں (وزیر مالیات)

محمد معظم خاں            محمد اعظم خاں            محمد مکرم خاں

چار صاحبزادیاں          حافظ کاظم علی خاں

تین صاحبزادیاں   امام العلما رضا علی خاں        حکیم تقی علی خاں        جعفر علی خاں

مولانا نقی علی خاں               تین صاحبزادیاں

امام احمد رضا خاں        مولاناحسن رضا خاں     محمد رضا خاں       تین صاحبزادیاں

مولانا حامد رضا خاں   مولانا مصطفی رضا نوریؔ بریلوی   مصطفائی بیگم    کنیز حسن   کنیز حسنین    کنیز حسین   مرتضائی بیگم

انوار رضا خاں  نگار فاطمہ   انوار فاطمہ   برکاتی بیگم    رابعہ بیگم     ہاجرہ بیگم     شاکرہ بیگم  (1)

  (کم سنی میں انتقال ہو گیا)

حیاتِ مفتیِ اعظم علامہ مصطفیٰ رضا نوریؔ بریلوی

(1310ھ1893ء تا1402ھ /1981ء)

ولادت

تحقیق و مطالعہ سے ظاہر ہوتا ہے کہ مفتیِ اعظم علامہ مصطفیٰ رضا نوریؔ بریلوی دنیائے اسلام کے عظیم رہِ نما،  قطبِ زمانہ،  مرجع العلماء و الخلائق،  رہبرِ شریعت و طریقت،  غزالی دوراں،  رازیِ زماں،  با فیض مدرس،  پُر خلوص داعی،  عظیم فقہیہ،  مفسر، محدث، خطیب،  مفکر،  دانش ور، تحریک آفریں قائد،  مایۂ ناز مصنف و محقق اور بلند پایہ نعت گو شاعر اور گوناگوں خصوصیات کے مالک تھے۔  آپ عالمِ اسلام کی مشہور شخصیت امام احمد رضا بریلوی کے فرزندِ اصغر تھے۔ آپ کا خاندان علم و فضل،  زہد و اتقا اور عشقِ رسول (صلی اللہ علیہ و سلم ) میں نمایاں مقام رکھتا ہے۔ آپ کی ولادت 22؍ ذی الحجہ1310ھ بمط 7 جولائی1893ء بروز جمعہ بہ وقتِ صبح صادق آپ کے چچا استاذِ زمن علامہ حسن رضا بریلوی کے دولت کدہ پر، واقع رضا نگر، محلہ سوداگران، بریلی،  یوپی،  (انڈیا) میں ہوئی۔ (2)

اسم گرامی

مفتیِ اعظم علامہ مصطفیٰ رضا نوریؔ بریلوی کا پیدایشی اور اصل نام ’ ’محمد‘‘ ہے۔  آپ کا عقیقہ اسی نام پر ہوا۔  غیبی نام ’’آلِ رحمن ‘‘ہے۔ پیر و مرشد نے آپ کا پورا نام ’’ابوالبرکات محی الدین جیلانی ‘‘ تجویز فرمایا اور والد گرامی نے عرفی نام ’’مصطفیٰ رضا‘ ‘ رکھا۔ فنِ شاعری میں آ پ اپنے پیر ومرشد شیخ المشائخ سید شاہ ابوالحسین نوریؔ میاں مارہروی نور اللہ مرقدہٗ(م1324ء) کی نسبت سے اپنا تخلص ’’نوریؔ ‘‘ فرماتے تھے۔  عرفی نام اس قدر مشہور ہوا کہ ہر خاص و عام آ پ کو اسی نام سے یاد کرتے ہیں۔ (3)

مشہور ترین لقب

یوں تو آپ کو علم و فضل کی بنیاد پر بہت سارے القاب سے نوازا گیا، مگر جس لقب کو شہرتِ دوام حاصل ہوئی وہ ہے ’’مفتیِ اعظم‘‘۔  اس کی تفصیل آ گے پیش کی جائے گی۔

ولادت سے قبل بشارت

مفتیِ اعظم علامہ مصطفیٰ رضا نوریؔ بریلوی کی ولادت سے پہلے والد ماجد امام احمد رضا بریلوی اپنے پیر و مرشد حضرت سید شاہ آل رسول احمدی مارہروی (م1297ھ) کے مزارِ پاک کی زیارت اور سید المشائخ سید شاہ ابوالحسین نوریؔ مارہروی(م1324ھ) سے ملاقات کے لیے مارہرہ مطہر ہ تشریف لے گئے تھے۔ اس موقع پر جو واقعات ہوئے اس کی الگ الگ روایتیں سامنے آئی ہیں،  مگر ان میں فقیہ النفس مفتی مطیع الرحمن رضوی کی وہ روایت جسے آپ نے مولاناسید شاہد علی رضوی رام پو ری سے بیان کیا،  بہ ایں معنی قابلِ ترجیح ہے کہ مفتی صاحب موصوف نے اس کو خود مفتیِ اعظم علامہ مصطفیٰ رضا نوریؔ بریلوی کی زبانی سماعت کیا ہے۔ سید شاہد علی رضوی تحریر فرماتے ہیں  :

        ’’22؍ ذی الحجہ1310ھ کی شب میں تقریباً نصف رات تک امام احمد رضا قدس سرہ اور سید المشائخ حضرت نوری میاں قدس سرہ کے درمیان علمی مذاکرات رہے۔  پھر دونوں اپنی اپنی قیام گاہوں میں آرام فرما ہوئے۔  اسی شب عالمِ خواب میں دونوں بزرگوں کو حضرت مفتی اعظم کی ولادت کی نوید دی گئی اور نومولود کا نام ’آل الرحمن ‘ بتا یا گیا۔  خواب سے بیداری پر دونوں بزرگوں میں سے ہر ایک نے یہ فیصلہ کیا کہ بہ وقتِ ملاقات مبارک باد پیش کروں گا۔ ۔ ۔ ۔ ۔ ۔ ۔ ۔  فجر کی نما ز کے لیے جب دونوں بزرگ مسجد پہنچے تو مسجد کے دروازے پر ہی دونوں بزرگوں کی ملاقات ہو گئی اور وہیں ہر ایک نے دوسرے کو مبارک باد پیش کی۔ فجر کی نماز کے بعد سید المشائخ حضرت سید شاہ ابو الحسین نوری میاں قدس سرہ نے امام احمد رضا سے ارشاد فرمایا :

        ’مولانا صاحب!آپ اس بچے کے ولی ہیں۔ اگر اجازت دیں تو میں نو مولود کو داخلِ سلسلہ کر لوں۔ ‘۔۔ امام احمد رضا قدس سرہ نے عرض کیا :  ’حضور غلام زادہ ہے اسے داخلِ سلسلہ فرما لیا جائے۔ ‘۔۔ سید المشائخ حضرت سید شاہ ابو الحسین نوری میاں قدس سرہ نے مصلا ہی پر بیٹھے بیٹھے مفتی اعظم کو غائبانہ داخلِ سلسلہ فرما لیا۔  حضرت سید المشائخ نے امام احمد رضا کو اپنا عمامہ اور جبہ عطا فرماتے ہوئے ارشاد فرمایا :

        ’میری یہ امانت آپ کے سپرد ہے جب وہ بچہ اس امانت کا متحمل ہو جائے تو اسے دے دیں۔  مجھے خواب میں اس کا نام ’آل الرحمن ‘بتایا گیا ہے۔ لہٰذا نومولود کا نام ’آل الرحمن ‘ رکھیے۔  مجھے اس بچے کو دیکھنے کی تمنا ہے۔  وہ بڑا ہی فیروز بخت اور مبارک بچہ ہے۔  میں پہلی فرصت میں بریلی حاضر ہو کر آپ کے بیٹے کی روحانی امانتیں اس کے سپرد کر دوں گا۔ ‘‘

        دوسرے روز جب ولادت کی خبر مارہرہ پہنچی تو سید المشائخ حضرت سیدشاہ ابوالحسین نوری قدس سرہ نے نومولود کا نام ’ابوالبرکات محی الدین جیلانی ‘منتخب فرمایا۔ ۔ ۔ ۔ ۔ ۔ ا مام احمد رضا قدس سرہ نے ساتویں روز ’’محمد ‘‘ نام پر بیٹے کا عقیقہ کیا۔ (4)

        متذکرہ واقعہ سے یہ ظاہر ہوتا ہے کہ اللہ رب العزت جل شانہٗ کے نیک طینت اور پاک باز بندوں پر عنایاتِ الٰہیہ سے غیبی طور پر آیندہ پیش آنے والے امور منکشف ہو جاتے تھے۔ مفتیِ اعظم قدس سرہ کی ولادت کی خبریں جن بندگانِ خدا نے دیں وہ اپنے عہد کے قطب اور مجدد ہیں۔ انھیں نفوسِ قدسیہ کی بشارتوں کا یہ ثمرہ ہے کہ مفتیِ اعظم قدس سرہ کا نام آج دنیائے اسلام کے افق پر روشن و منور ہے۔ 

بیعت و خلافت

6؍ ماہ بعد جب 25 جمادی الثانی 1311ھ کو سید المشائخ سید شاہ ابوالحسین نوری میاں مارہروی (م1324ھ) بریلی تشریف لائے تومفتیِ اعظم قدس سرہ کو اپنی آغوش میں لے کر دعاؤں سے نوازا اور چھ ماہ تین دن کی عمر میں ہی آپ کو داخلِ سلسلہ فرما کر تمام سلاسل کی اجازت و خلافت سے سرفراز کیا۔ اور دورانِ بیعت ارشاد فرمایا کہ   :

        ’’یہ بچہ دین و ملت کی بڑی خدمت کرے گا اور مخلوق خدا کو اس کی ذات سے بہت فیض پہونچے گا،  یہ بچہ ولی ہے، اس کی نگاہوں سے لاکھوں گم راہ انسان دین حق پر قائم ہوں گے۔  یہ فیض کا دریا بہائے گا۔ ‘‘(5)

        سید المشائخ نے حلقۂ بیعت میں لینے کے بعد قادری نسبت کا دریائے فیض بنا کر ابوالبرکات محی الدین جیلانی کو امام احمد رضا کی آغوش میں دیتے ہوئے ارشاد فرمایا:

        ’’مبارک ہو آپ کو یہ،  قرآنی آیت۔۔  ’’واجعل لی وزیرا من اہلی ‘‘ کی تفسیر مقبول ہو کر آ پ کی گود میں آ گئی ہے۔۔ ’’ آل الرحمن۔  محمد۔  ابولبرکات۔  محی الدین جیلانی۔  مصطفیٰ رضا ‘‘  (6)

        بزرگوں کے اقوال سے یہ بات مذکور ہے کہ جب کسی شخص میں محاسن کی کثرت ہوتی ہے تو اس کا ہر کام تشنۂ توصیف ہوتا ہے ، اور لوگ ایسی جامع الصفات شخصیت کو مختلف ناموں سے پکارتے ہیں۔ مفتیِ اعظم حضرت نوریؔ بریلوی کے نام میں پہلی نسبت رحمن سے ہے، دوسری نسبت حضوراقدس صلی اللہ علیہ و سلم سے ہے، تیسری نسبت غوث اعظم علیہ الرحمہ سے ہے اور چوتھی والد گرامی امام احمد رضا بریلوی سے ہے۔ اگرچہ یہ اہتمام تو اکابر نے اپنی بالغ نظری سے کیا مگر دنیا نے اس منبعِ خیر و فلاح سے قریب ہو کر جب فیوض حاصل کیا تو لوگ اپنے جذبۂ ستایش پر قابو نہ پا سکے۔ یہی وجہ ہے کہ آج آپ مختلف مبارک ناموں سے یاد کیے جاتے ہیں۔

تعلیم کا آغاز

جب مفتیِ اعظم قدس سرہ نے ہوش و خرد کی منزل میں قدم رکھا تو آپ کو زیورِ علم اور تہذیبِ اخلاق سے آراستہ کرنے کے لیے والدِ ماجد امام احمد رضا بریلوی کے قائم کردہ مدرسہ’’منظرِ اسلام‘‘ میں داخل کرایا گیا۔  آپ نے مدرسہ کے مختلف اساتذہ سے کسبِ علم کیا مگر آپ کی تربیت میں سب سے زیادہ دخل آپ کے برادرِ اکبر مولانا حامد رضا خاں بریلوی (م1362ھ/1943ء) کا رہا،  انھوں نے اس ہیرے کو خوب خوب تراشا ہر زاویے سے دیکھا پرکھا اور جب قوم کے روٗ بہ روٗ کیا تو بڑے بڑوں کی آنکھیں خیرہ ہو گئیں،  بعد اس کے آپ نے اپنے والدِ گرامی امام احمد رضا بریلوی سے اکتسابِ فیض کیا۔  ابتدا ہی سے ذکاوت و نکتہ سنجی،  جودتِ طبع،  فکر و خیال کی بلندی،  حصولِ علم میں کد و کاوش نمایاں رہی۔ آپ کے اساتذۂ کرام میں برادرِ اکبر مولانا حامد رضا خاں بریلوی،  مولانا شاہ رحم الٰہی منگلوری (م1361ھ)،  مولانا سید شاہ بشیر احمد علی گڑھی،  مولانا ظہور الحسین فاروقی رام پوری (م1342ھ) علیہم الرحمۃکا شمار ہوتا ہے۔

        تعلیم سے فراغت:  

        مفتیِ اعظم علامہ مصطفیٰ نوریؔ بریلوی نے 1328ھ/1910ء میں بہ عمر اٹھارہ سال خداداد ذہانت،  ذوقِ مطالعہ،  لگن و محنت اور اساتذۂ کرام کی شفقت و محبت،  والد گرامی امام احمد رضا بریلوی کی کامل توجہ اور مرشد گرامی حضرت سید شاہ ابوالحسین احمد نوری مارہروی کی روحانی عنایات کے نتیجے میں جملہ علوم و فنون،  منقولات و معقولات پر عبور حاصل کیا اور دارالعلوم منظر اسلام بریلی سے فراغت پائی۔ (7)

علوم و فنون

مفتیِ اعظم علامہ مصطفیٰ رضا نوریؔ بریلوی کی تصنیفات و تالیفات کے مطالعہ کے بعد یہ خیال تقویت پاتا ہے کہ برِ صغیر ہند و پاک میں علومِ عقلیہ و نقلیہ کی جتنی مشہور سندیں ہیں۔ آپ کا سلسلۂ تلمذ اُن سب کا جا مع ہے۔  ذیل میں ان علوم و فنون کی فہرست پیش کی جاتی ہے جو آپ نے’’ بریلوی سلسلۂ تلمذ ‘‘کے واسطے سے نہ صرف حاصل کیے بل کہ ان میں انھیں مہارتِ تامّہ و کاملہ بھی حاصل رہی۔

                (1)   علم تفسیر   

                (2)   علم حدیث  

                (3)   اُصول حدیث               

                (4)   فقہ(جملہ مذاہب)

                (5)   اصول فقہ

                (6)   علم الفرائض

                (7)   جدل

                (9)   عقائد

                (10) کلام

                (11) نحو

                (12) صرف

                (13) معانی

                (14) بیان

                (15) بدیع

                (16) منطق

                (17) مناظرہ

                (18) فلسفہ

                (19) تکسیر

                (20) ہیئت

                (21) حساب

                (22) ہندسہ

                (23) قراء ت

                (24) تجوید

                (25) تصوّف

                (26) سلوک

                (27) اخلاق

                (28) اسماء الرجال

                (29) سیَر  

                (30) تاریخ

                (31) لغت

                (32) ادب(عربی، فارسی، اردو)

                (33) عروض و قوافی  

                (34) توقیت

                (35) اوفاق

                (36) فنِ تاریخ و اعداد

                (37) جفر  

                (38) ریاضی  وغیرہ۔   (8)

        علوم و فنون کی یہ کثرت مفتیِ اعظم حضرت نوریؔ بریلوی کے علوئے مرتبت پر دلالت کرتی ہے۔  ان علوم فنون کو آپ نے خالص اللہ و رسول (جل و علا و صلی اللہ علیہ و سلم )کی رضا و خوش نودی اور دین و مذہب کی ترویج و اشاعت کے لیے حاصل کیا۔ مذکورہ بالا علوم و فنون آپ نے جن سلاسل سے حاصل کیے اور امام احمد رضا بریلوی نے آپ کو جن 25سلاسل اولیا و سلاسل قرآن و سلاسل حدیث کی اجازت مرحمت فرمائی ان اسنادکے نقشے آیندہ صفحات کی زینت بنیں گے۔

خلافت و اجازت

تعلیم و تربیت سے فراغت کے بعد آپ کے والدِ ماجد امام احمد رضا محدثِ بریلوی نے آپ کو جمیع اوراد و وظائف اور جملہ سلاسلِ طریقت کی خلافت و اجازت عطا فرمائی۔

عقد مسنون

امام احمد رضا بریلوی کے برادر اصغر مولانا محمد رضا صاحب کی اکلوتی صاحب زادی سے مفتیِ اعظم علامہ مصطفیٰ رضا نوریؔ بریلوی کا عقدِ مسنون1911ء میں ہوا۔ جن کو مخدومۂ اہل سنت کے لقب سے یاد کیاجاتا تھا، جو 16 جمادی الثانی 1405ھ /1985ء کو وصال کر گئیں۔

اولاد

مفتیِ اعظم علامہ مصطفیٰ رضا نوریؔ بریلوی کی اولاد میں ایک صاحب زادہ محمد انور رضا خاں تولد ہوئے افسوس! جو کم سنی ہی میں انتقال فرما گئے اور آپ کے یہاں چھ صاحب زادیاں پیدا ہوئیں،  جن کو آپ نے نہایت شفقت و محبت کے ساتھ رسول اللہ صلی اللہ علیہ و سلم کی صاحب زادی حضرت فاطمۃ الزہرا رضی اللہ عنہا کی سیرتِ طیبہ کے مطابق تربیت دی اور فرمانِ رسول صلی اللہ علیہ و سلم کو ادا کرتے ہوئے اپنی صاحب زادیوں کو پارۂ جگر تصور کیا۔ اُن کی پرورش و پرداخت میں حقِ پدری ادا کیا۔ یہی وجہ ہے کہ آپ کے نواسوں میں ہر کوئی ’’ہر گلے را رنگ وبوئے دیگر است‘‘کے مصداق گلشنِ اسلام کا بے خزاں شگفتہ پھول تصور کیا جاتا ہے۔

حج و زیارت

مفتیِ اعظم علامہ مصطفیٰ رضا نوریؔ بریلوی کو تین مرتبہ حجِ بیت اللہ شریف اور زیارتِ مواجہہ رسول صلی اللہ علیہ و سلم کی سعادت حاصل ہوئی۔ آپ نے پہلا حج 1364ھ/1945ء میں اوردوسرا حج1366ھ / 1948ء میں ادا کیا۔ ان دونوں حج و زیارت کے دوران پاسپورٹ میں فوٹو کی قید نہیں تھی۔   جب آپ نے تیسرا حج اپنی زوجۂ محترمہ کے ہم راہ 1391ھ/1971ء میں ادا کیا تو اس وقت پاسپورٹ میں فوٹو لازمی ہو گیا تھا لیکن آپ کا یہ حج اس لحاظ سے تاریخی اہمیت کا حامل ہے کہ آپ نے بغیر فوٹو کے حج کی سعادت حاصل کی۔ اس معاملے سے ظاہر ہوتا ہے کہ آپ تقوا و طہارت کی کس بلند منزل پر فائز تھے اور فرمانِ نبوی صلی اللہ علیہ و سلم پر عمل میں آپ کتنے غیور تھے۔ (9)

نقش سراپا

جب آپ کے حسن و جمال اور نقش سراپا پر نظر کرتے ہیں تو معلوم ہوتا ہے کہ آپ کے نقش و نگار پر جو خامہ فرسائی آپ کے شاگرد و خلیفہ جناب مفتی سید شاہد علی رام پوری نے کی ہے اُنھیں کے حوالے سے معمولی حذف و اضافہ کے ساتھ دیگر مصنفین نے نقل کیا ہے۔  لہٰذا اسی روایت کو اعتبار کا درجہ حاصل ہے۔ ذیل میں آپ کا سراپامفتی موصوف کی زبانی خاطر نشین ہو  :

        ’’رنگت سرخی مائل سفید،  قد میانہ،  بدن نحیف،  سر بڑا گول اس پر عمامہ کی بہار،  چہرہ گول روشن و تاب ناک نور برساتاہواجسے دیکھ کر خدا کی یاد آ جائے،  پیشانی کشادہ،  بلند تقدس کا آثار لیے ہوئے،  بھویں گنجان ہالہ لیے ہوئے،  پلکیں گھنی بالکل سفید ہالہ نما،  آنکھیں بڑی بڑی کالی چمک دار گہرائی و گیرائی لیے ہوئے،  رخسار بھرے بھرے گداز روشن جلال و جمال کا آئینہ،  ناک متوسط قدرے اٹھی ہوئی،  مونچھ نہ بہت پست نہ اٹھی ہوئی،  لب پتلے گلاب کی پتی کی طرح تبسم کے آثار لیے ہوئے،  دنداں چھوٹے چھوٹے ہم وار موتیوں کی لڑی کی طرح جب تبسم ریز ہوتے،  کان متناسب قدرے درازی لیے ہوئے،  گردن معتدل،  سینہ فراخ کچھ روئیں لیے ہوئے،  کمر خمیدہ مائل،  ہاتھ لمبے لمبے جو سخاوت و فیاضی میں بے مثل،  کلائیاں چوڑی روئیں دار،  ہتھیلیاں بھری ہوئیں گداز،  انگلیاں لمبی لمبی موزوں کشادہ،  پاؤں متوسط،  ایڑیاں گول موزوں۔ ‘‘(10)

خصوصیات

مفتیِ اعظم علامہ مصطفیٰ رضا نوریؔ بریلوی کی حیات و خدمات کا تحقیقی جائزہ لینے کے بعد اس خیال کو تقویت ملتی ہے کہ آپ گوناگوں خصوصیات اور متنوع صفات کے حامل تھے، آپ کی ہمہ جہت خوبیوں میں تین خوبیاں انتہائی نمایاں اور ممتاز ہیں  :

(1)عشق رسالت مآب صلی اﷲ علیہ و سلم ۔ یہ آپ کے خانوادے کا طرۂ  امتیاز ہے۔

(2)تقوا۔  مفتیِ اعظم علامہ مصطفیٰ رضا نوریؔ بریلوی کے عہد میں اور بعد بھی دور دور تک تقوا میں کوئی آپ کا مثیل و نظیر نہیں۔

(3)تفقہ فی الدین(دین کی سمجھ)۔ یہ وہ امتیازی وصف ہے جس میں آپ اپنے معاصرین مفتیانِ کرام کے مقابلہ میں سب سے زیادہ نمایاں تھے۔ اسی سبب سے آپ کو  ’’مفتیِ اعظم ‘‘ کے لقب سے سرفراز کیا گیا۔

        علاوہ ازیں آپ نے ہمیشہ آل رسول کا احترام کیا، غیر محرم عورتوں کو کبھی بھی بے پردہ نہیں دیکھا نہ ہی کبھی غیر محرم عورتوں کو بے پردہ مرید کیا، بے شرع کو سخت فضیحت اور شریعت مطہرہ پر قائم رہنے کی نصیحت کی، آپ نے تا حیات نماز کی ادائیگی میں پاسداری اختیار کی، حتیٰ کہ نماز تہجد اور دیگر نوافل پر بھی مداومت کی، طہارت کا یہ عالم تھا کہ ہمیشہ وضو سے رہتے ہوئے بھی ہر نماز کے لیے تازہ وضو فرماتے، ڈاکٹروں کی ممانعت پر بھی آپ نے حالتِ بیماری میں وضو کیا،   انگریزی اشیا، دوات، دوائیں اور دیگر کو کبھی بھی استعمال نہ کیا، آپ کی طبیعت میں مہمان نوازی کا جذبہ نہایت بلند تھا، گویا مہمان کو آپ خدا کی رحمت سمجھتے تھے اور ہر کس و ناکس سے شفقت و محبت کا سلوک کرنا آپ کی منکسر المزاجی کو ظاہر کرتا ہے۔  غرض یہ کہ آپ سراپا خلوص  و محبت تھے۔

وصال

مفتیِ اعظم علامہ مصطفیٰ رضا نوریؔ بریلوی تا عمر اہلِ اسلام کو اپنے علمی، روحانی اور عرفانی فیوض سے مالامال فرماتے رہے۔ اللہ رب العزت کی مرضی و مشیت کے مطابق علم و فضل اور زہد و اتقا کا یہ روشن ستارہ 92 ؍برس کی عمر میں 14؍ محرم الحرام1402ھ بمط12نومبر 1981ء بروز جمعرات شب ایک بج کر چالیس منٹ پر غروب ہو گیا۔ جوں ہی ریڈیو کے ذریعہ آپ کے وصالِ پُر ملال کی خبر اکنافِ عالم میں نشر ہوئی، پورے عالمِ اسلام میں رنج و غم کی فضا چھا گئی۔  سارا ماحول سوگوار ہو گیا۔ مختلف ممالک سے آپ کے عقیدت مند، مریدین و متوسلین جوق در جوق اپنے اس عظیم روحانی رہِ نما کے آخری دیدار کے لیے بریلی جمع ہونے لگے۔ 15؍ محرم ا لحرام 1402ھ بروز جمعہ صبح تقریباً نو بجے آپ کے جسدِ خاکی کو غسل دیا گیا۔ صبح تقریباً دس بجے جنازۂ مبارک لاکھوں عشاق کی اشک بار آنکھوں سے خراجِ عقیدت و محبت وصول کرتا ہوا کلمۂ طیبہ اور درود و سلام کی پُر کیف و روحانی گونج میں کاشانۂ اقدس سے بر آمد ہوا۔ یہ وہ لمحہ تھا جب ہر دل تڑپ رہا تھا۔  ہر آنکھ برس رہی تھی۔ ہر فرد مغموم تھا گویا انسانوں کا ٹھاٹھیں مارتا سمندر تھا جو اپنے اس عظیم محسن کو آخری آرام گاہ تک پہنچا نے کے لیے بریلی میں امنڈ آیا تھا۔ تقریباً دوپہر سوا تین بجے نمازِ جنازہ ادا کی گئی۔  جس کی امامت پیر طریقت مولاناسید مختار اشرف اشرفی الجیلانی الملقب بہ سرکار کلاں کچھوچھوی نے کی۔  اخباری رپورٹوں کے مطابق نمازِ جنازہ میں تقریباً پانچ لاکھ اور جلوسِ جنازہ میں تقریباً بیس لاکھ مسلمانوں نے شرکت کی۔ حکومتِ وقت کے وزرا اور بیرونِ ملک کے سفرا و مشاہیر بھی بریلی حاضر ہوئے۔ تقریباً ہر زبان کے ملکی و بین الاقوامی اخبارات و رسائل نے حضرت نوریؔ بریلوی کے وصالِ پُر ملال پر تعزیتی پیغامات شائع کیے۔ (11)

        مفتیِ اعظم علامہ مصطفیٰ رضا نوریؔ بریلوی کے مریدین ہندوستان، پاکستان کے علاوہ حجازِ مقدس، مصر، عراق، برطانیہ، افریقہ، امریکہ، ترکی، افغانستان، بنگلہ دیش،  وغیرہ ممالک میں پھیلے ہوئے ہیں۔ بڑے بڑے علما، فضلا اور دانش وروں نے آپ سے شرف بیعت حاصل کیا۔  آپ کے مریدین کی تعداد ایک کروڑ سے زائد ہے،  روایتوں میں آتا ہے کہ بیش تر جن بھی آپ سے بیعت تھے۔ آپ کی علمی و ادبی اور سیاسی و تدریسی خدمات کا دائرہ بہت وسیع ہے۔ جس کی تفصیل کے لیے ایک دفتر درکار ہے۔ اگلے صفحات پر آپ کی خدمات پر روشنی ڈالی جا رہی ہے۔

حواشی

(1)ماہ نامہ اعلیٰ حضرت :مفتیِ اعظم نمبر، ستمبر، نومبر 1990ء، ص14/15

(2)پندرہ روزہ رفاقت: پٹنہ ج 1،  ش 5،  1؍ فروری 1982ئ،  ص 6

]نوٹ :مفتیِ اعظم قدس سرہٗ کی تاریخ ولادت سے متعلق مفتی شریف الحق امجدی علیہ الرحمہ لکھتے ہیں : ’’ تاریخ ولادت بعض سوانح نگاروں نے 25؍ جمادی الاولیٰ 1310ھ لکھا ہے یہ صحیح نہیں ہے،  خود حضرت مفتیِ اعظم ہند نے اپنی تاریخ ولادت 22؍ ذی الحجہ 1310ھ بتائی ہے۔  خود حضرت مفتیِ اعظم ہند سے یہ سننے والے آج بھی اتنے موجود ہیں کہ ان سب کو غلط نہیں کہا جا سکتا،  ایک شہرت یہ ہے کہ مفتیِ اعظم کا تاریخی نام ’’محمد‘‘ ہے۔  اس طرح کہ سالِ ولادت 1892ء ہے،  اور بہ حذفِ  صدی 92 کا عدد آتا ہے۔  مگر قواعد اس کی تائید نہیں کرتے۔  سنہ ہجری و عیسوی میں تطابق کے جتنے قاعدے ہیں کسی قاعدے سے تطابق نہیں ہوتا۔  ہر قاعدے سے سالِ عیسوی 1893ء آتا ہے۔  نہ معلوم کیسے اسے شہرت ہو گئی۔  بہ ہرحال! 1892ء درست نہیں۔  اس کا ایک قرینہ یہ بھی ہے کہ الملفوظ میں اَعلا حضرت کا یہ ارشاد تو مذکور ہے کہ میرے بڑے بیٹے حامد رضا کا تاریخی نام ’’محمد‘‘ ہے،  ان کا سالِ ولادت 1292ھ ہے ۔۔۔مقام اس کا مقتضی تھاکہ اگر واقعۃً حضرت مفتیِ اعظم کا نام نامی ’’محمد‘‘ بھی تاریخی ہوتا تو اس کا تذکرہ بھی ضرور فرماتے خصوصاً جب کہ وہی جامعِ ملفوظات ہیں۔ ‘‘[۔۔(شریف الحق امجدی،  مفتی: مقالہ مفتیِ اعظم اپنے فضل و کمال کے آئینے میں،  مشمولہ: انوارِ مفتیِ اعظم،  رضا اکیڈمی،  ممبئی،  اکتوبر 1992ء،  ص 275 )۔۔ (  علاوہ ازیں کمپیوٹر سافٹ ویئر Hijri Gregorian Converterسے بھی 22؍ ذی الحجہ 1310ھ کی عیسوی تاریخ 7؍ جولائی 1893ء بر آمد ہوتی ہے،  مُشاہدؔ )

(3) شاہد علی رضوی، سید، مفتی:مقدمہ مفتی اعظم اور ان کے خلفا، رضا اکیڈمی، ممبئی، ج1 ص 20

(4) شاہد علی رضوی، سید، مفتی:مقدمہ مفتی اعظم اور ان کے خلفا، رضا اکیڈمی، ممبئی، ج1 ص 22/23

(5) شاہد علی رضوی، سید، مفتی:مقدمہ مفتی اعظم اور ان کے خلفا، رضا اکیڈمی، ممبئی، ج1 ص 25

(6) محمد جلال الدین قادری:محدث اعظم پاکستان، مکتبۂ نبویہ، لاہور، ج۱ ص67

(7)مرزا عبدالوحید بیگ بریلوی: حیاتِ مفتیِ اعظم کی ایک جھلک،  مطبوعہ بریلی،  ص 6

(8) شاہد علی رضوی، سید، مفتی:مقدمہ مفتی اعظم اور ان کے خلفا، رضا اکیڈمی، ممبئی، ج1 ص 31/32

(9)شریف الحق امجدی،  مفتی: مقالہ مفتیِ اعظم اپنے فضل و کمال کے آئینے میں،  مشمولہ: انوارِ مفتیِ اعظم،  رضا اکیڈمی،  ممبئی،  اکتوبر 1992ء،  ص 276

(10) شاہد علی رضوی، سید، مفتی:مقدمہ مفتی اعظم اور ان کے خلفا، رضا اکیڈمی، ممبئی، ج1 ص 17/18

(11)ماہ نامہ اعلیٰ حضرت :مفتی اعظم نمبر،  بریلی، ستمبر تا نومبر 1990ء ص49

٭٭٭

نقشۂ سلاسلِ علوم

(الف) خیرآبادی سلسلۂ تلمّذ

علامہ مولانا فضل حق خیرآبادی

مولانا عبدالعلی خاں رام پوری (الریاضی)          مولانا عبدالحق خیرآبادی

امام احمد رضا محدث بریلوی مولانا ظہور الحسین رام پوری         مولانا سید عبدالعزیز انبیٹھوی

                                                مولانا رحم الٰہی مظفر نگری

حضرت مفتیِ اعظم علامہ مصطفی رضا نوریؔ بریلوی

(قدست اسرارہم)

( شاہد علی رضوی، سید، مفتی:مقدمہ مفتی اعظم اور ان کے خلفا، رضا اکیڈمی، ممبئی، ج1 ص 33)

(ب) دہلوی و بریلوی سلسلۂ تلمّذ

نقشۂ سندِ حدیثِ مسلسل بالاوّلیّت

حضور نبیِ اکرم صلی اللہ علیہ و سلم

                حضرت ابو قابوس مولا عبداللہ بن عمرو بن عاص

                حضرت سفیان بن عمرو بن دینار

                حضرت سفیان بن عینیہ

                حضرت عبدالرحمن بن بشیر بن الحکم

                حضرت ابو حامد احمد بن محمد بن یحییٰ بن بلال البزار

                حضرت ابو طاہر بن محمد بن محمدمحمش الزیادی

                حضرت ابو صالح احمد بن عبدالملک الموذن

                حضرت ابو سعید اسماعیل بن ابوالصالح احمد بن عبدالملک نیشاپوری

                حضرت حافظ ابوالفرج عبدالرحمن بن علی الجوزی

                حضرت ابوالفرج عبداللطیف بن عبد المنعم الحرانی

                حضرت ابوالفتح محمد بن محمد بن ابراہیم الکبریٰ المیدومی

شیخ شمس الدین ابو عبداللہ محمد بن احمد التدمیری        شیخ زین الدین عبدالرحیم بن الحسین العراقی

شیخ الفضل عبدالرحیم بن حسین العراقی             شیخ ابوالفتح محمد بن ابو بکر بن الحسین المراغی

شیخ الشہاب ابوالفضل احمد بن علی العسقلانی ابن حجر شیخ سید ابراہیم التازی

شیخ شمس الدین سخاوی القاہری                       شیخ احمد حجی الوہرانی

شیخ وجیہ الدین عبدالرحمن بن ابراہیم علوی                شیخ سعید بن محمد المقرّی

شیخ محمد افلح الیمنی                             شیخ سعید بن ابراہیم الحزائری قدورہ

شیخ عبدالوہاب بن فتح اللہ بروجی                     شیخ یحییٰ بن محمد شاوی

(یکے از فقرائے سید عبدالوہاب المتقی)             شیخ عبداللہ بن سالم البصری

                                        شیخ سید عمر

شیخ عبدالحق محدث دہلوی                      شاہ ولی اللہ محدث دہلوی

شیخ ابولرضا بن اسماعیل دہلوی(نواسۂ شیخ محقق )              شاہ عبدالعزیز محدث دہلوی

سید مبارک فخرالدین بلگرامی                  سید آل رسول احمدی مارہروی

سید شاہ حمزہ بن سید آل محمد بلگرامی حسنی الواسطی

سید آل احمد اچھے میاں مارہروی

سید آل رسول احمد ی مارہروی

امام احمد رضا محدث بریلوی

مفتیِ اعظم علامہ مصطفی رضا نوریؔ بریلوی (قدست اسرارہم)

( شاہد علی رضوی، سید، مفتی:مقدمہ مفتی اعظم اور ان کے خلفا، رضا اکیڈمی، ممبئی، ج1 ص 35/36)

نقشۂ سندِ حدیثِ مسلسل بالاوّلیّت

(یہ سندِ حدیث بہت عالی ہے)

        حضور نبیِ اکرم صلی اللہ علیہ و سلم سے لے کر شیخ الشہاب ابوالفضل احمد بن حجر العسقلانی تک وہی سند ہے جو ماقبل سند گذری۔۔۔۔۔۔۔۔ اس کے بعد سند یوں ہے   :

شیخ الاسلام اشرف زکریا بن محمد الانصاری

شیخ ابوالخیر بن عموس الرشیدی

شیخ محمد بن عبدالعزیز

شیخ احمد بن محمد الدمیاطی المعروف ابن عبدالغنی

شیخ مولانا احمد حسن الصوفی مرادآبادی

سید شاہ ابوالحسین احمد النوری مارہروی

امام احمد رضا محدث بریلوی

مفتیِ اعظم علامہ مصطفی رضا نوریؔ بریلوی

(قدست اسرارہم)

( شاہد علی رضوی، سید، مفتی:مقدمہ مفتی اعظم اور ان کے خلفا، رضا اکیڈمی، ممبئی، ج1 ص 37)

نقشۂ سندِفقہِ حنفی

اس سند کی خصوصیت یہ ہے کہ اس کے تمام تر اساتذۂ کرام و مشائخِ ذوی الاحترام حنفی المسلک ہیں ۔۔۔۔۔اس نقشۂ سندِ فقۂ حنفی کو ’’العطایا النبویہ فی الفتاویٰ الرضویہ جلد اول ص ۵‘‘ سے نقل کیا جا رہا ہے،  نشانِ خاطر فرمائیں  :

النبی الکریم الامین علیہ الصلاۃ والسلام

حضرت عبداللہ بن مسعود

حضرت علقمہ              حضرت الاسود

حضرت ابراہیم

حضرت امام اعظم ابوحنیفہ

حضرت ابو عبداللہ محمد بن الحسن الشیبانی

حضرت احمد بن حفص (الشہیر ابو حفص الکبیر)

شیخ ابو عبداللہ السبند مونی

شیخ ابو بکر محمد بن الفضل البخاری

شیخ القاضی ابو علی النسفی

امام شمس الائمۃ الحلوانی

امام فخر الاسلام البزودی

امام برہان الدین (صاحب الہدایہ)

امام عبدالستار بن محمد الکردری

شیخ جلال الدین الکبیر

شیخ عبدالعزیز البخاری

شیخ جلال الدین الخبازی

شیخ علاوالدین السیرانی

شیخ السراج قاری الہدایہ

شیخ الکمال بن الہمام (ساحب فتح القدیر)

شیخ سری الدین عبدالبر بن الشحنہ

شیخ احمد بن یونس الشلبی

شیخ محمد بن عبدالرحمن المسیری    شیخ عبداللہ النحریری     شیخ محمد بن احمد الحموی        شیخ احمد المحبیّٰ

شیخ حسن الشرنبلالی     شیخ علی المقدسی شیخ الشمس الحانوتی     شیخ عمر بن نجیم

  (صاحبِ  نورالایضاح وغیرہ)

شیخ احمد شوبری

شیخ اسماعیل بن عبدالغنی النابلسی (ساحب شرح الدرد الغرر)

شیخ عبدالغنی بن اسماعیل بن عبدالغنی النابلسی( صاحب الحدیقۃ الندیۃ وغیرہ)

شیخ اسماعیل بن عبداللہ الشہیر علی زادہ البخاری

شیخ عبدالقادر بن خلیل

شیخ یوسف بن محمد بن علاو الدین المزجاجی

شیخ محمد عابدالانصاری المدنی

شیخ جمال بن عبداللہ بن عمر مفتیِ مکہ

شیخ عبدالرحمن السراج بن شیخ عبداللہ السراج مفتیِ مکہ

امام احمد رضا محدث بریلوی

مفتیِ اعظم علامہ مصطفی رضا نوریؔ بریلوی

(قدست اسرارہم)

( شاہد علی رضوی، سید، مفتی:مقدمہ مفتی اعظم اور ان کے خلفا، رضا اکیڈمی، ممبئی، ج1 ص 38/39)

٭٭٭

ب: علمی خدمات

علم اور علما کی قرآن و حدیث میں بہت فضیلتیں بیان کی گئی ہیں۔ دراصل علم سیکھنے اور سکھانے کا عمل ہے۔ علما کو انبیائے کرام علیہم السلام کا وارث بتاتے ہوئے خوف و خشیتِ الٰہی میں ان کو دیگر بندوں پر ممتاز قرار دیا گیا ہے۔ یہ امر مسلمہ ہے کہ انبیائے کرام کی بعثت و نبوت کا بنیادی مقصد اسلام کی ترویج و اشاعت تھا۔ آدم علیہ السلام سے لے کر حضور انور صلی اللہ علیہ و سلم تک تمام نبیوں اور رسولوں نے اللہ رب العزت کے پیغام کو اس کے بندوں تک پہنچایا۔ نبیِ آخرالزماں مصطفیٰ جانِ رحمت صلی اللہ علیہ و سلم پر اللہ رب العزت نے نبوت و رسالت کا خاتمہ فرما دیا۔ آپ  صلی اللہ علیہ و سلم کے بعد اسلام کی تبلیغ و اشاعت کی تمام تر ذمہ داریاں علمائے امت پر عائد ہو گئیں۔  اور جب بھی اہل اسلام کسی ناگفتہ بہ صورتِ حال سے دو چار ہوئے یا اسلام کے خلاف دشمنانِ اسلام نے سازشیں کیں تو علمائے کرام کی مقدس جماعت نے ان کا جواں مردی سے مقابلہ کرتے ہوئے مذہبِ اسلام کی صحیح تصویر پیش کی۔

        ایک سچا اور حق پسند عالمِ دین اپنے افکار و نظریات اور رجحانات کو قرآن و حدیث کی روشنی میں پرکھتا ہے۔ اس کے اقوال و اعمال اور عقائد کی اساس خلوص و للہیت پر ہوتی ہے۔ اس کا دل و دماغ تجلیاتِ ربانی اور انوارِ محمدی کا آئینہ دار ہوتا ہے۔  وہ کسی کی روٗ رعایت نہیں کرتا۔ اس معاملے میں اس کا طریقۂ کار اس طرح ہوتا ہے کہ وہ اپنوں کے ساتھ ریشم کی طرح نرم و ملائم اور دشمنانِ اسلام کے ساتھ فولاد سے زیادہ سخت بن جاتا ہے گویا حق بات کہنے میں اپنوں اور بے گانوں میں کوئی تفریق مدِ نظر نہیں رکھتا۔  دوستوں کی بے جا طرف داری سے گریزاورسچائی و صداقت کا برملا اظہاراس کا شعار ہوتا ہے۔  اس کی دوستی اور دشمنی دونوں اللہ کے لیے ہوتی ہے۔

        مفتیِ اعظم علامہ مصطفیٰ رضا نوریؔ بریلوی کی شخصیت ان اوصاف سے متصف تھی۔  علم و فضل اور زہد و اتقا کے سبب آپ کو اپنے عہد کے علما میں ممتاز اور نمایاں مقام حاصل رہا۔  آپ نے تمام تر چیزوں کو دینی نقطۂ نگاہ سے دیکھا اور جو چیز مذہب کی روشنی میں ہوتی تھی اس کو قبول کیا اور جو اس کے خلاف ہوتی تھی اس کو ٹھکرا دیا۔ آپ کی زندگی کے شب و روز کا مطالعہ کرنے کے بعد یہ بات واضح ہو جاتی ہے کہ آپ کی جملہ خدمات خواہ وہ علمی ہوں یا ادبی،  سیاسی ہوں یا تدریسی ان تمام میں آپ نے مذہبِ اسلام کی ترویج و اشاعت کو مقدم جانا اور اللہ تعالیٰ کے خوف و خشیت اوررسول اللہ صلی اللہ علیہ و سلم کے عشق و محبت کو پیشِ نگاہ رکھا۔

        مفتیِ اعظم علامہ مصطفیٰ رضا نوریؔ بریلوی کی علمی،  ادبی،  سیاسی اور تدریسی خدمات کا دائرۂ کار وسیع و عریض ہے۔  اس موضوع پر اگر مفصّل قلم اٹھایا جائے تو ایک ضخیم مقالہ سپردِ قرطاس کیا جا سکتا ہے۔  پیشِ نظر مقالہ کا خاص موضوع حضرت نوریؔ بریلوی کی نعتیہ شاعری ہے۔  اس لیے یہاں آپ کی علمی،  ادبی،  سیاسی اور تدریسی خدمات کا جائزہ اختصاراً پیش کیا جا رہا ہے۔ 

        مفتیِ اعظم علامہ مصطفیٰ رضا نوریؔ بریلوی کو مختلف علوم و فنون پر دست رس حاصل تھی۔ آپ کی تصانیف کے مطالعہ کے بعد یہ ظاہر ہوتا ہے کہ آپ مختلف علوم و فنون کے ماہر تھے۔  علمِ تفسیر، علمِ حدیث، علمِ فقہ ا ور دیگر علوم و فنون سے متعلق آپ کی خدمات یقیناً لائقِ صد آفریں ہیں۔  چوں کہ علمِ فقہ میں آپ کی خدمات انتہائی وسیع تر ہیں اوراسی کو جملہ خدمات میں ممتاز حیثیت حاصل ہے کہ اسی کے سبب آپ کو ’’مفتیِ اعظم‘‘ جیسے مہتم بالشان لقب سے نوازا گیا۔ چناں چہ اوّلاً اسی کو بیان کیا جاتا ہے۔

علمِ فقہ

فقہ و افتا :  افتا کے معنی ہیں فتویٰ دینا۔  فتویٰ شرعی مسائل میں ماہر شریعت کے فیصلے کو کہتے ہیں۔  اور علم فتویٰ کو علم فقہ بھی کہتے ہیں۔  فقہ ایک نہایت عالی اور کامل فن ہے جو آغازِ اسلام ہی میں وجود میں آیا۔  افتا چوں کہ نہایت اہم اور ذمہ داری کا کام ہے۔  اس لیے ابتدائے اسلام سے ہی اس کا ایک مخصوص محکمہ قائم تھا۔  جس کا نام ’’محکمۂ افتا ‘‘ تھا۔  اس محکمہ میں اسلامی قوانین کے ماہرین جنہیں ’’فقیہ‘‘ کہا جاتا ہے۔  تشنگانِ علومِ دینیہ کی طرف سے پوچھے گئے مسائل کے جوابات دیا کرتے تھے۔  فقیہ کو عرف عام میں ’’مفتی ‘‘ بھی کہا جاتا ہے۔

        امتِ مسلمہ میں علمائے دین کے دو طبقوں نے خاص طور پر اسلام کی خدمت نمایاں طور پر کی ہیں۔ ایک محدثینِ کرام کا طبقہ جس نے احادیثِ نبوی کی روایات اور ان کے بیان و ضبط کا اہتمام فرمایا اور اسناد وغیرہ پر گہری نظر رکھی۔ دوسرا فقہا(مفتیان کرام) کا طبقہ جس نے قرآنی آیات اور احادیثِ نبوی سے مسائل و احکام کا استنباط و استخراج کیا اور الفاظِ حدیث سے زیادہ معانیِ حدیث اور اس سلسلہ کے اصول و قواعد پر ان کی نظر مرکوز رہی۔  مفتیان کرام کا تعلق اسی دوسرے طبقہ سے ہے۔

خانوادۂ نوریؔ بریلوی میں افتا کی بنیاد

تیرہویں صدی ہجری میں مفتیِ اعظم علامہ مصطفیٰ رضا نوریؔ بریلوی کے جدِ امجد امام العلماء مفتی رضا علی خاں بریلوی (م1282ھ/1865ء)نے 1246ھ/1831ء میں بریلی میں مسندِ افتا کی بنیاد رکھی اور1282ھ/1865ء تک فتویٰ نویسی کا گراں قدر کام انجام دیا۔ آپ کے بعد آپ کے فرزند مولانا نقی علی بریلوی نے 1297ھ تک اپنے والدِ ماجد کی جگہ فتویٰ نویسی کا کام بہ حسن و خوبی انجام دیا اور مولانانقی علی بریلوی نے اپنے والدِ گرامی کی طرح اپنے تمام صاحب زادوں کو زیورِ علم سے آراستہ کیا اور ان میں امام احمد رضا محدثِ بریلوی کو خصوصی طور پر علمِ فقہ سے بہرہ ور فرما کر فتویٰ نویسی کے لیے متعین کیا۔  1293ھ/1876ء کو مولانا نقی علی نے امام احمد رضاکو فتویٰ نویسی کی کُلی طور پر اجازت دی،  امام احمد رضا بریلوی نے 1297ھ/1880ء سے 1340ھ/1921ء تک مسلسل فتویٰ نویسی کی خدمات انجام دیں۔  آپ پوری دنیا کے مسلمانوں کے مرجع تھے۔  ایساماناجاتا ہے کہ آپ کے دار الافتاء میں برِّ اعظم ایشیائ،  یورپ،  امریکہ،  افریقہ سے استفتا وارد ہوتے تھے اور ایک ایک وقت میں پانچ پانچ سو سوالات جمع ہو جایا کرتے تھے اور آپ تمام کا شافی و کافی جواب عنایت فرماتے تھے۔  امام احمد رضا محدثِ بریلوی نے بھی اپنے آبا و اجداد کی طرح اپنے صاحب زادوں کو فتویٰ نویسی کی خصوصی تربیت دی، حجۃ الاسلام علامہ حامد رضا بریلوی اور مفتیِ اعظم علامہ مصطفیٰ رضا نوریؔ بریلوی دونوں ہی اپنے وقت کے ممتاز فقیہ کہلائے۔  آج بھی خانوادۂ رضویہ میں فتویٰ نویسی کا کام بہ حسن و خوبی انجام دیا جا  رہا ہے۔ جانشینِ مفتیِ اعظم علامہ مفتی محمد اختر رضا قادری برکاتی ازہری بریلوی زیبِ مسندِ افتا و ارشاد ہیں۔  

علامہ مصطفیٰ رضا نوریؔ بریلوی کی فتویٰ نویسی کا آغاز

جیسا کہ بیان کیا جاچکا ہے کہ فتویٰ نویسی حضرت نوریؔ بریلوی کے خانوادے کا طرۂ امتیاز تھا۔  آپ اس فن کے امام کہے جاتے ہیں۔  آپ کے زمانے میں آپ جیسا تفقہ کسی اور کو حاصل نہیں ہوا۔  آپ کی ذات مرجع علما و خواص رہی۔  آپ کی اصابتِ رائے اور فکری گیرائی   وگہرائی کی مثال ملنی مشکل ہے۔ مختلف مسائل پر آپ کے فتاوے ہزاروں کی تعداد میں موجود ہیں۔  جس کے کچھ نمونے ’’فتاویٰ مصطفویہ‘‘ کی شکل میں منظر عام پر آ چکے ہیں۔  جو علوم و معارف کے گہر ہائے آب دار کہلاتے ہیں۔  آپ کی فتویٰ نویسی کی ابتدا کے بارے میں مولانا محمود احمد قادری مظفر پوری لکھتے ہیں  :

        ’’مولانا ظفرالدین (بہاری) ومولاناسیدعبدالرشید (عظیم آبادی) دارالافتاء میں کام کر رہے تھے ایک دن آپ دارالافتاء پہنچے مولانا ظفرالدین فتویٰ لکھ رہے تھے،  مراجع کے لیے اُٹھ کر فتاویٰ رضویہ الماری سے نکالنے لگے حضرت (نوریؔ بریلوی) نے فرمایا،  نو عمری کا زمانہ تھا،  میں نے کہا! فتاویٰ رضویہ دیکھ کر جواب لکھتے ہو ؟ مولانا نے فرمایا،  اچھا! تم بغیر دیکھے لکھ دو تو جانوں،  میں نے فوراً لکھ دیا،  وہ رضاعت کامسئلہ تھا۔  یہ پہلا جواب تھا آپ کا یہ واقعہ 1328ھ کاہے،  اصلاح کے لیے اعلا حضرت کی خدمت میں پیش کیا گیا۔  صحت جواب پر امام اہل سنت بہت خوش ہوئے اور ’’صحیح الجواب بعون اﷲ العزیزالوہاب ‘‘ لکھ کر دستخط ثبت فرمایا۔  اور ’’ابوالبرکات محی الدین جیلانی آل الرحمن عرف مصطفیٰ رضا‘‘ کی مہر مولانا یقین الدین سے بنوا کر عطا فرمائی۔ ‘‘ (1)

        بلاشبہ اسے فیضانِ نظر ہی کہا جا سکتا ہے کہ18؍ برس کی عمر میں بغیر کتاب کی مدد اور مشاہدے کے، فقط حافظے کی بنیاد پر قلم برداشتہ جواب لکھ دینا یقیناً قابلِ تحسین ہے۔  چناں چہ یہ حُسنِ تربیت کا فیضان ہی تھا ورنہ مکتب کی کرامت میں یہ بات کہاں ؟ اور یہ بھی عجیب حسنِ اتفاق ہے کہ امام احمد رضامحدثِ بریلوی کے قلم سے جو پہلا فتویٰ صادر ہوا تو وہ بھی رضاعت ہی کا تھا اور جب ان کے فرزندِ سعید نے قلم اٹھایا تو پہلامسئلہ جو قلم بند کیا وہ بھی مسئلۂ رضاعت ہی تھا۔  18؍ سال سے فتویٰ نویسی کی ابتدا ہوئی تو پھر تا حیات یہ سلسلۂ خیر جاری رہا اور آپ کا یہی وہ نمایاں فن تھا،  جس میں اس وقت برصغیر میں آپ کی نظیر نہیں۔

عکسِ مہر

مفتیِ اعظم علامہ مصطفیٰ رضا نوریؔ بریلوی کے معاصر علمائے کرام آپ کی علمی برتری اور تفوق کے قائل رہے۔  اختلاف کی صورت میں آپ کی جانب رجوع کیا جاتا،  جس فتویٰ پر آپ کی مہرِ تصدیق ثبت ہوتی،  اس میں کسی کو چوں چرا کی گنجایش نہیں رہتی،  آپ کی رائے سند اور قولِ فیصل کا درجہ رکھتی تھی۔  امام احمد رضا محدثِ بریلوی کے بعد اُمتِ مسلمہ جن مسائل سے دوچار ہوئی۔  ان مسائل کو آپ نے جس تحقیقِ انیق سے واضح کرتے ہوئے ان کا حل پیش کیا وہ آپ کی اعلا ترین اجتہادی صلاحیتوں اور فقہی بصیرتوں پر دلالت کرتے ہیں۔ ذیل میں چند مثالیں نشانِ خاطر ہوں  :

(1)   انجکشن سے روزہ ٹوٹنے نہ ٹوٹنے کا مسئلہ

        روزہ رہتے ہوئے انجکشن لگانے سے روزہ ٹوٹنے نہ ٹوٹنے کامسئلہ جب پہلی بار مفتیانِ کرام کے سامنے آیا تو بیش تر حضرات متردّد رہے کچھ نے انجکشن لگوانے پر روزہ فاسد ہو جانے کا حکم دیاتو کچھ نے کہا گوشت میں انجکشن لگوانے سے روزہ فاسد نہیں ہو گا،  ہاں ! رگ میں لگوانے سے روزہ فاسدہو جائے گا کیوں کہ دوائیں گوشت سے معدہ تک پہونچتی ہیں وغیرہ۔  لیکن حضرت نوریؔ بریلوی نے کہا کہ :

        ’’انجکشن گوشت میں لگوایا جائے یا رگ میں کسی صورت میں اس کی دوائیں معدہ تک منفذ کے ذریعے نہیں پہونچتی ہیں بل کہ مسامات کے ذریعہ پہونچتی ہیں،  اس لیے روزہ فاسد نہیں ہو گا‘‘(2)ملخصاً

         مفتیِ اعظم علامہ مصطفیٰ رضا نوریؔ بریلوی نے فقہ کے ضابطے سے کہ ’’اگر کوئی بیرونی چیز بغیر منفذ کے معدہ تک پہونچے تو روزہ فاسد نہیں ہو گا‘‘۔  روزہ کی حالت میں انجکشن لگوانے سے روزہ نہیں ٹوٹے گا، اس کی وضاحت فرمائی نیز آپ نے اس میں طبی نقطۂ نظر کو ملحوظ رکھا اور پھر فتویٰ صادر کیا، اور ملتِ اسلامیہ کی صحیح رہِ نمائی فرمائی۔

(2)   چاند پر انسان کا پہنچنا

        جب چاند پر پہلا قدم رکھنے کے لیے روس اور امریکہ ایک دوسرے پر سبقت اور اوّلیت لے جانے کی جدو جہد اور تگ و دو میں مصروف تھے تو چاند کو خدائی کا درجہ دینے والوں اور اس کی عبادت و پرستش کرنے والوں کے ساتھ ساتھ بعض مفتیانِ کرام بھی اسے روس اور امریکہ کا جنون اور بکواس قرار دے رہے تھے ان کا استدلال تھا کہ  :

’’چاند پر پہنچنے میں کامیاب ہونے کا خیال اسلامی اصول کے خلاف ہے۔ ‘‘

        بیش تر علمائے کرام گومگو کی کیفیت سے دوچار خاموش تھے لیکن مفتیِ اعظم علامہ مصطفیٰ رضا نوریؔ بریلوی نے کہا کہ  :

        ’’جب چاند کی طرف نگاہ اُٹھائی جاتی ہے تو وہ آسمان کے نیچے دکھائی دیتا ہے۔ صحابیِ رسول رئیس المفسرین حضرت عبداللہ ابن عباس رضی اللہ تعالیٰ عنہ کی تفسیر کے مطابق سورج چاند اور ستارے سبھی زمین وآسمان کے درمیان مسخّر ہیں جیسا کہ تفسیرِ مدارک میں ہے۔

        عن ابن عباس ان الشمس والقمر والنجوم کلہا مسخرات بین السماء والارض۔۔الغرض مشاہدہ اور روایات دونوں اس بات پر متفق ہیں کہ چاند آسمان کے نیچے ہے اور جب چاند آسمان کے نیچے ہے تو چاند پر پہنچنے سے آسمان پر پہنچنا کہاں لازم آتا ہے کہ چاند پر پہنچنا ممکن ہے اور اگر کسی مشینی ذریعہ سے انسان چاند پر پہنچ جائے تو اس سے اسلام کا کوئی اصول مجروح نہیں ہو گا۔ ‘‘(3)

         مفتیِ اعظم علامہ مصطفیٰ رضا نوریؔ بریلوی کے اس فتویٰ سے جہاں آپ کی مجتہدانہ صلاحیت و قابلیت کا اظہار ہوتا ہے وہیں تفاسیر پر آپ کی وسعتِ  نظری اور اسلامی اصولوں سے مکمل واقفیت و آگاہی کا اندازہ بھی لگتا ہے۔

(3)29 ؍ تاریخ کو ہوائی جہاز سے چاند دیکھے جا نے کا مسئلہ

        جنرل محمد ایوب خاں کے دورِ صدارت میں حکومتِ پاکستان کی طرف سے علما کی شمولیت میں رویتِ ہلال کمیٹی قائم کی گئی اور سطح زمین سے چاند نہ دیکھے جانے کی صورت میں ہوائی جہاز سے چاند دیکھنے کی کوشش کرنا طے پایا۔  چوں کہ یہ مسئلہ فقہ کی کتابوں میں موجود نہیں تھا اس لیے دنیائے اسلام کے بڑے بڑے مفتیانِ کرام سے فتویٰ طلب کیا گیا تمام مفتیانِ کرام نے ہوائی جہازسے 29؍کا چاند دیکھے جانے پر روزہ اور عید کرنا جائز قرار دیا مگرمفتیِ اعظم علامہ مصطفیٰ رضا نوریؔ بریلوی نے فرمایا :

        ’’چاند سطحِ زمین سے دیکھ کر روزہ رکھنے اور عید کرنے کا حکم ہے جہاں چاند نظر نہ آئے وہاں قاضیِ شرع شرعی ثبوت پر روزہ و عید کا حکم دیں گے۔  سطح زمین یا وہ جگہ جو سطح زمین سے ملی ہوئی ہو وہاں سے چاند دیکھا جائے تو معتبر ہے،  جہاز سے چاند دیکھا جانا معتبر نہیں۔  چاند نگاہوں سے پوشیدہ ہو جاتا ہے فنا نہیں ہو جاتا۔ اس لیے مزید بلندی پہ جایا جائے تو انتیس کے بجائے اٹھائیس کو بھی نظر آسکتا ہے اب اگر کوئی ہوائی جہاز سے اٹھائیس ہی کو چاند نظر آ جائے تو روزہ وعید کا حکم دیا جائے گا؟‘‘

        مفتیِ اعظم علامہ مصطفیٰ رضا نوریؔ بریلوی کا فتویٰ صادر فرمانا تھا کہ پاکستان کے تمام اخباروں نے جلی سُرخیوں کے ساتھ شائع کیا۔  حکومت نے 28؍تاریخ کو ہوئی جہاز اڑا کر اس کی تصدیق کرنا چاہی تو واقعی کافی بلندی پر جانے سے چاند نظر آ گیا۔  جس سے آپ کے فتویٰ کی صداقت کا کھلی آنکھوں سے مشاہدہ ہوا اور حکومتِ پاکستان نے ہوائی جہاز کے ذریعہ چاند دیکھنے کی کوشش ترک کر دی۔ (4)

        ان فتووں کے علاوہ تصویر کھنچوانے کے جواز و عدم جواز،  نیز لاؤ ڈ اسپیکر پر نماز ادا ہونے نہ ہونے سے متعلق اور دیگر سلگتے ہوئے مسائلِ جدیدہ میں آپ نے جس انداز سے تحقیق و تدقیق فرما کر مسئلہ کی صحیح صورت حال کو واضح کر کے حکم صادر فرمایا ہے ان سے آپ کی اعلا ترین اجتہادی صلاحیتوں،  فقہی مہارتوں اور علمِ فقہ پر غیور مطالعے اور گہری نظر کا پتہ چلتا ہے۔

مفتیِ اعظم کا خطاب

مفتیِ اعظم علامہ مصطفیٰ رضا نوریؔ بریلوی کی اعلا فقہی بصیرت کو دیکھتے ہوئے،  امام احمد رضا محدثِ بریلوی کے ساتویں عرس منعقدہ 25؍صفر المظفر 1347ھ اگست 1928ء کے عظیم الشان اجلاس میں حجۃ الاسلام مولانا حامد رضا بریلوی (برادرِ اکبر)سمیت غیر منقسم ہندوستان کے بڑے بڑے مفتیانِ کرام،  علمائے عظام اور مشاہیر قوم کی موجود گی میں آپ کو ’’مفتیِ اعظم‘‘ کہاگیا اور حضرت حجۃ الاسلام کے حکم سے منظور شدہ تجویزوں میں سے تجویز نمبر 3 میں آپ کو ’’صد رالعلما‘‘ اور ’’مفتیِ اعظم ‘‘ کا لفظ لکھا گیا۔ (5)

        اسی طرح آل انڈیا سنی کانفرنس منعقدہ 27تا 30 ؍اپریل 1946ء بہ مقام بنارس کے تاریخ ساز اجلاس جس میں غیر منقسم ہندوستان کے پانچ سو مشائخِ عظام سات ہزار مفتیانِ کرام اور علمائے فخام شریک تھے اس میں آپ کو بار بار ’’ مفتیِ اعظم‘‘ کے لقب سے یاد کیا گیا اور اس کی مختلف تجویزوں میں ’’مفتیِ اعظم‘‘ لکھا گیا۔ (6)تب سے حضرت نوریؔ بریلوی کو دنیائے اہل سنت عقیدت و احترام کے ساتھ’’ مفتیِ اعظم‘‘ کے معزز لقب سے یاد کرتی ہے،  یہاں تک کہ جب کوئی ’’مفتیِ اعظم‘‘ کہتا ہے تو اس سے شہزادۂ اعلا حضرت علامہ مصطفیٰ رضا نوریؔ بریلوی ہی مراد لیے جاتے ہیں۔

علمِ تفسیر

ایک کامیاب فقیہ کے لیے ضروری ہے کہ وہ کامیاب مفسر بھی ہو،  آشنائے رموزِ قرآنی اور مستندتفاسیر پر گہری نظر رکھتا ہو۔  کیوں کہ فتویٰ نویسی کے دوران مسائل کے استخراج اور استنباط اور استفتا کے جوابات میں بار بار قرآنی آیات اور احادیثِ نبویہ کا سہارا لینا پڑتا ہے،  مسئلہ کی مکمل توضیح و تشریح کے لیے قرآنی آیات کی تشریح و تفسیر کرنا پڑتی ہے۔ مفتیِ اعظم علامہ مصطفیٰ رضا نوریؔ بریلوی نہ صرف یہ کہ کامیاب مفتی تھے بل کہ علمائے کرام اور مفتیانِ شرعِ متین کی کثیر جماعت نے آپ کو ’’مفتیِ اعظم‘‘ کے لقب سے نوازا تھا ، بہ ایں طور دیکھا جائے تو مفتیِ اعظم علامہ مصطفیٰ رضا نوریؔ بریلوی کا مفسر ہونا یقینی ہے۔  چناں چہ آ پ کی تصنیفات و تالیفات اور حواشی نیز فتاویٰ مصطفویہ کی مجلدات کا مطالعہ کرنے سے یہ بات روزِ روشن کی طرح عیاں ہو جاتی ہے کہ آ پ علوم قرآنیہ میں مہارتِ تامہ رکھتے تھے نیز مستند تفاسیر پر آپ کی گہری نظر تھی اور آپ نے تفسیری حواشی بھی تحریر کیے،  تفسیرِ احمدی پر آپ کا حاشیہ رضوی دارالافتاء بریلی شریف کے کتب خانہ میں موجود ہے۔ 

        مفتیِ اعظم علامہ مصطفیٰ رضا نوریؔ بریلوی کی علمِ تفسیر پر دقتِ نظر کا اجمالاً مطالعہ کرتے ہیں۔   آپ کی بارگاہ میں سوال آیا  :

        ’’ زید کا قول ہے کہ شراب تھوڑی پئیں کہ حدِ سکر کو نہ پہنچے امام شافعی کے نزدیک اس کا پینا جائز و حلال ہے یہ صحیح ہے یا نہیں اگر نہیں تو مع حوالۂ کتب جواب عنایت ہو۔ ‘‘

        اس پر آپ نے ارشاد فرمایا:

        ’’زید کا قول حضرت امام شافعی رضی اللہ تعالیٰ عنہ پر افترا ہے اوس پر پہلی آن میں اپنی اس افترا سے توبہ اور رجوع لازم اوس نے اوس جلیل الشان رکنِ دین امامِ مسلمین پر افترا کیا لا حول ولاقوۃ ۔۔الخ ۔۔شراب پیشاب کی طرح عین نجاست ہے ‘‘۔ اس کے بعد آیتِ کریمہ   یا ایہا الذین اٰمنوا انما الخمر والمیسر والانصاب ۔۔الخ ۔۔کا حوالہ دیتے ہوئے فرمایا کہ:  ’’ اور جس پلیدی محرم العین،  جس کے دماغ میں عقل کا چراغ کچھ بھی روشنی دے رہا ہو وہ بھی یہ نہ کہے گا کہ کسی پلیدی کا کوئی قلیل حصہ حلال ہے کثیر حرام ہے بل کہ جو شَے عین نجاست ہو نجاست کا کوئی ذرہ یا کوئی قطرہ پڑ جانے سے پاک شَے ناپاک ہو گئی جب تک وہ ناپاک رہی اوس وقت تک کوئی صحیح دماغ والا انسان یہ نہیں کہہ سکتا کہ اس کا کثیر حرام،  قلیل حلال ہے شراب حرامِ قطعی ہے اوس کی حرمت کتاب و سنت اور امامِ امت سب سے ثابت۔ ‘‘ملخصاً  (7)

        اس کے بعد تفسیراتِ احمدیہ ص243کی عبارت پیش کر کے امام شافعی رحمۃ اللہ علیہ کے بارے میں کہا کہ زید کا قول حضرت امام پر نری تہمت ہے اس لیے اس پر توبہ لازم ہے۔

        اس حوالے سے آپ کی علم قرآن اور تفسیر پر دقتِ نظر کا برملا اظہار ہوتا ہے۔ 

        ایک سوال ’’ایسٹرن ٹائمز ‘‘ لاہور سے1354ھ میں آیا :

        ’’قرآن کریم اور احادیث مبارکہ وغیرہم سے یہ امر ثابت فرما دیجیے کہ تلوار رکھنا مسلم کے لیے ضروری ہے ایک انگریز اخبار نے چھاپا ہے کہ تلوار رکھنا مسلمانوں کا مذہبی شعار نہیں لفظ ’تلوار‘ صاف صاف آنا چاہیے۔ ‘‘

        اس کے جواب میں آیت کریمہ :

         ’’و ا عد وا لہم  ما ا ستطعتم  من  قوۃ  ومن  رباط۔۔الخ۔۔ اور آیت کریمہ :’’یا ا یہا  ا لذ ین اٰمنوا خذ و ا حذ رکم۔۔ الخ۔۔ کو تحریر فرما کر اس کی روشنی میں واضح کیا کہ مسلمانوں کو حفظِ ما تقدم بہ نیتِ مغلوبیِ اعدائے دین تلوار رکھنا روا ہے، اور پھر اس کی توضیحِ مزید میں تفسیراتِ احمدیہ کے حوالے دے کر مسئلہ روشن و صاف کیا ہے۔ ‘‘ (8)

        اسی طرح ایک مسئلہ رائے بریلی سے 25؍ محرم الحرام 1358ھ کو آیا جسے ملخصاً پیش کیا جا  رہا ہے ۔۔سوال یوں تھا کہ  :

        ’’جن عورتوں کو حیض و نفاس ہو تا ہے جب تک وہ پاک نہیں ہوتیں تب تک بعض بعض شخص ان کے ہاتھ کا کھانا اور ان کے ہاتھ کا چھوا پانی کھانے پینے سے اعتراض کرتے ہیں کیا ایساہی حکم شریعت میں ہے۔ ‘‘

        مفتیِ اعظم علامہ مصطفیٰ رضا نوریؔ بریلوی نے ارشاد فرمایا:

        ’’جو لوگ ایسا کرتے ہیں ناجائز و گناہ کے مرتکب ہوتے ہیں اور مشرکین کی پیروی کرتے ہیں بہ حالتِ حیض و نفاس صرف شرم گاہ سے استمناع ناجائز ہے،  مشرکین کی طرح ایسی عورت کو بھنگن سے بھی بد تر سمجھنا بہت ناپاک خیال ‘‘۔

        اس کے بعد تفسیراتِ احمدیہ کی طویل عبارت نقل کرتے ہوئے مسئلہ کو واضح کیا ہے اور یوں ارشاد فرمایا ہے کہ  :

        ’’مسلمانوں پر لازم ہے کہ جو لوگ ایسا کرتے ہیں انھیں سمجھائیں اور یہود و مجوس و ہنود و عنود کی اس ناجائز موذی رسم کی پیروی سے روکیں اگر وہ جہالت پر جمیں اپنی ہٹ پر اَڑیں ضد پر رہیں ان سے برادرانہ تعلقات چھوڑیں یہاں تک کہ وہ توبہ کریں۔ واللہ تعالیٰ اعلم  (9)

        یوں تو علمِ  قرآن و تفسیر کے حوالے سے مفتیِ اعظم علامہ مصطفیٰ رضا نوریؔ بریلوی کی تصانیف اور فتووں سے درجنوں مثالیں پیش کی جا سکتی ہیں۔ یہاں اختصاراً صرف تین ہی مثال پر اکتفاکیاگیاہے۔  آپ کی تصانیف میں تفسیر مدارک،  معالم التنزیل،  ابن کثیر،  نیشاپوری،   خازن،  کبیر،  لباب التاویل،  ابن جریر،  بیضاوی،  صاوی،  روح البیان،  جلالین،  احمدیہ،  عزیزی،   مظہری وغیرہ کتبِ تفاسیر کے حوالے بہ کثرت ملتے ہیں اس سے آپ کی مستند تفاسیر پر ژرف نگاہی کا ثبوت ملتا ہے۔

علمِ حدیث

یہ ایک مسلمہ حقیقت ہے کہ کامیاب مفتی و فقیہ کے لیے جس طرح علومِ قرآنی کا ماہر ہونا لازمی ہے۔  اسی طرح اسے محدث اور حدیث داں ہونا بھی ضروری ہے۔ یہ الگ بات ہے کہ محدث کے لیے مفتی اور فقیہ ہونا ضروری نہیں۔  اس بات کو اگر ذہن نشین رکھا جائے اور علامہ مصطفیٰ رضا نوریؔ بریلوی المعروف بہ مفتیِ اعظم کی حدیث دانی اور فنِ حدیث میں آپ کے رسوخ اور تبحر کو نہ بھی بیان کیا جائے تب بھی یہ بات اپنی جگہ پر ثابت ہوتی ہے کہ جس طرح فقہ میں آپ کا مقام و منصب انتہائی اعلا ہے اسی طرح فنِ حدیث میں بھی آپ کا مقام و مرتبہ بلند و بالا ہے۔

        ایک کامیاب مفتی کو فتویٰ نویسی کے دوران سائلین کے جوابات کے دوران جہاں آیاتِ قرآنیہ اور تفاسیر کے حوالے دینے پڑتے ہیں وہیں اپنے موقف کی وضاحت و صراحت کے لیے قدم قدم پر احادیثِ نبویہ علیٰ صاحبہا الصلاۃ والتسلیم کا سہارا بھی لینا ہوتا ہے۔

        اس تناظر میں اگر مفتیِ اعظم علامہ مصطفیٰ رضا نوریؔ بریلوی کی تصنیفات و تالیفات،  حواشی اور فتاویِٰ مصطفویہ کا تجزیہ کیا جائے تو یہ بات اظہر من الشمس ہو جاتی ہے کہ جہاں آپ اپنے عہد میں مفتیِ اعظم تھے وہیں محدثِ اعظم کے منصب پر فائز رہنے کے بھی حق دار ہیں۔

        مفتیِ اعظم علامہ مصطفیٰ رضا نوریؔ بریلوی کی تصنیفات، تالیفات اور فتاویٰ کے مطالعہ سے یہ واضح ہو تا ہے کہ ان میں احادیث و آثار کی ایک حسین و جمیل دنیا آباد ہے۔ چناں چہ آپ کی محدثانہ بصیرت پر خراجِ تحسین پیش کرتے ہوئے عصرِ حاضر کے مشہور و معروف استاذِ حدیث مولانا محمد عیسیٰ رضوی قادری تحریر فرماتے ہیں  :

        ’’حضور مفتیِ اعظم کے بعض فتاوے دیکھ کر علمِ حدیث پر ان کی معلومات و وسعتِ نظر کا اعتراف و اقرار کرنا پڑتا ہے اور اس سے یہ اندازہ ہوتا ہے کہ جس طرح فقہ کی باریکیوں پر آپ کی نظر گہری تھی، اسی طرح علمِ حدیث کے آداب و اصول سے بھی آپ کلی طور پر واقف و آگاہ تھے۔ ‘‘

 (مفتیِ اعظم اور علمِ حدیث :مولانا محمد عیسیٰ رضوی قادری: مشمولہ جہانِ مفتیِ اعظم :رضا اکیڈمی، ممبئی، ص593/594)

        اسی طرح مفتیِ اعظم علامہ مصطفیٰ رضا نوریؔ بریلوی کی مسئلۂ اذانِ ثانی پر مشہورِ زمانہ تصنیف ’’وقایۃ اہل السنۃ ‘‘ کا مکمل تجزیہ کرنے کے بعد ممتا ز عالمِ  دین رئیس القلم علامہ ارشد القادری علیہ الرحمۃ نے آپ کے محدثانہ مقام و منصب اور آپ کی فنِ حدیث میں گیرائی اور گہرائی پر یوں اظہارِ خیال کیا ہے  :

        ’’فنِ حدیث میں حضور مفتیِ اعظم کے رسوخ و تبحر کو سمجھنے کے لیے وقایۃ اہل السنۃ کے اتنے اقتباسات ہی کا فی ہیں،  ورنہ اس دریائے نا پیدا کنار کے تلاطم کا تو یہ حال ہے کہ بحث کے جس نکتے پر قلم اٹھتا ہے مختلف سمتوں میں اتنی دور تک پھیل جاتا ہے کہ اس کا سمٹنا مشکل ہے۔ ابنِ اسحاق کی حدیث پر حضور مفتیِ اعظم نے فنِ حدیث کے ایسے ایسے علمی ذخائر اور نوادر کا انبار لگا دیا ہے کہ عقل حیران ہے کہ ہم کس کس رُخ سے اس جلوے کا تماشا دیکھیں اور اس چمکتے ہوئے نگار خانے میں کس کس گوہرِ تاب دار کی نشاندہی کریں ۔۔ حضور مفتیِ اعظم کو اب تک اپنے وقت کے عظیم فقیہِ اعظم اور مجتہدانہ بصیرت رکھنے والے ایک فقید المثال اور وحید ا لعصر کشورِ افتا کی حیثیت سے جانتے تھے،  لیکن وقایۃ اہل السنۃ کے مطالعہ کے بعد ہر انصاف پسند کو یہ اعتراف کرنا پڑے گا کہ وہ صرف مفتیِ اعظم نہیں تھے بل کہ وہ اپنے دور میں فنِ حدیث کے امامِ اعظم تھے۔ ‘‘

(مفتیِ اعظم کا محدثانہ منصب:علامہ ارشد القادری:مشمولہ :جہانِ مفتیِ اعظم:رضا اکیڈمی، ممبئی، ص568)

         مفتیِ اعظم علامہ مصطفیٰ رضا نوریؔ بریلوی کی فتویٰ نویسی میں طرزِ استدلال بھی اپنے اندر انفرادیت اور جامعیت کا درجہ رکھتا ہے۔  استدلال کے طور پر آپ پہلے آیاتِ قرآنیہ،  پھر احادیثِ نبویہ علیٰ صاحبہا الصلاۃ والتسلیم،  پھر کتبِ فقہ کی عبارات و نصوص،  پھر اقوالِ ائمہ و علما پیش کرتے ہیں۔  یقیناً ایسا وہی شخص کر سکتا ہے جو علومِ اسلامیہ کا ماہر و فاضل ہو اور ان علوم و فنون پر جس کی فکر سلیم ہو اور غیورن ظر ہو۔  فتاوائے مصطفویہ اور آپ کی دوسری تصنیفات و تالیفات کے مطالعہ و مشاہدہ سے یہ واضح ہو تا ہے کہ آپ نے درج ذیل کتبِ احادیث اور کتبِ شروحِ احادیث کو زیرِ مطالعہ رکھا ہے اور ان کتب کے حوالے آپ کی تحریرات میں بہ کثرت ملتے ہیں۔ مثلاً  :

        ’’بخاری،  مسلم،  ابوداود،  ترمذی،  نسائی،  ابنِ ماجہ،  خصائصِ نسائی،  مشکوٰۃ،  مرقات شرحِ مشکوٰۃ،  اشعۃ اللمعات،  مسند امامِ اعظم،  موطا امام محمد،  موطا امام مالک،  کتاب الآثار،  کتاب الخراج،  شرح معانی الآثار،  مسند امام شافعی،  مسند امام محمد،  سنن دارمی،  بیہقی،  مسند امام احمد بن حنبل،  کنز العمال،  مقدمۂ اصولِ حدیث،  مختار الاحادیث،  حصن حصین،  طبرانی،  مستدرک،  معجم الکبیر،  جامع کبیر،  جامع صغیر،  کتاب الترغیب،  خصائص کبریٰ،  صحیح البہاری،  عینی شرح بخاری،  فتح الباری شرح بخاری، دار قطنی،  شرح السنۃ وغیرہ‘‘۔

        چناں چہ جس فقیہ کے فتاویٰ اور تصانیف میں اس قدر کثرتِ تعداد کے ساتھ کتبِ احادیث کے حوالے ملتے ہوں وہ فقیہ ہونے ساتھ ساتھ بجا طور پر ایک با خبر حدیث داں اور محدث کہلانے کا واجب طور پرمستحق ہے۔ اسی طرح آپ کے مجموعہ فتاویٰ ’’فتاویٰ مصطفویہ‘‘ جوکہ644؍ صفحات پر مشتمل ہے،  اس میں 375؍ مسائل ہیں مگر ان میں احادیث کی کل تعداد 357؍ تک ہے۔  اس میں دیگر مفتیان کے مقابلہ میں مسائل کی تعداد کی نسبت سے احادیث کی تعداد بہت زیادہ ہے۔  آپ نے ایک ایک سوال کے جواب کو دلائل و براہین سے مزین و آراستہ کرنے کے ساتھ ساتھ آیاتِ قرآنیہ کے بعد کہیں 38؍ احادیث،  کہیں 25؍ احادیث،  کہیں 20؍ احادیث،  کہیں 15؍ احادیث تو کہیں 10؍ 10؍ احادیث بھی پیش فرمائی ہیں بل کہ بعض فتاوے تو ایسے بھی ہیں جن میں آپ نے درجنوں احادیث سے استدلال کیا ہے اس سے آپ کے محدثانہ مقام و منصب اور علمِ حدیث میں وسعتِ نظر کا اندازہ لگایا جا سکتا ہے۔

        آخر میں مثال کے طور پر ایک استفتا فتاویٰ مصطفویہ سے نقل کیا جاتا ہے جس میں مفتیِ اعظم علامہ مصطفیٰ رضا نوریؔ بریلوی سے سوال کیا گیا کہ  :

        ’’زید کہتا ہے رسول اﷲ صلی اللہ تعالیٰ علیہ و سلم کو علم غیب حاصل نہیں ہے اور یہ کہ آپ غیب نہیں جانتے تھے؟‘‘

         مفتیِ اعظم علامہ مصطفیٰ رضا نوریؔ بریلوی نے اس سوال کے جواب میں دس آیاتِ قرآنیہ،  دس احادیثِ نبویہ علیٰ صاحبہا الصلاۃ والتسلیم پیش فرمائیں،  پھر کتبِ فقہ کی عبارات و اقوالِ ائمہ سے اسے مزین و آراستہ کیا  :

        قرآنِ عظیم کی آیات کے بعد آپ نے حضور صلی اللہ علیہ و سلم کے علمِ غیب کے ثبوت میں یہ احادیث پیش فرمائی ہیں  :

(1)ان اﷲقد رفع لی الدنیا وانا انظر الیہا والی ماہو کائن فیہا الی یوم القیامۃ کا نما انظر الی کفی ہذہ(زرقانی علی المواہب اللدنیہ)

        بے شک اﷲ عزوجل نے میرے لیے دنیا اٹھائی یعنی میرے پیشِ نظر فرما دی اور جو کچھ اس میں روزِ قیامت تک ہونے والا ہے سب کو ایسا دیکھ رہا ہوں جیسے ہا تھ کی ہتھیلی کو۔

(2)اخبرنا عن بدء الخلق حتی دخل اہل الجنۃ منازلہم واہل النار منازلہم

 (مشکوٰۃ، ص 506، کتاب بدء الخلق و ذکر الدنیا، الفصل الاول)

        ہمیں سیدِ عالم صلی اللہ علیہ و سلم نے ابتدائے آفرینش سے جنتیوں کے اور جہنمیوں کے اپنے اپنے منازل میں داخل ہونے تک کی خبر دی۔

(3)اﷲ زوی لی الارض فر اء یت مشارقہا و مغاربہا

(مشکوٰۃ،  ص 512، فضل سید المرسلین، الفصل الاول)

اﷲ عزوجل نے میرے لیے دنیا کو سمیٹ دیا تو میں نے اس کے مشارق و مغارب کو ملاحظہ فرمالیا۔

(4)تجلی لی کل شئی و عرفت

 (مشکوٰۃ، ص72،  باب المساجد و مواضع الصلاۃ،  الفصل الاول)

        ہر چیز مجھ پر روشن ہو ئی اور میں نے پہچان لیا۔

(5)علمت ما فی السموٰوٰت و الارض  (مشکوٰۃ، ص70)

        میں نے جان لیا جو کچھ آسمانوں اور جو کچھ زمین میں ہے۔

(6)قطرت فی حلقی قطرۃ فعلمت ماکان ومایکون

میرے حلق میں ایک قطرہ ٹپکا تو میں نے جان لیا ما کان و ما یکون کو جو کچھ ہونے والا ہے سب کو۔

(7)مامن شئی کنت لم ارہ ال وقد راء یت فی مقامی ہذا حتی الجنۃ والنار

(بخاری، ج 1، ص 18)

        جو چیز میں نے نہیں دیکھی تھی انھیں میں نے اپنی اس جگہ پر دیکھ لیا یہاں تک کہ جنت و دوزخ کو بھی دیکھا۔

(8)   تجلی لی مابین السمآ والارض

        آسمان و زمین کے درمیان کی ہر چیز مجھ پر روشن ہو گئی۔

(9)   علمت ما بین المشرق والمغرب

        مشرق و مغرب کے درمیان سب کچھ میں نے جان لیا۔

(10) اخبرنا بماکان و بما ہو کا ئن فاعلمنا احفظنا (مسلم، ج2، ص390)

        جو کچھ ہوا اور جو کچھ ہو نے والا ہے حضور صلی اللہ علیہ و سلم نے ہمیں خبر دی تو ہم میں زیادہ علم والا وہ جسے زیادہ یا د رہا۔

        الغرض آیات و احادیث و دیگر دلائلِ شرعیہ سے جو اب واضح کرنے کے بعد مفتیِ اعظم علامہ مصطفیٰ رضا نوریؔ بریلوی ایک جگہ تحریر فرماتے ہیں :

        ’’آیات و احادیث جن سے حضور علیہ الصلاۃ والسلام کے لیے علمِ غیب کا ثبوت ہے اور بھی ہیں مگر منکرین کے دس انکار کے مقابل دس آیات و احادیث پر بس کریں۔ ‘‘ (فتاویٰ مصطفویہ،  مولانا مصطفیٰ رضا نوریؔ بریلوی، ص32)

فنِ تاریخ گوئی

علمِ تفسیر،  علمِ فقہ، علمِ حدیث، اصولِ حدیث وغیرہ علوم و فنون کی طرح مفتیِ اعظم علامہ مصطفیٰ رضا نوریؔ بریلوی فنِ تاریخ گوئی میں بھی یدِ طولیٰ رکھتے تھے اور اس فن میں بھی مثالی حیثیت کے حامل تھے۔  آپ کی بیش تر تصانیف کے نام قریب قریب تاریخی ہیں۔  وجوبِ حج کے سلسلے میں آپ کی ایک کتاب ہے ،  ’’حجۃ واہرہ بوجوبِ الحجۃ الحاضرہ  (1344ھ)‘‘ اس کا نام تاریخی ہے اس کا سنِ تصنیف 1344ھ ہے۔  اسی طرح ’’القول العجیب فی اجوبۃ التثویب ‘‘ یہ بھی تاریخی نام ہے جو 1339ھ کی تصنیف ہے۔  دیوانِ نعت ’’سامانِ بخشش‘‘ کا نام بھی تاریخی ہے۔ آپ نے اس کا دوسرا نام ’’گلستانِ نعتِ  نوری‘‘ رکھا،  اس لیے کہ یہ دیوان1347ھ سے1354ھ کے درمیان مکمل ہوا دونوں سن کے حساب سے آ پ نے اس کے دو نام رکھے ’’سامانِ بخشش عرف گلستانِ نوری‘‘۔

        علاوہ ازیں اور بھی کئی تصانیف ہیں جن کے نام تاریخی ہیں۔  مریدین و معتقدین کے یہاں جب بچہ پیدا ہوتا تو حضرت سے تاریخی نام دریافت کرتے آپ فوراً بتا دیتے بعد میں جب اس نام کے تاریخی اعداد جوڑے جاتے تو وہ ایک دم صحیح اور تاریخی ہوتے۔

        محدث اعظم پاکستان حضرت مولانا سردار احمد (م 1382ھ) کے وصال پر صوفی اقبال احمد نوری بریلوی نے ماہ نامہ ’’نوری کرن ‘‘ کا خاص نمبر شائع کیا جس کے لیے انھوں نے حضرت سے تاریخِ وصال کی درخواست کی حضرت نے فرمایا کل صبح بعد نمازِ فجر آنا۔  صوفی صاحب موصوف دوسرے دن بعد نمازِ فجر حضرت کی خدمت میں حاضر ہوئے حضرت بیٹھک میں بیٹھے وظیفہ میں مشغول تھے انھیں اشارہ سے بیٹھنے کو کہا بعد فراغتِ  وظیفہ ایک کاغذ لیا اور صرف بیس منٹ میں حسبِ ذیل لوحِ تاریخِ وصال لکھ کر عطا کر دی۔

        لوحِ تا ریخِ وصال( 1382ھ)

        آہ میرا روشن چاند جاتا رہا( 1382ھ)

        غروبِ مہ صلحا  ( 1382ھ)

        فیضانِ تام ( 1382ھ)

        فیضانِ اتم ( 1382ھ)

        منبعِ کرم مقبولِ عصر امیر العلما ء( 1382ھ)

        آئینۂ اسرارِ مقصود آفاقِ زین و دانش ( 1382ھ)

        مشہورِ انام پیشوا چارہ سازِ بیکساں ( 1382ھ)

        ہادیِ  بُستان رہبرِ اسلام نورالہدیٰ ( 1382ھ)

        مولیٰنا الاوحد الاسدُ الاسعدُ الارشد بحر علم ( 1382ھ)

        سعادت مآب مولوی سردار احمد صاحب ( 1382ھ)

        ذکی و محدثِ  باکمال ( 1382ھ)

        رضی عنہ مولاہ الصمد ( 1382ھ)۔

        لوحِ تا ریخِ وصال کے اس استخراج میں ایک اور خوبی یہ ہے کہ ’’ لوحِ تاریخِ وصال ‘‘ کے اعداد بھی 1382ھ ہیں جو کہ محدث اعظم پاکستان علیہ الرحمۃ کا سنِ وصال ہے۔

        اسی ’’نوری کرن‘‘ میں منظوم تاریخِ وصال بھی نوریؔ بریلوی نے مولانا سردار احمد صاحب علیہ الرحمۃ کی رقم فرمائی،  یہ نظم 33؍ اشعار پر مشتمل ہے،  جس کے تین ا شعار جن میں تاریخِ وصال درج ہے خاطر نشین ہوں      ؎

مر گیا فیضان جس کی موت سے

ہائے وہ ’’فیض انتما‘‘ جاتا رہا 1382ھ

’’یا مجیب اغفر لہ‘‘ تاریخ ہے1382ھ

کس برس وہ رہنما جاتا رہا

دیو کا سر کاٹ کر نوریؔ کہو

’’ چاند روشن علم کا جاتا رہا‘‘ 1382ھ

تصنیفات و تالیفات اور حواشی

علمی خدمات کے ضمن میں تصنیفات و تالیفات اور حواشی کا ذکر بھی غیر ضروری نہ ہو گا۔  یوں تو بعض تصانیف ادبی خدمات کے زمرے میں بھی آتی ہیں۔ مفتیِ اعظم علامہ مصطفیٰ رضا نوریؔ بریلوی کے تمام قلمی جواہر پارے آپ کی علمیت و صلاحیت اور فقہی بصیرت و ژرف نگاہی کے منہ بولتے نادر نمونے اور شاہ کار ہیں۔  آپ نے اپنی گو نا گوں اور متنوع مصروفیات اور مشاغل کے باوجود تصنیف و تالیف اور حواشی کا ایک گراں قدر ذخیرہ چھوڑا ہے۔  قلم میں مبدءِ فیاض نے بے پناہ قوت اور کشش ودیعت فرمائی تھی۔ زبان پُر اثر اور طاقت ور استعمال فرماتے۔ الفاظ اور روزمرہ محاورات کا برمحل استعمال کرتے۔  آپ کی تصنیف و تالیف اور حواشی سے متعلق مایۂ ناز ادیب مولانا افتخار احمد مصباحی رقم طراز ہیں  :

        ’’وہ(مولانا مصطفی رضا نوریؔ بریلوی ) ایک عظیم محقق و مصنف بھی ہیں،  ان کی تحریر میں ان کے والدِ جلیل امام احمد رضاقدس سرہ کے اسلوب کی جھلک اور ژرف نگاہی نظر آتی ہے۔  تحقیق کا کمال بھی نظر آتا ہے اور تدقیق کا جمال بھی۔  فتاویٰ کے جزئیات پر عبور کا جلوہ بھی نظر آتا ہے اور علامہ شامی کے تفقہ کا انداز بھی۔  تصانیف میں امام غزالی کی تحقیق اور امام رازی کی تدقیق اور امام سیوطی کی تلاش و جستجو کی جلوہ گری نظر آتی ہے۔ ‘‘  (10)

        اللہ جل شانہ نے مفتیِ اعظم علامہ مصطفیٰ رضا نوریؔ بریلوی کے قلم میں ایسی روانی دی تھی کہ مضامین کے سیلاب کو جو اُن کے دماغ میں امنڈتا تھا اسے ضبطِ تحریر میں لے آتے تھے کتاب وسنّت کے خلاف اگر کسی طرف سے آواز اُٹھتی تو بے تابانہ تعاقب کرتے اور بلا خوفِ لومۃ لائم احقاقِ حق اور ابطالِ باطل کا فریضہ انجام دیتے مفتیِ اعظم علامہ مصطفیٰ رضا نوریؔ بریلوی کی تصنیفات و تالیفات اور حواشی جو اب تک تحقیق میں آئیں مندرجہ ذیل ہیں :

        (1)   اشدالباس علیٰ عابد الخناس  (1328ھ)              

        (2)   الکاوی فی العاوی والغاوی (1330ھ)

        (3)   القشم القاصم للداسم  القاسم  (1330ھ)

        (4)   نور الفرقان بین جند الالٰہ و احزاب الشیطان (1330ھ)

        (5)   وقعات السنان فی حلقۃ مسماۃ بسط البنان (1330ھ)

        (6)   الرمح الدیانی علیٰ راس الوسواس الشیطانی (1331ھ)

        (7)   وقایہ اہل سنۃ ( 1332ھ)۔ 

        (8)   الٰہی ضرب بہ اہل الحرب (1332ھ)

        (9)   ادخال السنان الیٰ الحنک  الحلقی بسط البنان (1332ھ)

        (10) نہا  یۃ السنان (1332ھ)

        (11) صلیم الدیان لتقطیع حبا  لۃ الشیطان (1332ھ)

        (12) سیف القہار علیٰ عبد الغفار (1332ھ)

        (13) نفی العار من معائب المولوی الغفار (1332ھ)

        (14) النکۃ علیٰ مراۃ کلکتہ ( 1332ھ)

        (15) مقتلِ اکذب و اجہل (1332ھ)

        (16) مقتلِ کذب و کید (1332ھ) 

        (17) الموت الاحمر علیٰ کل الجنس اکفر (1337ھ)

        (18) ملفوظات (چار حصے)(1338ھ)

        (19) الطاری الداری لہفوات عبد الباری (تین حصے)(1339ھ)

        (20) القول العجیب فی جواب التثویب (1339ھ)

        (21) طرق الہدیٰ والارشاد الیٰ احکام الامارۃ والجہاد (1341ھ)

        (22) حجۃ واہرہ بوجوب الحجۃ الحاضرہ (1342ھ)

        (23) القسورۃ علیٰ ادوارالحمر الکفرۃ (1343ھ)

        (24) سامانِ بخشش عرف گلستان نعت نوری (1354ھ)

        (25) فتاویٰ مصطفویہ

        (26) شفاء العی فی جواب سوال بمبئی

        (27) تنویر الحجہ با التواء الحجہ             

        (28) وہابیہ کی تقیہ بازی

        (29) مسائلِ سماع

        (30) الحجۃ الباہرہ

        (31) نورالعرفان

        (32) داڑھی کا مسئلہ

        (33) ہشتاد و بید بند بر مکال دیوبند

        (34) طرد الشیطان

        (35) سل الحسام الہندی لنصرۃ سیدناخالد النقشبندی

        (36) کانگریسیوں کا رد 

        (37) حواشی و تکمیلاتِ الاستمداد

        (38) حاشیہ تفسیرِ احمدی  (قلمی )

        (39) حاشیہ فتاویٰ عزیزیہ  (قلمی)

حواشی

(1)محمود احمد قادری، مولانا:تذکرۂ علمائے اہل سنّت، مکتبۂ نبویہ، لاہور، ص223

(2)مطیع الرحمن رضوی، مفتی :مفتیِ اعظم مفتیِ اعظم کیوں ؟، رضا دار المطالعہ،  بہار 2004ء، ص18/19

(3) مطیع الرحمن رضوی، مفتی :مفتیِ اعظم مفتیِ اعظم کیوں ؟، رضا دار المطالعہ، بہار2004ء، ص20

(4)ماہ نامہ استقامت : مفتیِ اعظم نمبر،  کانپور، 1983ء، ص 116/118

(5)دبدبۂ سکندری :رامپور، اگست 1928ئ، شمارہ 9، جلد 6، ص206

(6)ماہ نامہ المیزان : ممبئی،  اپریل 1987ء،  ص 120/122

(7)مصطفیٰ رضا نوریؔ بریلوی، علامہ :فتاویٰ مصطفویہ، مکتبہ رضا بریلی، ج1، ص207

(8)مصطفیٰ رضا نوریؔ بریلوی،  علامہ :فتاویٰ مصطفویہ، مکتبہ رضا بریلی، ج3، ص194/195

(9)مصطفیٰ رضا نوریؔ بریلوی، علامہ :فتاویٰ مصطفویہ، مکتبہ رضا بریلی، ج3، ص13/14

(10)ماہ نامہ استقامت : مفتیِ اعظم نمبر،  کانپور،  1983ء، ص

(11)مصطفیٰ رضا نوریؔ بریلوی، علامہ:فتاویٰ مصطفویہ، بیسلپور پیلی بھیت 1397ھ، ج1، ص9

٭٭٭

ج: ادبی خدمات

تحقیق و مطالعہ سے ظاہر ہوتا ہے کہ حضرت نوریؔ بریلوی کی ادبی خدمات کا دائرہ نہایت وسیع ہے۔  وہ مختلف اصنافِ ادب کے ماہر،  صاحبِ طرز ادیب،  مایۂ ناز انشا پرداز اور قادر الکلام نعت گو شاعر تھے۔  آپ کی تصنیف و تالیف اور حواشی میں بیش تر کتب و رسائل کو جب پیشِ نظر رکھتے ہیں تو بہت سارے ادبی پہلو سامنے آتے ہیں۔

        الملفوظ کی ترتیب و تدوین،  الاستمداد کی شرح و تکمیلات،  سامانِ بخشش اور مختلف کتب ورسائل سے آپ کی ادبیت آشکار ہے۔  آپ کی تصنیفات میں اردو،  عربی اور فارسی تینوں زبانوں کا کثرت سے استعمال ہے۔  حضرت نوریؔ بریلوی کی شاعری سے متعلق تحقیقی جائزہ تو پیشِ نظر مقالے کا خاص موضوع ہے۔ یہاں صرف آپ کی نثر نگاری پر قدرے روشنی ڈالنا مقصود ہے۔

        مفتیِ اعظم علامہ مصطفیٰ رضا نوریؔ بریلوی کی تصانیف جہاں اپنے فن کے اعتبار سے معرکہ آرا کہلاتی ہیں۔  وہیں زبان و بیان اور اسلوبِ نگارش کے اعتبار سے بھی اپنا جواب نہیں رکھتیں۔  آپ نے انشایئے،  خاکے اور مضامین بھی لکھے۔  جس میں اعلا درجہ کی نثرنگاری کی جھلک سامنے آئی ہے۔  مسجع و مقفا عبارتیں بھی لکھیں۔ سیدھے سادھے جملے بھی لکھے۔  مگر ان میں بھی بلا کی پر کا ری اور دلفریبی انگڑائیاں لیتی ہو ئی نظر آتی ہے۔  بات میں بات پیدا کرنا،  تشبیہ و استعارہ اور صنعتی گل بوٹے کھلانا آپ کی نثر نگاری کا اعلا نمونہ ہے۔  محدثِ اعظم پاکستان کے وصال پر ’’وہ میرا چاند تھا‘‘ کے عنوان سے ماہ نامہ نوری کرن،  بریلی کے محدثِ اعظم نمبر1382ھ میں آپ کا ایک مضمون شائع ہوا جو نثر نگاری کا ایک عمدہ نمونہ ہے  :

        ’’وہ میرا چاند تھا، جو بڑھتا ہی رہا کبھی نہ گھٹا جو اپنی گفتار۔۔ اپنی رفتار۔۔ اپنے کردارسے فتنوں ۔۔ فسادوں ۔۔ کفر و گمراہی کی گھٹا کو دفع کرتا رہا۔۔ کبھی گھٹاؤں میں نہ چھپا ۔۔ کتنی ہی دھولیں اڑیں ۔۔ کتنا ہی گھٹا ٹوپ اندھیرا چھایا۔۔ وہ چمکتا جگمگاتا ہی رہا ۔۔ وہ میرے دین کا چاند تھا۔۔ دین کا چاند بڑھتا ہی رہتا ہے آسمانِ دنیا کے چاند کی طرح بار بار گھٹتا اور اترتا اور اتر کر غائب نہیں ہوتا۔۔ وہ میرا چاند تھا، جس نے ملک میں بہت چاند روشن کیے۔ ‘‘ 

        امام احمد رضا محدثِ بریلوی کے علوم و معارف کا ایک بڑا ذخیرہ ’’الملفوظ ‘‘ ہے جو ان کے ارشادات اور کلمات طیبات پر مشتمل ہے۔ اس کو مفتیِ اعظم علامہ مصطفیٰ رضا نوریؔ بریلوی نے چار حصوں میں جمع کیا،  مکمل کتاب میں جا بجا ادبی جواہر پارے نظر آتے ہیں،  نثر اعلا ترین ہے،  اس کا مقدمہ مسجع و  مقفا نثر نگاری کا بہترین نمونہ ہے۔ نشانِ خاطر کیجیے  :

        ’’یہاں جو دیکھا شریعت و طریقت کے باریک مسائل جن پر مدتوں غور و خوضِ کامل کے بعد ہماری کیا بساط بڑے بڑے سر پٹک کر رہ جائیں فکر کرتے کرتے تھک جائیں اور ہرگز نہ سمجھیں صاف لاعلمی کا دم بھریں وہ یہاں ایک فقرہ میں ایسے صاف فرما دیے جائیں کہ ہر شخص سمجھ لے اور حقائق و نکاتِ  مذہب و ملّت جو ایک چیستاں اور معمّہ ہیں جن کا حل دشوار تر ہے وہ یہاں حل فرما دیے جائیں تو خیال گذرا کہ یہ جواہرِ عالیہ اور زواہرِ غالیہ یونہی بکھرے رہے اور انھیں سلکِ تحریر میں نہ لا یا تو اندیشہ ہے کہ وہ کچھ عرصہ بعد ضائع ہو جائیں۔ ‘‘ (1)

        اسی طرح الاستمداد کے مقدمہ کی یہ عبارت بھی کتنی شگفتہ، سلیس، اور رواں دواں ہے :

        ’’فضول قصوں،  ناولوں کی نظمیں،  نثریں دیکھتے پڑھتے گھنٹوں گزریں یہ بھی ایک مزہ دار نظم ہے اس میں رسول اللہ صلی اللہ علیہ و سلم کے زینت  ہے،  قیامت قریب ہے۔  اللہ حسیب ہے۔  اس کا ثواب عظیم اور عذاب شدید ہے،  دین کو جھگڑا سمجھنا مسلمانوں کی شان سے بعید ہے،  تنہا یا دو دو اطمینان سے۔  انصاف یا ایمان سے۔  دو تین بار سچے دل سے ایک ہی نگاہ دیکھ لیجیے مگر یہ کہ صاف بات میں نہ ایچ پیچ کی حاجت۔  نہ اللہ جل وعلا ورسولصلی اللہ علیہ و سلم کے مقابل کسی کی رعایت۔ ‘‘ (2)

        علاوہ ازیں امام احمد رضا محدثِ بریلوی کی کتاب ’دوام العیش فی الا ئمۃ من القریش‘ کے مقدمہ میں جو مفتیِ اعظم علامہ مصطفیٰ رضا نوریؔ بریلوی نے لکھا ہے اس میں ایسی ایسی عبارتیں ہیں جنھیں پڑھنے کے بعد قاری یہ سوچنے لگتا ہے کہ یہ کسی مولو ی کے جملے ہیں ؟ اس کی زبان ہے یاکسی صاحبِ طرز ادیب یا قلم کار کی عبارتیں ہیں ؟

        ’’اگرچہ چہرۂ پُر نور،  ماہتابِ صدق پر کذابوں کے کذب کی نہایت وحشت ناک تیرگیاں چھائیں،  اور روئے آفتابِ حق پر باطل کی سخت بھیانک اور خوف ناک تاریکیاں اور کالی کالی ڈراؤنی بدلیاں آئیں،  مگر ہمارے قلوب بفضلہ تعالیٰ مطمئن تھے،  ہم سمجھے ہوئے تھے یہ بھی کچھ روز کی ہَوا ہے،  جو دم میں ہَوا ہے،  آخر کار وہی ہُوا جس کا ہمیں شدت سے انتظار تھا۔  وہ دن آ ہی گیا کہ وہ تیرگی دور اور تاریکی کافور ہوئی،  نورِ حق کا جگمگاتا،  چمکتا دمکتا پُر نور چہرۂ آفتاب نصف النہار کی طرح آنکھیں خیرہ کرتے نکلا اور ایک عالم نے آنکھوں دیکھ لیا کہ حق یہ ہے اور باطل وہ تھا جو اس کے حضور جم نہ سکا پتّا توڑ بھاگا،  کب تک باطل حجابِ حق کو چھپائے تابہ کے جھوٹے نقابِ صدق کی آڑ کر سکے،  آخر حق کی شعاعوں نے ان باطل پردوں کو خاکستر ہی کر دیا، جھوٹے نقابوں کو جلا ہی ڈالا اور دنیا کو اپنا جلوۂ جہاں تاب دکھا ہی دیا ‘‘ (3)

        اس اقتباس میں ’’چہرۂ پُر نور، ماہتابِ صدق، روئے آفتابِ حق، نقابِ صدق، حجابِ حق‘‘ وغیرہ جیسے تراکیب کے حُسن ’’وحشت ناک،  خوف ناک، جگمگاتا، چمکتا، دمکتا‘‘،  وغیرہ ہم آواز اور ہم وزن الفاظ نیز ’’تیرگیاں،  تاریکیاں،  جگمگاتا، چمکتا، دمکتا‘‘ وغیرہ مترادفات اور’’ کالی کالی‘‘ لفظ کے جوڑ ے وغیرہ کا سلیقہ مندانہ استعمال نے تحریر میں صوتی فضا بھر دی اور اسے جمال و جلال کا حسین امتزاج بنا دیا ہے۔ کچھ روز کی ہوا،  اور پتہ توڑ بھا گا جیسے محاورات،۔ ہَوا،  ہَوا اورہُوا کا استعمال،  ۔۔ ذرا یہ جملہ دیکھیے  :

        ’’کچھ روز کی ہَوا ہے،  جو دم میں ہَوا ہے،  آخر کار وہی ہُوا جس کا ہمیں شدت سے انتظار تھا۔ وہ دن آہی گیا‘‘۔ 

        ’’کی ۔۔ روز ۔۔ ہَوا۔۔ ہُوا۔ ‘‘ کی تکرار نے تحریر میں حُسن و لطافت پیدا کر دی ہے مزید یہ کہ تحریر میں استفہامیہ انداز بھی ہے،  تشبیہات و استعارات کی جلوہ گری بھی۔

        مفتیِ اعظم علامہ مصطفیٰ رضا نوریؔ بریلوی کی ایک مقفّا و مسجع تحریر دیکھیے اور اس میں لطیف طنز کا جلوہ بھی خاطر نشین کیجیے  :

        ’’ یہ ہے آپ کی سندوں کا بھاگ۔۔ یہ ہے آپ کے کمل کا باگ۔۔ یہ ہے آپ کی کتابوں کی قطار۔۔یہ ہے آپ کی روایتوں کی پکار ع

شرم بادت از خدا ورسول‘‘(4)

        مذکورہ تحریر میں شعری فضا کے اہتمام کے ساتھ فارسی مصرع نے حُسنِ تحریر کو اور بھی دوبالا کر دیا ہے۔ یہ اقتباس نشانِ خاطر کیجیے :

        ’’وہ بے چارے ہیبت کے مارے، خاموش روپوش اور یہ چاری لگائے جاتے ہیں۔  ہر بار منہ کی کھاتے ہیں۔ مگر مکر و کید سے کب باز آتے ہیں ‘‘۔

        عبارت مقفّا بھی ہے اور ترکیب بند بھی۔ آوازوں کے جوڑوں نے جملے میں آہنگ برپا کر دیا ہے۔ ’’ خاموش،  روپوش،  بے چارے،  ہیبت کے مارے ‘‘ لائقِ دید ہیں۔ ’’چاری لگائے جاتے ہیں، ہر بار منہ کی کھاتے ہیں ‘‘۔  میں شعری ملاحت کا جلوہ دیدنی ہے۔

         مفتیِ اعظم علامہ مصطفیٰ رضا نوریؔ بریلوی نے تا عمر فتویٰ نویسی کی، قرآن و حدیث سے تحریروں کو آراستہ کیا اور اللہ و رسول جل و علاو صلی اللہ علیہ و سلم کے احکام اور نظامِ اسلام کے نفاذ و اشاعت اور ترویج و تشہیر کی سعی بلیغ فرمائی، فقہ و فتویٰ اور دینی تحریرات میں فصاحت و استدلال لازمی جزو ہیں، ساتھ ہی ساتھ ایجاز و اختصار اور متانت و سنجیدگی بھی ضروری ہے۔

        ایک سائل نے سوال کیا کہ  :

         ’’اصول کو اہلِ  منطق اور اہلِ فلسفہ وحدتِ نظری اور عوام الناس نظمِ کائنات کہتے ہیں،  کیا اس طرح قائل نے نظمِ  کائنات کو دائمی اور ابدی نہیں کہا؟‘‘

        مفتیِ اعظم علامہ مصطفیٰ رضا نوریؔ بریلوی نے اس کا جواب یوں دیا  :

        ’’قائل، نظمِ کائنات کو ابدی کہتا ہے نہ کائنات کو، کائنات کو نہ ابدی اور دائمی بتایا نہ اس کے کسی لفظ سے مترشح۔  نظمِ کائنات اس نے انھیں اصولوں کا نام رکھا جن پر نظامِ کائنات برقرار ہے۔  جن پر کائنات کا مدار ہے۔ رہا یہ کہ کن اصولوں کو وہ دائمی ومستحکم و ابدی کہتا ہے یہ اس عبارتِ  منقولہ میں نہیں وہ بھی منقول ہوتے تو ان کا حکم بتایا جاتا مگر ایسے اصول ہیں جنھیں ابدی کہہ سکتے ہیں مگر وہ بھی جواز کی بھی ہیں اور ابدی بھی ہمیشہ سے ہے اور ابد الآباد تک رہے گا۔   وہ اصل کیا ہے  لا الہٰ الا اللہ  جس پر نظامِ کائنات کا مدار ہے جب عالم میں کوئی  لا الہٰ الا اللہ محمد رسول اللہ کہنے والا باقی نہ رہے گا جب ہی قیامت قائم ہو گی اور یہ نظامِ  عالم درہم برہم اور عالم تہہ و بالانیست و نابود ہو جائے گا۔  فنا کے گھاٹ اُتر جائے گا۔  تو اسے ابدی دائمی کہنے میں کیا حرج کہ قطعاً ابدی و دائمی ہے۔  اصول کے دائمی و ابدی ہونے سے نظامِ عالم ابدی و دائمی نہ ہو جائیں گے! ‘‘ (5)

        غور کریں اس قدر فلسفیانہ اور زبردست دینی مسئلہ کو کس قدر آسانی کے ساتھ مفتیِ اعظم  علامہ مصطفیٰ رضا نوریؔ بریلوی نے سمجھایاہے کہ قوتِ استدلال اور منطقیانہ اندازِ  بیان دید نی و شنیدنی ہے۔  ساتھ ہی ساتھ ایجاز و اختصار اور متانت و سنجیدگی کو بھی برقرار رکھا گیا ہے۔

        طنز و نشتریت بھی ادب کا اہم جز ہے اس سے فن پا رے میں لذت و ملاحت پیدا ہوتی ہے اور یہ اصلاحِ معاشرہ کا ذریعہ بھی ہے اور فسادات کو روکتا اور دور کرتا ہے۔  مفتیِ اعظم علامہ مصطفیٰ رضا نوریؔ بریلوی نے فرقہائے باطلہ کے پیشواؤں،  بد عقیدوں،  مشرکوں،  ملحدوں،  اشتراکیوں،  غیروں کی چال و جال میں آ کر اسلامی عقائد اور مسلمانوں کو گمراہ کرنے والے اپنوں اور بے گانوں نیز بے عمل مسلمانوں وغیرہ پر طنز و تعریض اور تنقید کی نشتر زنی کی ہے اور اپنی تحریروں کو نمکین حُسن کا پیکر بنا دیا ہے،  چند اقتباسات ملاحظہ کیجیے  :

        ’’نہ تم انھیں مسجدوں میں لے جاتے اور انھیں مسجد کے منبر پر مسلمانوں سے اونچا اٹھاتے،  نہ تم ان کو واعظ بناتے،  نہ تم ان کے فوٹو کھنچواتے،  تصویر اترواتے،  نہ تم یہ روزِ بد دیکھتے نہ اوروں کو دکھاتے۔  آج میدانِ ارتداد میں منشی رام،  شردھانند کا وہ فوٹو جو جا مع مسجد دہلی میں اس کے منبر پر بیٹھے ہونے اور لکچر دینے کا لیا گیا ہے،  مسلمانوں کو دکھا دکھا کر مرتد کیا جا رہا ہے۔  شرم،  شرم،  شرم۔ ‘‘ (6)

        اسلام میں خلافت و امامت کے لئے ’’قُرشیت‘‘ شرط ہے مگر مولانا عبدالباری فرنگی محلی اس شرط کو نہیں مانتے تھے ان کے دادا مولانا عبدالرزاق صاحب نے بھی امامت و خلافت کے لئے ’’قُرشیت‘‘ کو لازمی قرار دیا اس پر مفتیِ اعظم علامہ مصطفیٰ رضا نوریؔ بریلوی موصوف کو لکھتے ہیں طنز کا یہ لطیف مگر کاٹ دار انداز لائقِ دید ہے  :

        ’’اب فرمایئے !آ پ حق پر ہیں یا آپ کے دادا اور وہ آپ کے جدِ اعلیٰ بحر ا لعلوم دیکھیں تو آپ کیسے بات کے دھنی ہیں کہ اپنے بزرگوں پر بھی کوئی فتویٰ لگاتے ہیں یا نہیں یا یہ عنایت ہم غربا اور ائمہ و علما پر ہے۔ ‘‘ (7)

        اسی طرح علما کی بارگاہ کے بے ادب و گستاخ افراد پر کس طرح طنز کے ہلکے ہلکے نشتر چلائے ہیں :

        ’’ اے مدعیانِ علم و تہذیب و ادب علما کی شان میں گستاخ نہ بنو،   انھیں اپنے پر قیاس نہ کرو۔ ‘‘ (8)

        مفتیِ اعظم علامہ مصطفیٰ رضا نوریؔ بریلوی کے یہاں جملہ اقسامِ نثر کے تمام خوب صورت نمونے موجود ہیں۔  یہاں مزید ایک اقتباس خاطر نشین کیجیے:

        ’’اللہ اﷲ !اہل اﷲ کی زندگی اﷲ تبارک و تعالیٰ کی اعلا نعمت ہے۔  سبحان اﷲ! انھیں نفوسِ قدسیہ طاہرہ کے قدم کی برکت سے وہ عقدۂ لاینحل چٹکی بجاتے حل ہو جاتے ہیں جنھیں قیامت تک کبھی بھی ناخنِ تدبیر نہ کھول سکے جس سے کیساہی کوئی عقیل،  مدبّر ہو،  حیران رہ جائے،  کچھ نہ بول سکے،  جسے میزانِ عقل میں تول نہ سکے،  اﷲ اکبر! ان کی سیرت،  ان کی صورت،  ان کی رفتار،  ان کی گفتار،  ان کی ہر روش،  ان کی ہر ادا،  ان کا ہر ہر کردار،  اسرارِ پروردگار عز مجدہٗ کا ایک بہترین مرقع اور بولتی تصویر ہے کہ یہ انفاسِ نفیسہ مظہرِ ذاتِ عُلیا وصفاتِ قدسیہ ہوتے ہیں۔ ‘‘ (9)

        علاوہ ازیں اس طر ح کی درجنوں نادر مثالیں مفتیِ اعظم حضرت نوریؔ بریلوی کے مکتوبات،  تصنیفات،  تالیفات،  حواشی اور فتاوائے مصطفویہ کے سیکڑوں صفحات پر جابہ جا جلوہ افروز ہیں جن سے آپ کی اعلا ترین ادبیت آشکار ہوتی ہے۔

        ذیل میں آپ کی مختلف تصنیفات و تالیفات سے بلا تبصرہ چند ادبی جواہر پارے پیش کیے جاتے ہیں جن میں اعلا ترین نثر کے نمونے،  مسجع و مقفا جملے اور روزمرہ محاورات کے استعمال ملتے ہیں ان مثالوں سے واضح ہوتا ہے کہ ان میں مفتیِ اعظم علامہ مصطفیٰ رضا نوریؔ بریلوی کے قلم نے تازگی و طرفگی کے گلہائے رنگا رنگ کھلائے ہیں  :

        ’’حمد کی جان اس مالکِ عرش و فرش پر قربان۔  جس نے صدق و حق کو پسند کیا اور اسے عزت دی اور اس سے اپنی حمد فرمائی کہ فرمایا۔  من اصدق من اﷲ قیلا۔ اور فرمایا۔  ومن اصدق من اﷲ حدیثا۔ اور ارشاد ہوا۔  واﷲ یقول الحق و یہدی السبیل۔ اور کذب و باطل کو سخت مبغوض رکھا اور کذابوں پر لعنت بھیجی اور ان پر اپنا غضب اتارا کہ فرمایا۔ لعنت اﷲ علیٰ الکاذبین۔ حق کو باطل پر ہمیشہ غلبہ عطا فرمایا حق گو،  راست بازوں کا منہ اجالا اور جھوٹے کذابوں،  دروغ بافوں،  ناپاکوں کا منہ کالا کیا جس نے ہمیں یہ پیارا پیارا روح افز ا جاں فزا مژدہ سنایا۔  قل جاء الحق وزہق الباطل ان الباطل کان زہوقا۔ تم فرما دو ! حق آیا اور باطل بھاگا اور باطل تو بھاگنے ہی کو تھا اور ہزاروں صلاۃ و لاکھوں تسلیمات کروروں تحیات زاکیات کی نچھاور اس کے مقدس رسول حبیب و محبوب،  طالب و مطلوب،  دانائے کل غیوب،  صادق و مصدوق صلی اللہ تعالیٰ علیہ و سلم پر جنھوں نے فرمایا۔ الصدق نجی والکذاب یہلک سچ نجات دیتا ہے اور کذب ہلاکت کرتا ہے پھر ان کی آل و اصحاب پر جنھوں نے امتیازِ  حق و باطل کے لیے جان توڑ کوششیں فرمائیں اور دودھ کا دودھ پانی کا پانی کر دیا۔ ‘‘(10)

٭

        ’’ہاں تکفیر کرنے والے ان کے نزدیک خطاکار ہیں۔  قصور وار ہیں۔  مجرم ہیں گنہ گار ہیں۔  ان کے خیال میں کفر کرنا کفر بکنا کچھ عیب نہیں کافر کہنا عیب ہے،  جب تو کفر بکنے والوں کے طرف دار ہیں۔  اور تکفیر کرنے والوں سے بر سرِ پیکار ہیں۔  کوئی کہتا ہے صاحب ان کے یہاں کفر کی مشین ہے جس میں رات دن کفر کے فتوے ڈھلتے ہیں۔ کوئی کہتا ہے اجی ساری دنیا کافر ہے بس یہ مسلمان ہیں۔  یہ بھی کافر وہ بھی کافر سب کو کافر کیے ڈالتے ہیں کوئی کہتا ہے یہ سب کو کافر کہتے ہیں انھوں نے اسلام کا دائرہ تنگ کر دیا ہے بڑے تنگ نظر ہیں،  بہت تنگ خیال ہیں۔ ‘‘(11)

٭

        ’’یہ بے ادب و بے تہذیب،  مدعیانِ تہذیب و ادب، علما پر بے تہذیبی کا الزام لگاتے ہیں اور بے ادبی کا منہ آتے ہیں۔  کہ یہ لوگ گالیاں سناتے ہیں۔  مخلوقِ خدا کو ناحق ستاتے ہیں۔  بہت سختیاں برتتے ہیں۔  نہایت شدتیں کرتے ہیں۔  ان کے اعتراض علما تک ہی نہیں رہتے بل کہ اﷲ ورسول تک جاتے ہیں،  علما ہی ان کی گندی گھنونی گالیوں سے ایذا نہیں پاتے ہیں بل کہ یہ کہہ کر اﷲ ورسول تک ایذا پہنچاتے ہیں علما کیا فرماتے ہیں جنھیں یہ گالیاں بتاتے ہیں۔  بے تہذیبی ٹھہراتے ہیں۔  علما تو وہی کہتے ہیں جو قرآن و حدیث انھیں سکھاتے ہیں۔  وہ اگر کافر کہتے ہیں تو اﷲ و رسول نے کافر فرمایا۔ ‘‘(12)

٭

        ’’اگر اس قسم کی آیات و احادیث لکھوں تو دفتر درکار ہے۔ اور مدِ نظر اختصار ہے۔   اور ہے یہ کہ    ع

در خانہ اگر کس ست یک حرف بس ست

        اور معاند کے لیے اوراقِ سماوات و ارض کے شواہد ناکافی۔ غرض اتنا تو بفضلہٖ تعالیٰ ہر ادنا عقل والے پر روشن ہو گیا کہ علمائے کرام متخلق با خلاق اﷲ المنان ہیں۔  ہر طرح اس کے اور اس کے رسول کے تابعِ فرمان ہیں۔  اور یہ ان کے دشمن اعدائے دین و مذہب و متبع خطوٰتِ شیطان ہیں۔  والعیاذ باﷲتعالیٰ۔  اے عزیز! یہ مسئلہ بھی ایسا ہے جس کے لیے دلائلِ فقیہہ درکار ہیں۔  اور اگر یہی اصرار ہے تو یہاں کب انکار ہے۔ ‘‘ (13)

٭

        ’’کیا اب بھی جوازِ مزامیر کا بے سُرا راگ گائے جاؤ گے؟۔  کیا اب بھی بے وقت کی راگنی الاپے جاؤ گے؟ حضور سلطان المشائخ کے فرمانِ ذی شان کے آگے سرِ تسلیم جھکاؤ۔  اور اپنے غلط و باطل کہے پر پشیماں ہو اور شرماؤ۔  کیا حضور نے مزامیر کو ناجائز،  حرام،  ممنوع و معصیت نہ فرمایا؟ کیا حضور نے ان کا معصیت ہونا غیر صوفیہ کے ساتھ خاص فرما دیا ؟ کیا خود صوفیہ کے لیے بار بار نہ فرما دیا کہ میں منع کر چکا ہوں ؟ انھوں نے بُرا کیا۔  نا مشروع کام کیا،  معصیت کی،  پھر یارب! اب وہ کون سے صوفی ہیں جو حضور سلطان المشائخ کے مریدوں سے بھی آگے ہیں اور ہوں بھی تو علی الاطلاق یہ کہنا کہ صوفیوں کے لیے مزامیر حلال ہیں کیوں کر برمحل ہو گا؟۔ ولاحول ولا قوۃ الا باﷲ العلی العظیم۔ (14)

٭

        ’’جو حکم انسانی قوت و طاقتِ  بشری،  وسعت واستطاعت سے باہر ہو وہ ہرگز حکمِ شریعتِ  مطہرہ نہیں،  جس حکم میں باقاعدہ اتلافِ جان و اہلاکِ نفس ہو وہ اس شرع مبین کا حکم نہیں یو ہیں جس حکم سے سوتے فتنے جاگیں فساد برپا ہوں وہ کبھی مقدس اسلام کا حکم نہیں ہوسکتا اب یہی خود دیکھ لیں یہاں اس وقت حکمِ جہاد میں تکلیف مالایطاق ہے یا نہیں ؟ اس میں فائدہ ہے یا مضرت ؟ جانوں کی بلاوجہ ہلاکت یا حفاظت،  فتنہ و فساد کی اشارت ہے یا اقامت ؟  اس میں مسلمانوں کی عزت ہے یا ذلّت؟ یہ حکم قبل از وقت ہے یا خاص وقت پر؟ ان امور پر غور کرنے کے بعد مسئلہ بالکل صاف ہو جائے گا،  اصلا خفا نہ ہو گا کیا نہتوں کو ان سے جو تمام ہتھیاروں سے لیس ہوں لڑنے کا حکم دینا سختی نہیں ؟ اور تکلیفِ فوق الوسعت نہیں ؟ کیا ایسوں کو جو ہتھیار چلانا بڑی بات ہے اٹھانا نہیں جانتے،  جن کے وہم میں بھی کبھی نہیں گذرا کہ بندوق کس طرح اٹھاتے،  تلوار کیوں کر تھامتے،  مارتے،  طمنچہ کیسے چلاتے ہیں،  جنہوں نے کبھی جنگ کے ہنگامے،  لڑائی کے  معرکے خواب میں نہ دیکھے ہوں انھیں توپوں کے سامنے کر دینا کچھ زیادتی نہیں ؟ کیا ایسوں سے میدان کرانا اور ان کی جانیں مفت گنوانا عبث نہیں ؟ کیا یہ فتنہ و فساد نہیں کہ مسلمانوں کی عزیز اور قیمتی جانیں مفت ضائع ہوں ؟ اس سے بڑھ کر اور فتنہ اور اس سے زائد فساد فی الارض کیا ہو گا؟۔ ‘‘(15)

٭

        ’’ہم کہتے ہیں اگر معاذ اﷲ شریف سے بھی کوئی کفر بھی ہو گیا ہوتا۔  تو ان کے کفر کا جب کہ امن پر کوئی اثر نہ ہوتا حج کیوں ناروا ہوتا؟  اب جب کہ بفضلہٖ تعالیٰن سے صدورِ کفر تو کفر،  فسق بھی بہ طریقِ ثبوتِ شرعی ثابت نہیں اور امن موجود، جوازِ حج کیوں مفقود؟ اتنی سی عبارت میں اکاذیبِ مضمون نگار کا انبار، اور اس کے افتراءت کا طومار۔ ‘‘ (16)

٭

        ’’مضمون نگار صاحب یہ سمجھے کہ اتنی خیانتیں کر کے اب یہ عبارت ان کے مقصود کی مو ید ہو گئی۔ مگر خدا کا دھرا سرپر اُنھیں نصیبوں سے کیا خبر۔  عبارت اتنی کاٹ چھانٹ،  لَوٹ پَوٹ پر بھی ان کے مقصود کے خلاف ہی ہے اور ان کی کج فہمی،  ناسمجھی کا پکار پکار کر اعلان کر رہی ہے،  اس کا بیان ہم آگے کریں گے پہلے مضمون نگار کی چوریاں بتا دیں۔  سینہ زوریاں دکھا دیں۔ ‘‘(17)

٭

        ’’تحریفیں بھی کیں،  خیانتیں بھی کیں،  مطلب خبط کرنے کو اوپر کی عبارت نیچے،  نیچے کی اوپر بھی کی،  یہ سب کچھ ہوا مگر للہ الحمد! وہ ستم زدہ عبارت وہی فرماتی رہی جو اس ستم سے پہلے فرما رہی تھی،  یہ اپنی کج فہمی سے اسے اپنے حسبِ منشا بن جانا سمجھے اور اسے نقل کر لائے اور نہ جانا کہ اس میں اب بھی ان کے لیے زہرِ ہلاہل سمِ قاتل ملا ہوا ہے۔ ‘‘(18)

٭

        ’’ہر مسلمان مظلوم کی حمایت کی جائے گی بلکہ ہر مظلوم انسان کی حالت دل دکھاتی اور خواہ نخواہ حمایت پر لاتی ہے پھر یہ کہ حمایت ہمدردی ہی سے ہوتی ہے سلطان کو سلطان مان کر حمایت کی تو ان کی ہم دردی ہے۔  انھیں معزول کیا یہ بھی ان کی ہم دردی ہے۔ کہ وہ اپنے ملک سنبھال نہ سکے لہٰذا انھیں گوشۂ عافیت میں بٹھایا اپنے آپ ملک کا انتظام کیا اگر ہم دردی نہ ہوتی یہ ترک اﷲ تعالیٰ انھیں اپنی ہزاروں نعمتوں سے نوازے اور ان کی تمام جائز مرادیں پوری فرمائے اپنے آپ کیوں زحمتیں گوارا کرتے کیوں مشقتیں اٹھاتے کس لیے مصیبتیں جھیلتے کا ہے کو تکلیفیں برداشت کرتے سلطان کے ہم درد نہ ہوتے تو ان کا سار ا ملک معاذاﷲ !سارا ملک غیروں کے قبضہ میں چلا جاتا ان کے کان پر جوں نہ رینگتی وہ خود ان کے ہاتھ میں پڑ جاتے انھیں خیال بھی نہ ہوتا کہ کیا ہوا؟ کیوں ہوا ؟ وہ ہم درد تھے جب ہی تو انھیں درد ہو ا ان کے ملک کی حمایت و حفاظت ان کی حمایت و حفاظت ہے۔ ‘ ‘(19)

        متذکرۂ بالا مثالوں سے ثابت ہوتا ہے کہ مفتیِ اعظم حضرت نوریؔ بریلوی قدس سرہ کی نثر اعلا پایے کی ہے۔ آپ کے قلم نے تازگی و طرفگی کے گلہائے رنگا رنگ کھلائے ہیں۔ آپ کی نثر میں مسجع و مقفا عبارتیں بھی ہیں،  سیدھے سادھے جملے بھی۔  تشبیہات و استعارات بھی ہیں اور صنعتوں کے گل بوٹے بھی۔  روزمرہ محاورات کا استعما ل بھی ہے،  اور ایجاز و اختصار اور متانت و سنجیدگی بھی۔  اور کہیں کہیں عبارت کی طنز و نشتریت نے آپ کی نثر کو اور بھی لطیف بنا دیا ہے۔  تصنیفاتِ نوریؔ کے مطالعہ کے بعد آپ کو مایۂ ناز ادیب اور بلند پایہ انشاپرداز قرار دینا غیر مناسب نہ ہو گا۔

حواشی

(1) مصطفیٰ رضا نوریؔ بریلوی، علامہ:الملفوظ، فیاض الحسن بک سیلر، کانپور، ص20

(2)مصطفیٰ رضا نوریؔ بریلوی، علامہ:مقدمہ الاستمداد، مرکزی مجلسِ رضا، لاہور، ص2/3

(3)احمد رضا بریلوی، امام:مقدمہ دوام ا لعیش فی الائمۃمن القریش، رضا اکیڈمی، ممبئی، ص 34

(4)مصطفیٰ رضا نوریؔ بریلوی، علامہ:مقتلِ کذب و کید، مطبع بریلی، ص 12

(5)مصطفیٰ رضا نوریؔ بریلوی، علامہ:فتاویٰ مصطفویہ، اختر رضا بک ڈپو،  بریلی، ج 1، ص50

(6)مصطفیٰ رضا نوریؔ بریلوی، علامہ:طرق الہدیٰ والارشاد، ریڈمی، ممبئی، ص23

(7)مصطفیٰ رضا نوریؔ بریلوی، علامہ:سوراخ در سوراج، رضا اکیڈمی، ممبئی،  ص76/77

(8)مصطفیٰ رضا نوریؔ بریلوی، علامہ:طرق الہدیٰ والارشاد، مطبع بریلی، ص52

(9)مصطفیٰ رضا نوریؔ بریلوی، علامہ:الملفوظ، فیاض الحسن بک سیلر، کانپور، ص18

(10)احمد رضا بریلوی، امام:مقدمہ دوام العیش فی الائمۃ من القریش،  رضا اکیڈمی، ممبئی، ص11

(11)مصطفیٰ رضا نوریؔ بریلوی، علامہ:القسورۃ علیٰ ادوار الحمرۃ، رضا اکیڈمی، ممبئی، ص18

(12)مصطفیٰ رضا نوریؔ بریلوی، علامہ:القسورۃ علیٰ ادوار الحمرۃ، رضا اکیڈمی، ممبئی، ص35/36

(13)مصطفیٰ رضا نوریؔ بریلوی، علامہ:القسورۃ علیٰ ادوار الحمرۃ، رضا اکیڈمی، ممبئی، ص43/44

(14)مصطفیٰ رضا نوریؔ بریلوی، علامہ:مسائلِ سماع، رضا اکیڈمی، ممبئی، ص10/11

(15)مصطفیٰ رضا نوریؔ بریلوی، علامہ:طرق الہدیٰ والارشاد، رضا اکیڈمی ممبئی،  ص7/8

(16)مصطفیٰ رضا نوریؔ بریلوی، علامہ:حجۃ واہرہ، رضا اکیڈمی ممبئی،  ص19/20

(17)مصطفیٰ رضا نوریؔ بریلوی، علامہ:حجۃ واہرہ، رضا اکیڈمی ممبئی،  ص29/30

(18)مصطفیٰ رضا نوریؔ بریلوی، علامہ:حجۃ واہرہ، رضا اکیڈمی ممبئی،  ص32/33

(19)احمد رضا بریلوی، امام:مقدمہ دوام العیش فی الائمۃ من القریش،  رضا اکیڈمی، ممبئی، ص38

٭٭٭

د: سیاسی خدمات

اسلام میں دین وسیاست جدا نہیں ہیں۔  علمائے حق پیغمبروں کے وارث اور جانشین ہونے کی بنا پر اسلامی سیاست کے وارث و جانشین بھی ہیں۔  لیکن اس کا یہ مطلب نہیں کہ ہر دور یاکسی بھی حکومت و ریاست میں عہدہ کے حصو ل،  جاہ و حشم کے لالچ،  اپنے مطلب کی خاطر دنیاوی عزت و شہرت اور نام وری کے لیے سیاست میں ملوّث ہوتے رہیں۔  جیسا کہ آج کل سیاست داں دنیا بھر میں کرتے پھر رہے ہیں۔

        مختلف ادوار اور حکومتوں میں مسلم سیاست کا طریقۂ کار بھی مختلف ہوتا ہے۔  لیکن اگر وہ مردِ مومن ہے تو حق و صداقت اور سچائی کا دامن نہیں چھوڑتا۔  دین و شریعت کے راستے سے کبھی نہیں ہٹتا۔  وہ سیاست میں حصہ لیتا بھی ہے تو اپنی قوم کی فلاح و بہبود اور دین و شریعت کے تحفظ و بقا کی خاطر اور اگر وہ دین و مذہب سے دور رہ کر سیاست میں سرگرمِ عمل ہو تو وہ سیاست نہیں بل کہ چنگیزی کرتا ہے۔

        فی زمانہ باطل پرستوں نے اسلامی سیاست کو دنیوی اور کفری سیاست میں تبدیل کر کے رکھ دیا ہے۔ نام نہاد مسلم سیاست داں سیاست کا ڈھونگ رچا کر ایک طرف اسلام اورمسلم قوم کو بدنام کر رہے ہیں تو دوسری طرف موقع فراہم ہونے پر ان کے جان و مال،  عزت و آبرو کی بربادی اور پامالی کا سامان بھی پیدا کر رہے ہیں۔  مفتیِ اعظم علامہ مصطفیٰ رضا نوریؔ بریلوی نے ان نام نہاد سیاست دانوں کی بساطِ سیاست الٹ کر رکھ دی،  مطالعہ و تحقیق سے ظاہر ہوتا ہے کہ آپ کی سیاسی خدمات،  علمی خدمات ہی کی طرح وسعت رکھتی ہیں۔ سرِ دست یہاں آپ کی سیاسی خدمات پر مختصراً روشنی ڈالنا مقصود ہے۔

        مفتیِ اعظم علامہ مصطفیٰ رضا نوریؔ بریلوی اپنے وقت کے سیاسی بصیرت و بصارت کے حامل،  دور اندیش،  تہذیبِ اخلاق،  سیاستِ مُدن اور تدبیرِ منزل سے آشنا فرد کہلائے۔  سیاسی اور ملی معاملات میں اعتدال پسندی،  تدبر و تحمل،  سلامت روی اور مثبت غور و فکر میں آپ نمایاں مقام رکھتے ہیں۔  آپ کے سیاسی افکار و نظریات کو سمجھنے کے لیے آپ کی درج ذیل تصانیف کا مطالعہ معلومات بخش ہو گا۔

        (1)   طرق الہدی والارشاد الیٰ احکام الجہاد  (1341ھ)

        (2)   فصل الخلافۃ یعنی سوراخ در سوراج  (1341ھ)

        (3)   الطاری الداری لہفوات عبدالباری  (1339ھ)

        (4)   مقدمہ ’’دوام العیش فی ائمۃ من القریش‘‘ (1334ھ)

        (5)   فتاویٰ مصطفویہ،  3؍جلدکے مختلف فتاویٰ۔

شدھی تحریک

تقسیمِ ہند سے پہلے شدھی تحریک نے جس طرح فتنہ انگیزی پھیلائی اور مسلمانوں پر جس انداز سے ظلم و ستم کے پہاڑ توڑے وہ کسی سے پوشیدہ نہیں ہے۔  زبردستی مسلمانوں کا شدھی کرن کیا جاتا،  اور روپیوں کا لالچ دے کر ان کے دلوں میں اسلام کے خلاف نفرت کے جذبات بھڑکائے جاتے۔  بوالہوس اور زرپرست انسان ان کے دامِ فریب میں آ کر اپنے دین و ایمان کا سودا کر ڈالتے۔  یہ سلسلہ اس قدر بڑھا کہ شہر شہر،  قریہ قریہ اس کی وبا عام ہو گئی اور نوبت یہاں تک پہونچی کہ اہلِ ہنود ببانگِ دہل اعلان کرنے لگے کہ چار کروڑ مسلمانوں کو شاشتر اور ششتر (تلوار)کے ذریعہ شدھ کیا جائے گا۔  ساتھ ہی ایسے نعرے بھی لگاتے جسے سُن کر مسلمانوں کا خون کھول جاتا۔ اور اپنی تقریروں میں بارہامسلمانوں کو کھٹمل،  آبِ زم زم کو کیچڑ اور گندگی،  وضو کو ڈھکوسلہ،  رکوع کو اچک بلّی،  اور سجدہ کو مُرغا بتا کر مسلمانوں کی دل آزاری کرنا ان کا شیوہ تھا۔ 

        غرض یہ کہ ایک سوچی سمجھی اسکیم اور منظم سازش کے تحت مسلمانوں کو جبراً مُرتد کیا جا رہا تھا،  قتل و غارت گری اور خوں ریزی کا بازار گرم تھا یہ قتل عام اس لیے تھا کہ نہ رہے بانس اور نہ بجے بانسری ۔۔ اس مذموم مقصد میں اہلِ ہنود اپنی گندی اور شاطرانہ سیاسی چالوں کے پیشِ نظر کامیاب ہو رہے تھے۔  مگر وہ ذات مفتیِ اعظم علامہ مصطفیٰ رضا نوریؔ بریلوی کی تھی کہ بلند حوصلگی اور پختہ عزائم کے ساتھ جان و مال کی پروا کیے بغیر میدانِ عمل میں آ کر میلوں بھوکے پیاسے چل کر تبلیغِ دین کی۔  مشرکوں کے دامِ فریب سے مسلمانوں کو بچانے کی سعیِ بلیغ فرمائی اور جو مسلمان دھوکہ میں آ کر مرتد ہو گئے تھے انہیں ارتداد سے نکال کر توبہ کرائی اور دوبارہ مسلمان کیا۔ حضرت نوریؔ بریلوی اور ان کے رفقائے کار نے شدھی تحریک کے خلاف جس مجاہدانہ طرزِ عمل کا مظاہرہ کیا اس کے شواہد جماعت رضائے مصطفیٰ کی فائلوں میں اب بھی محفوظ ہیں۔ (ملخصاً1)

ضبطِ ولادت(نس بندی)

ہندوستان میں ضبطِ ولادت کا مسئلہ بھی کچھ کم اہمیت کا حامل نہیں اس مسئلہ پر علما دو گروہوں میں منقسم ہو گئے تھے ایک گروہ مسئلہ اجتہادی کہہ کر اس کے جواز کے حق میں تھا جس کی نمائندگی دارالعلوم دیوبند کے مہتمم قاری طیب صاحب فرما رہے تھے اور دوسرا گروہ عدمِ جواز کے حق میں تھا جس کی زمامِ  قیادت مفتیِ اعظم علامہ مصطفیٰ رضا نوریؔ بریلوی کے ہاتھ میں تھی نس بندی کے اس رستا خیز عہد میں جب کہ حکومتِ  ہند کی طرف سے 5؍ جون 1976ء کو ایمر جنسی نافذ کر دی گئی،  حکومت کے خلاف زبان کھولنا انتہائی سنگین جرم تھا اس عہد میں ’’میٖسا ‘‘ نامی قانون کے تحت گرفتاریاں بھی زورو شور سے ہو رہی تھیں۔ لیکن حکومتِ وقت کے جبر و ظلم اور تشدد کی پروا نہ کرتے ہوئے مفتیِ اعظم علامہ مصطفیٰ رضا نوریؔ بریلوی نے قلمی جہاد فرمایا اور ظالم و جابر حکمراں کے سامنے حق گوئی کا مظاہرہ کیا،  جب آپ سے فیمیلی پلاننگ(نس بندی) کے بارے میں سوا ل ہوا تو آپ نے جواباً ارشاد فرمایا:

        ’’ کہ نس بندی حرام ہے، حرام ہے، حرام‘‘۔ 

        مذکورہ فتویٰ جناب ساجد علی خاں مہتمم دارالعلوم مظہرِ اسلام بریلی نے 3 ؍ رمضان المبارک 1396ھ/30؍ستمبر1976ء کو شائع کیا۔ اس کی اشاعت کے بعد فتوا میں تبدیلی کا مطالبہ کیا گیا تو مفتیِ اعظم علامہ مصطفیٰ رضا نوریؔ بریلوی نے فرمایا :

         ’’ ہمارے یہاں فتویٰ نہیں بدلا جاتا ہے ضرورت پڑی تو حکومت بدل دی جائے گی ‘‘۔

        چناں چہ ہوا بھی ایساہی کہ الیکشن میں حکمراں پارٹی ’’کانگریس ‘‘ کو بُری طر ح شکستِ فاش اور ناکامی کا منہ دیکھنا پڑا اور جنتا پارٹی کی حکومت بن گئی۔ (2)

تحریکِ جہاد

اسلامی فرائض میں جہاد اہم ترین فریضہ ہے۔  لیکن یہ اسی وقت فرض ہو گا جب اس کی شرائط پائی جائیں۔ اس کی اہم شرائط میں سلطانِ اسلام اور طاقت و قوت کا موجود ہونا انتہائی ضروری ہے۔ امام احمد رضا محدثِ بریلوی کے بہ قول    :

        ’’مفلس پر اعانتِ مال نہیں، بے دست و پا پر اعانتِ اعمال نہیں،   لہٰذا مسلمانانِ ہند پر حکمِ جہاد و قتال نہیں۔ ‘‘  (3)

        تحریکِ جہاد کا نعرہ مسٹر موہن داس کرم چند گاندھی اور ان کے ہم نواؤں نے یہ باور کر کے لگایا تھا کہ ہم ملک کو انگریزوں کی غلامی سے آزاد کرائیں گے چاہے مال کے ذریعہ چاہے جان کے ذریعہ۔  مسلمان چوں کہ فطرتاً جذباتی ہوتے ہیں اس لیے انہوں نے فوراً نعرۂ جہاد کو قبول کر لیا کیوں کہ کہا یوں گیا تھا کہ یہ جہاد انگریزوں کے خلاف ہے حال آں کہ اس کی حقیقت اس کے بر عکس تھی مسٹر گاندھی بے دست و پا مسلمانوں کو در پردہ مفلس و قلاش بنانا چاہتے تھے اور ان کے پاس جو مال و متاع تھی وہ جہاد کی نذر ہو جائے تاکہ قومِ مسلم ایک قوت بن کر نہ ابھر سکے۔

        مفتیِ اعظم علامہ مصطفیٰ رضا نوریؔ بریلوی جہاد کے مخالف نہ تھے مگر ایسی بے سروساما نی،  مفلسی اور تنگ دستی کی حالت دیکھ کر آپ نے مخالفتِ جہاد کی شرعی کوشش کی چوں کہ جہاد کی شرائط اس وقت ہندوستان میں نہیں پائی جاتی تھی آپ نے تحریر فرمایا  :

        ’’جو حکم انسانی قوت و طاقتِ  بشری،  وسعت واستطاعت سے باہر ہو وہ ہرگز حکمِ شریعتِ  مطہرہ نہیں،  جس حکم میں باقاعدہ اتلافِ جان و  اہلاکِ نفس ہو وہ اس شرع مبین کا حکم نہیں، یو ہیں جس حکم سے سوتے فتنے جاگیں فساد برپا ہوں وہ کبھی مقدس اسلام کا حکم نہیں ہوسکتا اب یہی خود دیکھ لیں یہاں اس وقت حکمِ جہاد میں تکلیف مالایطاق ہے یا نہیں ؟ اس میں فائدہ ہے یا مضرت ؟ جانوں کی بلاوجہ ہلاکت ہے یا حفاظت،  فتنہ و فساد کی اشارت ہے یا اقامت ؟ اس میں مسلمانوں کی عزت ہے یا ذلّت؟ یہ حکم قبل از وقت ہے یا خاص وقت پر؟ ان امور پر غور کرنے کے بعد مسئلہ بالکل صاف ہو جائے گا،  اصلا خفا نہ ہو گا کیا نہتوں کو ان سے جو تمام ہتھیاروں سے لیس ہوں لڑنے کا حکم دینا سختی نہیں ؟ اور تکلیفِ فوق الوسعت نہیں ؟ کیا ایسوں کو جو ہتھیار چلانا بڑی بات ہے اٹھانا نہیں جانتے،  جن کے وہم میں بھی کبھی نہیں گذرا کہ بندوق کس طرح اٹھاتے،  تلوار کیوں کر تھامتے،  مارتے،  طمنچہ کیسے چلاتے ہیں،  جنہوں نے کبھی جنگ کے ہنگامے،  لڑائی کے معرکے خواب میں نہ دیکھے ہوں انھیں توپوں کے سامنے کر دینا کچھ زیادتی نہیں ؟ کیا ایسوں سے میدان کرانا اور ان کی جانیں مفت گنوانا عبث نہیں ؟ کیا یہ فتنہ و فساد نہیں کہ مسلمانوں کی عزیز اور قیمتی جانیں مفت ضائع ہوں ؟ اس سے بڑھ کر اور فتنہ اور اس سے زائد فساد فی الارض کیا ہو گا؟‘‘(4)

        مفتیِ اعظم علامہ مصطفیٰ رضا نوریؔ بریلوی ہرگز ہرگز جذبۂ جہاد کو سردکرنا نہیں چاہتے تھے انہوں نے ایک باخبر مفتی اور فقیہہ کی حیثیت سے شرعی حکم صادر فرمایا،  اس میں نہ انگریزوں کی طر ف داری مقصود تھی نہ ہی خوشامد، وہ تو ان کے سخت مخالف تھے ان کے دولت کدہ پر بڑے بڑے سربراہانِ مملکت آئے مگر آپ نے ملاقات تک نہ کی اور وہ خود ہی بغیر ملاقات کے واپس چلے گئے۔  آ پ نے نام نہاد تحریکِ جہاد کا رد کرتے ہوئے شریعتِ مطہرہ کا واضح حکم یوں بیان کیا  :

        ’’یہاں کے نہتے بے سروپا جنگ سے ناواقف مسلمان،  ان پر خود سلطانِ اسلام جس کے پاس سامانِ حرب بھی ہو اور باقاعدہ فوج بھی وہ اگر یہ سمجھے کہ کفار زائد ہیں یہ فوج و سامان انہیں کافی نہ ہو گا تو ایسی حا لت میں اسے ان سے پہل ناجائز ہے۔ ‘‘  (5)

        واضح ہو کہ جس دور میں مسلمانوں کو جہاد کے لیے اکسایاجا رہا تھا، اس وقت جہاد کی شرائط عنقا تھیں۔  اور مسلمان مالی اور دیگر لحاظ سے انتہائی کمزور اور بے دست و پا تھے،  جب کہ دشمن انتہائی طاقت ور اور ہتھیاروں سے لیس ، زبردست کے مقابلے میں کمزور کو پیش کرنا خود کو موت کے منہ میں ڈالنا نہیں تو اور کیا ہے ؟ مسٹرگاندھی کے مشوروں سے اس عہد کے بہت سارے مسلمان لیڈروں نے قرآن و حدیث کے حوالے سے ’’جہاد جہاد‘‘ کا نعرہ دیا تاکہ مسلمان قریب سے قریب تر ہو جائیں،  ایک طرف گاندھی نے اخبارات میں شائع کرنا شروع کر دیا کہ میرا مذہب کشت و خون کو روا نہیں رکھتا ہم تو’’ اہنسا کے پُجاری ‘‘ہیں اور ’’عدم تشدد‘‘ پر یقین رکھتے ہیں۔  تو دوسری طرف انگریزوں کو مرعوب کرنے بل کہ درپردہ اسلام کو بدنام کرنے کے لیے یہ پالیسی اختیار کی کہ مسلمان ہر لمحہ جہاد جہاد پکارتے رہیں۔  مفتیِ اعظم علامہ مصطفیٰ رضا نوریؔ بریلوی پس پردہ سازش سے نقاب  اُٹھاتے ہوئے یوں فرماتے ہیں  :

        ’’اس وقت یہ جہاد بھی اسی دشمنِ اسلام و مسلمین گاندھیِ بد دین کا حکم ہے۔  جیسے پہلے ہجرت سے نقصان پہونچائے،  مسلمانوں کو خانماں برباد کرائے،  ان کی بیش بہا جائداد یں اور اموال کوڑیوں میں بکوائے،  سب کے کوڑے کرائے،  غریب مسلمانوں میں اتنا روپیہ کہاں تھا،  یوں اپنے ہندو بھائیوں کو دلوائے،   یوہیں یہ مسئلہ جہاد نکال کر اس نے چاہا کہ مسلمانوں کو جن کی روح بالکل فنا ہو چکی ہے کچھ یوہیں سی رمق باقی ہے یہ بھی کیوں رہ جائے بالکل تباہ کرائے۔ ‘‘ (6)

        مفتیِ اعظم علامہ مصطفیٰ رضا نوریؔ بریلوی نے ہر اس تحریک کا رد کیا جو اسلامی اصولوں اور بنیادوں سے ہٹ کر چلی،  جس تحریک نے بہ نامِ اسلام اسلامی اصولوں سے کھلواڑ کیا اس کی بھی آپ نے سختی سے تردید فرمائی اور مسلمانوں کو آگاہ کرتے ہوئے تنبیہاً تحریر فرمایا  :

        ’’کاش اب بھی سنبھلو !اور ان گندم نما جو فروشوں سے بھاگو ان کی تو دلی خواہش ہے کہ تم مشقت میں پڑو۔  قد بدت البغضا من افواہہم وما تخفی صدورہم اکبر قد بینا الاٰیات ان کنتم تعقلون۔ ‘‘ ۔۔ ’’خدا کے لیے ہماری اس یا د دہانی سے فائدہ اٹھایئے اور خلقِ خدا کو راہِ راست پر لایئے ہم نے اپنا فرض ادا کر دیا ہے اور اب آپ اپنا فر ض ادا کیجیے۔ ‘‘  (7)

        مفتیِ اعظم علامہ مصطفیٰ رضا نوریؔ بریلوی کے دل میں اسلام کا درد اور مسلمانوں کے کامیاب مستقبل کی فکر تھی آپ کی سوچ مسلمانوں کے مستقبل کو تاب ناک اور روشن بنانے کی تھی،  انہوں نے اپنی سیاسی بالغ نظری اور دوراندیشی کو بروئے کار لاتے ہوئے اس دور میں چلنے والی سیاسی تحریکات کا صرف ظاہری خد و خال نہیں دیکھا بل کہ اس کا گہرائی سے مشاہدہ کرنے کے بعد ملّتِ اسلامیہ کی صحیح رہِ نمائی فرمائی۔

تحریکِ خلافت

1919ء میں خلافت کا مسئلہ پیش آیا تو اس وقت بھی آپ نے امتِ مسلمہ کی صحیح قیادت اور رہِ نمائی کا فریضہ انجام دیا،  امام احمد رضا محدثِ بریلوی کی تصنیف ’دوام العیش فی ائمۃ من القریش 1334ھ‘ پر آپ نے ایک جامع، پُر مغز اور معلومات افزا مقدمہ تحریر فرمایا جو آ پ کی اعلا ترین سیاسی بصیرت و بصارت کا منہ بولتا نمونہ ہے۔ 

        مفتیِ اعظم علامہ مصطفیٰ رضا نوریؔ بریلوی نے تحریکِ خلافت کے حامیوں سے تین سوالات کیے جو ترکی کے سلطان عبدالحمید کو خلیفۂ شرعی تسلیم کرانے پر اصرار کرتے تھے،  ذرا ان سوالات کو ملاحظہ کیجیے اور مفتیِ اعظم حضرت نوریؔ بریلوی کی سیاسی سوجھ بوجھ اور بالغ نظری کے ساتھ ساتھ ان کے علم دین کا کمال بھی دیکھیے  :

        ’’(1) سلطان مراد کی معزولی کے بعد عبدالحمید خاں سلطانِ ترکی ہوئے اگر سلطان مراد کو خلیفہ تسلیم کیا جائے تو سلطان عبدالحمید پر کیا حکم لگایا جائے گا؟

        (2)   غازی مصطفیٰ کمال پاشا نے سلطان عبدالحمید خاں کو معزول کیا اگر واقعی عبدالحمید خاں خلیفہ تھے تو مصطفیٰ کما ل پا شا پر کیا حکم لگایا جائے گا ؟

        (3)   جب سلطان عبدالحمید خاں کی خلافت سے انکار کفر تھا تو جس نے اس کو معزول کیا اس پر تو اس سے بڑ ا فتویٰ لگنا چاہیے تھا مگر غازی مصطفیٰ کمال پاشا پر فتویٰ لگانے کی بجائے ان کو مبارک با دی کے تار بھیجے گئے ‘‘۔

        مفتیِ اعظم علامہ مصطفیٰ رضا نوریؔ بریلوی نے ارکانِ خلا فت سے یوں سوال کیا   :

        ’’کیا ان کو باغی و کافر کہا جائے گا جس طر ح شریفِ مکہ ملک الحجاز کو سلطان کی اطاعت سے سرتابی پر واجب القتل کا حکم لگایا جاچکا ہے۔ ‘‘

        آگے چل کر بڑے ناصحانہ انداز میں اصلاح کرتے ہوئے فرماتے ہیں  :

        ’’انسان کو چاہیے کہ بات کہنے اور کرنے سے پہلے اس کے قال و انجام پر نظر رکھے،  جس کا آخر حَسن ہو اسے اختیار کرے ورنہ نہیں، تیرہ سو برس کے اجتماعی اتفاقی مسئلہ میں اختلاف سوائے کشت و افتراقِ  بین المسلمین اور کیا تھا ؟ ترکوں کو اس سے کچھ فائدہ نہ ہوا ہاں ! اختلافِ مسلمین میں ایک اور اضافہ ہو گیا ‘‘۔ (8)

        تحریکِ خلافت کے زمانہ میں جو سب سے عجیب بات دیکھی گئی وہ یہ تھی کہ جو حضرات خلافتِ اسلامیہ کی حفاظت کی جد و جہد کر رہے تھے،  وہ اہلِ ہنود کی ہم نوائی کو احیائے خلافتِ اسلامیہ کے لیے ممد ومعاون سمجھ رہے تھے اور جوش و جذبات میں اسلامی شعائر کو چھوڑ کر شعائرِ کفر اپنا رہے تھے۔  چناں چہ اس زمانے میں مسلمانوں نے اپنی پیشانی پر قشقہ بھی لگوایا،  ہندو لیڈروں کی ارتھیوں پر کندھا بھی دیا،  ہندو لیڈروں کو مساجد میں منبرِ رسول (صلی اللہ علیہ و سلم ) پر بٹھایا،  اپنا ہادی،  اپنا رہِ بر اور پیشوا بنایا،  قرآنِ پاک کو مندروں میں لے جایا گیا وغیرہ۔

        یہاں یہ امر ملحوظِ خاطر رکھنا ضروری ہے کہ تحریکِ خلافت کا ظاہر یہی تھا کہ یہ سلطنتِ اسلامیہ اور خلیفۂ اسلام کی حفاظت و  صیانت کے لیے چلائی جا رہی ہے۔ جب کہ اس کا تحقیقی جائزہ لینے کے بعد یہ واضح ہوتا ہے کہ اس تحریک کے ہم نواؤں نے غیر مسلموں کے ساتھ جو دیرینہ تعلقات اور مراسم روا رکھے تھے۔  اس کا شریعتِ مطہرہ ہرگز اجازت نہیں دیتی یہی وجہ ہے کہ مفتیِ اعظم علامہ مصطفیٰ رضا نوریؔ بریلوی نے اس کا تعاقب کیا اور اس کے نقصانات سے اہلِ اسلام کو آگاہ کیا۔ یہاں یہ نہیں سمجھنا چاہیے کہ آپ ایک اسلامی تحریک کی مخالفت کر رہے تھے اور مسلمانانِ ترکی کی خیر خواہی کے جذبات کو سرد کر رہے تھے۔  ذیل کی تحریر چشم کشا اور سچائی کا اظہار کرتی ہوئی نظر آتی ہے   :

        ’’ سلطنتِ اسلام تو سلطنتِ اسلام ہے۔  سلطان تو سلطان ہیں۔  ہر فردِ مسلم کی خیر خواہی لازم ہے۔۔ الدین النصح لکل مسلم ۔۔ ارشادِ پاکِ  حضور صلی اللہ علیہ و سلم اس پر ناطق ہے۔ ‘‘ (9)

        مفتیِ اعظم علامہ مصطفیٰ رضا نوریؔ بریلوی ایک صاحبِ فکر و نظر،  صاحبِ بصیرت و بصارت اور مدبر سیاست داں تھے۔  جیسا کہ پہلے ہی عرض کیا گیا ہے کہ آپ کی سیاسی سوجھ بوجھ میں مذہبی اثرات اس قدر نمایاں تھے کہ آ پ نے دیگر ہم عصر بازی گرانِ سیاست کی طرح مذہب و ملّت کا سودا نہیں کیا،  بل کہ آپ نے ان سیاسی تحریکات کی زبردست مخالفت کی،  جن سے مذہبی اصولوں اور شرعِ مطہرہ پر ضرب پڑتی تھی۔  یہی وجہ ہے کہ آپ نے بعض ان تحریکات کا بھی تعاقب کیا جوبہ بظاہر مسلمانوں کی فلاح و بہبود کے لیے چلائی جا رہی تھیں۔  مگر جب اس کا قال اور انجام بہ نظرِ غائر دیکھا گیا تو وہ پس پردہ مسلمانوں کو نقصان اور خسارے میں ڈال کر مفلس و قلاش اور بے دست و پا بنا رہی تھیں۔  یہ مفتیِ اعظم کی تاب ناک اور پاکیزہ سیاسی فکر تھی کہ آپ نے ایسے ناگفتہ بہ حالات میں اپنے افکارِ عالیہ سے ملّتِ اسلامیہ کی حفاظت و صیانت کا فریضہ انجام دیا۔  چوں کہ آپ کی زندگی کا لمحہ لمحہ شرعی اصول و ضابطے کا آئینہ دار تھا، اور اسی کے مطابق آپ کے شب و روز بسر ہوتے تھے۔ یہی وجہ ہے کہ آپ کے سیاسی شعور اور افکار و نظریات کی بنیاد اسلامی افکار و خیالات سے مملو تھی۔

حواشی

(1)تفصیل کے لیے ملاحظہ کریں، تاریخِ جماعتِ رضائے مصطفیٰ :مولانا شہاب الدین رضوی، رضا اکیڈمی، ممبئی

(2)   حجاز : مفتی اعظم نمبر، دہلی 1990ء، ص106

(3)   احمد رضا بریلوی، امام:مقدمہ دوام العیش،  رضا ا ا اکیڈمی، ممبئی، ص108

(4)   مصطفیٰ رضا نوریؔ بریلوی، علامہ:طرق الہدیٰ والارشاد، رضا اکیڈمی، ممبئی، ص20/30

(5)   مصطفیٰ رضا نوریؔ بریلوی، علامہ:طرق الہدیٰ والارشاد، رضا اکیڈمی، ممبئی، ص31

(6)   مصطفیٰ رضا نوریؔ بریلوی، علامہ:طرق الہدیٰ والارشاد، رضا اکیڈمی، ممبئی، ص41

(7)   مصطفیٰ رضا نوریؔ بریلوی، علامہ:طرق الہدیٰ والارشاد، رضا اکیڈمی، ممبئی، ص42/44

(8)   احمد رضا بریلوی، امام:مقدمہ دوام العیش، رضا اکیڈمی، ممبئی، ص11

(9)   مصطفیٰ رضا نوریؔ بریلوی، علامہ:طرق الہدیٰ والارشاد، رضا اکیڈمی، ممبئی، ص53/54

٭٭٭

ہ: تدریسی خدمات

تحقیق کی روشنی میں یہ واضح کیا جا چکا ہے کہ مفتیِ اعظم علامہ مصطفیٰ رضا نوریؔ بریلوی دنیا ے اسلام کے عظیم روحانی پیشوا،  مرجع العلماء،  رہبرِ شریعت،  پُر خلوص داعی،  تحریک آفریں قائد،  مایۂ ناز فقیہ و محدث،  با فیض مدرس اور بلند پایہ نعت گو شاعر کی حیثیت سے پہچانے جاتے ہیں۔ آپ نے درس وتدریس کے فرائض بھی انجام دیے۔  درسِ نظامی کی تکمیل و فراغت کے بعد 1328ھ / 1910ء میں جامعہ رضویہ منظرِ اسلام میں مسندِ تدریس کو زینت بخشی اورتدریسی سلسلہ شروع کیا۔  (1)

        آپ کے تلامذہ اور خلفا کے تذکروں کے مطالعہ اور منظرِ اسلام اور مظہرِ اسلام کے ریکارڈ سے معلوم ہوتا ہے کہ آپ دارا لافتا ء کے اہتمام و انصرام،  فتویٰ نویسی کی زیادتی،  تبلیغِ دین کے اسفار،  تصنیف و تالیف اور دیگر مصروفیات کے سبب کبھی کبھار صرف مخصوص طلبہ کو درس دیتے تھے۔  اور آپ کا سلسلۂ درس و تدریس تسلسل کے ساتھ جاری نہ تھا بل کہ آپ فرصت کے لمحات میں طلبہ کو پڑھایا کرتے تھے۔  تحقیق سے ظاہر ہوتا ہے کہ آپ نے  1328ھ / 1910ء سے درس و تدریس کا سلسلہ شروع کیا۔  لیکن یہ سلسلہ کس طرح اور کب تک جاری رہا ؟ اس کی وضاحت و صراحت سے آپ کی حیات و خدمات پر تحقیق و ریسرچ کرنے والے محققین و اسکالرز اور تذکرہ نگاروں کی زبانیں خاموش ہیں۔ بہ ہرکیف!آپ نے اپنا تدریسی سلسلہ تسلسل سے نہ سہی کسی نہ کسی طور پر جاری رکھا۔ اس ضمن میں ذیل کا واقعہ پیش کرنا غیر مناسب نہ ہو گا۔

        1344ھ / 1926ء میں آپ کے برادرِ اکبر حجۃ الاسلام علامہ محمد حامد رضا بریلوی انجمن حزب الاحناف لاہور کے پہلے اجلاس میں شریک ہوئے۔  دو روز لاہور میں قیام کے بعد بریلی واپس آئے۔  واپسی پر حصول تعلیم کی غرض سے مولانا ابو الفضل سردار احمد رضوی لائل پوری،  حامد رضا صاحب کے ہمراہ بریلی آئے۔  آپ (علامہ حامد رضا صاحب) نے اپنی سرپرستی میں خصوصی عنایات کے ساتھ تعلیم و تربیت کا اہتمام کیا۔  اور اپنے دولت خانے پر قیام و طعام کا انتظام کیا۔  جامعہ رضویہ منظرِ اسلام بریلی میں کم و بیش تین سال تک تعلیم حاصل کی۔  اس عرصے میں مولانا سردار احمد نے علامہ  محمد حامد رضا بریلوی،  مولانا شاہ محمد حسین کے ساتھ ساتھ مفتیِ اعظم علامہ مصطفیٰ رضا نوریؔ بریلوی سے درس نظامی کی کتابیں اور صرف و نحو کی ابتدائی کتابیں مولانا محمد حسین مدرس منظرِ اسلام سے پڑھیں،  منیہ،  کنز الدقائق اور شر ح جامی تک کی کتابوں کا درس حضرت نوریؔ بریلوی سے حاصل کیا۔ چناں چہ حضرت نوریؔ بریلوی نے اس امر کی طرف یوں اشارہ کیا ہے۔ ذیل میں ملاحظہ ہو :

        ’’ جب میں ان (مولانا سرداراحمد ) کو دیکھتا۔  پڑھتے دیکھتا۔  مدرسہ میں قیام گاہ پر حتیٰ کہ مسجد میں آتے تو بھی کتاب ہا تھ میں ہوتی،  اگر جماعت میں تا خیر ہوتی تو بجائے دیگر اذکار و اوراد کے مطالعہ میں مصروف ہو جاتے۔  ان کے اس والہانہ تحصیلِ علم سے میں بہت متاثر ہوا۔  میرے پا س دوسرے پنجابی طالب علم مولوی نذیر احمد سلمہ پڑھتے تھے۔  ان سے دریافت کرنے پر آپ کی ساری سرگزشت سنائی۔  پھر ان کے ذریعہ وہ(مولانا محمد سردار احمد)میرے پاس آنے جا نے لگے۔  ان کے بہ اصرار درخواست اور مولوی نذیر احمد سلمہ کی سفارش پر میں نے منیہ،  قدوری،  کنز الدقائق اور شرح جامی تک پڑھایا۔ ‘‘(2)

        علاوہ ازیں مولانامفتی محمد اعجاز ولی خاں رضوی بریلوی( متولد1332ھ / 1914ء متوفی 1393ھ / 1973ء) نے بھی حضرت نوریؔ بریلوی سے شرح جامی پڑھی اور 1352ھ / 1929ئمیں آپ سے سند حدیث حاصل کی۔  مولانا معین الدین شافعی قادری(متولد 1357ھ/1939ء) ناظم اعلیٰ جامعہ قادریہ رضویہ لائل پور نے بھی مفتیِ اعظم سے میزان،  نحو میر تک کی کتابیں مستقل سبقاً سبقاً پڑھیں اور 1950ء میں جامعہ رضویہ مظہرِ اسلام بریلی سے سند فراغت حاصل کی۔  بعد میں آپ نے اجمیر مقدس میں آستانۂ عالیہ پر مولانا معین الدین شافعی کو دستار خلافت کے ساتھ ’’تاج العلم و الفضل ‘‘ کی سند بھی عطا کی۔  اور بعد ازاں عدیم الفرصتی کے سبب آپ نے درس ورتدریس کاسلسلہ موقوف کر دیا لیکن مدارسِ اسلامیہ کے ماہرینِ علوم و فنون،  اساتذۂ کرام خصوصاً جامعہ رضویہ منظرِ اسلام اور جامعہ رضویہ مظہرِ اسلام کے اساتذہ اور فارغ ہونے والے طلبہ آپ سے صحاحِ ستّہ اور درسِ نظامی کی منتہی کتابوں کا درس لیتے اور شرف تلمذ حاصل کرتے رہے۔

        مندرجہ بالا تحقیق سے یہ امر واضح ہوتا ہے کہ مفتیِ اعظم قدس سرہ نے 1328ھ / 1910ء سے 1366ھ /1947ء تک درس و تدریس کا سلسلہ کسی نہ کسی طور جاری رکھا۔ بعد میں رضوی دارالافتاء کی کثرت، جامعہ رضویہ مظہرِ اسلام کی ادارت و سرپرستی اور تبلیغی اسفار کے سبب تدریس کا سلسلہ موقوف ہوا، اور یہ بھی واضح ہو اکہ مدارسِ اسلامیہ کے اساتذہ و طلبہ آپ سے درس لیا کرتے تھے۔  چناں چہ مدارسِ اسلامیہ کی تعطیلِ کلاں ماہِ شعبان المعظم اور ماہِ رمضان المبارک میں بعض مدارس کے اساتذہ و فارغ التحصیل طلبہ نیز زیرِ تعلیم طلبہ اپنے آپ کو حضرت نوریؔ بریلوی کے حلقۂ شاگردی میں شمار ہونے کی سعادت حاصل کرنے کی غرض سے بریلی حاضر ہوتے اور آپ سے صحاح ستّہ اور دیگر درسی کتابوں کا درس لیتے۔ اس ضمن میں علامہ ضیاء المصطفیٰ اعظمی اپنا ذاتی واقعہ یوں بیان کرتے ہیں   :

        ’’علومِ اسلامیہ کی عربی درس گاہوں میں عموماً رمضان المبارک میں تعطیلِ کلاں ہوتی ہے۔ ان تعطیلات میں بریلی حاضر ہو کر فقیر ضیاء المصطفیٰ حضرت مفتی اعظم (نوریؔ بریلوی) رضی اﷲ عنہ وارضاہ عنا سے علمی استفادہ کرتا، ایک سال تعطیل کلاں میں حضرت مفتی اعظم قدس سرہ سے صحاح ستّہ میں ابو داود شریف و ابن ماجہ شریف پڑھی۔ حضرت مفتی اعظم نے ان دونوں کتابوں کی اجازت بھی عطا فرمائی۔ ‘‘(3)

        مفتیِ اعظم قدس سرہ جب تبلیغِ دین اور اشاعتِ مذہب کی غرض سے دورے پر ہوتے تو کسی نا کسی جامعہ یا دارالعلوم میں آپ ضرور تشریف لے جاتے تو اس سنہری موقع سے فائدہ اٹھا کر ان جامعات کے اساتذہ بھی خود کو آپ کے حلقہ شاگردی میں شامل کرنے کے لیے التماس کر کے درس حدیث کی نورانی و عرفانی محفل آراستہ کرتے اور درس لیتے چناں چہ درسِ حدیث کی ایسی ہی ایک نورانی و عرفانی محفل کا تذکرہ قاضی عبد الرحیم رضوی بستوی نے یوں کیا ہے   :

        ’’حضرت مفتی اعظم(نوریؔ بریلوی) قدس سرہ ایک سال دارالعلوم فیض الرسول،  براؤں کے سالانہ جلسۂ دستارِ فضیلت کے موقع پر براؤں تشریف لے گئے۔  ساتھ میں مَیں اور مفتی شریف الحق صاحب امجدی مدظلہ بھی تھے۔  دارالعلوم فیض الرسول کے اساتذہ و منتظمین نے حضرت کا شان دار استقبال کیا۔  حضرت فیض الرسول پہنچے کئی روز قیام رہا۔  اسی موقع پر فیض الرسول کے اساتذہ نے حضرت مفتی اعظم قدس سرہ سے درسِ حدیث لے کر اجازتِ حدیث لینے کا فیصلہ کیا۔ حضرت مفتی اعظم کی اجازت سے درسِ حدیث کی ایک نورانی مجلس بڑے تزک و احتشام سے منعقد ہو ئی۔  درسِ حدیث کی اس مجلس میں شرکا پر لازم قرار دیا گیا کہ وہ عمامہ باندھ کر ہی شریک ہوں۔  چناں چہ سارے اساتذۂ فیض الرسول درسِ حدیث کی اس مجلس میں عمامہ باندھ کر شریک ہوئے۔  حضرت مفتی اعظم قدس سرہ نے بخاری شریف کی ایک حدیث کا درس دیا۔  درسِ بخاری سے فراغت کے بعد جمیع شرکائے درس کو حدیث مسلسل بالاولیہ،  حدیث مصافحہ اور حدیثِ  تمر کی عملاً اجازت عطا فرمائی۔  نیز النور و البہا میں درج شدہ جملہ اجازتیں عطا فرمائیں۔  بخاری شریف کے اس درس میں،  مَیں،  مفتی شریف الحق امجدی صاحب،  مولانا غلام جیلانی صاحب،  مولانا جلال الدین صاحب،  مولانا محمد یونس صاحب،  مولانا محمد حنیف صاحب بستوی اور مولانا قدرت اﷲ وغیرہ شریک تھے۔ ‘‘(4)

        علاوہ ازیں آپ صحت کے زمانے میں عموماً بعدِ عشآرضوی دارالافتاء میں تشریف رکھتے تھے۔  اس وقت علمائے کرام اور مفتیانِ عظام آپ سے استفادہ کرتے تھے۔  چناں چہ اس دوران مولانا محمد نعیم اللہ رضوی،  صدرالمدرسین جامعہ منظرِ اسلام بریلی آپ سے استفادہ کرتے اور مشکل مقامات کو حل کرتے تھے۔ 

        تحقیق سے معلوم ہوتا ہے کہ مفتیِ اعظم علامہ مصطفیٰ رضا نوریؔ بریلوی اعلا تدریسی صلاحیتوں کے مالک تھے۔ باوجود یہ کہ آپ نے اپنا تدریسی سلسلہ مسلسل جاری نہ رکھا،  پھر بھی آپ کو اپنے عہد کے دیگر ممتاز اساتذہ میں نمایاں مقام حاصل رہا۔  علم و فضل کے اعتبار سے آپ بلند رُتبے پر فائز تھے۔  درسِ نظامی کے باریک باریک اُمور پر آپ گہری نظر رکھتے تھے۔ اس مقام پر آپ کی تدریسی صلاحیتوں،  مبلغِ علم کی بلندی اور درسِ نظامی پر کامل دست گاہ کے بارے میں مفتی محمد اعظم رضوی ٹانڈوی،  شیخ الحدیث جامعہ رضویہ مظہرِ اسلام، بریلی کے خیالات کو پیش کرنا غیر مناسب نہ ہو گا  :

        ’’ایک بار جب کہ میں رضوی دارالافتاء میں بیٹھا مشکوٰۃ شریف کا مطالعہ کر رہا تھا کیوں کہ مجھے یہ کتاب پڑھانے کے لیے دی گئی تھی۔ حدیثِ جبریل میں جہاں قیامت کے علم کو پانچ ان علوم میں بتایا گیا ہے جنھیں بے بتائے کوئی نہیں جانتا سوائے اﷲ تعالیٰ کے۔  میں اس حدیث کو کئی بار پڑھا چکا تھا۔  علومِ خمسہ طلبہ کو سمجھاچکا تھا بما لہ وماعلیہ۔ لیکن مجھے خود سمجھانے کے باوجود حضرت مفتی اعظم(نوریؔ بریلوی) علیہ الرحمۃسے اس حدیث کو سمجھنے کا شوق ہوا۔  میں نے حضرت مفتی اعظم رحمۃ اﷲ علیہ سے دریافت کیا کہ حضور! اس حدیث میں پانچ علوم کے مخلوق کو علم ذاتی نہ ہونے کی تخصیص ہے،  تو پانچ ہی کی تخصیص کیوں کی گئی حال آں کہ کسی چیز کا علمِ ذاتی مخلوق کو نہیں۔  حضرت مفتی اعظم نے ارشاد فرمایا: آپ نے کہا ہے کہ علوم خمسہ کی تخصیص کی گئی۔  یہاں تخصیص کہاں ہے ؟ میں متنبہ ہوا اور سمجھ گیا کہ حضرت نے مجھے اس بات پر تنبیہ کی ہے کہ آپ کو تخصیص نہیں کہنا چاہیے تھا کہ تخصیص علمِ معانی و بیان میں خاص صورت میں ہوتی ہے،  خاص کلمات کے ذریعہ نفی اور استثناکے ذریعہ اور کلمہ انما کے ذریعہ اور تقدیم وغیرہ کے ذریعہ۔  اور یہاں ایسی کوئی صورت نہیں۔  مجھے یہاں تخصیص نہیں بولنا چاہیے تھا۔  اس کے بعد فوراً حضرت مفتی اعظم نے فرمایا:  یہ کہیے علومِ خمسہ کی تخصیصِ بالذکر کی گئی۔ اس تنبیہ سے میں نے حضرت مفتی اعظم کے مبلغِ علم کی بلندی اور تعمقِ نظر و فکر کو خوب سمجھ لیا اور میں نے اندازہ لگا لیا کہ حضور مفتی اعظم کا درس نظامی پر گہرا مطالعہ ہے۔  اگرچہ مفتی اعظم کہلاتے ہیں،  مگر مدرسِ اعظم بھی ہیں۔  پھر حضرت نے وہ بتا یا جو میں جاننا چاہتا تھا۔

        حضرت مفتی اعظم نے فرمایا :

        بے شک عالم کے کسی ذرّے کا بھی علم مخلوق کو بے عطائے الٰہی حاصل نہیں کہ علمِ ذاتی خاص ہے اﷲ تعالیٰ کی ذات کے ساتھ۔  حدیث شریف کایہ مطلب ہرگز نہیں کہ پانچ چیزوں کا علمِ ذاتی مخلوق کو نہیں اور ان پانچ کے سوا کا معاذ اﷲ ذاتی مخلوق کو ہے۔  اصل میں پانچ کی تخصیص ذکر کے ساتھ اس لیے کی گئی کہ اس زمانے میں کاہن،  قائف،  اور ساحر وغیرہ ان پانچ چیزوں کے علم کا دعوا کیا کرتے تھے اور وہ گمراہ تھے۔  وہ اس قابل نہیں تھے کہ اﷲ عزوجل انھیں ان چیزوں کا علم عطا فرمائے۔ جب انھیں اﷲ تعالیٰ نے بتایانہیں اور وہ ان علوم کے جاننے کے مدعی تھے تو ان کے دعوے سے نکلتا تھاکہ انھیں ان چیزوں کاعلم ذاتی ہے۔ تو قرآن و حدیث میں ان کا رد کیا گیاکہ اﷲ تعالیٰ کے بے بتائے جو یہ دعوا کر رہے ہیں وہ غلط اور باطل ہے۔ ان علوم کو بھی وہی جانتے ہیں جنھیں اﷲ بتائے۔  اور یہ کاہن وغیرہ نہیں جانتے۔  یہ ہے وجہ تخصیصِ بالذکر کی۔ یہ ایک حدیثِ خا ص حضرت نے مجھے سمجھائی اور پتہ نہیں کتنی بار فتاویٰ سناتے اور دکھاتے وقت تفسیر و حدیث اور فقہ وغیرہ کی کتابوں کے مطالب سمجھائے اور بتائے۔ ‘‘(5)

        مفتیِ اعظم حضرت نوری بریلوی کے درس نظامی کی انفرادیت کا تذکرہ کرتے ہوئے آپ کے جانشین تاج الشریعہ علامہ مفتی محمد اختر رضا قادری ازہری دام ظلہ العالی اپنی فتویٰ نویسی کی ابتدا بیان کرتے ہوئے راقم ہیں :

        ’’جامعہ ازہر سے واپسی کے بعد میں نے اپنی دل چسپی کی بنا پر فتوے کا کام شروع کیا۔۔ شروع شروع میں مفتی افضل حسین صاحب علیہ الرحمہ اور دوسرے مفتیان کرام کی نگرانی میں یہ کام کرتا رہا۔۔ اور کبھی کبھی حضرت کی خدمت میں حاضر ہو کر فتویٰ دکھا یا کرتا تھا۔۔ کچھ دنوں بعد اس کام میں میری دل چسپی زیادہ بڑھ گئی اور پھر میں مستقل حضرت کی خدمت میں حاضر ہونے لگا۔۔ حضرت کی توجہ سے مختصر مدت میں اس کام میں مجھے وہ فیض حاصل ہوا کہ جو کسی کے پاس مدتوں بیٹھنے سے بھی نہ ہوتا۔ ‘‘(6)

        علاوہ ازیں آپ سے بیش تر حضرات نے فتویٰ نویسی کی تربیت بھی لی اور اپنے فتاویٰ پر اصلاح و نظر ثانی کے لیے آپ کی بارگاہ میں رہ کر مدتوں بعض علمائے دین نے کسبِ فیض کیا۔  اس دوران کبھی کبھار اصلاحِ فتاویٰ کے ساتھ ساتھ درس و تدریسِ حدیث کاسلسلہ بھی چل نکلتا۔  فتویٰ نویسی سیکھنے کے دوران جب علماآپ کو فتاویٰ دکھاتے اور سناتے اس وقت مفتیِ اعظم تفسیر و حدیث اور فقہ و اصول کی سیکڑوں کتابوں کے مطالب سمجھاتے اور ان کی زنبیلِ حیات میں علم وفن کے گہر ہائے آب دار کا اضافہ کرتے۔

        مفتیِ اعظم قدس سرہ کے ہم عصر علما و فقہا، مفسرین و محدثین اور متکلمین و مناظرین آپ سے علمی استفادہ کرتے اور شرعی مسائل میں آپ سے رجوع ہوتے۔  مزید یہ کہ پیچیدہ و لاینحل مسائل کے حل کے لیے آپ کے یہاں حاضر ہوتے تھے۔  آپ جب تک حیات رہے یہ سلسلہ جاری رہا۔  علما و طلبہ آتے گئے اور آپ کے علمی فیض سے مالامال ہوتے گئے۔ ا ور جنھیں آپ کی شاگردی کا شرف حاصل ہوا وہ اپنے آپ کو سعادت مند اورخوش قسمت تصور کرتے ہیں۔

مفتیِ اعظم قدس سرہ کا طریقۂ تعلیم

مفتیِ اعظم علامہ مصطفیٰ رضا نوریؔ بریلوی کا طریقۂ تعلیم اور درسِ افتا امتیازی شان کا حامل تھا۔  آپ درسِ افتا میں اس بات کا التزام فرماتے تھے کہ محض نفسِ حکم سے واقفیت نہ ہو بل کہ اس کے ما علیہ ومالہٗ کے تمام نشیب و فراز ذہن نشین ہو جائیں۔ پہلے آیات و احادیث سے استدلال کرتے،  پھر اصولِ فقہ و حدیث سے اس کی تائید دکھاتے اور قواعدِ کلیہ کی روشنی میں اس کا جائزہ لے کر کتبِ فقہ سے اس کی جزئیات پیش فرماتے،  اور مزید اطمینان کے لیے فتاویٰ رضویہ یا امام احمد رضا بریلوی کا ارشاد بیان کرتے۔  اگر مسئلہ میں اختلاف ہوتا تو قول راجح کی تعیین دلائل سے کرتے اور اصولِ افتا کی روشنی میں ماعلیہ الفتویٰ کی نشاندہی کرتے۔  پھرفتاویٰ رضویہ یا امام احمد رضا بریلوی کے ارشاد سے اس کی تائید پیش فرماتے۔ مگر عموماً یہ سب زبانی ہوتا۔  عام طور سے جواب بہت مختصر اور سادہ لکھنے کی تاکید فرماتے،  ہاں ! کسی عالم کا بھیجا ہوا استفتا ہوتا اور وہ ان تفصیلات کا خواست گار ہوتا تو پھر جواب میں وہی رنگ اختیار کرنے کی بات ارشاد فرماتے۔

        مفتیِ اعظم قدس سرہ کے درسِ افتا اور اصلاحِ فتاویٰ سے متعلق آپ کے نائب شارح بخاری،   مفتی محمد شریف الحق امجدی نے یوں اظہارِ خیال کیا ہے  :

        ’’میں گیارہ سال تین ماہ خدمت میں حاضر رہا۔  اس مدت میں چوبیس ہزار مسائل لکھے ہیں، جن میں کم از کم دس ہزار وہ ہیں جن پر حضرت مفتی اعظم کی تصحیح و تصدیق ہے۔ عالم یہ ہوتا کہ دن بھر بل کہ بعدِ مغرب بھی دو گھنٹے تک حاجت مندوں کی بھیڑ رہتی۔ یہ حاجت مند خوش خبری لے کر نہیں آتے،  سب اپنا اپنا دکھڑا سناتے،  غم آگیں  واقعات سننے کے بعد دماغ کا کیا حال ہوتا ہے وہ سب کو معلوم ہے۔  اتنے طویل عرصے تک اس غم آگیں ماحول سے فارغ ہونے کے بعد،  عشآ بعد پھر تشریف رکھتے اور میں اپنے لکھے ہوئے مسائل سناتا،  میں گھسا پٹا نہیں بل کہ بہت سوچ سمجھ کر،  جانچ تول کر مسئلہ لکھتا،  مگر واہ رے ! مفتی اعظم۔  اگر کہیں ذرا بھی غلطی ہے،  لوچ ہے یا بے ربطی ہے،  یا تعبیر غیر مناسب ہے،  یا سوال کے ماحول کے مطابق جواب میں کمی بیشی ہے،  یا کہیں سے کوئی غلط فہمی کا ذرا بھی اندیشہ ہے فوراًاس پر تنبیہ فرما دیتے اور مناسب اصلاح۔  تنقید آسان ہے مگر اصلاح دشوار،  جو لکھا گیا ہے وہ نہیں ہونا چاہیے،  اس کو کوئی بھی ذہین نقاد کہہ سکتا ہے،  مگر اس کو بدل کر لکھا جائے،  یہ جوئے شیر لانے سے کم نہیں ہے۔  مگر ستّر سالہ مفتی اعظم کا علم ایسا جوان تھا کہ تنقید کے بعد فوراً اصلاح فرما دیتے اور ایسی اصلاح کہ پھر قلم ٹوٹ کر رہ جاتا۔

        کبھی ایسے جاں فزا تبسم کے ساتھ کہ قربان ہونے کا جذبہ حدِ اضطرار کو پہنچ جائے،  کبھی ایسے جلال کے ساتھ کہ اعصاب جواب د ے جائیں۔  مگر اس جلال کو کون سانام دیں جس کے مخاطب کی جراتِ رندانہ اور بڑھ جاتی کیا کیجیے گا؟ اگر جلال سے مرعوب ہو کر چپ رہتے تو جلال اور بڑھتا،  بڑھتا رہتا یہاں تک کہ مخاطب کو عرض معروض کرنا ہی پڑتا۔  یہ جلال وہ جلال تھا کہ جو اس کا مورد بنا کندن  ہو گیا ۔۔یہ مجلس آدھی رات سے پہلے کبھی ختم نہ ہوتی۔  بارہا رات کے دو بج جاتے اور رمضان شریف میں تو سحری کا وقت روز ہو جاتا۔ 

        بارہا ایسا ہوتا کہ حکم کی تائید میں کوئی عبارت نہ ملتی تو اپنی صواب دید سے حکم لکھ دیتا۔  کبھی دور دراز کی عبارت سے تائید لاتا۔  مگر مفتی اعظم ان کتابوں کی عبارتیں جو دارالافتاء میں نہ تھیں زبانی لکھوا دیتے۔  میں حیران رہ جاتا،  یا اﷲ! کبھی کتاب کا مطالعہ کرتے نہیں،  یہ عبارتیں زبانی کیسے یاد ہیں ؟ پیچیدہ سے پیچیدہ دقیق سے دقیق مسائل پر بداہۃً ایسی تقریر فرماتے کہ معلوم ہوتا تھا اس پر بڑی محنت سے تیاری کی ہے۔

        سب جانتے ہیں کہ کلام بہت کم فرماتے مگر جب ضرورت ہوتی تو ایسی بحث فرماتے کہ اجلہ علما انگشت بدنداں رہ جاتے۔  کسی مسئلہ میں فقہا کے متعدد اقوال ہیں تو سب دماغ میں ہر وقت حاضر رہتے،  سب کے دلائل،  وجوہِ ترجیح،  اور قولِ مختار و مفتی بہ پر تیقن اور ان سب اقوال پر اس کی وجہِ ترجیح سب ازبر۔  بابِ نکاح میں ایک مسئلہ ایسا ہے جس کی بہتّر(72)صورتیں ہیں اور کثیر الوقوع بھی ہیں،  پہلی بار جب میں نے اس کو لکھا،  سوال مبہم تھا،  میں نے بیس(20) پچیس(25) شق قائم کر کے چار ورق فل اسکیپ کاغذ پر لکھا جب سنانے بیٹھا تو فرمایا  :

        ’’یہ طول طویل شق در شق اور شق در شق جواب کون سمجھ پائے گا ؟ پھر اگر لوگ خدا ناترس ہوئے تو جو شق اپنے مطلب کی ہو گی اس کے مطابق واقعہ بنا لیں گے۔  آج ہندوستان میں یہ صورت رائج ہے اسی کے مطابق حکم لکھ کر بھیج دیں یہ قید لگا کر کہ آپ کے یہاں یہی صورت تھی تو حکم یہ ہے۔ ‘‘

        یہ جواب فل اسکیپ کے آدھے ورق سے بھی کم پر مع تائیدات آ گیا۔  اس واقعہ نے بتایا کہ کتب بینی سے علم حاصل کر لینا اور بات ہے اور فتویٰ لکھنا اور بات۔ ‘‘(7)

        متذکرہ واقعہ سے معلوم ہوتا ہے کہ مفتیِ اعظم قدس سرہ کا طریقۂ تعلیم انتہائی عمدہ تھا۔  آپ نہایت شفقت ومحبت سے اپنے طلبہ کو پڑھاتے تھے۔  پیچیدہ سے پیچیدہ اور دقیق سے دقیق مسائل کو اس آسانی سے سمجھاتے کہ وہ طلبہ کے ذہن نشیٖن ہو جاتا۔  فتویٰ نویسی کی تربیت لینے والے علما سے آپ ہمیشہ فرماتے تھے کہ استفتا کے جواب میں جو صورت رائج ہو اس کے مطابق حکم واضح کریں اور جواب طول طویل دینے کی بجائے اجمالاً مگر جامع دیا جائے۔

مفتیِ اعظم قدس سرہ کی طلبہ سے شفقت و محبت

مفتیِ اعظم علامہ مصطفیٰ رضا نوریؔ بریلوی طلبہ سے مشفقانہ و مربیانہ اور محبت آمیز رویہ رکھتے تھے۔ آپ طلبہ پر نہایت مہربان تھے، انھیں شفقت و محبت سے نوازتے اور ہر طرح ان کی خدمت کرتے حتیٰ کہ غریب و نادار طلبہ کو خفیہ طور پر خرچ کے لیے رقوم بھی عنایت فرماتے۔  یوں ہی درس وتدریس کے ذریعہ ان کی خدمت کرتے،  نہایت شفقت و محبت سے ان کو پڑھاتے،  علمِ نافع حاصل ہونے کی دعائیں دیتے،  کوئی طالب علم مسئلہ دریافت کرتا یا حدیث یا فقہ کی کتاب کے آغاز کے وقت تبرکاً پڑھنے کے لیے آپ کی خدمت میں حاضر ہوتا،  آپ نہایت شفقت سے جواب دے کر مطمئن فرماتے،  جلسۂ دستارِ فضیلت کے موقع پر علما و طلبہ کے لیے خصوصی دعوت کا اہتمام فرماتے تھے۔  خوشی کے موقع پر کھانے پکوا کر طلبہ کو کھلاتے۔  بیش تر طلبہ ایسے تھے جو دونوں وقت آپ کے یہاں کھاتے تھے،  بعض طلبہ کو ان کے ذوقِ علمی کی بنا پر آپ خود اپنے مکان پر ٹھہراتے اور نہایت لطف و کرم سے قیام و طعام کا بندوبست فرماتے نیز ان کو اپنے علمی و روحانی فیضان سے مالا مال کرتے۔  غرض یہ کہ علما کی توقیر، طلبہ سے شفقت و محبت جو آج کل بڑی بڑی ہستیوں میں مفقود ہوتی جا رہی ہے۔ وہ آپ کا طرۂ امتیاز تھا۔

        آپ کا علمی رعب و دبدبہ اور روحانیت ساری دنیا پر واضح ہے،  آپ عالمِ اسلام میں مسلمانوں کی توجہ کا مرکز تھے۔  اس کے باوجود اپنے شاگرد رشید مولانا سردار احمد رضوی لائل پوری کو کن الفاظ سے یا د کرتے ہیں،  آپ کے ایک مکتوب کا اقتباس نشانِ خاطر کرتے ہوئے اپنے شاگرد کے تئیں اُن کی والہانہ شفقت و محبت کا اندازہ کیجئے  :

        ’’آپ کے مدرسہ اور خدماتِ دینی کا حال ہر آنے والے سے معلوم ہوتا رہتا ہے۔  ماشا ء اﷲ لاحول ولاقوۃ الا باللہ۔ مولا تعالیٰ آپ کے فیض کو اور زیادہ سے زیادہ کرے اور دارین کی نعمتوں،  برکتوں سے آپ کو مالامال کرے اور بہت بہت ترقیاں ہر قسم کی دینی و دنیوی نصیب فرمائے آپ کی خدماتِ دینی کو شرفِ قبول بخشے اور بیش از بیش توفیقِ خیر دے اور آپ کو اس فقیر حقیر گناہ گار،  عصیاں کار کے لیے سرمایۂ نجات بنائے۔ آپ کی دینی خدمات سُن سُن کر د ل باغ باغ ہے۔ ‘‘ (8)

        دورِ حاضر کے اساتذہ کے لیے مفتیِ اعظم قدس سرہ کا اپنے تلامذہ کے ساتھ یہ محبت آمیز رویہ ایک درس پیش کرتا ہے کہ اتنی عظیم اور بلند پایہ شخصیت جب اپنے شاگردوں کے ساتھ ایسا مشفقانہ برتاؤ ر کھتی تھی تو انھیں بھی چاہیے کہ آپ کے اس طرزِ عمل کو مشعلِ راہ بنائیں۔

مفتیِ اعظم قدس سرہ کے تلامذہ

مفتیِ اعظم علامہ مصطفیٰ رضا نوریؔ بریلوی کے شاگردوں اور آپ سے علمی و فقہی استفادہ کرنے والوں میں بڑے بڑے علما و فقہا،  مدرسین و محققین،  مفسرین و محدثین،  متکلمین و مناظرین گزرے ہیں جن کی ہند و پاک اور دیگر ممالک میں ایک بڑی جماعت ہے۔  گو کہ بعض اپنے مالکِ حقیقی سے جاملے ہیں اور بقیہ جو بہ قید حیات ہیں وہ ہمہ وقت دین و مذہب اور حق و صداقت کی ترویج و اشاعت میں مصروف ہیں۔  آپ کے تلامذہ و مستفیدین عالم،  عامل،  مدرس،  مقرر،  مفسر و محدث،  مناظر و متکلم،  منطقی و فلسفی،  محقق و مصنف،  فقیہ و قاضی اور مفتی ہونے کا ساتھ ساتھ ملک و ملت کے بہی خواہ،  ہم درد اور بے لوث خادم ہیں۔

        استاذ کی سیرت و کردار،  علم و عمل کی پختگی اور قول  و فعل کی یکسانیت اور ہم آہنگی کا اثر تلامذہ پر ضرور پڑتا ہے۔  خصوصاً جب استاذ کی علمی و روحانی قوت اپنے معاصر علما و مشائخ سے بھی خراجِ عقیدت وصول کر چکی ہو۔  یہی وجہ ہے کہ مفتیِ اعظم  کے تلامذہ و مستفیدین رسوخ فی العلم،  استقامت فی الدین،  مسلک سے والہانہ محبت،  عشقِ مصطفیٰ صلی اﷲ تعالیٰ علیہ و سلم اور دیگر مقاصدِ علم میں ایسے ممتاز و منفرد ہیں کہ اپنی مثال آپ ہیں۔

        حضرت نوریؔ بریلوی خیرآبادی اور دہلوی سلسلۂ تدریس کے ساتھ ساتھ عشقِ مصطفیٰ صلی اﷲ تعالیٰ علیہ و سلم کے مظہر بریلی سلسلۂ تدریس کے وارث و امیٖن ہیں۔ اس لیے آپ کے تلامذہ میں عشقِ مصطفیٰ صلی اﷲ تعالیٰ علیہ و سلم کی ایک حسیٖن تڑپ پیدا ہو گئی۔  جس نے ان کی فکری و اعتقادی زندگی میں اجتماعیت،  روحانیت،  عزمِ مصمم،  یقیں محکم اور عمل پیہم کی بے کراں دولت جمع کر دی۔  آپ کے مکتب اور فیضانِ نظر نے انھیں باطل فتنوں کے مقابلوں کی ہمت و جرات بخشی۔  آپ کے فیض یافتہ علما،  فقہا،  مفسرین،  محدثین،  متکلمین و مناظرین،  محققین و مقننین، مصنفین و مولفین،  مقررین و مدرسین،  مناطقہ و فلاسفہ،  ادبا  و شعرا،  قاضیانِ عدالت اور مفتیانِ شریعت زمانے کے ہر چیلنج کا جواب دینے کی پوری صلاحیت رکھتے ہیں،  اور اپنے اندر ایسی توانائی اور قوت پاتے ہیں کہ جہاں ہوں وہاں ایک جہان آباد کر دیتے ہیں۔

        تحقیق سے یہ امر واضح ہوتا ہے کہ منظرِ اسلام و مظہرِ اسلام کے جن طلبہ نے آپ سے درس لیا یا ا ستفادہ کیا ان کا کوئی ریکارڈ نہ رکھا گیا اس لیے آپ کے تلامذہ و مستفیدین کا شمار ممکن نہیں رہا۔  لیکن یہ حقیقت تو ظاہرہے کہ آپ کے ان گنت تلامذہ ومستفیدین آسمانِ علم و فضل کے مہر و ماہ بن کر چمکے اور ان کا علمی فیض ہند و پاک اور اس کی سرحدوں کے پار بھی فضاؤں کو منور کر رہا ہے۔

مفتیِ اعظم قدس سرہ کے درسی تلامذہ

مفتیِ اعظم قدس سرہ کے بے شمار تلامذہ میں سے چند کے اسمائے گرامی ذیل میں ملاحظہ ہوں  :

1)محدثِ پاکستان مولاناسردار احمد رضوی،  گورداس پور ی، بانی جامعہ رضویہ مظہرِاسلام،  فیصل آباد، پاکستان

2)مفتی محمد اعجاز ولی خاں رضوی بریلوی، شیخ الحدیث و الفقہ جامعہ نعیمیہ لاہور، پاکستان

3)مولانا مفتی حشمت علی خاں رضوی پیلی بھیتی، بانی دارالعلوم حشمت الرضا، پیلی بھیت

4)مولانا الحاج مبین الدین امروہوی، شیخ التفسیر جامعہ نعیمیہ، مرادآباد

5)مولانا محمد تحسین رضا خاں رضوی محدث بریلوی،  صدرالمدرسین مرکزالدراسات الاسلامیہ جامعۃ الرضا، بریلی

6)شارح بخاری مولانا مفتی محمد شریف الحق امجدی، صدر مفتی الجامۃ الاشرفیہ، مبارک پور

7)مولانا محمد ریحان رضا خاں رضوی بریلوی، مہتمم جامعہ رضویہ منظرِ اسلام، بریلی

8)مفتی محمداختر رضاخاں ازہری میاں، صدر مفتی مرکزی دارالافتا،  و بانی مرکز الدراسات الاسلامیہ جامعۃ الر ضا، بریلی

9)مولانا محمد خالد علی خاں رضوی، مہتمم جامعہ رضویہ مظہرِ اسلام، بریلی

10)محدث کبیر علامہ ضیاء المصطفیٰ رضوی امجدی اعظمی، بانی و سربراہِ اعلیٰ جامعہ امجدیہ رضویہ، گھوسی

11)مولانا مفتی محمد اعظم رضوی ٹانڈوی، شیخ الحدیث وصدرالمدرسین جامعہ رضویہ مظہرِ اسلام، بریلی

12)مولانا سید عارف رضوی نان پاروی، شیخ الحدیث جامعہ رضویہ منظرِاسلام، بریلی

13)مولانا محمد نعیم اﷲ خاں رضوی بستوی، صدرالمدرسین جامعہ رضویہ منظرِاسلام، بریلی

14)مبلغِ اسلام مولانا محمد ابراہیم خوشتر صدیقی رضوی، بانی سُنّی رضوی سوسائٹی، ماریشش

15)مولانا محمد منظور احمد فیضی رضوی، بانی مدینۃ العلوم، بھاول پور، پاکستان     

16)مولانا معین الدین شافعی قادری، ناظمِ اعلیٰ جامعہ قادریہ رضویہ، فیصل آباد، پاکستان

17)مولانا غلام جیلانی گھوسوی، شیخ الحدیث جامعہ رضویہ مظہر اسلام، بریلی

18)مولانا مفتی قاضی عبد الرحیم بستوی، مرکزی دارالافتا، بریلی

19)فقیہ ملت مفتی جلال الدین احمد امجدی، بانی مرکزِ تربیتِ افتا اوجھاگنج، بستی

20)مولانا بد رالدین رضوی گورکھپوری، صدر مدرس مدرسہ غوثیہ، بڑھیا، بستی

21)مولانا محمد یونس نعیمی، صدرالمدرسین دارالعلوم فیض الرسول، براؤں، بستی

22)مولانا محمد حنیف قادری، مدرس دارالعلوم فیض الرسول، براؤں، بستی

23)مولانا قدرت اﷲ رضوی، مفتی دارالعلوم فیض الرسول، براؤں، بستی

24)مفتی محمد مطیع الرحمن رضوی، مدیرِ عام الادارۃ الحنفیہ، کشن گنج، بہار

25)مولانا لطف اﷲ قریشی رضوی علی گڑھی، خطیب شاہی جامع مسجد و مفتی شہر متھرا

26)مولانا نذیر احمد رضوی پنجابی                 

27)مولانا محمد اسماعیل رضوی پورنوی 

28)مولانا بلال احمد رضوی بہاری،  مدرس جامعہ رضویہ منظرِ اسلام، بریلی

29)مولانا عبدالخالق نوری بہاری، مدرس جامعہ رضویہ منظرِ اسلام، بریلی

30)مولانا محمد ہاشم یوسفی بہاری، مدرس جامعہ رضویہ منظرِ اسلام، بریلی

31)مولانا عبدالحمیدرضوی افریقی          

32)مولانا احمد مقدم رضوی افریقی

33)مولانا محمد میاں رضوی بریلوی       

34)قاری محمد امانت رسول پیلی بھیتی

35)مولاناسید شاہد علی رضوی رام پوری، شیخ الحدیث و ناظم الجامعۃ الاسلامیہ، رام پور۔ وغیرہ  (9)

افتا کے تلامذہ

مفتیِ اعظم علامہ مصطفیٰ رضا نوریؔ بریلوی کے شاگردوں میں آپ سے فتویٰ نویسی میں استفادہ کرنے والے حضرات کی تعداد کثیر ہے۔ بل کہ اگر برِ صغیر کے مفتیانِ کرام کے اسماجمع کیے جائیں تو ان میں بیش تر حضرات آپ کے بلاواسطہ یا بالواسطہ شاگرد ہوں گے۔  مفتیِ اعظم علامہ مصطفیٰ رضا نوریؔ بریلوی کے درسِ افتا کے چند تلامذہ کے اسمائے گرامی ملاحظہ ہوں  :

1)محدثِ  پاکستان مولاناسردار احمد رضوی، گورداس پور ی، بانی جامعہ رضویہ مظہرِاسلام، فیصل آباد، پاکستان

2)مفتی اعظم پاکستان مولانا ابوالبرکات سید احمد رضوی، شیخ الحدیث دارالعلوم حزب الاحناف، لاہور، پاکستان

3)مفتی سید افضل حسین رضوی مونگیری، شیخ الحدیث و مفتی جامعہ قادریہ رضویہ، فیصل آباد،  پاکستان

4)مولانا الحاج مبین الدین امروہوی، شیخ التفسیر جامعہ نعیمیہ، مرادآباد

5)مفتی محمد احمد جہانگیر خاں رضوی اعظمی، شیخ الحدیث و مفتی جامعہ رضویہ منظرِ اسلام، بریلی

6)مولانا محمد تحسین رضا خاں رضوی محدث بریلوی، صدرالمدرسین مرکزالدراسات الاسلامیہ جامعۃ الرضا، بریلی

7)شارح بخاری مولانا مفتی محمد شریف الحق امجدی، صدر مفتی الجامۃ الاشرفیہ، مبارک پور

8)مفتی محمد اختررضاخاں ازہری میاں، صدر مفتی مرکزی دارالافتا،  و بانی مرکز الدراسات الاسلامیہ جامعۃ الر ضا، بریلی

9)محدث کبیر علامہ ضیاء المصطفیٰ رضوی امجدی اعظمی، بانی و سربراہِ اعلیٰ جامعہ امجدیہ رضویہ، گھوسی، اعظم گڑھ

10)مولانا مفتی قاضی عبد الرحیم بستوی، مرکزی دارالافتا، بریلی

11)مولانا مفتی محمد اعظم رضوی ٹانڈوی، شیخ الحدیث وصدرالمدرسین جامعہ رضویہ مظہرِ اسلام، بریلی 

12)مفتی عبدالمنان اعظمی، شیخ الحدیث و مفتی شمس العلوم، گھوسی، اعظم گڑھ

13)مفتی رجب علی رضوی نان پاروی، بانی و مہتمم مدرسہ عزیزالعلوم، نان پارہ، بہرائچ

14)مولانا محمد حبیب رضا خاں رضوی بریلوی، ناظم ادارہ سُنّی دنیا، بریلی 

15)مولانا مفتی ابرارحسین صدیقی تلہری، مفتی جماعت رضائے مصطفیٰ و مدیرِ اعلیٰ ماہنامہ یادگارِ رضا، بریلی

16)مولانا غلام جیلانی گھوسوی، شیخ الحدیث جامعہ رضویہ مظہر اسلام، بریلی

17) مفتی خواجہ مظفر حسین رضوی پورنوی، شیخ المعقولات دارالعلوم

18)مولانا غلام یزدانی گھوسوی، صدرالمدرسین جامعہ رضویہ مظہرِاسلام، بریلی

19)مولانا غلام یٰسین رشیدی پورنوی

20)مولانا معین الدین خاں اعظمی مدرس جامعہ رضویہ مظہرِ اسلام، بریلی

21)مفتی محمد طاہر حسین اشرفی، مفتی رضوی دارالافتا، بریلی

22)مفتی محمد مطیع الرحمن رضوی، مدیرِ عام الادارۃ الحنفیہ، کشن گنج، بہار

23)مولانا محمد حسن منظر قدیری، فاضل جامعہ رضویہ منطرِ اسلام، بریلی

24)مولانا عبدالحمید رضوی، دیناجپوری

25)مفتی محمد صالح رضوی مدرس جامعہ رضویہ مظہرِ اسلام، بریلی

26)مولانا مفتی مجیب الاسلام نسیم اعظمی، مدرس جامعہ رضویہ مظہرِاسلام، بریلی

27)مولانا مظفر حسین غازی پوری، کراچی، پاکستان

28)مفتی ریاض احمد سیوانی، نائب مفتی جامعہ رضویہ منظرِاسلام، بریلی

29)مفتی جلال الد ین قادری، ٹانڈہ، فیض آباد

30)مفتی عبدالغفور بہاری، مدرس جامعہ رضویہ مظہرِاسلام، بریلی

31)مولانا محمد انور رضوی ٹانڈوی، مفتی رضوی دارالافتا، بریلی

32)مولانا رئیس الدین رضوی پورنوی، مدرس جامعہ رضویہ مظہرِاسلام، بریلی۔  وغیرہ (10)

        حضرت نوریؔ بریلوی کی شہرت و مقبولیت صرف برِ صغیر ہند و پاک تک ہی محدود نہ تھی۔  بل کہ عالمِ اسلام کے جید علما و مشائخ آپ کو قد رو منزلت کی نگاہ سے دیکھتے تھے۔  غائبانہ طور پر آپ کی دینی و ملی،  علمی و فنی خدمات اور رفعت و عظمت کے معترف اور قدرداں تھے۔  آپ کے وجودِ مسعود کو عالمِ اسلام کے لیے باعثِ برکت و رحمت اور ایک نعمتِ عظمیٰ تصور فرماتے تھے۔  چناں چہ1391ھ / 1971ء میں جب آپ تیسری مرتبہ حج و زیارت کے لیے حاضر ہوئے تو اس موقع پر مکہ معظمہ اور مدینہ منورہ کے سیکڑوں افراد آپ کے دستِ مبارک پر بیعت ہوئے۔  بڑے بڑے جید علمائے اعلام،  فضلائے کرام اور مفتیانِ عظام نے آپ کے سامنے زانوئے ادب تہہ فرما کر شرفِ تلمذ حاصل کیا۔  آپ سے اجازتِ حدیث لی اور خلافتیں حاصل کیں۔  ان میں سے چند کے اسما ے گرامی ملاحظہ ہوں  :

        1)  مفتیِ حرم علامہ مولاناسید محمد مغربی مالکی مکی        

        2)   شیخ العلما علامہ سید امین قطبی مکی                 

        3)  حضرت علامہ مولانا مفتی سید نور                    

        4)   استاذالعلما حضرت علامہ مولانا جعفر بن کثیر     

        5)  حضرت علامہ مولانا عمر ہمدان مکی                 

        6)   حضرت علامہ مولاناسید عباس مالکی مکی         

        7)  حضرت علامہ مولانا عبدالمالک                                

        8)   حضرت علامہ مولانا موزا عرقی      

        9)   حضرت علامہ مولانا ابراہیم مدنی                             

        10)  حضرت علامہ مولانا محمد فضل الرحمن مدنی

        11)  حضرت علامہ مولاناسید علوی مالکی وغیرہ  (11)

        تدریسی خدمات کے تحت جائزہ لیتے ہوئے اس امر کو واضح کیا گیا ہے کہ مفتیِ اعظم قدس سرہ نے تعلیم سے فراغت کے بعد 1328ھ / 1910ء سے درس و تدریس کا سلسلہ شروع کیا۔ لیکن فتویٰ نویسی کی زیادتی اور دیگر مصروفیات کے سبب آپ کا تدریسی سلسلہ تسلسل سے جاری نہ رہ سکا۔  ویسے آپ کبھی کبھار مخصوص طلبہ کو پڑھاتے رہے۔  مدارس کے اساتذہ،  فارغ التحصیل طلبہ اور زیرِ تعلیم طلبہ تعطیل کے دوران بریلی حاضر ہو کر آپ کے حلقۂ شاگردی میں داخل ہوتے۔  اسی طرح تبلیغی سفر کے دوران بھی بعض علما و مشائخ آپ سے درسِ حدیث لے کر حضرت نوریؔ بریلوی کے تلامذہ میں شامل ہو کر اپنے آپ کو سعادت مند تصور کرتے۔

        تحقیق سے یہ بھی واضح ہوا ہے کہ آپ اعلا تدریسی صلاحیتوں کے مالک تھے۔  درسِ نظامی کے باریک باریک اُمور پر گہری نظر تھی۔  طلبہ کو نہایت شفقت و محبت سے پڑھاتے۔ آپ کا طریقۂ تعلیم اور درسِ افتا امتیازی شان کا حامل تھا۔  آپ پیچیدہ سے پیچیدہ مسائل کو اس آسانی سے سمجھاتے کہ وہ طلبہ کے ذہن نشین جاتا۔  طلبہ پر نہایت مہربان تھے،  انھیں شفقت و محبت سے نوازتے،  انھیں وظائف دیتے اور علمِ نافع حاصل ہونے کی دعائیں دیتے تھے۔

         آپ کی تدریسی خدمات کا دائرہ اتنا وسیع ہوا کہ آپ سے بالواوسطہ یا بلا واسطہ علمی و فقہی استفادہ کرنے والوں کی ایک بڑی جماعت نہ صرف ہند و پاک بلکہ دیگر ممالک میں بھی موجود ہے۔  جو ہمہ وقت دین و مذہب کی حفاظت و صیانت میں مصروف ہے۔

حواشی

(1)  شاہد علی رضوی، سید، مفتی:مقدمہ مفتی اعظم اور ان کے خلفا، رضا اکیڈمی، ممبئی، ج1 ص 40

(2) شاہد علی رضوی، سید، مفتی:مقدمہ مفتی اعظم اور ان کے خلفا، رضا اکیڈمی، ممبئی، ج1 ص 42

(3) شاہد علی رضوی، سید، مفتی:مقدمہ مفتی اعظم اور ان کے خلفا، رضا اکیڈمی، ممبئی، ج1 ص 44

(4)  شاہد علی رضوی، سید، مفتی:مقدمہ مفتی اعظم اور ان کے خلفا، رضا اکیڈمی، ممبئی، ج1 ص 44/45

(5)  شاہد علی رضوی، سید، مفتی:مقدمہ مفتی اعظم اور ان کے خلفا، رضا اکیڈمی، ممبئی، ج1 ص 46/47

(6)ماہ نامہ استقامت ڈائجسٹ،  کان پور،  مفتیِ اعظم نمبر،  ملخصاً مئی 1983ء،  ص 191

(7)پندرہ روزہ رفاقت:مفتی اعظم نمبر، پٹنہ، جلد ؍۱، شمارہ؍5، فروری 1982ء، ص9

(8)مکتوب حضرت نوریؔ بریلوی بنام محدث اعظم پاکستان محررہ 16؍شوال 1374ھ

(9) شاہد علی رضوی، سید، مفتی:مقدمہ مفتی اعظم اور ان کے خلفا، رضا اکیڈمی، ممبئی، ج1 ص 58/64

(10) شاہد علی رضوی، سید، مفتی:مقدمہ مفتی اعظم اور ان کے خلفا، رضا اکیڈمی، ممبئی، ج1 ص64/67

(11)عبد النعیم عزیزی، ڈاکٹر :ضمیمہ:مفتی اعظم،  مطبوعہ بریلی، چھٹا ایڈیشن، ص 77

٭٭٭

باب سوم

مفتیِ اعظم کی نعتیہ شاعری کا تحقیقی و ادبی مطالعہ

نوریؔؔ بریلوی کے عہد میں نعت گوئی کا معیار اور عام روش

مفتیِ اعظم علامہ مصطفیٰ رضا نوریؔ بریلوی کے عہد میں نعتیہ شاعری کا معیار اوراس کی عام روش کم و بیش وہی تھی جو انیسویں صدی کے نصف آ خر میں نظر آتی ہے۔  جس کا تذکرہ مقالہ نگار نے اپنے پی ایچ ڈی مقالہ کے باب چہارم ’’ہندوستان میں اردو کی نعتیہ شاعری کا تاریخی جائزہ ‘‘ کے تحت دورِ متاخرین نعت گو شعرا میں کیا ہے۔ نوریؔ بریلوی کا عہد (1892ء سے 1981ء تک) ہندوستانی مسلمانوں کے لیے تاریخ کا ایک ایسا کرب ناک اور ناگفتہ بہ دور تھا جو تاریخِ ہند میں اس سے قبل نہ دیکھا گیا تھا۔ نت نئی تحریکات جنم لے رہی تھیں۔  اسلام اور مسلمانوں کو زک پہنچانے کے لیے اسلام دشمن قوتیں شب  و روز نئے نئے منصوبے بنا کر ان کو عملی جامہ پہنا رہی تھیں۔  ۱۸۵۷ء کی پہلی جنگِ آزادی کی ناکامی کے زخم اب دھیرے دھیرے مندمل ہو رہے تھے، لیکن کشورِ ہند پر انگریزوں کی حکومت تشکیل پا چکی تھی۔  چوں کہ نوریؔ بریلوی کا تعلق ہندوستان کے اسی عہدِ افتراق و انتشار سے تھا،  اس لیے ان کی شاعری میں بھی اُس دور میں پیدا ہونے والے حالات و حوادث کی عکاسی دیکھنے کو ملتی ہے۔

        نوریؔ بریلوی کے عہد میں نعت گوئی کا جو معیار قائم ہو چکا تھا اُسے بہ آسانی فہم کر لینا دشوار گزار امر ہے کیوں کہ نوریؔ بریلوی نے بیسویں صدی کا وہ دور دیکھا تھا جب کہ امیرؔ مینائی،   محسنؔ کاکوروی،  حالیؔ ،  شبلیؔ اور نظمؔ طباطبائی کے قائم کردہ معیار میں مزید کچھ نئے رنگ و آہنگ کا اضافہ ہو گیا تھا۔

        تحقیق سے ظاہر ہوتا ہے کہ اس دور میں نعتیہ شاعری دو حلقوں میں منقسم ہو گئی تھی۔  نعت گو شعرا کا ایک حلقہ محسنؔ کاکوروی،  حالیؔ ،  شبلیؔ اور نظم طباطبائی کے زیر اثر کام کر رہا  تھا تو دوسرا طبقہ امیرؔ مینائی،  داغؔ دہلوی اورناسخؔ لکھنوی کے زیر اثر نعت گوئی کے پرچم کو بلند کیے ہوئے تھا۔  اول الذکر شعرا کے یہاں مسائلِ حاضرہ بھی نعت کے دامن میں جگہ پاتے تھے جب کہ آخرالذکر شعرا کے کلام میں تغزل کا فنّی ولسانی در وبست نظر آتا ہے اور ان کے ہاں نعت کا روایتی اسلوب بھی خاصا نمایاں ہے۔  گویا گردشِ ایّام پیچھے کی طرف لوٹ رہا تھا اس کی ایک وجہ یہ بھی ہو سکتی ہے کہ 1857ء کی ناکام جنگِ آزادی کے زخم اب اتنے تازہ نہیں رہ گئے تھے۔  لیکن اول الذکر شعرا نے اس درد اور کسک کو اپنی نعت گوئی میں زندہ رکھا جو امتِ مسلمہ کے زوال کے سبب دلوں میں پیدا ہوئی تھی۔  اس عہد میں پہلے گروہ کی قیادت مولانا ظفرؔ علی خان اور اقبالؔ کے ہاتھوں میں تھی تو دوسرے گروہ کی زمام میلادِ اکبر والے اکبرؔ میرٹھی کے ہاتھ میں تھی۔

        اس پورے منظر نامے میں ایک نئی،  اچھوتی اور ملکوتی،  کوثر وتسنیم سے دھلی ہوئی دل کش آواز اُبھر رہی تھی جسے ہم تیسری آواز کہہ سکتے ہیں۔  اور وہ آواز ہے امام احمد رضا محدثِ بریلوی کی۔  اس آواز میں کوثر و تسنیم کا تقدس،  ملکوتی صفات،  زوالِ امتِ مسلمہ کی تڑپ اور کسک،  تغزل کا فنی اور لسانی رنگ و آہنگ،  تعظیم و توقیرِ ذاتِ رسالت مآب صلی اللہ علیہ و سلم ،  اور عشق و محبت رسول صلی اللہ علیہ و سلم کچھ ایسے متنوع جز  شامل ہو گئے تھے جو اس سے پہلے نعتیہ شاعری کا مقدر نہ بن سکے۔  اور آج یہی تیسری آواز نعتیہ شاعری اور نعت خوانی کی محفلوں اور مجلسوں میں نوائے سروش بن کر امتِ مسلمہ کے قلب و روح پر سایہ فگن ہے۔

        اس آواز کے حامل نعت گو شعرا کی زمام امام احمد رضا بریلوی کے ہاتھ میں تھی اور اس کی ہم نوائی کرنے والوں میں آسیؔ سکندرپوری،  حسنؔ رضا بریلوی،  جمیلؔ بریلوی،  سید محمد اشرفی سیدؔ کچھوچھوی،  نعیم الدین نعیمؔ مرادآبادی،  احمد یار خاں سالکؔ نعیمی،  علیمؔ میرٹھی،  فقیرؔ برکاتی مارہروی وغیرہ کا شمار ہوتا ہے۔

        مفتیِ اعظم علامہ مصطفیٰ رضا نوریؔ بریلوی چوں کہ اسی عہد کے ممتاز عالمِ دین،  عظیم فقیہ و محدث،  بلند پایہ ادیب و مصنف اور مایۂ ناز شاعر ہیں۔  آپ کے کلام کے مطالعہ سے معلوم ہوتا ہے کہ آپ نے اپنے عہد سے اثر تو قبول کیا ہے۔  لیکن آپ کی آواز حسنؔ رضا بریلوی،  جمیلؔ بریلوی،  سیدمحمد سیدؔ کچھوچھوی،  نعیم الدین نعیمؔ مرادآبادی،  احمد یار خاں سالکؔ نعیمی،  علیمؔ میرٹھی،  فقیرؔ برکاتی مارہروی وغیرہ کی آواز سے منفرد اور جدا لگتی ہے۔  لیکن یہ ضرور ہے کہ آپ کی شاعری کا معیار اور روش اس عہد کے شعرائے نعت کے معیار اور روش سے مماثل ہے۔ آپ کے یہاں مسائلِ حاضرہ بھی نعت کے اندر جگہ پاتے ہیں تو تغزل کے فنی اور لسانی درو بست بھی موجود ہیں،  اسی طرح وہ کسک اور تڑپ بھی ہے،  جو اُمتِ مسلمہ کے زوال و انحطاط کے سبب قلب و روح میں پیدا ہو رہی تھی اور محبتِ  رسول صلی اللہ علیہ و سلم کا جذبہ بھی نہاں ہے۔  گویا آ پ کی نعتیہ شاعری میں گو نا گوں اور متنوع جز یک جا ہو گئے ہیں۔

        ’’نعت گوئی کی تاریخ کا اجمالی جائزہ‘‘ کے تحت اس بات کی وضاحت مقالہ نگار نے اپنی پی ایچ ڈی تھیسس کے باب سوم میں کی ہے کہ دنیا کی تمام زبانوں میں رسولِ مختار صلی اللہ علیہ و سلم کی نعتِ پاک کے محبت آمیز ذخائر موجود ہیں۔  اور سار ی دنیا کے مسلمان اپنی اپنی زبانوں میں رسول اللہ صلی اللہ علیہ و سلم کی مقدس بارگاہ میں اپنا نذرانۂ خلوص و محبت نذر کر رہے ہیں۔  نعت کو نورِ لحد اورسرمایۂ آخرت سمجھ کرمسلمان تو مسلمان غیر مسلم بھی نعتِ پاک کی بابرکت محفلوں میں شرکت کو سعادت سمجھتے ہیں اور عقیدت و احترام کے ساتھ نعتِ پاک کی مجالس میں شریک ہوتے ہیں۔  ذکرِ رسول و نعتِ رسول کو آفاقیت اور عالم گیریت بلکہ کائناتی وسعت حاصل ہے۔  جہاں جہاں اس روئے زمین پر کوئی بھی ذی روح موجود ہے وہاں وہاں ذکرِ رسولِ پاک صلی اللہ علیہ و سلم جاری وساری ہے۔  عربی،  فارسی،  اردو اور ہندوستانی زبانوں کی بات تو کُجا دنیا کی ساری زبانیں اور بولیاں ذکرِ نبوی اور حُبِّ نبوی کی شاہد و گواہ ہیں۔

        حضرت نوریؔ بریلوی کی نعت گوئی انتہائی اہمیت کی حامل ہے۔  آپ کی نعتیہ شاعری جملہ شعری و فنی محاسن سے آراستہ اور مزین ہے۔  آپ کے کلام میں رعایتِ لفظی،  صنائع و بدائع،  محاورات کا استعمال،  تجانیس،  پیکر تراشی،  تراکیب سازی،  معنی آفرینی،  جدت طرازی،  ندرتِ بیان،  علاقائی زبانوں کا استعمال،  عربی کی آمیزش اور فارسیت کا رچاؤ  وغیرہ عناصر بدرجۂ اتم موجود ہیں۔

        نوریؔ بریلوی کے علم و فضل اور کمال کا اک جہاں معترف ہے۔  آپ نے اپنی شاعری میں جذبے کی آنچ اور تبحرِ علمی دونوں کو ہم آہنگ کر کے ایک ایسے لب و لہجے کو جنم دیا جو دیدنی بھی ہے اور شنیدنی بھی۔ آپ کے یہاں صنائعِ لفظی و معنوی،  اصنافِ سخن اور جملہ شعری و فنی لوازمات کے تجربات محض تفنّنِ طبع کے طور پر نہیں بل کہ ایک سنجیدہ فکری نظریے کے طور پر کیے گئے ہیں۔  اور یہ تجربات مکمل عالمانہ شان،  ادیبانہ مہارت اور وقار و تمکنت کے ساتھ نوریؔ بریلوی کے کلام میں جلوہ گر نظر آتے ہیں۔

        نعت کا وسیع و عریض دامن پوری کائنات پر اس طرح پھیلا ہوا ہے کہ اس کی بے کراں وسعت،  آفاقیت،  عالم گیریت اور ہمہ جہتی کا کماحقہٗ اندازہ عقلِ انسانی کے بس کی بات نہیں۔  اس کا احاطہ کرنا اربابِ عقل و فہم سے بھی ماورا بل کہ وراء ُ الورا ہے اس میں کسی بھی بلند پایہ نعت گو شاعر اور مداحِ رسول کی بھی کوئی تخصیص نہیں۔  ہاں ! اس راہ میں جو رفعت و منزلت امام احمد رضا محدث  بریلوی ان کے برادرِ اصغر علامہ حسن رضا خاں بریلوی اور فرزندِ ارجمند علامہ مصطفیٰ رضا نوریؔ بریلوی کے حصے میں آئی ہے وہ نہایت اعلا اور منفرد ہے۔  ان شعرائے نعت نے نعت گوئی میں نئے نئے گوشوں اور نئی نئی یافتوں سے نعتیہ ادب کو روشناس اور مالامال کیا ہے۔  ان حضرات نے مقامی زبانوں اور علاقائی بولیوں کا عربی و فارسی کے ساتھ جس طرح ایک مخصوص رنگ و آہنگ اور آمیزہ نعت گوئی میں تیار کیا ہے وہ زبان و ادب کے لیے باعثِ فخر ہے۔

        یہ ایک مسلمہ صداقت ہے کہ ہمارے وہ تجربات جو محض جودتِ فکر کو چمکانے اور جودتِ طبع کی نمایش کے لیے وجود میں لائے جاتے ہیں وہ اکثر و بیش تر ناکامی کے شکار ہو جاتے ہیں۔  مگر جو تجربات نعتِ  رسول صلی اللہ علیہ و سلم کے حوالے سے حضرت نو ریؔ بریلوی نے کیے ہیں وہ مہک مہک اُٹھے ہیں اور ایسا محسوس ہوتا ہے کہ جیسے یہ تجربات خود ملہمِ غیبی کے اشارے پر معرضِ وجود میں آئے ہیں۔  اس سلسلے میں آپ کے مشہور و معروف حمدیہ و نعتیہ کلام    ؎

قلب کو اس کی رویت کی ہے آرزو

جس کا جلوہ ہے عالم میں ہر چار سو

بل کہ خود نفس میں ہے وہ سبحٰنہ

عرش پر ہے مگر عرش کو جستجو

۔ ۔ ۔ ۔ ۔ ۔ ۔ ۔

تو شمعِ رسالت ہے عالم ترا پروانہ

تو ماہِ نبوت ہے اے جلوۂ جانانہ

۔ ۔ ۔ ۔ ۔ ۔ ۔ ۔

کچھ ایسا کر دے مرے کردگار آنکھوں میں

ہمیشہ نقش رہے روئے یار آنکھوں میں

۔ ۔ ۔ ۔ ۔ ۔ ۔ ۔

حبیبِ خدا کا نظارا کروں میں

دل و جان اُن پر نثارا کروں میں

        کی محبت آمیز خوشبوئیں عالمِ اسلام کے اہلِ ایمان و عقیدت کے مشامِ جان و ایمان کو معطر و معنبر کر رہی ہیں۔ غر ض یہ کہ نوریؔ بریلوی کے کلام میں شاعری برائے شاعری نہیں بل کہ شاعری برائے عبادت بن کر جلوہ فگن ہے۔  آپ کے کلام کی سب سے اہم ترین خصوصیت آپ کا عشقِ رسول صلی اﷲ علیہ و سلم ہے کہ آپ نے اسی عشق کے اظہار کے لیے نعت گوئی کو بطورِ وسیلہ استعمال کیا ہے۔

        ذیل میں نوریؔ بریلوی کے ہم عصر غزل گو و نعت نگار شعرا کے منتخب نعتیہ اشعار پیش کیے جا رہے ہیں تا کہ اس بات کا مزید اندازہ ہوسکے کہ نوریؔ بریلوی کے عہد میں نعت گوئی کا معیار اور روش کیا تھی   ؎

گزرے جس راہ سے وہ سیّدِ والا ہو کر

رہ گئی ساری زمیں عنبرِ سارا ہو کر

چمنِ طیبہ ہے وہ باغ کہ مرغِ سدرہ

برسوں چہکے ہیں جہاں بلبلِ شیدا ہو کر

صرصرِ دشتِ مدینہ کا مگر آیا خیال

رشکِ گلشن جو بنا غنچۂ دل وا ہو کر

                                            امام احمد رضاؔ بریلوی (م1921ء)

مدیحِ سرورِ کونین میں خامہ اٹھاتا ہوں

خیالِ کفر کی ظلمت پہ اک بجلی گراتا ہوں

شبِ اوہام ہے،  شمعِ یقیں محفل میں لاتا ہوں

چراغِ طورِ ایمن کوہِ معنی پر جلاتا ہوں

الٰہی شوخیِ برق تجلی دہ زبانم را

قبول خاطر موسیٰ نگاہاں کن بیانم را

محمد پیشوا اور رہنمائے خلق و عالم ہیں

معزز ہیں مقدس ہیں معظم ہیں مکرم ہیں

فروغِ محفلِ ہستی میں نورِ عرشِ اعظم ہیں

حبیبِ حق ہیں ممدوحِ ملک ہیں فخرِ آدم ہیں

انہیں کے رنگ سے رنگِ گلِ ہستی کی زینت ہے

انہیں کی بو سے عطر آگیں بنی آدم کی طینت ہے

                                        اکبرؔ الٰہ آبادی (م1921ء)

جو پایا ناشناس اہلِ جہاں کو شاہِ بطحا نے

تو بس آئینۂ زانو سے پیدا کی شناسائی

رہے غارِ حرا میں مہرِ انور ایک مدت تک

پسندِ طبع تھی عزلت شریکِ حال تنہائی

نہ تھا جز ذکرِ حق دنیا و مافیہا سے کچھ مطلب

اسی عالم میں گذرا عالمِ طفلی و برنائی

                                                نظمؔ طباطبائی (م1933ء)

کلفتِ قطعِ منازل ہوئی کافور ہے آج

ہے مدینہ جو نزدیک تو سب دور ہے آج

سنگِ در تک تو بہ ہر حال رسائی بخشی

دیکھوں کیا کیا مرے سرکار کو منظور ہے آج

اب بھی دیدار سے محروم ہی رکھیے گا ہمیں

تھی جو اک حسرتِ پابوس بہ دستور ہے آج

                                                محمد علی جوہرؔ (م1931ء)

وہ شمع اجالا جس نے کیا چالیس برس تک غاروں میں

اک روز چمکنے والی تھی دنیا کے سب درباروں میں

گر ارض و سما کی محفل میں ’لولاک لما‘ کا شور نہ ہو

یہ رنگ نہ ہو گل زاروں میں یہ نور نہ ہو سیّاروں میں

وہ جنس نہیں ایمان جسے لے آئیں دکانِ فلسفہ سے

ڈھونڈے سے ملے گی عاقل کو یہ قرآں کے سی پاروں میں

                                        ظفرؔ علی خاں (م1956ء)

جو تیرے کوچے کے ساکنوں کا فضائے جنت میں دل نہ بہلے

تسلیاں دے رہی ہیں حوریں خوشامدوں سے منا منا کر

شہیدِ عشق نبی کے مرنے میں بانکپن بھی ہیں سوطرح کے

اجل بھی کہتی ہے زندہ باشی ہمارے مرنے پہ زہر کھا کر

ترے ثنا گو عروسِ رحمت سے چھیڑ کرتے ہیں روزِ محشر

کہ اس کو پیچھے لگا لیا ہے گناہ اپنا دکھا دکھا کر

شہیدِ عشقِ نبی ہوں میری لحد پہ شمعِ قمر جلے گی

اٹھا کے لائیں گے خود فرشتے چراغِ خورشید سے جلا کر

                                        اقبالؔ (م 1938ء)

عدم سے لائی ہے ہستی کو آرزوئے رسول

کہاں کہاں لیے پھرتی ہے جستجوے رسول

تلاشِ نقشِ کفِ پائے مصطفی کی قسم

چنے ہیں آنکھ سے ذرّاتِ خاکِ کوے رسول

عجب تماشا ہو میدانِ حشر میں بیدمؔ

کہ سب ہوں پیشِ خدا میں روبروئے رسول

                                        بیدمؔ شاہ وارثی (م1944ء)

حیران ہوئے برق اور نظر اک آن ہے اور برسوں کاسفر

راکب نے کہا اﷲ غنی مرکب نے کہا سبحان اﷲ

طالب کا پتا مطلوب کو ہے مطلوب ہے طالب سے واقف

پردہ میں بلا کر مل بھی لیے پردہ بھی رہا سبحان اﷲ

ہے عبد کہاں معبود کہاں معراج کی شب ہے راز نہاں

دو نور حجابِ نور میں تھے خود رب نے کہا سبحان اﷲ

                                        حامد رضا بریلوی (م1942ء)

نام کے نقش سے روشن یہ نگینہ ہو جائے

کعبۂ دل مرے اﷲ مدینہ ہو جائے

اس کی تقدیر جو پامال ہو تیرے در پر

اس کی تقدیر کہ جو خاکِ مدینہ ہو جائے

دفن ہوں ساتھ مرے میرے گہر ہائے سخن

خاک میں مل کے نمایاں یہ دفینہ ہو جائے

 جان کی طرح تمنا ہے یہی دل میں ریاضؔ

مروں کعبہ میں تو منھ سوے مدینہ ہو جائے

                                        ریاضؔ خیرآبادی (م1934ء)

دل نثارِ مصطفیٰ جاں پائمالِ مصطفیٰ

یہ اویسِ مصطفیٰ وہ بلالِ مصطفیٰ

سب سمجھتے ہیں اسے شمعِ شبستانِ حرا

نور ہے کونین کا لیکن جمالِ مصطفیٰ

عالمِ ناسوت میں اور عالمِ لاہوت میں

کوندتی ہے ہر طرف برقِ جمالِ مصطفیٰ

                                        اصغرؔ گونڈوی (م1936ء)

مظہرِ شانِ کبریا صلِ علیٰ محمدٍ

آئینۂ خدا نما صلِ علیٰ محمدٍ

موجبِ نازِ عارفاں باعثِ فخرِ صادقاں

سرورِ خیلِ انبیا صلِ علیٰ محمدٍ

مرکزِ عشقِ دل کشا مصدرِ حسنِ جاں فزا

صورت و سیرتِ خدا صلِ علیٰ محمدٍ

مونسِ دل شکستگاں پُشتِ پناہِ خستگاں

شافعِ عرصۂ جزا صلِ علیٰ محمدٍ

                                        حسرتؔ موہانی (م1951ء)

سلام اے صبحِ کعبہ السلام اے شامِ بت خانہ

تو چمکا بزمِ آزر میں بہ اندازِ خلیلانہ

حریمِ پاک تیرا وہ بلند ایواں حقیقت کا

جہاں جبریل بھی ناچیز سا ہے ایک پروانہ

کہیں تو زندگی پیرا بہ اندازِ لبِ عیسیٰ

کہیں تو خطبہ فرما اوجِ طائف پر کلیمانہ

کچھ اس انداز سے جلوہ نمائی تو نے فرمائی

کہ ہر ذرّہ زمیں کا ہو گیا تیرا ہی دیوانہ

یہ دنیا تیری نظروں میں مثالِ نقطۂ ناقص

یہ عالم خرمنِ عرفاں کا تیرے صرف اک دانہ

                                        سیمابؔ اکبرآبادی(1951ء)

نیرنگیاں عجب تھیں محمّد کے نور کی

ہر جا نئی ادا تھی کرم کے ظہور کی

آنکھوں میں روشنی ہے محمّد کے نور کی

بجلی چمک رہی ہے ثنا میں ظہور کی

غنچوں میں عطر بیز ہے خوشبو حضور کی

نیرنگیاں ہیں گل میں محمّد کے نور کی

رحمت نے آ کے جوش میں کیں غرق کشتیاں

عیبوں کی،  معصیت کی،  خطا کی،  قصور کی

                                        اکبر وارثی میرٹھی (م1952ء)

آمنہ بی بی کے گلشن میں آئی ہے تازہ بہار

پڑھتے ہیں صلی اللہ و سلم آج در و دیوار

بارہ ربیع الاول کو وہ آیا ہے دُرِّ یتیم

ماہِ رسالت مہرِ نبوت صاحبِ خلقِ عظیم

                                سید احمد حسین امجدؔ حیدرآبادی(م1961ء)

تو صبحِ ازل آئینۂ حسن ازل بھی

اے صلِ علیٰ صورتِ سلطانِ مدینہ

اے خاکِ مدینہ تری گلیوں کے تصدق

تو خلد ہے تو جنتِ سلطانِ مدینہ

ظاہر میں غریب الغرباء پر یہ عالم

شاہوں سے سوا سطوتِ سلطانِ مدینہ

                                        جگر مرادآبادی (1960ء)

بد ہیں اگرچہ ہم حضور،  آپ کے ہیں مگر ضرور

کس کو سنائیں حالِ دل،  تم کو نہیں سنائیں تو

آپ کے در پہ گر نہ آئیں،  کون سا در ہے جس پہ جائیں

سامنے کس کے سر جھکائیں،  آپ ہمیں بتائیں تو

دل کی مراد ان کی دید،  دید ہے ان کی دل کی عید

عید نہیں ہے کچھ بعید،  لطف سے گر بلائیں تو

                                علامہ سید نعیم الدین نعیمؔ مرادآبادی(م1948ء)

تمنا ہے کہ مرتے وقت ہم بھی مسکراتے ہوں

زباں پر یا محمد ہو جب اس دنیا سے جاتے ہوں

بنے اے کاش اس دم سازِ ہستی آخری ہچکی

فرشتے نغمۂ صل علیٰ جب گنگناتے ہوں

شبِ فرقت کی ان رنگینیوں پر جان و دل صدقے

تمہاری یاد ہو دل میں ستارے مسکراتے ہوں

سکوں کی ساعتوں میں کون ان کو بھول سکتا ہے

دمِ مشکل جو ہر اک بے نوا کے کام آتے ہوں

                                        شکیل بدایونی (م1970ء)

تری نعلِ مقدس جس کے سر پر سایہ گستر ہے

وہی فرماں روائے ہفت کشور ہے سکندر ہے

خدا ہی جانے ان کے سر کی عزت اور عظمت کو

قدم ان کے جہاں پہنچے وہ عرشِ ربِّ اکبر ہے

ترے الطافِ بے پایاں تری چشم کرم مولا!

ہمیٖں پر ہے ہمیٖں پر ہے ہمیٖں پر ہے ہمیٖں پر ہے

                                مولاناحسنینؔ رضا بریلوی(م1981ء)

جس زمیں کو پائے بوسی کا شرَف حاصل ہوا

اس زمیں میں لعل و یاقوت و گہر پیدا ہوئے

عارفِ ارض و سما میرِ بساطِ کائنات

خیر سے خیر الامم،  خیرالبشر پیدا ہوئے

جس نے دیکھا پھر نہ دیکھا اور کچھ ان کے سوا

اک نظر میں سیکڑوں حُسنِ نظر پیدا ہوئے

اب نہ اتریں گے صحیفے اب نہ آئیں گے  رسول

لے کے قرآں آخری پیغام بَر پیدا ہوئے

                                        احسان دانش(م1982ء)

اے مسلمانو! مبارک ہو نویدِ فتحِ یاب

لو وہ نازل ہو رہی ہے چرخ سے امُّ الکتاب

وہ اٹھے تاریکیوں کے بامِ گردوٗں سے حجاب

وہ عرب کے مطلعِ روشن سے ابھرا آفتاب

گرد بیٹھی کفر کی،  اٹھی رسالت کی نگاہ

گر گئے طاقوں سے بت خم ہو گئی پشتِ گناہ

چرخ سے آنے لگی پیہم صدائے لا الٰہ

ناز سے کج ہو گئی آدم کے ماتھے پر کلاہ

آ گیا جس کا نہیں ہے کوئی ثانی وہ رسول

روحِ فطرت پر ہے جس کی حکمرانی وہ رسول

ٰجس کا ہر تیور ہے حکمِ آسمانی وہ رسول

موت کو جس نے بنایا زندگانی وہ رسول

محفلِ سفاکی و وحشت کو برہم کر دیا

جس نے خوں آشام تلواروں کو مرہم کر دیا

                                        جوشؔ ملیح آبادی(م1982ء)

سلام اے آمنہ کے لال اے محبوبِ سبحانی

سلام اے فخرِ موجودات فخرِ نوعِ انسانی

سلام اے ظلِ رحمانی سلام اے نورِ یزدانی

ترا نقشِ قدم ہے زندگی کی لوحِ پیشانی

ترے آنے سے رونق آ گئی گل زارِ ہستی میں

شریکِ حالِ قسمت ہو گیا پھر فضلِ ربّانی

سلام اے صاحبِ خلقِ عظیم انساں کو سکھلائے

یہی اعمالِ پاکیزہ یہی اشغالِ روٗحانی

حفیظِؔ بے نوا بھی ہے گدائے کوچۂ الفت

عقیدت کی جبیں تیری مروت سے ہے نورانی

ترا در ہو،  مرا سر ہو،  مرا دل ہو،  ترا گھر ہو

تمنا مختصر سی ہے مگر تمہید طولانی

سلام اے آتشیں زنجیرِ باطل توڑنے والے

سلام اے خاک کے ٹوٹے ہوئے دل جوڑنے والے

                                         حفیظؔ جالندھری(م1982ء)

مدینہ کی زمیں بھی کیا زمیں معلوم ہوتی ہے

لیے آغوش میں خلدِ بریں معلوم ہوتی ہے

ترے جوٗد و کرم کی ہر ادا میں یارسول اللہ

نمودِ شانِ رب العالمیں معلوم ہوتی ہے

تعالیٰ اللہ اے ارضِ مدینہ تیرا کیا کہنا

بلندی عرش کی زیرِ زمیں معلوم ہوتی ہے

                                مولاناسید محمدؔ اشرفی محدث کچھوچھوی(م1383ھ)

آ گیا رحمت بہ داماں موسمِ حج آ گیا

نغمہ ہائے شوق اربابِ طرب گانے لگے

عازمانِ کوچۂ طیبہ پَہ ہنگامِ وداع

کوثر و زم زم کے ساگر بھر کے چھلکانے لگے

پھر سکونِ گم شدہ کی جستجو ہونے لگی

وہ جنونِ شوق کے لمحات یاد آنے لگے

                                زائرِ حرم حمیدؔ صدیقی لکھنوی(م1385ھ)

پامال کیا برباد کیا،  کم زور کو طاقت والوں نے

جب ظلم و ستم حد سے گزرے،  تشریف محمّد لے آئے

تہذیب کی شمعیں روشن کیں، اونٹوں کے چرانے والوں نے

کانٹوں کو گلوں کی قسمت دی، ذرّوں کے مقدر چمکائے

عورت کو حیا کی چادر دی،  غیرت کا غازہ بھی بخشا

سینوں میں نزاکت پیدا کی،  کردار کے موتی بکھرائے

                                        ماہرالقادری(م1398ھ)

        حضرت نوریؔ بریلوی کے عہد میں نعت گوئی کی مبارک و مسعود روش اور اس کے معیار پر روشنی ڈالتے ہوئے جن شعرائے گرامی کے نعتیہ اشعار پیش کیے گئے ہیں ان کے مطالعہ کے بعد آئیے نوریؔ بریلوی کی نعتیہ شاعری کا تحقیقی و ادبی جائزہ لیتے ہیں۔  

٭٭٭

نوریؔ بریلوی۔ نعتیہ شاعری کا آغاز

مفتیِ اعظم علامہ مصطفیٰ رضا نوریؔ بریلوی اپنے والدِ ماجد امام احمد رضا محدثِ بریلوی نور اللہ مرقدہٗ کے علم و فضل اور زہد و تقوا کے جانشین اور وارث و امیٖن تھے۔ فقہ،  حدیث،  تفسیر اور دیگر علوم عقلیہ و نقلیہ کی طرح تقدیسی شاعری بھی آپ کو ورثے میں ملی تھی۔  اور یہی شاعری تا عمر آپ کی شہنازِ تخییل اور ناہیدِ سُخن بنی رہی۔

        سرکارِ ابد قرار روحی فداہ،  نبیِ امّی،  ختمی مرتبت صلی اللہ تعالیٰ علیہ و سلم و اصحاب و اولیا سے عشق و محبت و الفت،  خانوادۂ رضا کا طرۂ امتیاز ہے۔  حضرت نوریؔ بریلوی نہ صرف عاشقِ رسول اور عقیدت کیشِ اولیا بالخصوص شیدائے غوث الورا تھے بل کہ عشقِ مصطفوی اور عقیدتِ اولیا کی اشاعت و تشہیر بھی ان کی حیات کا مقصد اور ان کا مشن تھا فرماتے ہیں    ؎

ترا ذکر لب پر خدا دل کے اندر

یوں ہی زندگانی گذارا کروں میں

دمِ واپسیں تک ترے گیت گاؤں

محمّد محمّد پکارا کروں میں

        ظاہر ہے ایک ایسے عاشقِ رسول کا وہ بھی ایک خالص دینی،  روحانی،  علمی اور ادبی خانوادے کے چشم و چراغ کی حیثیت سے تقدیسی شاعری یعنی نعتیہ شاعری (اسی کے تحت حمد و مناجات اور منقبت کو بھی رکھا گیا ہے)سے لگاؤ اور شغف فطری اور قدرتی امر تھا۔  جسے عشق و محبت،  عقیدت و الفت،  تعظیم و توقیر،  دینی دردمندی اور پاکیزہ ومقدس ماحول نے نکھارا اور بانکپن عطا کیا۔

        حضرت نوریؔ بریلوی 18؍ سال کی عمر میں درسیارت سے فارغ ہوئے لہٰذا دونوں باتیں ممکن ہیں کہ زمانۂ طالب علمی سے ہی آپ نے شعر کہنا شروع کیا ہو یا باقاعدہ شعر گوئی کا آغاز بعدِ فراغت کیا ہو اس بابت اب تک کوئی تحقیق سامنے نہیں آسکی ہے اوریوں بھی اس سے کوئی فرق بھی نہیں پڑتا کہ کس عمر میں شاعری کا آغاز ہوا۔

        سید تعظیم علی نقوی شایاںؔ بریلوی کے بہ قول حضرت نوریؔ بریلوی کا تخلص پہلے ’’شیداؔ ‘‘  تھا۔  انھوں نے اپنی تالیف میں آپ کے دونوں تخلص لکھے ہیں یعنی ’’شیدا‘‘ و ’’نوری‘‘۔  اس سے ظاہر ہوتا ہے کہ شاعری کا آغاز بہ بہر حال! جو انی ہی میں ہو گیا تھا۔

        تعظیم علی نقوی شایاںؔ بریلوی نے شیداؔ تخلص سے حضرت کے دو شعر بھی لکھے ہیں     ؎

بزمِ عالم میں ہزاروں لائے پیغمبر چراغ

کوئی کب لایا جہاں میں آپ سے بہتر چراغ

ظلمتِ مرقد کا اندیشہ ہے شیداؔ کس لیے

لے کے آئیں گے لح دمیں شافعِ محشر چراغ (1)

        حضرت نوریؔ بریلوی کے نعتیہ دیوان کے مندرجۂ ذیل تین تاریخی نام ہیں۔ یہ تینوں آپ نے خود اپنے قلمی دیوان کے شروع میں اپنے ہی قلم سے لکھے تھے  :

        (1)   حضور بیانِ نور۔ 1333ھ

        (2)   گلستانِ نعتِ نبی۔ 1347ھ

        (3)   سامانِ بخشش۔ 1354ھ

        دیوان کے مندرجہ بالا تینوں نام میں پہلا نام ’’حضور بیانِ نور‘‘سے ظاہر ہے کہ حضرت نوریؔ بریلوی نے1333ھ میں اچھے خاصے کلام پر مشتمل دیوان مرتب کر لیا تھا یعنی 23 ؍ سال کی عمر میں۔  (کیوں کہ حضرت نوریؔ بریلوی کاسنہ ولادت 1310ھ ہے)

        اس سے بھی ظاہر ہوتا ہے کہ حضرت نوریؔ بریلوی نے شاعری کا آغاز کم عمری ہی میں کر دیا ہو گا یعنی زمانۂ طالب علمی میں اور پھر18؍ سال کی عمر میں درسیات سے فارغ ہونے کے بعد آپ پر فتویٰ نویسی، درس وتدریس، رشد و ہدایت وغیرہ کی ذمہ داری بھی عائد ہو گئی تھی لہٰذا اشعار کہنے کا زیادہ وقت نہ مل پاتا رہا ہو گا اور چوں کہ آپ نے بہ عمر 23؍سال (حیاتِ مولانا احمد رضا ہی میں کہ آپ کا سنہ وصال 1340ھ ہے) اچھے خاصے کلام پر مشتمل بہ نام ’’حضور جانِ نور ‘‘ کے نام سے مجموعہ مرتب کر لیا تھا لہٰذا یہ بھی واضح ہو جاتا ہے کہ آپ کو شاعر ی سے بڑا لگاؤ تھا اور آپ بہت زود گو بھی تھے۔

        یہ بات تو ابتدا میں واضح کی جاچکی ہے کہ شاعری حضرت نوریؔ بریلوی کو ورثہ میں ملی تھی اور محبتِ رسول و عقیدتِ نائبینِ رسول نیز گھریلو ماحول نے شعر گوئی کی تحریک میں تیزی پیدا کی اور چوں کہ بریلی میں وصالِ امام احمد رضا کے بعد عرسِ رضا میں نعتیہ مشاعرہ کا انعقاد بھی ہوتا تھا۔  اس میں آپ بھی شرکت فرماتے تھے لہٰذا ایسا گمان گزرتا ہے کہ ذوقِ شعر گوئی کو اور بھی تقویت و تحریک ملی۔

        حضرت نوریؔ بریلوی کے تقدیسی شاعری سے لگاؤ کا اندازہ مندرجہ ذیل واقعات سے بھی لگایا جا سکتا ہے۔

        ڈاکٹر عبدالنعیم عزیزی لکھتے ہیں :

        ’’ ایک بار حضرت( حضرت نوریؔ بریلوی)ضلع بریلی کے ایک گاؤں میں تشریف لے گئے تھے۔ صاحب خانہ کی آٹھ،  نو برس کی لڑکی کے ہاتھ میں کتاب کا ایک ورق تھا جس پر داغؔ دہلوی کی ایک غزل تھی جس کا ایک مصرع اس طرح تھا     ع

کون کہتا ہے آنکھیں چرا کر چلے

        حضرت کو مصرع بہت پسند آیا اور وہیں بیٹھے بیٹھے تھوڑی دیر میں نعت لکھ دی۔ ‘‘(2)

         مصرع داغؔ ۔ ’’کون کہتا ہے آنکھیں چرا کر چلے‘‘۔ پر حضرت نوریؔ بریلوی نے جو نعتِ پاک کہی اس کا مطلع اس طرح ہے    ؎

کون کہتا ہے آنکھیں چرا کر چلے

کب کسی سے نگاہیں بچا کر چلے

        یہ نعت پاک 34 ؍اشعار  پر مشتمل ہے۔ ایک نشست میں وہ بھی قلیل وقت میں اتنی طویل نعت کہہ دینا حضرت نوریؔ بریلوی کی شعری حرکیت اور زود گوئی پر دال ہونے کے ساتھ ساتھ شاعری سے ان کے شغف اور لگاؤ کی بھی شاہد و گواہ ہے۔

        دوسرا واقعہ حضرت نوریؔ بریلوی کے اولین سوانح نگار ڈاکٹر عبدالنعیم عزیزی اس طرح بیان کرتے ہیں :

        ’’ ایک بار حضرت سفر میں تھے راستے میں کاغذ کا ایک ورق پڑا ملا جس کو حضرت نے اٹھا لیا۔ اس میں اکبرؔ الہ آبادی کی ایک نظم کے کچھ اشعار تھے جس کا مضمون کچھ اس طرح تھا کی اس میں ڈور، الجھاؤ، اور پتنگ وغیرہ کا تذکرہ آتا تھا۔

        حضرت کو یہ مضمون بہت پسند آیا بعد میں حضرت نے ایک طویل نظم کہی جس کا ایک شعر مندرجہ ذیل ہے اور جو بہت مشہور ہے    ؎

دہریہ الجھا ہوا ہے دہر کے پھندے میں یوں

سارا الجھا سامنے ہے اور سرا ملتا نہیں (3)‘‘

        یہ نعتِ  پاک بھی طویل ہے اور47 ؍اشعار پر مشتمل ہے۔ اس نعت کے لکھنے سے بھی حضرت نوریؔ بریلوی کی زود گوئی اور شاعری سے قلبی لگاؤ کا پتہ چلتا ہے۔

        یہاں یہ امر بھی ملحوظ رہ کہ نوریؔ بریلوی کی ذمہ داریاں گوناگوں تھیں،  رضوی دارالافتاء کا اہتمام،  جامعہ مظہرِاسلام کا انصرام،  کارِ فتویٰ کی کثرت،  تبلیغِ دین کے اسفار،  تصنیف و تالیف اور دیگر مصروفیات سے جو وقت بچ جاتا تھا یا بچا لیا جاتا تھا اس میں نوریؔ بریلوی نعت گوئی کیا کرتے تھے۔  پھر بھی آپ کی شاعری ایسی عمدہ شاعری ہے کہ سلاست و روانی،  زبان کی شگفتگی اور محاورہ کے اعتبار سے جن شعرا کی حیثیت کو مسلم مانا گیا ہے ان کی صف میں بلا شبہہ شامل ہو نے کی حق دار ہے۔

حواشی

(1)تعظیم علی نقوی شایاںؔ بریلوی، سید:تاریخِ شعرائے روہیلکھنڈ، ج2، ص759

(2) عبدالنعیم عزیزی، ڈاکٹر:مفتیِ اعظمِ  ہند، اختر رضا بکڈپو، بریلی، 1981ء، ص58

(3)عبدالنعیم عزیزی، ڈاکٹر:مفتیِ اعظمِ  ہند، اختر رضا بکڈپو، بریلی، 1981ء، ص58

٭٭٭

شاعری سے لگاؤ اور تخییلی رویّے

تخییلی رویّے اور شاعری سے لگاؤ کا ایک دوسرے سے خاص تعلق ہے ایک فطری شاعر وہ بھی نعت و منقبت کا شاعر جب بھی اپنے ممدوحین کا تصور کرتا ہے یا ان کے تذکرے کرتا ہے یاسنتا ہے یاگستاخانِ زمانہ ان کی تنقیص و توہین کرتے ہیں تب شاعر کا قلم حرکت میں آ جاتا ہے۔

        حضرت نوریؔ بریلوی کے والد ماجد امام احمد رضا محدثِ بریلوی،  عمِ محترم علامہ حسن رضا خاں حسنؔ بریلوی اور برادرِ اکبر حجۃ الاسلام علامہ حامد رضا خاں حامدؔ بریلوی وغیرہ کے  دواوین حضرت نوریؔ بریلوی کے گھر ہی میں تھے۔  آپ کو ان کے مطالعے سے بھی شعر گوئی کی تحریک و ترغیب ملتی تھی علاوہ اس کے فتویٰ نویسی،  درسِ فقہ و حدیث،  نیز دینی تصنیف و تالیف میں حضور جانِ نور صلی اللہ علیہ و سلم نیز نائبین رسول کے فضائل و مناقب اور گستاخانِ  رسول و اصحاب و عترت و اولیا وغیرہ کے ردّ کے توسط سے بھی نعت و منقبت لکھنے کی تحریک و ترغیب ملتی تھی اور حضرت نوریؔ بریلوی اپنے شعری حرکیت کو  بروئے کار لا کر اشعار قلم بند کیا کرتے تھے۔

        حضرت نوریؔ بریلوی کی شاعر ی دراصل وہبی تھی کسبی نہیں۔  حضرت نوریؔ بریلوی صرف شاعر ہی نہیں شارحِ ادب بھی تھے اور طلاقتِ لسانی،  برجستگی و شگفتہ کلامی کا پیکر بھی۔  آپ نے اپنے والد ماجد امام احمد رضا بریلوی کے چند اشعار کی شرح بھی فرمائی جسے فتاویٰ مصطفویہ میں نشانِ خاطر کیا جا سکتا ہے۔  نیز تصنیفِ رضا’’ الاستمداد علیٰ اجیال الارتداد ‘‘ پر نوریؔ بریلوی نے حواشی لکھے ہیں اور اشعار کی شرح فرمائی ہے۔ ان امور سے بھی شعر وسخن سے آپ کے دلی لگاؤ اور شغف کا اندازہ ہوتا ہے نیز تخییلی رویّے کا پتہ چلتا ہے۔

        ادیبِ شہیر مولانا اسلم بستوی بلرام پوری آپ کی شعر فہمی،  طلاقتِ لسانی،  برجستگی اور شگفتہ کلامی بیان کرتے ہوئے حضرت نوریؔ بریلوی کی زبان دانی کا ایک واقعہ یوں تحریر کیا ہے:

        ’’ مَیں نے ایک ملاقات میں عرض کیا :’ حضور ایک جدید شاعر کو اَعلا حضرت کے اس مصرعے۔۔ ’کھائی قرآں نے خاکِ گذر کی قسم ‘ ۔۔ پر اعتراض ہے،  شاعر کا کہنا ہے کہ ’’خاکِ گذر‘‘ کی ترکیب صحیح نہیں ہے،  اس لیے کہ اَعلا حضرت نے غالباً ’’خاکِ گذر ‘‘ سے ’’خاکِ رہِ گذر‘‘ مراد لیا ہے۔  اوّل تو ’’خاکِ گذر‘‘ کی ترکیب بالکل نئی ہے،  اساتذہ کے کلام میں کہیں اس کی نظیر نہیں ملتی،  دوّم یہ کہ مفہوم کی صحیح ترسیل نہیں ہو پاتی،  سوّم یہ کہ ’’گذر‘‘ بمعنی ’’گذرنا‘‘ ہوتا ہے اور گذرنا مرنے کو بھی کہتے ہیں اس لیے ’’خاکِ گذر‘‘ کا یہاں کچھ اور مفہوم بھی نکلتا ہے،  وغیرہ وغیرہ قسم کی لایعنی باتیں کہتا ہے۔ ‘

        اس پر آپ(مفتیِ اعظم) نے ارشاد فرمایا :’ جدیدیے ابھی پچاس سال اَعلا حضرت کو پڑھیں،  اور پچاس سال سمجھیں،  ۔۔ ’’خاکِ گذر‘‘ کی ترکیب بالکل نئی ہے مسلّم!۔۔ لیکن یہ تو کوئی اعتراض نہ ہوا،  اس لیے کہ غالبؔ وغیرہ اپنی نئی ترکیبوں کی وجہ سے بھی ممتاز سمجھے جاتے ہیں،  درآں حال یہ کہ وہاں کچھ بے معنی تراکیب بھی ملتی ہیں جب کہ اَعلا حضرت کی یہ اور اس طرح کی بہت ساری نئی تراکیب بامعنی اور برمحل ہیں،  اس طرح اَعلا حضرت نے نعتیہ شاعری میں نہ صرف اضافہ کیا ہے بل کہ خوش آیند امکانات کے بہت سے نئے دروازے بھی کھول دئیے ہیں،  جو فنِّ شاعری کے لیے فالِ نیک ہے۔  اور یہ کہ اَعلا حضرت کے کلام کے لیے دوسروں کی نظیر کیوں تلاش کی جائے ؟ ۔۔ اَعلا حضرت کا کلام بجائے خود دوسروں کے لیے نظیر ہے۔

        اور یہ کہ اس سے مفہوم کی صحیح ترسیل جاہلوں تک نہیں ہو پاتی اور اَعلا حضرت کی شاعری جاہلوں کے لیے ہے بھی نہیں ! ۔۔

        اَعلا حضرت نے ’’خاکِ گذر‘‘ کی ترکیب  وانت حل بہذا البلد  کی رعایت سے استعمال کی ہے جو اس آیتِ مبارکہ کی صحیح ترجمانی بھی ہے،  اس کے برخلاف بات غلط ہو جاتی۔ 

        اور یہ کہ’’ گذر‘‘ بمعنی ’’گذرنا‘‘ یعنی ’’ مرنا ‘‘ہے تو اس شاعر سے کہو کہ تمہارے مرنے کے بعد کیا تمہاری قبر کو ’’گذر گاہ ‘‘ کہا جائے گا؟‘‘

( ماہ نامہ استقامت: مفتیِ اعظم نمبر،  ماہ مئی ۱۹۸۳ء،  کان پور،  ص ۴۲۰)

        اسی طرح حضرت نوریؔ بریلوی نے مدیر زمین دار ظفر علی خاں کے تین کفری اشعار کی شرح کرتے ہوئے ان اشعار کو خالص کفری قرار دیتے ہوئے ظفر علی خاں پر حکمِ کفر عائد کیا ہے، اشعار مندرجہ ذیل ہیں    ؎

یہ سچ ہے اس پہ خدا کا نہیں چلا قابو

مگر ہم اس بتِ کافر کو رام کر لیں گے

بجائے کعبہ خدا آج کل ہے لندن میں

وہیں پہنچ کے ہم اس سے کلام کر لیں گے

جو مولوی نہ ملے گا تو مالوی ہی سہی

خدا خدا نہ سہی رام رام کر لیں گے

        تفصیل کے لیے خاطر نشیٖن کریں رسالہ ’ ’القسورۃ علی ادّوار الحمرۃالکفرۃ (1343ھ ) ‘‘ رسالہ کا عرفی نام ہے ’’سیف الجبار علی کفر زمین دار‘‘ اور لقبی نام ہے ’’ظفر علی رمۃ من کفر‘‘۔ 

        درج بالا شرح و نقد سے حضرت نوریؔ بریلوی کے شعری لگاؤ اور ساتھ ہی ساتھ تخییلی رویّے کا بھی اندازہ ہوتا ہے۔

        حضرت نوریؔ بریلوی نے اپنے والد ماجد امام احمد رضا بریلوی کے کلام سے بھی استفادہ کیا ہے۔  ’’گیسو‘‘کی ردیف پر امام احمد رضا کی ایک نعت ہے جس کا مطلع ہے    ؎

چمنِ طیبہ میں سنبل جو سنوارے گیسو

حوریں بڑھ کر شکنِ ناز پہ وارے گیسو

        اسی زمین پر نوریؔ بریلوی نے بھی نعت کہی ہے جس کا مطلع ہے      ؎

کیا کہوں کیسے ہیں پیارے ترے پیارے گیسو

دونوں عارض ہیں ضحی لیل کے پارے گیسو

        حضرت رضا بریلوی کے اشعار ہیں    ؎

ذبح ہوتے ہیں وطن سے بچھڑے

دیس کیوں گاتے ہیں گانے والے

ارے بد فال بُری ہوتی ہے

دیس کا جنگلا سنانے والے

        اسی مضمون پر حضرت نوریؔ بریلوی کے دو شعر ملاحظہ کریں        ؎

دیس سے ان کے جو الفت ہے تو دل نے میرے

اس لیے دیس کا جنگلا بھی تو گانے نہ دیا

دیس کی دھن ہے وہی راگ الاپا اس نے

نفس نے ہائے خیال اس کا مٹانے نہ دیا

        کلامِ  نوری اور کلامِ  رضاؔ کی معنوی اور صوتی ہم آہنگی کی مزید چند مثالیں ذیل میں نشانِ خاطر کریں      ؎

واہ کیا جود و کرم ہے شہ بطحا تیرا

’نہیں ‘ سنتا ہی نہیں مانگنے والا تیرا

مانگیں گے مانگے جائیں گے منہ مانگی پائیٕں گے

سرکار میں نہ ’لا‘ ہے نہ حاجت اگر کی ہے

                                                                (رضاؔ )

جس نے جو مانگا وہ پایا اور بے مانگے دیا

پاک منہ پر حرف آتا ہی نہیں انکار کا

سنو گے ’لا‘ نہ زبانِ کریم سے نوریؔ

کریم ہیں یہ خزانے لٹانے آئے ہیں

                                                              (نوریؔ )

۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔

لاوربِّ العرش جس کو جو ملا ان سے ملا

بٹتی ہے کونین میں نعمت رسول اللہ کی

                                                                (رضاؔ )

دوجہاں میں بٹتا ہے باڑہ اسی سرکار کا

دونوں عالم پاتے ہیں صدقہ اسی سرکار کا

                                                               (نوریؔ )

۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔

پھول کیا دیکھوں میری آنکھوں میں

دشتِ طیبہ کے خار پھرتے ہیں

                                                               (رضاؔ )

نظر میں کیسے سمائیں گے پھول جنت کے

کہ بس چکے ہیں مدینے کے خار آنکھوں میں

                                                               (نوریؔ )

۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔

وہ جو نہ تھے تو کچھ نہ تھا، وہ جو نہ ہوں تو کچھ نہ ہو

جان ہیں وہ جہان کی، جان ہے تو جہان ہے

                                                (رضاؔ )

جب تم نہ تھے کچھ بھی نہ تھا، جب تم ہوئے سب کچھ ہو ا

ہے سب میں جلوہ آپ کا، مہرِ عجم ماہِ عرب

                                                      (نوریؔ )

۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔

جن جن مرادوں کے لیے احباب نے کہا

پیشِ خبیر کیا مجھے حاجت خبر کی ہے

                                                                (رضاؔ )

حال ہمارا جیسا زبوں ہے، اور وہ کیسا اور وہ کیوں ہے

سب ہے تم پر روشن شاہا،  صلی اللہ علیک و سلم

                                                        (نوریؔ )

۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔

گذرے جس راہ سے وہ سیدِ والا ہو کر

رہ گئی ساری زمیں عنبرِ سارا ہو کر

                                                                (رضاؔ )

جس گلی سے تو گذرتا ہے مرے جانِ جناں

ذرّہ ذرّہ تری خوشبو سے بسا ہوتا ہے

                                                               (نوریؔ )

۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔

ایسا اُمی کس لیے منتِ کشِ استاد ہو

کیا کفایت تجھ کو اقرا ربک الاکرم نہیں

                                                                (رضاؔ )

نہ منت تم پہ استادوں کی رکھی

تمہارا اُمی ہونا معجزا ہے

                                                               (نوریؔ )

۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔

اور کوئی غیب کیا تم سے نہاں ہو بھلا

جب نہ خدا ہی چھپا تم پہ کروروں درود

                                                              (رضاؔ )

چھپا تم سے رہے کیوں کر کوئی راز

خدا بھی تو نہیں تم سے چھپا ہے

                                                              (نوریؔ )

        مذکورہ مثالیں اس بات کی دلیل ہیں کہ حضرت نوریؔ بریلوی کی شاعرانہ دل چسپی، لگاؤ اور شغف انتہائی گہرا تھا اور ساتھ ہی  یہ آپ کے تخییلی رویّے کی غمازی بھی کرتی ہیں۔

        بہ ہر حال! اس حقیقت سے انکار نہیں کہ حضرت نوریؔ بریلوی فطری شاعر تھے اور نعتیہ شاعری سے آپ کو عشقِ نبوی علیہ التحیۃ و الثنا ہی کے حوالے سے بڑا لگاؤ تھا۔ آپ اپنے دولت کدہ پر سالانہ محفلِ میلاد، ہفتہ وار میلاد اور نعتِ پاک کی بزم آراستہ کرتے تھے اس سے بھی نعتیہ شاعری سے آپ کے والہانہ شغف کا اندازہ ہوتا ہے۔

        نوریؔ بریلوی نے عشقِ رسولصلی اللہ علیہ و سلم کے حوالے سے ہی نعت نگاری کا آغاز کیا۔  آپ نے اپنے کلام میں رحمۃ للعالمین صلی اللہ علیہ و سلم کی عظمت و رفعت اور مقام و منصب کے ہر رُخ اور ہر پہلو کو اجاگر کرنے کی سعی فرمائی ہے۔ آپ کی نثر و نظم دونوں جگہ حضور احمدِ مجتبیٰ  صلی اللہ علیہ و سلم کی عظمت و رفعت کے جلوے نظر آتے ہیں۔ نوریؔ بریلوی نے والد گرامی امام احمد رضا محدثِ بریلوی کی طرح اپنے نعتیہ کلام میں جن موضوعات کو اختیار کیا ہے اس کی فہرست ذیل میں درج ہے۔

1۔     اللہ رب العزت جل شانہ کی حمد و ثنا

2۔     رسول اللہ  ﷺ کا اللہ کا نور اور باعثِ ایجادِ عالم واصلِ عالم ہونا

3۔     رسول اللہ  ﷺ کا اللہ کی عطا سے غیب پر آگاہ ہونا

4۔     رسول اللہ  ﷺ کا حاضر و ناظر ہونا اور آپ کی حیات          

5۔     رسول اللہ  ﷺ کی محبوبیت (اللہ کا محبوب ہونا)

6۔     رسول اللہ  ﷺ کا معراج کی شب لامکاں کا مکیں ہونا اور دیدارِ الٰہی سے مشرف ہونا

7۔     رسول اللہ  ﷺ کا مالک و  مختار ہونا                        

8۔     رسول اللہ  ﷺ کا خاتم النبین ہونا

9۔     رسول اللہ  ﷺ کا قاسمِ نعمت ہونا                              

10۔   رسول اللہ  ﷺ کا بے مثل و بے مثال ہونا

11۔   رسول اللہ  ﷺ کی فصاحت و بلاغت سب سے اعلیٰ و ارفع ہونا               

12۔   رسول اللہ  ﷺ کا شافع یوم النشور ہونا

13۔   رسول اللہ  ﷺ کی میلادِ  پاک کا جشن منانا                 

14۔   رسول اللہ  ﷺ کا سایہ نہ ہونا

15۔   رسول اللہ  ﷺ کے معجزات کا ذکر کرنا                            

16۔   رسول اللہ  ﷺ کے شہرِ پاک مدینۂ طیبہ کا ذکر کرنا

17۔   رسول اللہ  ﷺ کے دیگر آسمانی کتب میں ذکر و ثنا کو بیان کرنا

18۔   رسول اللہ  ﷺ کی بارگاہِ عالیہ میں قوم و ملّت کی بدحالی پر استغاثہ و فریاد کرنا

19۔ رسول اللہ  ﷺ کے اسوۂ حسنہ پر اصلاحِ اعمال و عقائد کے ساتھ قومِ مسلم کو عمل کرنے کی تلقین کرنا۔

٭٭٭

نوریؔ بریلوی کا تصوّرِ عشق و فن

اردو شاعری کا خمیر بنیادی طور پر عشقیہ رہا ہے۔ ولیؔ سے میرؔ تک، ذوقؔ سے مومنؔ تک،  غالبؔ سے داغؔ تک اور اقبالؔ سے زمانۂ حال کے شعرا تک،  تمام ہی شعرا کے تصورِ  فن پر عشق کے تصورات قائم اور حاوی رہے ہیں۔  عشق ایک فطری جذبہ ہے۔  کوئی انسان چاہے کتنا ہی بے حِس اور سنگ دل ہو۔ مگر قدرت کے اس حسین و جمیل اور لطیف و پُر کیف انعام سے وہ بے خبر ہرگز نہیں رہ سکتا۔  یہ لطیف جذبہ جب سر اٹھاتا ہے تو زندگی ایک نئی انگڑائی لیتی نظر آتی ہے۔  ساکت و جامد زندگی میں حرارت و توانائی پیدا ہو جاتی ہے۔ مر کے جینے کے اسباب مہیا ہو جاتے ہیں۔ اور بے ثبات و بے نشاط زندگی کو حیاتِ جاوداں اور انبساط و نوید کا سراغ مل جاتا ہے،  لمحہ لمحہ دل میں امنگ و ولولہ،  آنکھوں میں تجسس و تلاش،  سینے میں خلش و کرب،  کچھ پا نے اور کچھ کھونے کی تمنا و آرزو،  بڑ ی مصروف ترین اور مشغولیت کی زندگی ہوتی ہے ان عشق کے ماروں کی مگر     ؎

رونقِ ہستی ہے عشقِ خانہ ویراں ساز سے

انجمن بے شمع ہے گر برق خرمن میں نہیں

        آیئے اوّل،  عشق کی حقیقت و ماہیت اور اس کے اسباب و محرکات کا تجزیہ کرتے ہیں اوراس ضمن میں مذہبی ادب کے معروف ناقد ڈاکٹر امجد رضا امجد کا مرقومہ حوالہ پیش کرتے ہیں  :

        ’’حضرت فرید الدین عطار نے تکمیلِ عشق کی مثال پیش کرتے ہوئے لکھا ہے کہ ’ایک شب کچھ پروانے ایک جگہ اکٹھا ہوئے اپنے دلوں میں شمع سے ہم کنار ہو نے کی آرزو لیے ہوئے۔  ان میں سے ایک پروانہ شمع کی تلاش میں اڑا اس نے دور سے شمع کو جلتے ہوئے دیکھا،  پس واپس آیا،  اور دوسرے پروانوں کے سامنے شمع کے بارے میں بڑی دانش مندی سے باتیں کرنے لگا،  مگر پروانوں میں سب سے عقل مند پروانے نے کہا : ’’یہ پروانہ ہمیں شمع  کے بارے میں کچھ نہیں بتا سکتا،  ‘‘۔  تب ایک پروانہ اڑا،  وہ شمع کے اس قدر قریب چلا گیا کہ اس کے پروں نے شمع کے شعلے کو چھو لیا،  مگر تپش اتنی زیادہ تھی کہ وہ اس کی تاب نہ لا سکا اور واپس آ گیا،  واپس آ کر اس نے بھی شمع کے اسرار سے پردہ اٹھایا اور بتایا کہ شمع سے وصال کی کیا نوعیت ہوتی ہے۔ مگر عقل مند پروانے نے کہا: ’’ تمہارا تجربہ بھی اتنا ہی بے کار ہے جتنا تمہارے ساتھی کا تھا‘‘۔  تب تیسرا پروانہ اڑا اوراس پروانے نے جاتے ہی خود کو شمع کے حوالے کر دیا پھر جب وہ شعلے سے ہم کنار ہو گیا تو شمع کی طرح ہی لو دینے لگا،  عقل مند پروانے نے دیکھا کہ شمع نے پروانے کو خود میں جذب کر لیا ہے تو اس نے کہا : ’’ اس پروانے نے عشق کی تکمیل کر دی ہے لیکن اس تجربہ کو وہی جانتا ہے اور کوئی نہیں جان سکتا،  ‘‘۔ 

        اس تمثیل پر ڈاکٹر وزیر آغا تبصرہ کرتے ہوئے یوں لکھتے ہیں  :

        ’’تصوف میں عشق کا سفر پروانے کے سفر سے مماثل ہے،  جو شمع کی روشنی کی ایک جھلک پانے پر شروع ہوتا ہے اور اس لمحہ اپنے انجام کو پہنچتا ہے جب پروانہ خود کو شمع کی روشنی کی آگ میں جلا کر روشنی میں تبدیل کر دیتا ہے۔ ‘ ‘  (1)

        اسی طرح عشق کی حقیقت کو مشہور صوفی بزرگ منصور بن حلّاج نے اس طرح طرح بیان فرمایا ہے :

                ’’محبت کی ابتدا جلنا ہے اور انتہا قتل ہو جانا۔ ‘‘

        علاوہ ازیں حضرت ابو تراب بخشی نے عشق کی علامات میں یہ چند شعر کہے ہیں     ؎

’’منہا تنعمہ بمر بلائہ

وسرورہ فی کل ماہو فاعل

ومن الدلائل ان تریٰ فی عزمہ

طوع الحبیب وان الح العادل

ومن الدلائل ان یری متبسما

والقلب فیہ من الحبیب بلائل

        ترجمہ :ایک علامت یہ ہے کہ وہ اپنی تلخ آزمایش سے لطف اندوز ہوتا ہے اور محبوب جو کرتا ہے اس سے خوش ہوتا ہے،  ایک علامت یہ ہے کہ وہ محبوب کی اطاعت کا پختہ ارادہ رکھتا ہے اگر اسے ملامت کرنے والے ملامت کریں، ایک علامت یہ ہے کہ تم اسے مسکراتا ہوا پاؤ گے اگرچہ اس کے دل میں محبوب کی طرف سے آگ سلگ رہی ہوتی ہے۔ ‘‘(2)

        حقیقت یہ ہے کہ کائناتِ عالم کی ساری رونقیں،  چہل پہل اور رنگینیاں عشق ہی کے دم قدم سے ہیں ، کہ اگر عشق نہ ہوتا تو کچھ نہ ہوتا اور عشق نہ ہو تو کچھ نہ ہو۔  عشق ہی ’’کنت کنزاً مخفیا ‘‘کی تفسیر بن کر کائنات کی شکل میں ظہور پذیر ہوا۔  یہی وجہ ہے کہ قدرت نے ہر شَے میں اس پاکیزہ قوت کو کار فرما رکھا ہے۔

        اس ضمن میں پروفیسر ڈاکٹر طلحہ رضوی برقؔ داناپوری تحریر کرتے ہیں   :

        ’’سائنٹفک طور پر اگر دیکھا جائے تو معلوم ہو گا کہ عشق وہ کشش ہے جو مادہ میں موجود ہے اور جس کی بہ دولت دنیا کا نظام بہ دستور قائم ہے۔  ‘ ‘ (3)

        اﷲ رب العزت جل و علا نے بھی اپنے محبوب علیہ السلام سے بے مثال محبت فرمائی ہے۔  ذرا قرآنِ مقدس میں محبوبِ  بے مثال کا ذکرِ جمیل اور اظہارِ محبت کا دل نواز اسلوب ملاحظہ کیجیے :

        لا اقسم بہٰذا البلد وانت حل بہٰذا البلد  (سورۃ البلد پارہ 30، آیت 2)

        محبوب کے شہر کی قسم

        سبحان الذی اسریٰ بعبدہ (سورۃ بنی اسرائیل پارہ15، آیت1)

        محبوب کے سفرِ لامکاں اور رفتار کا ذکرِ جمیل

        ید اللہ فوق ایدہم  (سورۃ الفتح پارہ26، آیت10)

        محبوب کے ہاتھوں کو محبت میں اپنا ہاتھ کہنے کا واقعہ

        ومارمیت اذ رمیت  (سورۃ الانفال پ 9،  آیت 17)

        محبوب کے عمل کو اپنا عمل کہنے کاسُخنِ د ل آرا

        والضحیٰ واللیل اذا سجیٰ  (سورۃ الضحیٰ پارہ 30، آیت 1)

        محبوب کے چہرۂ زیبا کی یاد اور زلفِ پیچاں کا تذکرۂ خیر

        گویا عشق کی یہ مقدس روایت جو عملاً ہم تک پہنچی ہے اس کی بنیاد ہی تقدس و طہارت،  شیفتگی و لطافت اور پاکی و نفاست پر ہے۔  یہاں ہم یہ کہہ سکتے ہیں کہ عشق بندگی ہے،  عشق عبادت ہے،  عشق ریاضت ہے،  عشق طاعت ہے،  عشق سپردگی ہے،  عشق فنا ہو کر بقا کا حصول ہے اگر اسے برتا جائے۔ اسے پرکھا جائے اور یہ’’ سب کچھ ہے ‘‘اگر اسے سمجھاجائے۔ یہی وجہ ہے کہ جہاں عشق و عقل کے مابین معرکہ آرائی میں عقل شکست خوردہ ہو جاتی ہے، وہیں عشق کی قوت و طاقت بڑے بڑے ناقابلِ تسخیر معرکے سر کر لیا کرتی ہے۔ عقل اصولوں کی پابند ہے۔ اس کے پیروں میں ضوابط کی بیڑیاں ہیں۔ اسے کانٹوں میں چبھن،  انگاروں میں جلن،  درد میں بے قراری،  اور ہجر میں کرب و کسک کا احساس ہوتا ہے۔  مگر عشق کا انداز ہی انتہائی جداگانہ،  اچھوتا اور نرالا ہے۔   انگارے اس کے لیے لالہ و گل بن جاتے ہیں۔  بے قراری میں سکون و اطمینان کی لذت ملتی ہے۔  اور کرب میں آرام و آسایش کا احساس،  عاشقِ زخم خوردہ کی ٹیس بھی مرہمِ زنگار ہے۔ مگر عقل کے لیے آہ آہ اور ہائے ہائے کے سوا کچھ بھی نہیں۔  عاشق کا زخم نہیں بھرتا اور اس کا درد و کرب منّتِ کشِ دوا بھی نہیں ہوتا،  بہ قولِ غالبؔ      ؎

درد منّت کشِ دوا نہ ہوا

میں نہ اچھا ہوا  بُرا نہ ہوا

        یہ عشق کے زخموں اور چوٹوں کا اعجاز ہے کہ وہ بڑھتے بڑھتے خود ہی دوا ہو جاتا ہے۔   اس کے چاک زخموں کو رفو کرنے کی ضرورت نہیں ہوتی غالبؔ کہتے ہیں      ؎

عشرتِ قطرہ ہے دریا میں فنا ہو جانا

درد کا حد سے گذرنا ہے دوا ہو جانا

        اور جب عشق اپنے انتہا کو پہنچتا ہے تو اسے قتل گہہ جاناں تک رسائی حاصل ہو جاتی ہے اور یہی عشق کی معراج ہے      ؎

عشرتِ قتل گہہ اہلِ تمنا مت پوچھ

عیدِ نظّارہ ہے خورشید کا عریاں ہونا

        غزل کا بنیادی سرمایہ چوں کہ عشق ہے۔  اور یہ عشق جتنا شدید اور پختہ ہو گا غزل کی معنویت اتنی ہی پر کشش اور اثر انگیز ہو گی۔  شاعر کا فکری رجحان اور قلبی میلان معشوقِ مجازی کی طرف ہو یا محبوبِ حقیقی کی طرف۔۔اگر اس میں عشق کا سوز و گداز اور جذبِ دروں کی کیفیت کافی و وافی ہو تو فوراً دل پر اثر انداز ہوتا ہے۔

        فارسی سے لے کر اردو تک ایسے شاعروں کی کمی نہیں جنھوں نے عشق کے بحرِ بے کراں کا صرف ساحل سے نظارہ نہیں کیا بل کہ اس میں غوطہ زن بھی ہوئے ہیں۔ چشمِ گریاں اور دلِ بریاں کے گوہر ہائے آب دار بھی پائے ہیں۔ اور دلِ مبتلا کو زخم و غم کے داغوں سے آراستہ بھی کیا ہے۔  اسی لیے ان کی شاعری میں درد و کرب کا سورج چمکتا ہے۔  زخموں اور ٹیسوں کے گلہائے رنگارنگ مہکتے ہیں۔  اور داغِ دل کا سرسبز و شاداب باغ بہاروں کو شرماتا ہے۔ جب تک شاعر عینی مشاہدہ کی آنچ اور ذاتی تجربہ کی تپش سے اپنے فکر و خیال کو روشن نہیں کرتا،  اس کی شاعری تاثیر اور اثر انگیزی سے یک سر محروم ہوتی ہے۔ اردو شاعری میں میرؔ و غالبؔ اور اقبالؔ بڑے خوش قسمت شاعر گذرے ہیں جنھیں اردو شاعری کی ارواحِ ثلاثہ کہا جاتا ہے۔  ان کے یہاں تصورِ عشق کا جو رجحان ملتا ہے دراصل وہ ذاتی تجربہ اور عینی مشاہدہ کا منہ بولتاعکس ہے۔  خارجیت و داخلیت دونوں پہلوؤں میں ان کے احساسات و جذبات کی کرچیاں ہمیں ان کے صحیفۂ عشق اور دیوانِ غم کا مکمل عرفان بخشتی ہیں۔

        مذکورہ بالا تمہید کے بعد عشق کے تناظر میں ہم مفتیِ اعظم علامہ مصطفیٰ رضا نوریؔ بریلوی کی شاعری اور ان کے تصورِ عشق و فن پر گفتگو کرتے ہیں۔  حضرت نوریؔ بریلوی اتر پردیش کے شہر بریلی کے اس خانوادہ سے متعلق ہیں کہ جس کا طرۂ امتیاز ہی عشق ہے۔ اور وہ عشق ملکوتی تصورات اور صفات کا حامل عشق ہے۔  والد گرامی امام احمد رضا محدثِ بریلوی کہ جن کی زندگی کا مشن ہی تحریکِ عشق تھا۔ آپ کے وجود پر عشق ہی عشق کا غلبہ تھا۔  یہی وجہ ہے کہ آپ کے ہر فعل سے عشق کی تاب ناکی ہویدا تھی۔  آپ کے ہر عمل سے عشق کی درخشانی عیاں تھی۔  آپ کا لمحہ لمحہ عشق کی تشہیر میں گذرا۔  آ پ کا قلم عشق ہی عشق کی ترویج کرتا رہا۔  حضرت نوریؔ بریلوی کو جہاں اپنے والدِ ماجد سے ورثے میں بہت سے قیمتی گوہر ملے۔  وہیں سب سے بیش بہا جو دولت ملی وہ دولتِ عشق ہے۔ 

        حضرت نوریؔ بریلوی کے یہاں عشق کا ایک ایسا توانا تصور و تخیل ہے جو انتہائی نکھرا ہوا،  ستھرا ہوا،  صاف و شفاف اور دل کش و دل نشین ہے۔  آپ کے تصورِ عشق میں پراگندگی نہیں بل کہ پاکیزگی ہے۔  آلودگی نہیں بل کہ طہارت ہے۔ آپ کی عاشقی مجازی عاشق و معشوق کی طرح بے راہ روی اور بے حیائی سے عبارت نہیں بل کہ آپ کی عاشقی خدائے وحدہ لاشریک اور اس کے محبوبِ بے مثال مصطفیٰ جانِ رحمت صلی اللہ علیہ و سلم سے بے پناہ عقیدت و محبت سے آراستہ و مزین ہے کہ یہی عشق اصل میں زندگی اور بندگی ہے،  طاعت اور عبادت ہے۔  یہی منشائے قرآنی بھی ہے اور باعثِ نجاتِ دائمی بھی۔  نوریؔ بریلوی  کے تصورِ عشق کے سب رنگ جلوے ہمیں ان کی زندگی کے گوشہ گوشہ میں نظر آتے ہیں۔  کہتے ہیں کہ ضمیر کی آواز لفظوں کا لبادہ اوڑھ کر جب درِ دل پر دستک دیتی ہے تو قاری وسامع اپنے اندر وہی درد،  سوز،  غم،  کسک،  کرب،  تڑپ اور اضطراب کی لذتوں سے آشنا ہو جاتا ہے جو شاعر کے قلب پر گذر چکی ہوتی ہے۔

        حضرت نوریؔ بریلوی کی غزلیات کو پڑھ کر ان کی اس کیفیت کو جانچا اور پرکھا جا سکتا ہے۔  جس کا شعر شعر قرآنی عشق کی تشریح و تفسیر،  لفظ لفظ حدیثِ محبت کا سرچشمہ و منبع اور حرف حرف واردات و الہام کاعکاس ہے۔  آپ نے اپنے والد رضاؔ بریلوی ہی کی طر ح اپنی زندگی کا مقصد و مدعا عشق ہی کو بنایا۔  اسی لیے مادیت کے تمام افعال اور روحانیت کے تمام امور میں عشق ہی کی جلوہ گری رہی اور آپ نے عشق ہی کی رہِ بری میں تمام مقدمات و مسائل حل کیے۔  آپ کی ذات پر عشق ہی عشق کا غلبہ تھا۔  اس لیے آپ کے ہر فعل سے عشق کی روشنی پھوٹتی تھی۔  آپ کے ہر عمل سے عشق کی تاب ناکی ہویدا تھی۔

        چناں چہ حضرت نوریؔ بریلوی کے جانشین سماحۃ الشیخ فخر ازہر مرشدی مفتی محمد اختر رضا قادری برکاتی ازہری بریلوی آپ کے عشق کے بارے میں رقمطراز ہیں  :

        ’’سیدی مفتی اعظم حضرت مصطفیٰ رضا قدس سرہ رضائے مصطفیٰ تھے،  اور جو عظمت انھیں حاصل ہوئی محبتِ رسول علیہ الصلوٰۃ والتسلیم ہی کی بنا پر اور بلا شبہ عشقِ مصطفی علیہ التحیۃ والثناہی جانِ ایمان ہے۔  حضرت کی سرکار علیہ السلام کے عشق میں فنائیت کا شاہد ان کی زندگی کا ہر لمحہ ہے۔  ان کی محبتِ رسول میں فنائیت کا صحیح اندازہ اس بات سے ہوتا ہے کہ آخری عمر میں باوجود شدیدعلالت کے نعت کی محفلوں میں گھنٹوں با ادب بیٹھے رہتے تھے اور نعتِ پاک کے ہر ہر مصرعے پر رونا اور والہانہ کیفیت کا طاری ہونا اس بات کا غماز ہے کہ وہ مصطفی (صلی اللہ علیہ و سلم )کی محبت میں ضم ہو چکے تھے۔  ‘‘(4)

        جس طرح ڈاکٹر اقبالؔ نے اسرارِ خودی سے جاوید نامہ تک کا اور امام احمد رضا محدثِ  بریلوی نے انیسویں صدی کے اواخر سے 1921ء تک کا روحانی و ادبی اور شعری سفر عشق کی رہبری میں طے کیا تھا۔  اسی طرح کلامِ نوریؔ کے مطالعہ کی روشنی میں یہ کہا جا سکتا ہے کہ حضرت نوریؔ بریلوی نے بھی 1892ء سے 1981ء تک کا علمی و ادبی،  روحانی و عرفانی،  شعری و فنی سفر اسی عشق کی ہم رکابی میں مکمل کیا ہے۔  آپ کا یہ وصف ایک اعجاز ہے جس نے اربابِ فکر و نظر کو مخمور و مسحور کر رکھا ہے۔  یہ عشقِ صادق ہی کی کرشمہ سازیاں ہیں کہ آج نوریؔ بریلوی کا نعتیہ کلام دنیائے اسلام کے مسلمانوں کے لبوں پر جاری وساری ہے اور لوگ وجد آفریں انداز میں آپ کے اشعار پڑھتے اور سنتے رہتے ہیں۔  حسن و عشق کی یہ دل ربائی اردو شاعری میں حضرت نوریؔ بریلوی کا طرۂ امتیاز اور وجہِ افتخار ہے۔

        آپ کی غزلیات میں علوئے فکر، اوجِ خیال اور معنویت کی پُرکاری ہے۔ وہ اسی دردِ دل اور اضطرابی کیفیت کے ترجمان ہیں جو عشقِ صادق کا مقصود ہے۔  آپ از خود کچھ نہیں کہتے تھے بل کہ جذبات خود ہی اشعار کی صورت میں ڈھل جاتے تھے اس لیے آپ کی غزلوں میں آمد آمد کی کیفیات ہیں جو ہمیں بھی تڑپنے،  سلگنے،  جلنے اور مچلنے پر انگیز کرتی ہے۔  چند شہ پارے خاطر نشین کیجیے    ؎

اے شہ عرش آستاں اے سرورِ کون و مکاں

اے مرے ایمانِ جاں اے جانِ ایمانِ زماں

اے مرے امن و اماں اے سرورِ ہر دوجہاں

میں ہوں عاصی سرورا اور تم شفیعِ عاصیاں

۔ ۔ ۔ ۔ ۔ ۔ ۔ ۔ ۔ ۔ ۔

تری رحمتیں عام ہیں پھر بھی پیارے

یہ صدماتِ فرقت سہارا کروں میں

خدارا اب آؤ کہ دم ہے لبوں پر

دمِ واپسیں تو نظارہ کروں میں

یہ اک جان کیا ہے اگر ہوں کروروں

ترے نام پر سب کو وارا کروں میں

مجھے ہاتھ آئے اگر تاجِ شاہی

تری کفشِ پا پر نثارا کروں میں

ترا ذکر لب پر خدا دل کے اندر

یوں ہی زندگانی گذارا کروں میں

مرا دین و ایماں فرشتے جو پوچھیں

تمہاری ہی جانب اشارا کروں میں

۔ ۔ ۔ ۔ ۔ ۔ ۔ ۔ ۔ ۔ ۔

نامِ والا ترا اے کاش مثالِ مجنوں

ریگ پر انگلیوں سے لکھوں قلم کی صورت

تیرا دیدار کرے رحمِ مجسّم تیرا

دیکھنی ہو جسے رحماں کے کرم کی صورت

صفحۂ دل پہ مرے نامِ نبی کندہ ہو

نقش ہو دل پہ مرے ان کے علم کی صورت

دم نکل جائے مرا راہ میں ان کی نوریؔ

ان کے کوچے میں رہوں نقشِ قدم کی صورت

۔ ۔ ۔ ۔ ۔ ۔ ۔ ۔ ۔ ۔ ۔

بڑے دربار میں پہنچایا مجھ کو میری قسمت نے

میں صدقے جاؤں کیا کہنا مرے اچھے مقدر کا

بجھے گی شربتِ دیدار ہی سے تشنگی اپنی

تمہاری دید کا پیاسا ہوں یوں پیاسا ہوں کوثر کا

۔ ۔ ۔ ۔ ۔ ۔ ۔ ۔ ۔ ۔ ۔ ۔

دل ہے کس کا جان کس کی سب کے مالک ہیں وہی

دونوں عالم پر ہے قبضہ احمدِ مختار کا

کیا کرے سونے کا کشتہ، کشتہ تیرِ عشق کا

دید کا پیاسا کرے کیا شربتِ دینار کا

۔ ۔ ۔ ۔ ۔ ۔ ۔ ۔ ۔ ۔ ۔ ۔

چارہ گر ہے دل تو گھایل عشق کی تلوار کا

کیا کروں میں لے کے پھاہا مرہمِ زنگار کا

جاگ اٹھی سوئی قسمت اور چمک اٹھا نصیب

جب تصور میں سمایا روئے انور یار کا

۔ ۔ ۔ ۔ ۔ ۔ ۔ ۔ ۔ ۔ ۔ ۔

کبھی بیمارِ محبت بھی ہوئے ہیں اچھے

روز افزوں ہے مرَض کام دوا نے نہ دیا

۔ ۔ ۔ ۔ ۔ ۔ ۔ ۔ ۔ ۔ ۔ ۔

مرَضِ عشق کا بیمار بھی کیا ہوتا ہے

جتنی کرتا ہے دوا درد سوا ہوتا ہے

ہم نے یوں شمعِ رسالت سے لگائی ہے لَو

سب کی جھولی میں انھیں کا تو دیا ہوتا ہے

آپ محبوب ہیں اللہ کے ایسے محبوب

ہر محب آپ کا محبوبِ خدا ہو تا ہے

۔ ۔ ۔ ۔ ۔ ۔ ۔ ۔ ۔ ۔ ۔

یہ اشتیاق تری دید کا ہے جانِ جہاں

دم آ گیا ہے دمِ احتضار آنکھوں میں

کرم وہ مجھ پہ کیا ہے مرے تصور نے

کہ آج کھینچ دی تصویرِ یار آنکھوں میں

        ڈاکٹر اقبالؔ نے کہا تھا مسلمان اگر عشقِ مصطفی(صلی اللہ علیہ و سلم )میں سرشار ہو کر زندگی کے راستے پر گامزن نہیں ہوسکتا تو پھر اس کے لیے ایک ہی راستہ ہے کہ وہ دینِ ابراہیمی سے اپنا رشتہ منقطع کر لے اور کافر کی موت مرنے کے لیے تیار ہو جائے۔ ان کا کہنا یہ بھی تھا کہ مصطفیٰ جانِ رحمت صلی اللہ علیہ و سلم ہی اصل میں دین ہیں اگر ان سے کوئی اپنا تعلق توڑتا ہے تو وہ مصطفوی نہیں بل کہ ابولہبی کہلانے کا مستحق ہے     ؎

بمصطفیٰ برساں خویش را کہ دیں ہمہ اوست

اگر با و نرسیدی تمام بولہبی ست(5)

        حضرت نوریؔ بریلوی کا بھی یہی تصور ہے کہ مصطفی جانِ رحمت صلی اللہ علیہ و سلم کی محبت ہی ایمان کی جان ہے اور یہ جذبۂ عشق جس کے دل میں نہیں وہ مسلمان نہیں۔ کہتے ہیں      ؎

جانِ ایماں ہے محبت تری جانِ جاناں

جس کے دل میں یہ نہیں خاک مسلماں ہو گا

        رسولِ رحمت صلی اللہ علیہ و سلم کا عشق ہی سراپاعبادت اور بندگی ہے۔ باعثِ نجاتِ سرمدی اور ایمان کا نور ہے۔  اور اسی نور کی مشعلِ تاباں مرتے دم تک روشن و منور رہی تو قبر کی اندھیری رات چراغاں ہو گی۔ نوریؔ بریلوی نے عشق کو جانِ ایمان اور نورِ ایمان قرار دیا ہے اور اسی نور کو ظلمت کدۂ لحد میں لے کر جا رہے ہیں     ؎

نورِ ایماں کی جو مشعل رہے روشن پھر تو

روز و شب مرقدِ نوریؔ میں چراغاں ہو گا

حواشی

(1)سہ ماہی افکارِ رضا :شمار ہ اپریل تا جون 2000ء، ممبئی، ص21

(2)غزالی، امام:مکاشفۃالقلوب، ترجمہ:مفتی تقدس علی خاں بریلوی، مطبوعہ دہلی 1978ء، ص87/88

(3)سہ ماہی افکارِ رضا :شمار ہ اپریل تا جون 2000ء، ممبئی، ص21

(4)ماہنامہ استقامت : مفتی اعظم نمبر، کانپور، 1983ء، ص193

(5)محمد اقبال،  ڈاکٹر:کلیاتِ اقبالؔ ، اعتقاد پبلشنگ ہاؤس، دہلی، 1981ء، ص 691

٭٭٭

کلامِ نوریؔ میں عقیدۂ توحید

توحید خدائے وحدہ لاشریک جل شانہٗ کی یکتائی اور بے ہمتائی پر مکمل ایمان رکھنے کا نام ہے۔  اس کا اجمالی تعارف سورۂ اخلاص میں اﷲ رب العزت جل شانہ نے یوں بیان فرمایا ہے  :

        ’’ اے محبوب تم فرماؤ! وہ اللہ ہے وہ ایک ہے۔  اﷲ بے نیاز ہے۔  نہ اس کی کوئی اولاد۔  اور نہ وہ کسی سے پیدا ہوا۔  اور نہ اس کے جوڑ کا کوئی۔ ‘‘

(سورۃ اخلاص:پ ؍30، رکوع؍37)

        قرآن و حدیث میں توحیدِ باریِ تعالیٰ سے متعلق جتنے بیانات و ارشادات اور اقوال و آثار ملتے ہیں ان سب کا خلاصہ و نچوڑ سورۂ اخلاص میں پوری شانِ اکملیت اور کاملیت کے ساتھ جلوہ گر ہے۔  توحید کے تحت خدائے بزرگ و برتر جل شانہٗ کی ذات و صفات کی بو قلمونی کا بیان ہوتا ہے۔  اللہ رب العزت کی عظمت و کبریائی چوں کہ لامحدود و لامتناہی ہے۔  اس لیے شاعری میں اللہ کی توحید بیان کرنے کے لیے شاعروں کو لامحدود و لامتناہی فضا میسر آتی ہے۔  اب یہ شعرا کے شاعرانہ ظرف اور ذوق پر منحصر ہے کہ وہ کس حد تک صفاتِ خداوندی اور تجلیاتِ ربانی کے کیفِ مشاہدہ یا اپنے حُسنِ تخیل کو اظہار کی حدوں میں سمیٹ سکتے ہیں۔  وہ ذات جو کسی کے مثل نہیں،  اور نہ کوئی شَے اس کی مثل ۔۔ جو عرش پر مستوی ہے مگر عرش کو اس کی جستجو ہے۔  اور جو کائنات کے ذرّے ذرّے میں پنہاں اور مستور ہے۔  زمان و مکاں سے منزہ و مبرہ ہے۔ اور جو احساسات و ادراک سے ماورا بل کہ وراء الوراء ہے۔ اور پھر بھی شہ رگ سے قریب ترین ہے۔  اس کے بیان کو محسوسات کے دائرے میں لانا بڑے زرین تخیل اور بلند حوصلگی کا تقاضا ہے۔  ہاں ! اس کے اسمائے صفات کی بہ دولت کچھ بات بن سکتی ہے۔ جہاں تک حضرت نوریؔ بریلوی کا معاملہ ہے تو تحقیق سے ظاہر ہوتا ہے کہ آپ عشق و عرفانِ الٰہی،  معرفتِ ربانی اور روحانیت و تصوف کے اس بلند و بالا اور ارفع و  اعلا مقام و مرتبہ پر فائز تھے کہ آپ کو اپنے زمانے کا قطب اور غوث کہا جاتا تھا۔ بہ بایں معنیٰ دیکھا جائے تو آپ کے کلامِ بلاغت نظام میں توحیدِ  باریِ تعالیٰ جل شانہ کے اذکار پوری تکمیلی شان و شوکت کے ساتھ جلوہ گرہیں۔

        آپ کے مجموعۂ کلام سامانِ بخشش کی دو ابتدائی حمدیہ نظمیں اذکارِ توحید باری سے اس قدر آراستہ و مزین ہیں کہ پڑھنے کے بعد دیدہ و دل روشن و تاب ناک ہو جاتے ہیں۔  حمدِ باریِ تعالیٰ،  مدحتِ رسول صلی اللہ علیہ و سلم ،  مناجات،  اذکارِ توحید،  اسما و صفات،  اور عقائدِ توحید سے مملو یہ نظمیں بالترتیب ۲۰ بندوں اور ۹۹ بندوں پر مشتمل ہیں اور یہ دل کش نظمیں خوش آہنگی و ترنم ریزی،  غنائیت اور نغمگی میں اپنی مثال آپ ہیں۔  منظر کشی کاحسن اور تصویریت کا جمال ہر جگہ نمایاں ہے۔  لفظ لفظ میں اذکارِ توحید،  اسماو صفات کی جلوہ گری ہے اور حرف حرف میں توحیدِ  باری کی عظمت و جلالت کا کیف آگیں بیان ہے   ؎

قلب کو اس کی رویت کی ہے آرزو

جس کا جلوہ ہے عالم میں ہر چار سو

بلکہ خود نفس میں ہے وہ سبحٰنہ

عرش پر ہے مگر عرش کو جستجو

اﷲ اﷲ اﷲ اﷲ

عرش و فرش و زمان و جہت اے خدا

جس طرف دیکھتا ہوں ہے جلوہ ترا

ذرّے ذرّے کی آنکھوں میں تو ہی ضیا

قطرے قطرے کی تو ہی تو ہے آبرو

اﷲ اﷲ اﷲ اﷲ

تو کسی جا نہیں اور ہر جا ہے تو

تو منزہ مکاں سے مبرہ زسو

علم و قدرت سے ہر جا ہے تو کو بکو

تیرے جلوے ہیں ہر ہر جگہ اے عفو

اﷲ اﷲ اﷲ اﷲ

        بے شک خداوندِ  قدوس کی ذات یکہ و تنہا ہے۔  اس کا کوئی شریک و سہیم نہیں۔ نہ ذات میں نہ صفات میں۔  نہ افعال میں۔  نہ احکام میں۔  اور نہ اسمامیں۔  وہی ہمارا معبودِ برحق ہے۔  اس کے علاوہ کو ئی عبادت و بندگی کے لائق نہیں۔  صرف اور صرف وہی پرستش کے قابل ہے۔  اس کی بارگاہِ جلالت مآب کے سوا کسی اور کی بارگاہ میں سرِخم ہونا روا نہیں۔  ہر ایک کی وہی سنتا ہے۔  ہر سانس ہر دھڑکن اس کی دستِ نگر ہے۔  عالم کی ہر شَے اس کی محتاجِ کرم ہے۔  جب کہ اسے کسی کی احتیاج نہیں وہ بے ہمتا ہے۔  حضرت نوریؔ بریلوی فرماتے ہیں      ؎

اﷲ واحد و یکتا ہے

ایک خدا بس تنہا ہے

کوئی نہ اس کا ہمتا ہے

ایک ہی سب کی سنتا ہے

        خداوندِ قدوس کی ذات وحدہ لاشریک ہے وہ ہر طرح کی حرکت،  سکون،  صورت اور اجسام سے پا ک و منزہ ہے۔  اس کے ہر فعل میں حکمتِ بے بہا پوشیدہ ہے۔  وہی ہوتا ہے جو وہ چاہتا ہے وہی ہر شَے پر قادر ہے۔  حضرت نوریؔ بریلوی اس عقیدۂ توحید کا جلوہ اس طر ح دکھاتے ہیں   ؎

وہ ہے منزہ شرکت سے

پاک سکون و حرکت سے

کام ہے اس کے حکمت سے

کرتا ہے سب قدرت سے

        جیساکہ عرض ہوا کہ علمائے اسلام نے جس قدر بھی توحیدِ باری تعالیٰ جل شانہ کی تعریفیں پیش کی ہیں اور عقیدۂ توحید کا بیان کیا ہے وہ تمام بیانات و ارشادات اور اقوال سورۃاخلاص کا خلاصہ و نچوڑ ہیں یا اس کی تشریح و تفسیر ہیں۔  حضرت نوریؔ بریلوی چوں کہ علومِ اسلامیہ کے افق کے ایک روشن و تابندہ ستارہ ہیں۔ علمِ قرآن وتفسیرِ قرآن پر آپ کی گہری نظر تھی۔  اور عقیدۂ توحید کی عظمت و جلالت آپ کے قلب و ذہن پر ثبت تھی۔  سورۃ اخلاص کو اپنے ایک بند میں بیان کرتے ہوئے آپ اﷲ رب العزت کے آٹھ اسمائے صفات کو اس حسن و خوبی کے ساتھ پیش کرتے ہیں کہ طبیعت پر وجدانی کیفیت طاری ہو جاتی ہے اور توحیدِ  باری کی اس مشک باری سے مشامِ جان و ایمان معطر و معنبر ہو جاتی ہے فرماتے ہیں     ؎

اﷲ الٰہ و ربُّ واحد

 فرد و واحد و تر و صمد

جس کا والد ہے نہ ولد

ذات و صفات میں بے حد و عد

        خدائے واحد کی طرح کوئی دوسرا نہیں۔  اسی سے یہ کائنات قائم ہے۔ اس کی جڑیں مضبوط ہیں۔  وہ ہر عیاں کو دیکھتا ہے۔  حیات،  قدرت،  سننا،  دیکھنا،  کلام،  علم،  اور ارادہ اس کی صفاتِ ذاتیہ ہیں۔  مگر کان،  ناک،  زبان،  جلد یعنی حواسِ خمسہ کے ذریعہ اس کا سننا،  بولنا،  دیکھنا،   محسوس کرنا اور کلام کرنا نہیں ہے کہ یہ سب اجسام ہیں اور ذاتِ باری عز اسمہ اجسام سے پاک و منزہ ہے۔  بہر حال وہ پست سے پست آواز مسموع کر لیتا ہے،  مہین سے مہین کو محسوس کر لیتا ہے۔  اس کی ذات و صفات ایسی ہے کہ وہ احاطۂ بیان سے ما ورا اور ورا ء الورا ہے۔  حضرت نوریؔ بریلوی اس امر کا اظہار یوں کرتے ہیں       ؎

ساجھی اس کا نہ کوئی شریک

وہی مَلَک ہے وہی مَلیک

پاک مکاں سے اور نزدیک

دیکھے سُنے پست و باریک

۔۔۔۔۔۔۔۔۔۔۔۔۔۔

روح نہیں ہے اور نہ وہ جسیم

مُقسم ہے نہ وہ قِسم و قسیم

اس کے صفات و اسم قدیم

یہ ہے اپنا دینِ قویم

        اﷲ فرماتا ہے :    ’’بے شک شرک بڑا ظلم ہے‘‘(قران عظیم: پ ۲۱رکوع۱۱)

        شرک ظلمِ عظیم ہے۔ اﷲ کی ذات و صفات میں کسی کو شریک کرنا دائرۂ اسلام سے آدمی کو خارج کر دیتا ہے۔  یہ انتہائی خطرناک جرم ہے۔  اسی طر ح اﷲ سبحان السبوح والقدوس کی ذات کی طرف کسی ایسی بات کو منسوب کر دینا جو اس کی تنزیہہ کے خلاف ہے وہ بھی کفر ہے۔  مثلاً: یہ کہنا کہ اﷲ جھوٹ بول سکتا ہے،  العیاذ با ﷲتعالیٰ۔  اس سے جھوٹ صادر ہو سکتا ہے یا کذب باریِ تعالیٰ ممکن ہے۔  تو وہ دراصل خدائے واحد جل شانہٗ کا انکار کر رہا ہے کہ اﷲ کی ذات ہر عیب سے پاک و منزہ ہے۔  اس کی ذات سے عیب کو کیا علاقہ ؟ حضرت نوریؔ بریلوی ایسے باطل نظریات کی تردید کرتے ہوئے یوں تحفظِ الوہیت و توحیدِ  باری کی عظمت و جلالت کا نقشہ پیش کر رہے ہیں     ؎

جہل و کذب و ظلم و زنا

خواری مے خواری سرقہ

اس سے ممکن؟ جس نے کہا

لاریب اس نے کفر بکا

پاک ہے عیبوں سے مولا

عیب سے اس کو علاقہ کیا

عیب اس کا صالح نہ ہوا

ہو متعلق قدرت کا

        عقیدۂ توحید کے منکروں کو اﷲ رب العزت جل شانہ نے جا بہ جا قرآن پاک میں تنبیہ فرماتے ہوئے کہا ہے کہ :  ا ﷲ کے برابر کوئی نہیں،  نہ اس کی ضد ہے اور نہ اس کی کو ئی نظیر و مثیل ہے۔  اور وہ ہر عیب سے پاک ہے۔  اسی کا قول سچا ہے اور اسی کی بات صادق ہے۔  اﷲ رب العزت سے زیادہ سچا اور صادق کون؟ یہ ایک ایسا عقیدہ ہے جس میں کسی شک و شبہہ کی گنجایش نہیں مگر منکرینِ عقیدۂ توحید نے ذاتِ باری کے لیے محال کو ممکن ثابت کرنے کی ناپاک جسارت کرتے ہوئے کذبِ باریِ تعالیٰ کو ممکن بتانا شروع کر دیا۔  جب کہ ایسے ناہنجار اور ناعاقبت اندیش اسی کی زمین پر رہتے بستے ہیں اور اسی کا رزق کھاتے ہیں ایسے فاجروں اور منکروں کو حضرت نوریؔ بریلوی نے یوں للکار کر کہا ہے      ؎

من اصدق منہ قیلا

من اصدق منہ حدیثا

کیسا کیسا رب نے کہا

منکر ایک نہیں سنتا

صدقِ رب جب واجب ہے

کذب محال اے خائب ہے

جمعِ دو ضد جائز کب ہے

عقل کہاں تری غائب ہے

اس کا کھائے او منکر

اور غرائے او کافر

کون ہے دیتا او غادر

اس کے سوا ہاں او فاجر

        اﷲ رب العزت کی جلوہ گری کائنات کی ہر شَے میں ہے عرش و فرش، زمان و جہت ہر ذرۂ خشک و تر، میں اسی کا جلوہ سمایا ہوا ہے اسی کا علم، اور اسی کی رحمت ہر شَے کو محیط ہے۔ اﷲ جزئیات، کلیات موجودات، معدومات، ممکنات اور محالات کو ازل میں جانتا تھا، اب جانتا ہے اور ابد تک اور ہمیشہ جانتا ہے گا۔ اشیا میں تغیرات واقع ہوتے ہیں مگر اس کا علم نہیں بدلتا دلوں کے خطرات اور وساوس پر وہ باخبر ہے اس کا علم لامتناہی ہے اور وہی ہر شَے کا خالق ہے حضرت نوریؔ بریلوی کی نظر میں توحیدِ باری کے یہ عقائد انتہائی گہرائی سے بسے ہوئے تھے یہی وجہ ہے کہ آپ نے عقائدِ  توحید کو اپنے اشعار میں بڑی ہنر مندی سے پیش کیا ہے جس سے آپ کی قادرالکلامی کا ثبوت ملتا ہے     ؎

عرش و فرش و زمان و جہت اے خدا

جس طرف دیکھتا ہوں ہے جلوہ ترا

ذرّے ذرّے کی آنکھوں میں تو ہی ضیا

قطرے قطرے کی تو ہی تو ہے آبرو

اﷲ اﷲ اﷲ اﷲ

تو کسی جا نہیں اور ہر جا ہے تو

تو منزہ مکاں سے مبرہ زسو

علم و قدرت سے ہر جا ہے تو کو بکو

تیرے جلوے ہیں ہر ہر جگہ اے عفو

اﷲ اﷲ اﷲ اﷲ

۔ ۔ ۔ ۔ ۔ ۔ ۔ ۔ ۔ ۔ ۔

ہے وہ زمان و جہات سے پاک

وہ ہے ذمیمِ صفات سے پاک

وہ سارے محالات سے پاک

وہ ہے سب حالات سے پاک

۔ ۔ ۔ ۔ ۔ ۔ ۔ ۔ ۔ ۔ ۔

وہ ہے محیطِ انس و جاں

وہ ہے محیطِ جسم و جاں

وہ ہے محیطِ کل از ماں

وہ ہے محیطِ کون و مکاں

        ہمارا عقیدہ ہے کہ بخشنے والا۔ ظاہر و باطن کا بادشاہ۔ بہت پاک۔ سلامت رکھنے والا۔  امن دینے والا۔  نگہبان۔  غالب۔  نقصان کو پورا کرنے والا۔  بزرگ۔  سب چیز کا پیدا کرنے والا۔  صورت بنانے والا۔  تمام مخلوقات کو روزی دینے والا۔  بہت زیادہ جاننے والا۔  بلند درجہ کرنے والا۔  دونوں جہاں میں عزت دینے والا۔  دیکھنے۔  سننے۔  انصاف کرنے والا۔  بخشنے والا۔  معاف کرنے والا۔  خبردار۔  روح و بدن کو طاقت دینے والا۔  آخرت میں حساب لینے والا۔  کرم کرنے والا۔  دعائیں قبول کرنے والا۔  قوت و طاقت والا۔  دوبارہ پیدا کرنے والا۔  مارنے والا۔   جِلانے والا۔  ہر شَے پر قدرت رکھنے والا۔  سب سے اول۔  سب سے آخر۔  ظاہر۔  باطن۔  احسان کرنے والا۔  توبہ قبول کرنے والا۔  نعمت عطا کرنے والا۔  سارے جہانوں کا بادشاہ۔  نفع پہنچانے والا۔  ہمیشہ رہنے والا۔  گنہگاروں کے گناہوں کو پوشیدہ رکھنے والا۔  صرف اور صرف اﷲ تعالیٰ جل شانہ ہی ہے۔  یہ توحیدِ باری تعالیٰ سے متعلق وہ عقائدِ ضروریہ ہیں جن پر ایمانِ کامل رکھنا ہی ہمارے مومنِ کامل ہونے کی بیّن دلیل ہے۔  حضرت نوریؔ بریلوی کا عقیدۂ توحید انتہائی پختہ اور مضبوط تھا۔  آپ کا عقیدۂ توحید ہر قسم کی ا فراط و تفریط اور شرکتِ بے جا سے پاک تھا۔ اﷲ رب العزت کے اسمائے صفات اور اس کے مفاہیم و مطالب پر آپ کی بڑی گہری نظر تھی۔  یہی وجہ ہے کہ آپ نے اسمائے حسنیٰ کے گوہر ہائے آبدار سے ایسا خوش نما ہار تیار کیا ہے جو ہمیں کیف اندوز کرتا ہے۔  حضرت نوریؔ بریلوی فرماتے ہیں       ؎

منعم و حق و سمیع و بصیر

باقی باری برّ و خبیر

جامع مانع منار و کبیر

رافع نافع حیّ و قدیر

حَکَم و عدل و علی و عظیم

دیّان و رحمن و رحیم

قدوس و حنّان و علیم

فتّاح و منّان و کریم

والی ولیّ و متعالی حکیم

وہّاب و رزّاق و علیم

مالکِ یومِ دین و جحیم

مالکِ مُلک و خلد و نعیم

وہ ہے عزیز و مجیب و شکور

وہ ہے بدیع و قریب و صبور

وہ ہے متین و حبیب و غفور

وہ ہے معین و رقیب ضرور

وہ ہے مقدِّم اور غفار

وہ ہے مہیمن اور جبار

وہ ہے مؤخر اور قہّار

وہ ہے باسط اور ستّار

نور مصوّر اور ظاہر

باطن اول اور آخر

واجد ماجد اور قادر

مومن متکبّر و قاہر

توّاب و مغنی ہادی

مقسط محیی ممیت و غنی

منتقم و قیوّم و قوی

مقتدر و واسع مُہی

مبدی جلیل و حفیظ و مجید

معطی و وکیل و سلام و معید

وہ ہے لطیف و ودود وحید

اور شہیدُ وحید و رشید

وہ ہے جوّاد و عفوُ عطوف

ازلی ابدی ہے معروف

یصرف عنا جمیع صروف

مولی الکل وہو رؤف

لا الٰہ الا اﷲ اٰمنابرسول اﷲ

        عقیدۂ توحید صرف ’’لا الٰہ الا اﷲ‘‘ کہہ دینے سے مکمل نہیں ہو جاتا بلکہ ’’محمد رسول اﷲ ‘‘  کا صدقِ دل سے اقرار بھی ضروری ہے۔  اﷲ عز و جل کو وحدانیت کے جملہ لوازمات کے ساتھ مانتے ہوئے محبوبانِ خدا کو بھی ماننا یہی صحیح اور سچی توحید ہے۔  صرف اﷲ کو ماننا اور محبوبانِ خدا سے منہ موڑنا یہ عقیدۂ توحید کے منافی ہے۔ اس نکتے کو ابلیس نہ سمجھ سکا۔ اﷲ کو مانتے ہوئے عظمتِ آدم علیہ السلام کا منکر ہو کر راندۂ درگاہ ہو گیا۔  نوریؔ بریلوی ایسی ابلیسی توحید کے سخت ترین مخالف اور حقیقی توحید کے قائل تھے۔  آپ کے نزدیک اﷲ عز و جل کی وحدانیت کے ساتھ ساتھ رسو ل اﷲ  صلی اللہ علیہ و سلم کی رسالت پر ایمان لانا ایمانِ کامل ہے۔ یہی وجہ ہے کہ آپ کے کلام میں جہاں عقیدۂ توحید کی جلوہ ریزیاں ہیں وہیں عقیدۂ رسالت کی ضیا باریاں بھی ہیں جو پڑھنے اور سننے والوں کو بڑے کیف آگیں جذبات سے سرشار کرتی ہیں   ؎

اپنے کرم سے ربِّ کریم

ہم پہ کیا احسانِ عظیم

بھیجا ہم میں بفضلِ عمیم

بحرِ کرم کا دُرِّ یتیم

اپنے مظہرِ اول کو

اپنے حبیبِ اجمل کو

پہلے نبیِ افضل کو

پچھلے مُرسلِ اکمل کو

موجِ اول بحرِ قَدِم

موجِ آخر بحرِ کرم

سب سے اعلیٰ اور اعظم

سب سے اولیٰ اور اکرم

نور سے اپنے پیدا کیا

نورِ حبیبِ ربِّ عُلا

پھر اس نور کو حصے کیا

ان سے بنایا جو ہے بنا

لا الٰہ الا اللہ اٰمنا برسول اللہ

        الغرض نوریؔ بریلوی کا عقیدۂ توحید انتہائی نکھر ا اور ستھرا ہوا ہے۔ آپ نے اللہ جل شانہٗ کی صفات و کمالات کو بڑے احسن انداز میں پیش کیا ہے۔ جس سے اللہ رب العزت جل شانہٗ سے آپ کی محبت و اُلفت کا پتہ چلتا ہے۔ نوریؔ بریلوی کا عقیدۂ توحید ابلیسی توحید کے منافی تھا کہ ابلیس عظمتِ آدم علیہ السلام کا منکر ہو کر راندۂ درگاہ ہو گیا۔ آپ نے اللہ کی وحدانیت کے ساتھ رسالتِ محمدی صلی اللہ علیہ و سلم پر ایمان لانے کو ہی اصل توحید قرار دیا ہے۔

٭٭٭

کلامِ نوریؔ میں خصائصِ رسول صلی اللہ تعالیٰ علیہ و سلم

نعت وہ مقدس و محترم اور پاکیزہ صنفِ  ادب ہے۔ جو اپنی ابتدائے آفرینش سے امروز تک رسولِ رحمت صلی اللہ علیہ وکسلم کی توصیف و ثنا، شمائل و خصائل اور اوصافِ جمیل کے اظہار کے لیے مختص ہے۔ نعت منشائے قرآن اور تقاضائے ایمان ہے۔ نعت قلب و نظر کے لیے نور اور روح و جگر کے لیے سرور ہے۔  نعت حریمِ جاناں میں اذانِ شوق،  آبروئے فن اور معراجِ ذوق ہے۔  نعت ہر زبان کے شعر و ادب کی بلا شبہہ عزت و آبرو اور عصمت و عفت ہے۔  یوں تو نعت کی کوئی خاص ہیئت متعین نہیں کی گئی ہے کیوں کہ ادب کی جملہ اصناف میں نعتیہ کلام لکھا جا رہا ہے۔ حتیٰ کہ بعض علمائے ادب کے نزدیک وہ نثری شہ پا رہ بھی نعت کے زمرہ میں شمار کیا جانا چاہیے جس میں رسول اﷲ صلی اللہ علیہ و سلم کے اوصافِ جمیل اور اخلاقِ عظیم کا تذکرۂ جلیل ہو۔ بہ ہر کیف ! اصطلاحِ ادب میں حمد،  قصیدہ،  مثنوی،  مرثیہ،  منقبت اور غزل کے جس طرح موضوعات متعین ہیں اسی طر ح نعت کا موضوع بھی رسولِ مختا ر صلی اللہ علیہ و سلم کی ثنا و توصیف کے اظہار کے تئیں مختص ہے۔  ان میں ذاتِ رسول صلی اللہ علیہ و سلم کے خصائص و فضائل سببِ تخلیقِ کائنات،  ذکرِ معجزات،  بے مثالی،  نفیِ سایہ،  اختیارات و تصرفات، عطائے عام،  بیانِ عظمت و رفعت،  ختمِ نبوّت،  مظہرِ ذاتِ رب العزت،  علمِ نبوت،  وصفِ جمالِ نبوی،  آستانۂ بلند،  شہرِ محبوب کے خار و گل،  مسیحائی،  دستگیری،  امیدِ شفاعت وغیرہ کو نعت گو شعرا اپنے کلام کا موضوع بناتے ہوئے بارگاہِ رسالت مآب صلی اللہ علیہ و سلم میں اپنا خراجِ عقیدت و محبت پیش کرتے ہیں۔ 

        جہاں تک حضرت نوریؔ بریلوی کے عشقِ رسول اور وارفتگیِ شوق کا معاملہ ہے تو آپ کا خانوادہ آج سارے عالم میں محبتِ رسول صلی اللہ علیہ و سلم کے لیے طرۂ امتیاز کی حیثیت رکھتا ہے۔  جب بھی جہاں کہیں عشقِ رسول صلی اللہ علیہ و سلم کا ذکر نکلتا ہے وہاں خانوادۂ رضاؔ کا تذکرہ لازمی ہے۔ یہی وجہ ہے کہ حضرت نوریؔ بریلوی کے مجموعہ کلام ’’سامانِ بخشش‘‘ کے ورق ورق میں شمائلِ نبوی صلی اللہ علیہ و سلم کی جلوہ ریزیاں ہیں اور سطر سطر میں خصائصِ رسول صلی اللہ علیہ و سلم کی ضیا پاشیاں ہیں۔

باعثِ تخلیقِ کائنات و اصلِ مخلوقات

کائنات اوراس کی نیرنگیاں اس کی ساری نعمتیں،  تمام آسایشیں،  چاند کی چاندنی،  سورج کی روشنی،  ستاروں کی چمک،  کہکشاں کا وجود،  سمندروں کی جو لانی،  دریاؤں کی روانی،  فصلوں کی لہلہاہٹ،  جنگلوں کی شادابی،  گلوں کی عطر بیزی،  پرندوں کی چہچہاہٹ غرض یہ کہ کائنات کی ہر شَے صدقہ ہے باعثِ تخلیقِ کائنات،  وجہِ بِنائے روزگار صلی اللہ علیہ و سلم کا جس پر حدیثِ قدسی ’’لولاک لما خلقت الافلاک والارضین‘‘(1)۔ اور حدیثِ نبوی ’’کل خلائق من نوری‘‘ (2)۔ شاہد ہے۔ جس کی تشریح و تفسیر اہلِ معرفت شعرائے کرام نے اچھوتے انداز میں  کی ہے اسی کی توضیح و تفسیر کلامِ نوریؔ میں ملاحظہ ہو      ؎

ہے خشک وتر پہ قبضہ جس کا وہ شاہِ جہاں یہ ہے

یہی ہے بادشاہ بر کا یہی سلطاں سمندر کا

۔ ۔ ۔ ۔ ۔ ۔ ۔ ۔ ۔ ۔ ۔ ۔

تمہارے ہی دم کی ہیں ساری بہاریں

تمہارے ہی دم سے یہ نشوونما ہے

اُسی دم سے آباد سارا جہاں ہے

اُسی دم سے سارا وجود و بِنا ہے

۔ ۔ ۔ ۔ ۔ ۔ ۔ ۔ ۔ ۔ ۔

جب تم نہ تھے کچھ بھی نہ تھا، جب تم ہوئے تو سب ہوا

ہے سب میں جلوہ آپ کا مہرِ عجم ماہِ عرب

۔ ۔ ۔ ۔ ۔ ۔ ۔ ۔ ۔ ۔ ۔

تم ہو وجہِ بعثِ خلقت تم ہو سرِّ غیب و شہادت

رازِ وحدت کثرت والے صلی اللہ صلی اللہ صلی اللہ علیک و سلم

سرور و آقا مالک و مولا دونوں جگ کے تم ہو داتا

رحمت والے رافت والے صلی اﷲ صلی اﷲ صلی اﷲ علیک و سلم

۔ ۔ ۔ ۔ ۔ ۔ ۔ ۔ ۔ ۔ ۔

تم ہو پیارے اصل ہماری سارا جہاں ہے فرع تمہاری

تم سب کی ماہیت گویا  صلی اﷲ صلی اﷲ صلی اﷲ علیک و سلم

بے مثالی

رسو ل اﷲ صلی اللہ علیہ و سلم کی بے مثالی کتاب و سنت سے ثابت ہے کہ اﷲ رب العزت نے اپنے محبوبِ مکرم علیہ التحیۃ و الثناکو بے مثل و بے نظیر پیدا کیا ہے۔ تمام مخلوقات میں سب سے افضل و اعلا اور بے نظیر ذات رسول اﷲ صلی اللہ علیہ و سلم ہی کی ہے۔  یہ بے مثالی خصائصِ رسول  صلی اللہ علیہ و سلم میں نمایاں خصوصیت ہے اس کو حضرت نوریؔ بریلوی نے اپنے کلام میں یوں پیش کیا ہے    ؎

مُحالِ عقل ہے تیرا مماثل اے مرے سرور

توہم کر نہیں سکتا ہے عاقل تیرے ہمسر کا

        اسی کو دوسری جگہ یوں بیان کرتے ہیں       ؎

مثل ممکن ہی نہیں ہے ترا اے لاثانی

وہم نے بھی تو ترا مثل سمانے نہ دیا

آپ کے جوڑ کا آئے تو کہاں سے آئے

جب وجود اس کو شہ ارض و سما نے نہ دیا

        دوسر ے مقام پر اس کو بڑے خوب صورت انداز میں بیان کرتے ہیں کہ پڑھتے ہی وجدانی کیفیت طاری ہو جاتی ہے    ؎

نظر نظیر نہ آیا نظر کوئی کہیں

جچے نہ غلماں نظر میں نہ حور آنکھوں میں

۔ ۔ ۔ ۔ ۔ ۔ ۔ ۔ ۔ ۔

تمہیں حق نے دیئے ہیں وہ فضائل

کہ شرکت اس میں ہو ناروا ہے

مماثل ہو نہیں سکتا تمہارا

تمہیں وہ فضلِ کل رب نے دیا ہے

تمہاری بے مثالی اس سے ظاہر

کہ محبوبِ خدا تم کو کیا ہے

محب کیا چاہتا ہے مثلِ محبوب

محب تو بے مثالی چاہتا ہے

نفیِ سایہ

حضور انور صلی اللہ علیہ و سلم کے جسدِ لطیف اور جسمِ انور کا سایہ نہ تھا ۔  حدیثِ پاک میں ہے۔  حضرت ذکوان رضی اللہ عنہ فرماتے ہیں :

        ’’حضور انور صلی اللہ علیہ و سلم کا سایۂ مبارک نہ سورج کی دھوپ میں نظر آتا تھا نہ چاندنی میں۔ ‘‘(3)

        اس مضمون کو نعتِ  سرکارعلیہ السلام میں حضرت نوریؔ بریلوی نے مختلف مقام پر پیش کیا ہے اور ہر جگہ ندرتِ ادا کے ساتھ طرزِ بیان میں نیا بانکپن ہے۔  کہیں بلندیِ خیال ہے۔ کہیں عاشقانہ رنگ اور کہیں طرزِ استدلال۔ فرماتے ہیں      ؎

نہ سایا روح کا ہرگز نہ سایا نور کا ہرگز

تو سایہ کیسا اس جانِ جہاں کے جسمِ انور کا

۔ ۔ ۔ ۔ ۔ ۔ ۔ ۔ ۔ ۔ ۔

وہ ہیں خورشیدِ رسالت نور کا سایہ کہاں

اس سبب سے سایۂ خیرالوریٰ ملتا نہیں

۔ ۔ ۔ ۔ ۔ ۔ ۔ ۔ ۔ ۔ ۔

جسمِ پر نور کا یوں تو سایہ نہ تھا

اور پتھر میں نقشے جما کر چلے

۔ ۔ ۔ ۔ ۔ ۔ ۔ ۔ ۔ ۔ ۔

تو ہے نورِ خدا پھر سایہ کہاں

کہیں بھی نور کا سایہ پڑا ہے

تو ہے ظلِّ خدا واللہ باﷲ

کہیں سایے کا بھی سایہ پڑا ہے

زمیں پر تیرا سایہ کیسے پڑتا

ترا منسوب ارفع دائما ہے

اختیارات و تصرفات

یہ ایک مسلمہ حقیقت ہے کہ رسولِ کونین صلی اللہ علیہ و سلم کے عشق و الفت میں سرشار رہنے والے سچے شاعروں  کا کلام اور ان کی شاعرانہ ریاضتیں آقائے کائنات صلی اللہ علیہ و سلم کے تئیں اس کی خوش عقیدگی اور ایمانی پختگی کی تفسیر ہوتی ہیں۔  سرکارِ دو عالم صلی اللہ علیہ و سلم کے لیے اختیارات و تصرفات ماننا۔ آپ کو قاسمِ  نعمت تسلیم کرنا۔  بارگاہِ رب العزت میں آپ کو وسیلۂ عظمیٰ ماننا۔  آپ کو بہ عطائے الٰہی مِلکِ خدا اور سارے جہاں کا مالک ماننا۔  یہ سب ایسے امور ہیں جن کا ایک طبقہ منکر ہے۔  حضرت نوریؔ بریلوی نے جہاں مخالفین پر طنز و نشتریت کرتے ہوئے ان عقائد کو بیان کیا ہے وہیں ان کمالات و خصائص کا ذکر کرتے ہوئے نعتِ  سرور کائنات کا حق بھی ادا کیا ہے۔  حضرت نوریؔ بریلوی،  سیدِ عالم صلی اللہ علیہ و سلم کے اختیارات و تصرفات اور حاکمیت و مالکیت کو بہ رنگِ استدلال یوں پیش کرتے ہیں    ؎

تم کو عالم کا مالک کیا اس نے

جس کی مملوک ساری خدائی ہے

کس کے قبضے میں ہیں یہ زمین و زماں

کس کے قبضے میں ساری خدائی ہے

تو خدا کا ہوا اور خدا تیرا

تیرے قبضے میں ساری خدائی ہے

جب خدا خود تمہارا ہوا تو پھر

کون سی چیز ہے جو پرائی ہے

۔ ۔ ۔ ۔ ۔ ۔ ۔ ۔ ۔ ۔ ۔

دل ہے کس کا جان کس کی سب کے مالک ہیں وہی

دونوں عالم پر ہے قبضہ احمدِ مختار کا

۔ ۔ ۔ ۔ ۔ ۔ ۔ ۔ ۔ ۔ ۔

جو محب کی چیز ہے محبوب کے قبضے کی ہے

ہاتھ میں ہو جس کے سب کچھ اس سے کیا ملتا نہیں

۔ ۔ ۔ ۔ ۔ ۔ ۔ ۔ ۔ ۔

انھیں خدا نے کیا اپنے مُلک کا مالک

انھیں کے قبضے میں رب کے خزانے آئے ہیں

عطائے عام و فیضِ دوام

        مالکِ کونین صلی اللہ علیہ و سلم کے جود و  نوال، بخشش و عطا،  عنایت و کرم،  فیض و سخا اور قاسمیتِ عامّہ کا ذکرِ خیر کرتے ہوئے حضرت نوریؔ بریلوی رقم طراز ہیں      ؎

دو عالم صدقہ پاتے ہیں مرے سرکار کے در کا

اسی سرکار سے ملتا ہے جو کچھ ہے مقدر کا

۔ ۔ ۔ ۔ ۔ ۔ ۔ ۔ ۔ ۔ ۔

جو آیا لے کے گیا کون لوٹا خالی ہاتھ

بتا دے کوئی سنا ہو جو ’لا‘ مدینے سے

۔ ۔ ۔ ۔ ۔ ۔ ۔ ۔ ۔ ۔ ۔

جو چاہیں گے جسے چاہیں گے یہ اسے دیں گے

کریم ہیں یہ خزانے لٹانے آئے ہیں

سنو گے ’لا‘ نہ زبانِ کریم سے نوریؔ

یہ فیض و جو د کے دریا بہانے آئے ہیں

۔ ۔ ۔ ۔ ۔ ۔ ۔ ۔ ۔ ۔ ۔

جاری ہے آٹھوں پہر لنگر سخی دربار کا

فیض پر ہر دم ہے دریا احمدِ مختار کا

۔ ۔ ۔ ۔ ۔ ۔ ۔ ۔ ۔ ۔ ۔

محروم نہیں جس سے مخلوق میں کوئی بھی

وہ فیض انھیں دینا وہ جود و سخا کرنا

ہے عام کرم ان کا اپنے ہوں کہ اعدا ہوں

آتا ہی نہیں گویا سرکار کو ’لا‘ کرنا

محروم گیا کوئی مایوس پھرا کوئی

دیکھا نہ سنا ان کا انکار و اِبا کرنا

اِلتجا

استغاثہ و فریاد اور بارگاہِ رسالت مآب صلی اللہ علیہ و سلم میں التجا کے عناصر بھی نعتیہ شاعری کے موضوعات سے متعلق ہیں،  حضرت نوریؔ بریلوی چوں کہ ایک خوش عقیدہ شاعرِ محبت و الفت ہیں اس لیے آقائے کائنات صلی اللہ علیہ و سلم کے اختیارات و تصرفات کا ذکرِ جمیل کرتے ہوئے بارگاہِ نبوی صلی اللہ علیہ و سلم میں یوں اپنا دردِ دل پیش کر کے ملتجی ہیں      ؎

تم سے ہر دم امیدِ بھلائی ہے

میٹ دیجے جو ہم میں برائی ہے

۔ ۔ ۔ ۔ ۔ ۔ ۔ ۔ ۔ ۔ ۔

اعدا کو خدا والا جب تم نے بنا ڈالا

دشوار ہے تم پر کیا مجھ بد کا بھلا کرنا

سوکھی ہے مری کھیتی پڑ جائے بھرن تیری

اے ابرِ کرم اتنا تو بہرِ خدا کرنا

۔ ۔ ۔ ۔ ۔ ۔ ۔ ۔ ۔ ۔ ۔

ہماری کشتِ امل میں کبھی نہ پھل آئے

کبھی تو شجرۂ امید بارور ہو جائے

قاسمِ نعم

اہل سنت و جماعت کا عقیدہ ہے کہ حقیقی معطی تو رب العزت جل شانہ کی ذاتِ والا تبار ہے۔ لیکن کوئی بھی نعمت کسی کو سرکار کے وسیلے کے بغیر نہیں ملتی۔ حقیقی دینے والا تو اﷲ ہے اور بانٹنے والے سرکارصلی اللہ علیہ و سلم ۔۔ خود سیدِ عالم صلی اللہ علیہ و سلم کا ارشادِ گرامی ہے   :

         ’’انما انا قاسم واللہ یعطی ‘‘ (4)حضرت نوریؔ بریلوی اپنے نعتیہ کلام میں بخاری شریف کی اس حدیثِ پاک کی ترجمانی کرتے ہوئے یوں گویا ہیں کہ          ؎

انت القاسم ربک معطی تم ہی نے سب کو نعمت دی

دے دو مجھ کو میرا حصہ صلی اﷲ صلی اﷲ صلی اﷲ علیک و سلم

۔ ۔ ۔ ۔ ۔ ۔ ۔ ۔ ۔ ۔ ۔

جو خدا دیتا ہے ملتا ہے اسی سرکار سے

کچھ کسی کو حق سے اس در کے سوا ملتا نہیں

خود خدا بے واسطہ دے یہ ہمارا منہ کہاں

واسطہ سرکار ہیں بے واسطہ ملتا نہیں

بیانِ رفعت و عظمت

حضرت نوریؔ بریلوی کا جنابِ رسالت مآب صلی اللہ علیہ و سلم سے والہانہ محبت و عقیدت،  احترام و تعظیم اور حضور صلی اللہ علیہ و سلم پر فدا کا ری و جاں نثاری کا جو انداز تھا وہ آپ کے ہر شعر سے نمایاں ہے۔ عشقِ رسول صلی اللہ علیہ و سلم میں بے تاب و سرشار رہنے والے دلِ گداختہ میں ہر لمحہ یہی ایمانی و عرفانی آرزو پروان چڑھتی رہی کہ شانِ مصطفوی صلی اللہ علیہ و سلم کا بیان ان رفعتوں اور بلندیوں تک پہنچا دیا جائے جہاں تک انسان کا علم،  اس کا قلم،  اس کی زبان،  اس کی فکر،  اس کا خیال اور اس کا ادراک ساتھ دے سکتا ہو۔ ویسے یہ بھی سچ ہے کہ بندے سے یہ ممکن نہیں کہ وہ محبوبِ خدا صلی اللہ علیہ و سلم کی رفعت و عظمت کا کما حقہ بیان کر سکے کیوں کہ خود خدائے مطلق جل شانہ نے قرآنِ مقدس میں یوں آپ کی رفعتِ بالا بیان فرمائی ہے کہ ’’ورفعنا لک ذکرک ‘‘۔

        اسی تعلیمِ قرآنی اور عشقِ صادق کے جذبۂ دروں کی کار فرمائی تھی جس نے نثر نگاری ہو یا شاعری نوریؔ بریلوی کو ہر زاویۂ فکر وفن سے شانِ مصطفوی کی رفعتوں اور عظمتوں کے اظہار کے لیے تا دمِ زیست سرگرمِ عمل رکھا۔  سرکار دوجہاں صلی اللہ علیہ و سلم کی رفعت و عظمت اور افضلیت کو نعتیہ پہلو میں کس طرزِ ادا اور رنگینیِ بیان کے ساتھ بیان کیا ہے کلامِ  نوریؔ میں نشانِ خاطر ہو    ؎

ماہِ تاباں تو ہوا مہرِ عجم ماہِ عرب

ہیں ستارے انبیا مہرِ عجم ماہِ عرب

ہیں صفاتِ حق کے نوری آئینے نبی سارے

ذاتِ حق کا آئینا مہرِ عجم ماہِ عرب

۔ ۔ ۔ ۔ ۔ ۔ ۔ ۔ ۔ ۔ ۔

رَفعنا سے تمہاری رفعتِ بالا ہوئی ظاہر

کہ محبوبانِ رب میں سب سے عالی مرتبہ تم ہو

شبِ معراج سے اے سیدِ کل ہو گیا ظاہر

رُسل ہیں مقتدی اور امام الانبیا تم ہو

۔ ۔ ۔ ۔ ۔ ۔ ۔ ۔ ۔ ۔ ۔

تاج رکھا تیرے سر پر رَفعنا کا

کس قدر تیری عزت بڑھائی ہے

ختمِ نبوّت

اہلِ اسلام کا یہ ایک نصِ قرآنی سے ثابت اجماعی عقیدہ ہے کہ حضور سرورِ کائنات صلی اللہ علیہ و سلم خاتم الانبیا ہیں،  آپ پر ربِ ذوالجلا ل والاکرام نے نبوت کا دروازہ بند کر دیا۔ آپ کے بعد نہ کوئی نبی پیدا ہوا نہ قیامت تک ہو گا۔ قرآن پاک میں ہے  :

        ’’ماکان محمد ابا احد من رجالکم ولٰکن رسول اﷲ و خاتم النبین ‘‘(5)

        ترجمہ:  محمد تمہارے مردوں میں کسی کے باپ نہیں، ہاں !اﷲ کے رسول ہیں سب نبیوں میں پچھلے (آخری)۔

        نعتیہ کلام میں نوریؔ بریلوی نے اس مضمون کو اس شعر میں یوں پیش کیا ہے    ؎

کب ستارہ کوئی چمکا سامنے خورشید کے

ہو نبی کیسے نیا مہرِ عجم ماہِ عرب

        حضور سرور کائنات صلی اللہ علیہ و سلم دنیا میں تمام انبیا کے بعد خاتم الانبیا بن کر آئے لیکن اصل تخلیق کے اعتبار سے آپ تمام انبیا و رسل سے اول و مقدم ہیں۔  حدیثِ رسول صلی اللہ علیہ و سلم کہ ’’ میں اس وقت بھی نبی تھا جب آدم روح و جسد کی منزل میں تھے۔  ‘‘۔۔ اور ۔۔ ’’ میں اس وقت بھی نبی تھا جب آدم آب و گِل کی منزل میں تھے۔ ‘‘ اسمفہوم کی ادائیگی حضرت نوریؔ بریلوی نے بڑے اچھوتے انداز میں اور علمِ صرف و نحو کے  استعمال سے کیا ہے،  نشانِ خاطر ہو شہ پارہ      ؎

نہ ہوتے تم نہ ہوتے وہ کہ اصلِ جملہ تم ہی ہو

خبر تھے وہ تمہاری میرے مولا مبتدا تم

تمہیں باطن تمہیں ظاہر تمہیں اول تمہیں آخر

نہاں بھی ہو عیاں بھی مبتدا و منتہا تم ہو

مظہرِ ذاتِ لم یزل

علمائے معرفت و طریقت کا اس امر پر اجماع ہے کہ رسولِ کونین علیہ افضل الصلاۃ والتسلیم کی ذاتِ والا شان، رب العالمین کی ذاتِ واحد کی جملہ صفاتِ عالیہ کی مظہرِ کامل و اکمل ہے۔ اس مظہریتِ  عظمیٰ کا بیان صنائع معنوی و لفظی کا لحاظ رکھتے ہوئے حضرت نوریؔ بریلوی نے کلام میں کیا ہے،  مثالیں خاطر نشین ہوں    ؎

خدا ہے تو نہ خدا سے جدا ہے اے مولا

ترے ظہور سے رب کا ظہور آنکھوں میں

۔ ۔ ۔ ۔ ۔ ۔ ۔ ۔ ۔ ۔ ۔

ہیں صفاتِ حق کے نوری آئینے سارے نبی

ذاتِ حق کا آئینہ مہرِ عجم ماہِ عرب

۔ ۔ ۔ ۔ ۔ ۔ ۔ ۔ ۔ ۔ ۔

خدا نے ذات کا اپنی تمہیں مظہر بنایا ہے

جو حق کو دیکھنا چاہیں تو اس کے آئینہ تم ہو

علمِ سرکار

مصطفیٰ جانِ رحمت صلی اللہ علیہ و سلم کے لیے علمِ غیب کا ثبوت ایک اہم علمی مسئلہ ہے۔ اﷲ کا علم ذاتی ہے جب کہ حضور صلی اللہ علیہ و سلم کا علم عطائی، خامۂ گل رنگِ نوریؔ اپنے عقیدے کی تشریح و توضیح کرتے ہوئے نعتیہ کلام میں اس مسئلے کو استدلالی انداز میں یوں زیبِ قرطاس کرتا ہے       ؎

خدا نے غیب تمہارے لیے حضور کیا

جو راز دل میں چھپے ہوں تمہیں خبر ہو جائے

۔ ۔ ۔ ۔ ۔ ۔ ۔ ۔ ۔ ۔ ۔

مسلط کر دیا تم کو خدا نے اپنے غیبوں پر

نبیِ مجتبیٰ تم ہو،  رسولِ مرتضیٰ تم ہو

۔ ۔ ۔ ۔ ۔ ۔ ۔ ۔ ۔ ۔ ۔

عیب سے تم کو پاک کیا ہے غیب کا تم کو علم دیا ہے

اور خود حق بھی تم سے چھپا کیا صلی اللہ علیک و سلم

وصفِ جمال

محبوب کے حسن و جمال کی تعریف و توصیف،  اس کے رخِ زیبا اور جبینِ تاباں کی ستایش اور ان کی سحر اور شمس و قمر سے تشبیہہ غزلیہ شاعری کا خاصہ رہا ہے۔  لیکن جب عاشقِ رسول صلی اللہ علیہ و سلم اپنے آقا کے حُسن و جمال،  سراپائے اقدس،  رخِ زیبا،  قامتِ رعنا،  جمالِ جہاں آرا اور جبینِ تاباں کی مدح و ثناسے اپنے عشق و محبت کی بزم آراستہ کرتا  ہے تو کس کس انداز سے نواسنج و نغمہ سرا ہوتا ہے اور شمس و قمر کی تابانی و درخشانی کو اپنے آقا کے مقابل کس طرح پیش کرتا ہے۔ اس کا خوب صورت اورحسین و جمیل نظارا آئیے کلامِ نوریؔ میں نشانِ خاطر فرمائیں،  نت نئی ترکیباتِ لفظی متاثر کن ہے جو اپنے اندر جہانِ معانی اور محبت کا دل کش اندازسموئے ہوئے ہے   ؎

تمہارا حسن ایسا ہے کہ محبوبِ خدا تم ہو

مہ کامل کرے کسبِ ضیا وہ مہ لقا تم ہو

۔ ۔ ۔ ۔ ۔ ۔ ۔ ۔ ۔ ۔ ۔

وصف کیا لکھے کوئی اس مہبطِ انوار کا

مہر و مہ میں جلوہ ہے جس چاند سے رخسار کا

فق ہو چہرہ مہر و مہ کا ایسے منہ کے سامنے

جس کو قسمت سے ملے بوسہ تری پیزار کا

تیرے باغِ حسن کی رونق کا کیا عالم کہوں

آفتاب اک زرد پتہ ہے ترے گلزار کا

جلوہ گاہِ خاص کا عالم بتائے کیا کوئی

مہر عالم تاب ہے ذرہ حریم یار کا

زرد رُو کیوں ہو گیا خورشیدِ تاباں سچ بتا

دیکھ پایا جلوہ کیا اس مطلعِ انوار کا

یہ مہ و خور یہ ستارے چرخ کے فانوس میں

شمعِ روشن میں ہے جلوہ آپ کے رخسار کا

۔ ۔ ۔ ۔ ۔ ۔ ۔ ۔ ۔ ۔ ۔

صورتِ پاک وہ بے مثل ہے پائی تم نے

جس کی ثانی نہ عرب اور عجم کی صورت

        اس کے علاوہ والشمس وضحٰہا اور والضحیٰ واللیل اذا سجیٰ کی تفسیر عاشق رسول حضرت نوریؔ بریلوی کے اشعار میں ملاحظہ کیجیے   ؎

زلف والا کی صفت واللیل ہے قرآن میں

اور رخ کی والضحیٰ مہرِ عجم ماہِ عرب

۔ ۔ ۔ ۔ ۔ ۔ ۔ ۔ ۔ ۔ ۔

نہار چہرۂ والا تو گیسو ہیں واللیل

بہم ہوئے ہیں یہ لیل و نہار آنکھوں میں

آستانۂ بلند

محبوب کے دیار اور درو دیوار اور اس کے دربارو گلی کوچے کی شان و شوکت،  عظمت و رفعت،  قدر و منزلت اور اس کا وقارو عزت ایک عاشقِ صادق کی نظر میں کس قدر ہوتا ہے۔ خاطر نشین کیجیے کلامِ نوریؔ بریلوی سے محبت آمیز چند شہ پارے      ؎

بادشاہانِ جہاں ہوتے ہیں منگتا اس کے

آپ کے کوچے کا شاہا جو گدا ہوتا ہے

۔ ۔ ۔ ۔ ۔ ۔ ۔ ۔ ۔ ۔ ۔

ضیا بخشی تری سرکار کی عالم پہ روشن ہے

مہ و خورشید صدقہ پاتے ہیں پیارے ترے در کا

۔ ۔ ۔ ۔ ۔ ۔ ۔ ۔ ۔ ۔ ۔

رشکِ سلطان ہیں وہ گدا جس نے

تیرے کوچے میں دھونی رمائی ہے

        کوچۂ محبوب کے پاس و لحاظ اور اس کے ادب و احترام کواس انداز میں بیان کرنا حضرت نوریؔ بریلوی جیسے عاشقِ صادق کا کمال ہے       ؎

پاؤں تھک جاتے اگر پاؤں بناتا سر کو

سر کے بل جاتا مگر ضعف نے جانے نہ دیا

۔ ۔ ۔ ۔ ۔ ۔ ۔ ۔ ۔ ۔ ۔

آبلے پاؤں میں پڑ جائیں جو چلتے چلتے

راہِ طیبہ میں چلوں سر سے قدم کی صورت

خارِ دیارِ محبوب

یہ حقیقت ہے کہ ایک عاشقِ صادق کی نظر میں دیارِ محبوب کے خار گلہائے باغِ عالم ہی نہیں بل کہ گلہائے جنت سے بھی زیادہ دل کش،  دل فریب،  روح پرور،  فرحت افزا،  خوش نما اور تسکین بخش ہوتے ہیں حضرت نوریؔ بریلوی فرماتے ہیں       ؎

نہ کیسے یہ گل و غنچہ ہوں خوار آنکھوں میں

بسے ہوئے ہیں مدینے کے خار آنکھوں میں

نظر میں کیسے سمائیں گے پھول جنت کے

کہ بس چکے ہیں مدینے کے خار آنکھوں میں

دست گیری

پناہِ عاصیاں،  ہم دردِ بے کساں،  شافعِ روزِ جزا،  سرورِ کونین صلی اﷲ تعالیٰ علیہ و سلم کی بارگاہِ عالی وقار میں اپنے رنج والم اور بارِ عصیاں کی درد بھری داستان پیش کرتے ہوئے غم گسار و غم خوارِ  امت سے حمایت و دستگیری کی طلب کا اندازِ عاشقانہ خاطر نشین ہو     ؎

دبا جاتا پجا جاتا ہوں میں آقا دہائی ہے

یہ بھاری بوجھ عصیاں کا مرے سر سے ذرا سرکا

۔ ۔ ۔ ۔ ۔ ۔ ۔ ۔ ۔ ۔ ۔

دور ساحل موج حائل پار بیڑا کیجیے

ناؤ ہے منجدھار میں اور ناخدا ملتا نہیں

مسیحائی

جانِ عالم و عالمیان صلی اللہ علیہ و سلم باعثِ ایجادِ عالم ہیں۔  کائنات کی جملہ اشیا آپ ہی کی وجہ سے تخلیق کی گئیں۔  بل کہ آپ ہی کے ہونے سے ہر کسی کو ربِ کائنات کا عرفان حاصل ہوا۔  دیگر انبیائے کرام کو جو مقام و منصب ملا ہے وہ بھی مصطفی جانِ رحمت صلی اللہ علیہ و سلم کا صدقہ ہے۔  حضرت عیسیٰ علیہ السلام کی معجزانہ مسیحائی سے تقابل کرتے ہوئے رحمتِ عالم صلی اللہ علیہ و سلم کی مسیحائی کو حضرت نوریؔ بریلوی ندرتِ بیان کے ساتھ پیش کرتے ہوئے بارگاہِ بے کس پناہ میں عرض گزار ہیں، تقابل کا یہ انداز دیگر شعرا کے یہاں نہیں ملتا احترام و عقیدت کا پاس و لحاظ قابلِ دید ہے     ؎

شہرہ لبِ عیسیٰ کا جس بات میں ہے مولا

تم جانِ مسیحا ہو ٹھوکر سے ادا کرنا

۔ ۔ ۔ ۔ ۔ ۔ ۔ ۔ ۔ ۔ ۔

مسیحِ پاک نے اجسامِ مردہ زندہ کئے

یہ جانِ جاں دل و جاں کو جِلانے آئے ہیں

اُمیدِ شفاعت

احادیثِ کثیرہ سے یہ ثابت ہے کہ سیدِ عالم صلی اللہ علیہ و سلم اپنے گنہ گار امتیوں کی شفاعت فرمائیں گے،  یہی نہیں بل کہ حافظِ قرآن بھی شفاعت کے مرتبے کو پائیں گے۔  ایک طبقہ اس امر کا بھی منکر ہے۔  جب کہ حقیقت یہی ہے کہ نبیِ کونین صلی اللہ علیہ و سلم کو رب العالمین جل شانہ نے تاجِ شفاعتِ کبریٰ سے نوازا ہے۔ 

        نوریؔ بریلوی جیسے خوش عقیدہ شاعر اپنے انتہائے جرم و خطا،  اس پر ندامت و شرمندگی اور شفیعِ روزِ جزا دستگیرِ عاصیاں صلی اللہ علیہ و سلم کے انتہائے عفو و کرم اور آپ کی دستگیری و شفاعت پر بھروسہ اور امید کا اظہار کرتے ہوئے شافع یوم النشور صلی اللہ علیہ و سلم کے اس خاصہ کو یوں پیش کرتے ہیں     ؎

دھجیاں ہو جائے دامن فردِ عصیاں کا مری

ہاتھ آ جائے جو گوشہ دامنِ دل دار کا

۔ ۔ ۔ ۔ ۔ ۔ ۔ ۔ ۔ ۔ ۔

عجب کرم ہیں کہ خود مجرموں کے حامی ہیں

گنہ گاروں کی بخشش کرانے آئے ہیں

۔ ۔ ۔ ۔ ۔ ۔ ۔ ۔ ۔ ۔ ۔

کیوں مجھے خوف ہو محشر کا کہ ہاتھوں میں مرے

دامنِ حامیِ خود ماحیِ عصیاں ہو گا

پلہ عصیاں کا گراں ہو بھی تو کیا خوف مجھے

میرے پلے پہ تو وہ رحمتِ رحماں ہو گا

۔ ۔ ۔ ۔ ۔ ۔ ۔ ۔ ۔ ۔ ۔

گنہ کتنے ہی اور کیسے ہی ہیں پر رحمتِ عالم

شفاعت آپ فرمائیں تو بیڑا پار ہو جائے

عطر بیزی

احادیثِ طیبہ اس بات پر بھی دال ہے کہ سرکار دو عالم صلی اللہ و سلم جس گلی،  کوچے یا راہ سے گزر تے تو آپ کے جسمِ  اطہر اور زلفِ  مشک بار کی خو شبو سے گلی کوچے معطر و معنبر ہو جاتے تھے۔  اسی مشک باری اور عطر بیزی کا ذکر کرتے ہوئے حضرت نوریؔ بریلوی وجد آفریں انداز میں فرماتے ہیں    ؎

جس گلی سے تو گذرتا ہے مرے جانِ جناں

ذرّہ ذرّہ تری خوشبو سے بسا ہوتا ہے

۔ ۔ ۔ ۔ ۔ ۔ ۔ ۔ ۔ ۔ ۔

جگمگا ڈالیں گلیاں جدھر آئے وہ

جب چلے وہ تو کوچے بسا کر چلے

۔ ۔ ۔ ۔ ۔ ۔ ۔ ۔ ۔ ۔ ۔

خوشبوئے زلف سے کوچے مہکے ہیں

کیسے پھولوں میں شہا بسائی ہے

پیارے خوشبو تمہارے پسینے کی

خلد کے پھولوں سے بھی سوائی ہے

بات وہ عطرِ فردس میں بھی نہیں

تیرے ملبوس نے جو سنگھائی ہے

فصاحت و بلاغت

افصح الفصحاء،  نبیِ امی صلی اللہ علیہ و سلم نے کسی کے آگے زانوئے ادب تہِ نہیں فرمایا نہ کسی سے پڑھنا،  لکھنا سیکھا۔  لیکن یہ ایک عظیم معجزہ ہے کہ آپ کی زبانِ بلاغت نظام سے فصاحت و بلاغت کے ایسے ایسے چشمے ابلے جن کے سامنے عرب کے فصحا و بلغا کی فصاحتیں اور بلاغتیں دم بہ خود رہ گئیں۔  اور ان کی بلاغتوں کا تا جِ تفوق و برتری سرنگوں ہو کر رہ گیا۔ ان کی ساری خوش فہمیاں خس و خاشاک کی طرح بہہ گئیں اور ان کی زبانیں گنگ ہوتی دکھائی دیں۔ اس کی منظر کشی حضرت نوریؔ بریلوی نے یوں کی ہے   ؎

جن کے دعوے تھے ہم ہی ہیں اہلِ زباں

سن کے قرآں زبانیں دبا کر چلے

        جس طرح شعرا اور ان کی شاعری کے درمیان اختلاف پایا جاتا ہے اسی طرح شعرا کے مقصدِ شاعری میں بھی واضح اختلاف پا یا جا تا ہے۔ عموماً ایسے شعرا کی کثرت ہے جن کی شاعری برائے شاعری ہے لیکن حضرت نوریؔ بریلوی کی شاعری کا واحد مقصد رسول اﷲ صلی اللہ علیہ و سلم کے جملہ خصائصِ جمیل کے جلوۂ جہاں آرا کو نمایاں کرنا تھا۔ جسے ہم بہ الفاظِ دیگر یہ کہہ سکتے ہیں کہ حضرت نوریؔ بریلوی کی شاعری، شاعری برائے شاعری نہیں بلکہ برائے عبادت تھی۔  لہٰذا اس کی وضاحت آپ کے کلام میں یوں ہے    ؎

ثنا منظور ہے ان کی نہیں یہ مدعا نوریؔ

سخن سنج و سخن ور ہو سخن کے نکتہ داں تم ہو

حواشی

(1)نقی علی خاں بریلوی، مولانا:سرورالقلوب، فاروقیہ بک ڈپو، دہلی،  ص55

(2)نقی علی خاں بریلوی، مولانا:سرورالقلوب،  فاروقیہ بک ڈپو، دہلی،  ص55

(3) ارشدالقادری، علامہ:  جسمِ بے سایہ، مکتبۂ جامِ نور،  دہلی، 1985ء، ص 7، بحوالہ المواہب ص30